ЁФКС, КОНА УЛЬСЬ
„Мес тячи, атяй,
Тон аф весялат?
Ёфкс аф азондат,
Морот аф морат?
Мес тячи атяй
Улоця нолдаф?
Кода акша лов
Шамаця олаф?
Али од пинкця,
Тонь мялезот ляць,
Али седицень
Токазя иляць?”
Тяфта кизефнихть
Кузь — атянь эса,
Эсь уноконза —
[ 65 ]
Ёмбла иденза;
Конатненди сон
Лама корхнекшнесь,
Ёфкскат, моронят.
Азонкшнезя сон,
Кода мокшетня
Эрясть инголя —
Сиря пингоня.
Кода моданкса,
Баярхнень каршес
Мокша — эрьзятня
Тюренчнесть марса.
Мокшетнень колга
Кармай корхтама,
Трнай вайгялец
Нльня аварьди.
Ялгай, аварьдят, —
Кда мокшетнень
Эряфснон колга
Содама кармат.
„Эх, иднят, иднят,
Ёмбла лефкскянят, —
Корхтай Кузь-атя, —
Мес вексь нюрьхкяня.
[ 66 ]
Аф весялан сяс:
Векозя ётни,
Иднят-седизя
Работамда, лоткси.
Эх, лама нужат,
Иднят няендень,
Лама векозон
Лов-ведь кялендень.
Комсь кизоняста,
Кодкемонь кизос
Покань козянди,
Козя алянди.
Цебярь цёралень...
Эрямя ашса,
Ламоксть утцекшнень
Шава паксяса.
Аф эсь мяль вельдя
Оцта урьвяень.
Кода корхнекшнихть,
Иднят, — урмаень.
Кармасть шачема
Монцень иденя...
Курок ашу шись
Нужас кильденьзя.
[ 67 ]
Эсь лацон яксесть
Плотонь панема,
Коста сивочнесть
Стадань ванома.
Кулеви — кайги,
Мушконь локшосна
Оцю вирь ваксса,
Кели паксяса
Токави седись,
Аварьдемась сай,
А козясь пинекс
Рахси ха,-ха, хай!
Стака эряфста
Степка Сибирьга,
Срацть явонцть эздон
Оцю иденя.
Эстонь пингоня
Афи няйиня...
Стакаста, иднят,
Эряфть кялиня,
Ёмблать кельгиня...
Кувать мархтон ульсь,
Кода брадонза
Нужать каршес тюрьсь.
[ 68 ]
Марса шавомя,
Коза саты вийсь,
Станя кирдемя
Ёряф-пара ши.
Ламоксть прашонць лов
И пизепт пизесть,
Наротти учевсь
14-ця кизось”, —
Коневсть атенять
Сиря сельмонза,
Путердезь шудесть
Сельмя веденза.
Авардезь иттня
Эсонза кардайхть
Ожа пеняса
Сельмя ветть нардайхть.
„Лемботольхть эста
Тундань иляттня,
Ляйхненди шудесть
Мутна ведьнятня.
Лопаясь вирьнясь
Пижя лопаса,
Кармасть якама,
Велень сокайхня, —
[ 69 ]
Сёра видихня,
Кели лафтусост
Стакань кандыхня.
Моньгя цёразя
Кармась сокама,
Тундань шиса эжтьф
Модань токама.
Молян мельганза;
Касы мялезя:
Кода сокаса
Сокай цёразя.
„Ну тятдень кизоть
Дацязень панцан,
Монць старастати
Аф пелезь канцан.”
Тяфта арьсекшнень
Пижя паксяса,
Монць пижя розьнять
Кяцон капштаса.
А пижя розьнясь
Волнат кеподи,
Кода морянясь
Вишкя вармати.
Эх, увнась рознясь,
[ 70 ]
Морсесь нармоннясь,
Паксять уфсезя
Сетьмя варманясь.
Вай, лама эста
Цебярь дупт думсень,
Лама сёрода
Сёксети учсень.
Исть ёта эряфс
Мезя ульсь думандаф.......
Вов сяс
Шамазя монь олаф.
Аф од пингозя
Монь мялезон ляць,
Сон кунаркига ни
Эздон кяшезь кяшсь,
Сюдуф кизотнень,
Иднят, шачемя,
Сянкса цебярьда
Кржа няемя.
Ланксонок арнекшнесть
Оцю азорхня,
Симонцть вердонок
Козя баярхня.
Вов сят кизотнень,
[ 71 ]
Мзярда думсекшнень,
Шавозь идезень,
Лядыкс цёразень...
Аф маниль шинясь, —
Корхтай Кузь-атя,
Шудезня — шудесть
Вельхкска дуцятня,
Стерьнек — аванек.
Сокай алянек
Сембя паксясольхть,
Паксянь тев ланксольхть.
Ляденцть велети
Сиря атятня,
Сиря бабатня,
Ёмбла шабатня.*)[1]
Эрязда нароць
Паксяса покоць,
Тюжя розьнятнень
Товнясна почкоцть.
Ванан ош ширьдя
Арды алаша,
Ланксонза ломантть
[ 72 ]
Пиндолць палашоц.
Лафту ланксонза,
Ульсть пагононза,
Кедень кескавса
Ульсть кагодонза.
Кармасть церькавста
Пайкнень шавома,
Тяфта эряскаць
Кулянь азома.
Фкя ломань лаца
Пряснон кеподезь
Паксяса нуйхня,
Модань сокайхня.
Ваныхть велети
Мезьгя аф няеви,
Мезенькса пайгонь
Вайгяль маряви?
Мярьголеть пажар
Велеть фатязя, —
Качамонц нароць
Афи няезя.
Сембонь сельмоста
Кяшевсь вельхксста шись,
Ласьки ломаньда
[ 73 ]
Пяшкоць паксянь кись.
Ласькихть алятьня,
Ласькихть аватня,
Сяда пяк ласькихть
Стерхня, цёратня.
Пуромсть велети
Пайгонь шавить ваксс,
Кона кяждонза
Кулятьс дамс макссь.
„Ой! Война! Война!” —
Кулезь пиленя,
Сельмя ведьняса
Пяшкоцть сельмоня.
Вай сяка шитнень,
Сяка недлятнень,
Кармасть панема
Войнав алятнень.
Кармасть шамома
Ошня, велетня,
Явсть сокай вийда
Кели паксятня.
Монгя, идненя,
Колазь седизень,
Веры войнати
[ 74 ]
Панезь идезень.
Верьгя вайгяльса
Пешкоцть аватня,
Кармасть кулсема
Ризфти бабатня.
Колма кизот мольсь
Тя оцю вайнась,
Верса валондовсь
Сокаень модась.
Лоткасть касомда
Паксяв сёротня,
Видиснон ильхнезь
Равжа порухня.
Кармасть лядома
Ошня кшефтема,
Кармасть ащема
Завоттня тевфтома.
Оцю азорть ланкс
Венептезь кяцнон.
Кармасть зрнама
Модать краенза,
Кармасть шерьхкома
Уськса стаенза.
Эста лиссть ланкти
[ 75 ]
Сембя трудяйхня,
Пряснон ланкс пяярсть
Веры баярхня.
Трудяйхня тюрезь
Войнать лоткафтозь,
Кафта пря орёлть
Прянзон комафтозь.
Коммунисттня мярьксть:
„Минць азорхтама,
Лиякс эряма
Минь карматама.
Модать — сокайти,
Заводть — покайти,
Властть советтненди —
Трудендайхненди.”
. . . . . . . . . . . .
Кода нармотня,
Тундань шинятнень,
Лийихть ширезнок,
Вири, паксязнок.
Станя салдаттня,
Аяркс вайнаста,
Эряскацть куду,
Ломань бойняста.
[ 76 ]
Кажнайть мялецоль
Куца покодемс,
Эсь ломань мархта
Корхтамс топодемс.
Фкя ков потмоста
Пяшкоць веленкя
Алянь вийняса,
Салдат лемняса.
Кармасть корхнема,
Кода явомат
Нелькфт паршитня, —
Козянь паксятня.
Эрь шиня пуромкст
Синь пуропнесть,
Модань тевть колга
Спорязь корхнекшнесть.
Лятьфтаса, пшькяць
Велень козянеконь:
— Осал, атенят.........
Цёлак волянття.........
Содамс эряви
Вельхксса шкай ули,
Сембонь атянят
Грехонькя улихть.
[ 77 ]
Аф пара тяфта:
Козятнень обижамс,
Ицнон анцема,
Ёрасасть нолдамс.
Эрямс эряви,
Кода атянькя,
Топоцта улихть
Сембонь пеконькя.
Сиря валмуворкссь
Вов мезя корхтай:
Эста трудяйхня
Нолдазь вайгяльснон,
„Осалонь арьсись —
Сонць осалс токай”
Эста Семанясь
Комоць кяждонза,
Козять мяштенцты
Кундасть кяденза.
Лоткак, инекуй,
Пантк кели куркцень!
Саты нолякшнить
Пинень вайгяльцень!
Кода атяньття —
Эрямс ёратад,
[ 78 ]
А тейнек эряф
Тинь аф нолятад.
Сявсаськ моданттень,
Явсаськ паршиньтень,
Нельксаськ эрьхконттень —
Калу веденттень.
„Видеця, Сема!” —
Ювацть ашуфня,
Ётась кизотнень
Стакань кандыйхня.
Тяфта велеса
Срафнезь козятнень, —
Инь азоронь пинкть —
Веронь потяхнень.
. . . . . . . . . .
Вай лиякс шинясь
Эждема кармась,
Лия кожфкаса
Уфазевсь вармась.
Вельхксста яфодевсть
Равжа дуцятня,
Мазелгоцть иднят,
Велень ульцятня.
Аньцек монь сюдоф,
[ 79 ]
Шава седизя,
Войнаста изь са
Ляды идезя.
Кевитие киза
Тятдя топоць ни,
Вай иньазоронь
Веры войнати.
Вов тянкса тячи
Мон думазевонь,
Сиря седиса,
Ух ризназевонь.
А тяни иднят.
Дайте маттама,
Ёфксозень эзда
Вандыс яфтама.
Ётка пингя сай
Пенц шумордаса,
Вай, лия эряфть
Моразь мораса.
- ↑ *) Шабатня — Идьнятьня.
|
|
