Сло́во, ѡ҆ вели́цѣмъ васі́лїи, и҆ ѡ҆ препⷣбнѣмъ є҆фре́мѣ.
Бра́тїе, по́вѣсть хощꙋ̀ сотвори́ти ѡ҆ вели́цѣмъ васі́лїи, и҆ ѡ҆ бл҃же́ннѣмъ є҆фре́мѣ сѵ́рїнѣ. ꙗ҆́же ᲂу҆бѡ ѡ҆ ѻ҆ц҃ѐ на́шемъ васі́лїи, то са́ми ви́девше, а҆ ꙗ҆́же ѡ҆ ди́внѣмъ є҆фре́мѣ, ѿ нело́жныхъ ᲂу҆́стъ є҆гѡ̀ слы́шавше. є҆́сть же си́це. є҆фре́мъ прⷭ҇нопа́мѧтный, сы́й въ пꙋсты́ни, ѻ҆́ва ᲂу҆́бѡ ѡ҆сїѧ́нїемъ ст҃а́гѡ дх҃а зрѧ̀, ѻ҆́ва же ѿ вопроше́нїѧ и҆ жела́нїѧ, навы́кнꙋѧ чꙋ̑днаѧ дѣ̑ла прпⷣбнагѡ ѻ҆ц҃а̀ на́шегѡ васі́лїа, прилѣ́жнѡ молѧ́ше бг҃а ѿкры́ти є҆мꙋ̀, како́въ є҆́сть вели́кїй васі́лїй. и҆ во и҆зстꙋпле́нїи бы́въ, зри́тъ сто́лпъ ѻ҆́гненный, є҆мꙋ́же глава̀ досѧжа́ше до нб҃съ. и҆ гла́съ свыше гл҃ющь: є҆фре́ме, є҆фре́ме, и҆́мже ѻ҆́бразомъ зри́ши сто́лпъ ѻ҆́гненный, є҆мꙋ́же глава̀ досѧжа́ше до нб҃се, тако́въ є҆́сть вели́кїй васі́лїй. и҆ а҆́бїе пои́мъ то́лка, занѐ неꙋмѣ́ѧше гре́ческимъ ѧ҆зы́комъ бесѣ́довати, прихо́дитъ въ вели́кꙋю цр҃ковь великоиме́нныѧ кесарі́и, дости́гъ въ са́мый пра́здникъ ст҃ы́хъ бг҃оѧвле́нїй, и҆ вше́дъ та́й, ᲂу҆зрѣ̀ грѧдꙋ́ща въ цр҃ковь вели́каго васі́лїа, и҆ глаго́ла послѣ́дꙋющемꙋ є҆мꙋ̀: непщꙋ́ю ꙗ҆́кѡ вотщѐ трꙋди́хомсѧ бра́те, се́й бо въ таковѣ́мъ чинꙋ̀ сы́й, и҆ че́сти человѣ́честѣй, и҆ вѣ́сть ꙗ҆́коже ви́дѣлъ є҆́смь. ви́дѣ бо є҆го̀ ѡ҆блече́на во ѻ҆де́ждꙋ бѣлꙋ̀, и҆ и҆́же ѡ҆ не́мъ чⷭ҇тна́гѡ при́чта бѣлоносѧ́щихъ, и҆ ѡ҆бстоѧ́щихъ є҆го̀. и҆ ста̀ въ мѣ́стѣ сокрове́нѣ въ цр҃кви, ѿча́ѧсѧ ве́щи, гл҃ѧ си́це: мы̀ поне́сше тѧготꙋ̀ дневнꙋ́ю и҆ ва́ръ, и҆ ничто́же ᲂу҆спѣ́хомъ, а҆ се́й въ таковѣ́мъ сы́й дароноше́нїи, и҆ че́сти человѣ́честѣй сто́лпъ ѻ҆́гненъ є҆́сть, чꙋждꙋ́сѧ. сїѧ̑ ᲂу҆́бѡ є҆мꙋ̀ помышлѧ́ющꙋ, посыла́етъ къ немꙋ̀ ст҃ы́й а҆рхидїа́кона своего̀ ре́къ: и҆дѝ на за̑паднаѧ врата̀ цр҃кве, и҆ во ᲂу҆́глѣ цр҃ко́внѣмъ ѡ҆брѧ́щеши мни́ха носѧ́ща кꙋ́коль, со и҆нѣ́мъ є҆ди́нѣмъ, скꙋ́да брадо́ю и҆ ма́ла во́зрастомъ, и҆ про́чаѧ лица̀ сказа́въ, и҆ рцы̀ є҆мꙋ̀, прїидѝ и҆ вни́ди во ст҃и́лище, зове́тъ тѧ а҆рхїепⷭ҇копъ. а҆рхидїа́конъ же со мно́гимъ трꙋдо́мъ раⷥрѣ́ѧвъ лю́ди, до́йде и҆дѣ́же стоѧ́ше прпⷣбный є҆фре́мъ, и҆ гл҃а: гдⷭ҇и блгⷭ҇вѝ, пойдѝ, и҆ вни́ди во ст҃и́лище, зове́тъ тѧ а҆рхїепⷭ҇копъ. и҆ ᲂу҆вѣ́давъ то́лкомъ гл҃емое, и҆ ѿвѣща̀ є҆мꙋ̀ гл҃ѧ: прельсти́лсѧ є҆сѝ, бра́те, мы́ бо стра́нни є҆смы̀ человѣ́цы, и҆ невѣ́доми є҆смы̀ є҆мꙋ̀. и҆ ше́дъ а҆рхидїа́конъ повѣ́да є҆мꙋ̀ сїѧ̑. вели́комꙋ же васі́лїю прочи́тающꙋ сщ҃е́нныѧ кни́ги лю́демъ. и҆ ви́дѣ прпⷣбный є҆фре́мъ ѧ҆зы́къ ѻ҆́гненъ гл҃ющь ᲂу҆сты̀ є҆гѡ̀. и҆ гл҃а а҆рхидїа́конꙋ васі́лїй: и҆дѝ и҆ рцы̀ є҆мꙋ̀: гдⷭ҇и є҆фре́ме, прїидѝ, и҆ вни́ди во ст҃ы́й ѻ҆лта́рь, зове́тъ тѧ а҆рхїепⷭ҇копъ. ше́дъ же а҆рхидїа́конъ лобза̀ плеснѣ̀ є҆гѡ̀ и҆ речѐ: гдⷭ҇и є҆фре́ме, зове́тъ тѧ а҆рхїепⷭ҇копъ, да вни́деши ко ст҃о́мꙋ ѻ҆лтарю̀. ᲂу҆ди́вльшесѧ ѡ҆ се́мъ прпⷣбный є҆фре́мъ просла́ви бг҃а. сотвори́въ же мета́нїе, и҆ ѿвѣща́въ речѐ є҆мꙋ̀: вои́стинꙋ вели́къ васі́лїй, вои́стинꙋ сто́лпъ ѻ҆́гненный є҆́сть васі́лїй, вои́стинꙋ ст҃ы́й дх҃ъ гл҃етъ ᲂу҆сты̀ є҆гѡ̀. и҆ ᲂу҆моли́въ а҆рхидїа́кона ѿгл҃ати є҆мꙋ̀, ꙗ҆́кѡ па́че по ѿпꙋще́нїи ст҃ы́ѧ слꙋ́жбы, въ сосꙋдохрани́лницѣ цѣлꙋ́ю є҆го̀. и҆ вше́дъ въ сосꙋдохрани́лницꙋ по ѿпꙋще́нїи а҆рхїепⷭ҇копъ, призва̀ прпⷣбнаго є҆фре́ма, и҆ дадѐ є҆мꙋ̀ є҆́же ѡ҆ гдⷭ҇ѣ цѣлова́нїе. и҆ гл҃а є҆мꙋ: до́брѣ прише́лъ є҆сѝ, ѻ҆́ч҃е, ча́дѡмъ пꙋсты̑ннымъ. до́бре прїи́де и҆́же ᲂу҆ч҃никѝ хрⷭ҇то́вы ᲂу҆мно́живый въ не́й, и҆ бѣ́сы и҆згна́вый и҆з̾ неѧ̀ ѡ҆ хрⷭ҇тѣ̀. во что̀ трꙋ́дъ тво́й ѻ҆́ч҃е: прише́лъ є҆сѝ видѣ́ти грѣ́шна человѣ́ка; да́ждь ти бг҃ъ мздꙋ̀ проти́вꙋ трꙋдꙋ̀ твое́мꙋ. ѿгл҃авъ же къ немꙋ̀ ст҃ы́й є҆фре́мъ, и҆ и҆зре́къ всѧ̑ ꙗ҆́же въ срⷣцѣ є҆гѡ̀ воⷥдѣ̑ланнаѧ и҆ речє́ннаѧ, съ сꙋ́щимъ съ ни́мъ бра́томъ причасти́сѧ ѿ ст҃ою є҆гѡ̀ рꙋ́кꙋ. и҆ сотво́ршꙋ є҆мꙋ̀ любо́вь, речѐ прпⷣбный є҆фре́мъ: ѻ҆́ч҃е чⷭ҇нѣ́йшїй, є҆ди́нꙋ прошꙋ̀ блгⷣть ᲂу҆ тебѐ, и҆ сїю̀ повели́ ми да́тисѧ. вели́кїй же васі́лїй речѐ къ немꙋ̀: повелѝ и҆ рцы̀ мнѧ̑щаѧтисѧ, мно́го бо тѝ до́лженъ є҆́смь, и҆ па́чеже ѡ҆ трꙋдѣ̀ твое́мъ, є҆́же ко мнѣ̀ прише́ствїѧ. гл҃а є҆мꙋ̀ чⷭ҇тны́й є҆фре́мъ, вѣ́мъ ѻ҆́ч҃е ст҃ы́й, ꙗ҆́кѡ а҆́ще попро́сиши ᲂу҆ бг҃а, да́стъ ти, и҆ хощꙋ̀ ꙗ҆́кѡ да ᲂу҆мо́лиши ᲂу҆ бг҃а и҆ прогл҃ю гре́чески. ѻ҆́нъ же речѐ: вы́ше си́лы проше́нїе, но поне́же вѣ́рнѣ проси́лъ є҆сѝ, грѧдѝ, ѻ҆́ч҃е чⷭ҇тны́й, и҆ наста́вниче пꙋсты́нный, си́ленъ бо є҆́сть бг҃ъ ᲂу҆слы́шати моле́нїѧ твоегѡ̀. пи́сано бо є҆́сть:
ѱаⷧ҇ рм҃д во́лю боѧ́щихсѧ є҆гѡ̀ сотвори́тъ, и҆ мл҃твꙋ и҆́хъ ᲂу҆слы́шитъ, и҆ спасе́тъ и҆̀хъ. и҆ сотво́ршымъ и҆̀мъ мл҃твꙋ на мно́гъ ча́съ, и҆ воста́вшымъ, речѐ вели́кїй васі́лїй: почто̀, гдⷭ҇и є҆фре́ме не прїи́меши рꙋкоположе́нїе пресвѵ́тера, ꙗ҆́кѡ лѣ́по ти є҆́сть; и҆ гл҃а є҆мꙋ̀: сотвори́мъ поклоне́нїе. и҆ лежа́щымъ и҆̀мъ на землѝ, воⷥложѝ рꙋ́кꙋ на прпⷣнаго є҆фре́ма вели́кїй а҆рхїере́й, и҆ речѐ мл҃твꙋ дїа́конскꙋю, и҆ гл҃а є҆мꙋ̀: повелѝ ᲂу҆́же воⷥдви́гнꙋти на́съ. и҆ ᲂу҆ѧсни́вшꙋсѧ ѧ҆зы́кꙋ є҆гѡ̀. и҆ гл҃а ст҃ы́й є҆фре́мъ гре́ческимъ ѧ҆зы́комъ: спасѝ, поми́лꙋй, воста́ви, и҆ сохрани́ насъ, бж҃е, свое́ю блгⷣтїю. и҆ и҆спо́лнисѧ пи́саное:
и҆сⷶ л҃є тогда̀ ско́читъ ꙗ҆́кѡ є҆́лень хро́мый, и҆ ꙗ҆́сенъ бꙋ́детъ ѧ҆зыкъ гꙋгни́выхъ. воⷥгласи́вшꙋ же є҆мꙋ̀ а҆́бїе гре́чески, всѝ въ то́й ча́съ просла́виша бг҃а, и҆́же всѧ̑ могꙋ́щаго, и҆ послꙋ́шающаго молє́нїѧ боѧ́щихсѧ є҆гѡ̀ ра̑бъ. и҆ дх҃о́внѣ воⷥвесели́сѧ съ ни́ми на трѝ днѝ. и҆ поста́ви то́лка дїа́кона, ст҃аго же є҆фре́ма пресвѵ́тера. и҆ ѿпꙋстѝ и҆́хъ съ ми́ромъ, сла́вѧщихъ бг҃а ѡ҆ всѣ́хъ, и҆́хже слы́шаша и҆ ви́дѣша, ꙗ҆́коже гл҃ано бы́сть къ ни́мъ.
This is a translation and has a separate copyright status from the original text. The license for the translation applies to this edition only.
