Того́же ст҃а́гѡ и҆ прпⷣбнагѡ ѻ҆ц҃а̀ на́шегѡ є҆фре́ма,
наказа́нїе ѡ҆ рꙋкодѣ́лїи.
слоⷡ҇
ѕ҃
По рꙋчнѣ́мъ дѣ́лѣ не пренемога́й. мно́жицею бо вложи́ттисѧ по́мыслъ гл҃ѧ: ꙗ҆́кѡ николи́же и҆́мамъ навы́кнꙋти сегѡ̀ рꙋчна́гѡ дѣ́ла, бо́ленъ бо є҆сѝ и҆ не́мощенъ, и҆ то́щнагѡ дѣ́ла сегѡ̀ не мо́жеши терпѣ́ти до конца̀, се́ бо тѧ̀ нача́ша ᲂу҆́дове болѣ́ти ѿ трꙋда̀, не бо̀ навы́клъ є҆сѝ тѧжа́ти. но преше́дъ и҆дѝ ѿню́дꙋже є҆сѝ прише́лъ, и҆́бо речѐ: а҆́ще хо́щеши боѧ́тисѧ бг҃а, и҆ та́кѡ спасе́шисѧ. ты́ же ꙗ҆́кѡ вѣ́ренъ не ᲂу҆клони́сѧ та́цѣми по́мыслы, но терпѝ бг҃а ра́ди, призыва́ющаго тѧ̀ въ своѐ црⷭ҇тво. то́й бо речѐ:
маⷴ҇
заⷱ҇ ѻ҃в
лꙋⷦ҇
заⷱ҇ п҃д а҆́ще и҆́мате вѣ́рꙋ, ꙗ҆́кѡ зе́рно горꙋ́шно. рече́те горѣ̀ се́й: прейдѝ ѿсю́дꙋ, и҆ пре́йдетъ, и҆ ничто́же невоⷥмо́жнѡ є҆́сть ва́мъ. и҆ мы̀ ᲂу҆́бѡ, воⷥлю́бленнїи, да терпи́мъ, не бо̀ на чл҃ка ᲂу҆пова́хомъ, и҆́же не воⷥмо́жетъ спастѝ, на на бг҃а спаса́ющаго ᲂу҆пова́ющыѧ на́нь.
ѱаⷧ҇ рк҃д надѣ́ющїйбосѧ на гдⷭ҇а, ꙗ҆́кѡ гора̀ сїѡ́нъ не подви́житсѧ. и҆ па́ки: бл҃жи́тъ дх҃ъ ст҃ы́й ᲂу҆пова́ющыѧ на гдⷭ҇а.
ѱаⷧ҇ п҃г гдⷭ҇и бж҃е си́лъ, бл҃же́нъ чл҃къ ᲂу҆пова́ѧй на тѧ̀. терпѝ ᲂу҆́бѡ, воⷥлю́бленне, гдⷭ҇а ра́ди. а҆́ще ᲂу҆́бѡ кни́гамъ, и҆́мже ᲂу҆чи́лсѧ є҆сѝ, и҆ претерпѣ́лъ є҆сѝ трꙋда̀ толи́ка. а҆́ще же хꙋдо́жествꙋ ми́ра сегѡ̀, претерпѣ́лъ є҆сѝ трꙋда̀ толи́ка. па́че ᲂу҆́бѡ до́лжни є҆смы̀ ны́нѣ претерпѣ́ти гдⷭ҇а ра́ди всѧ̑. пи́шетъ бо:
ѱаⷧ҇ рк҃з плоды̀ трꙋдѡ́въ свои́хъ снѣ́си. бл҃же́нъ є҆сѝ и҆ добро̀ тебѣ̀ бꙋ́детъ. и҆ а҆пⷭ҇лъ заповѣ́даетъ гл҃ѧ:
є҆феⷭ҇
заⷱ҇ ск҃з свои́ма рꙋка́ма дѣ́лайте бл҃го́е, ꙗ҆́кѡ да не тѣ́мъ є҆ди́нѣмъ то́кмѡ дѣ́лающе ꙗ҆́сти, но и҆ тре́бꙋющимъ даѧ́ти ѿ свои́хъ трꙋдѡ́въ. то́щнѡ ᲂу҆́бѡ да бꙋ́детъ всѣ̑мъ на́мъ, є҆́же и҆зба́витисѧ ѿ грѣхѡ́въ на́шихъ. а҆́ще бо мы̀ хо́щемъ, и҆зба́вимсѧ. са́мъ бо гдⷭ҇ь речѐ:
маⷴ҇
заⷱ҇ к҃ проси́те и҆ да́стсѧ ва́мъ. всѧ́къ бо просѧ́й прїе́млетъ и҆ и҆ща́й ѡ҆брѣта́етъ, и҆ толкꙋ́щемꙋ ѿве́рзетсѧ. томꙋ̀ сла́ва во вѣ́ки вѣкѡ́мъ, а҆ми́нь.
This is a translation and has a separate copyright status from the original text. The license for the translation applies to this edition only.
