Пароход (Кельдов)

Пароход Автор: Матвей Кельдов

Поттэмын: 1929. Источник: Удмурт дунне : газет. — 2018. — № 96. — 16-тӥ бам

Уйлэн кезьытэз вандӥсь, жигетӥз, бӧрдӥз тӧл. Пеймытын сьӧд адскись ву ӝужытэсь тӧдьы сюрлыосын вогыръяськиз. Бадӟымесь тулкымъёс, пӧзись шукыос погылляса шур кузя нискылало, куашетыса яр борды жугисько. Тӧдьы йӧ люкъёс, огзылэсь огзы ортчыны турттыса, кошко, ваче шуккиськыса, векчи пырыен ву вылэ вӧлмо. Интыен-интыен йӧ гурезь будэ, паськыта но соку ик пелез вандӥсь куажыртэм куараен куашка. Омырын кӧшкемес куашетэм кылӥське. Кезьыт ву но йӧ пырыос кынмись пиялаен пазясько.

Сэзъяське, бекыръяське пароход. Кужмо тулкымъёс сое ӝутъяло, сэрпалляло. Бадӟымесь йӧос, вожзы потыса сямен, пароход борды шуккисько, вистэк йыггетса, жугисько. Вуын бергась питранэ йӧ кынме но тӥяське, пичиен вуэ усьылыса, кыле.

Тӧл, тулкымъёс но йӧос пароходлы пумит вераськиллям кадь. Вожзы потса, жадьытэк со борды жугисько, выйтыны турттыса, вань кужымзэс золто.

Озьы ке но таза мугоро рулевой ас интыяз зӥбыт сылэ. Кышкасьтэм синъёсыныз борт сьӧрысь лек тулкымъёс шоры учке. Кужмо киосыныз руль питранэз кутса, пароходэз азьлань нуэ.

Ӵукна азе тӧл уката кужмояз. Тулкымъёс уката но золгес пароход борды жугиськизы. Бадӟым йӧ донгиськыса боддор вӧзтӥ выжез ӝутӥз но, каютае бульрак-бульрак гинэ ву пырны кутскиз. Соку ик матросъёс вуса пасез ӵоктазы. Ву пыремысь дугдӥз.

Кышкасьтэм но ас кужмызлы оскись рулевой нош азьло сеен ик ас интыяз сылӥз. Кужмо киосыныз пароходэз кулэ сюрестӥ нуиз. Азьланьын нош, вуюисьлэн вань буёлъёсыныз кисьтаськыса, ӵукпал инвис ӝуаз. Шулдыр, чебер нунал сӥзиз. Кыдёке кыскиз, азьлане дораз ӧтиз.

***

Ортчиз кык ар. Пеймыт гуртысь одӥг коркан мон Октябрьлэсь 12 ар тырмемзэ пумитасько. Али гинэ кенешысь бертӥ. Уй пеймыт. Мон культурной центрлэсь кыдёкын, палэнын. Озьы ке но татын но езтылын югдытэм корт но бетон мугоро выль улонлэн жингыртыса будэм куараез кылӥське.

Тулкымъяськись шуретӥ пароходын мынэмме тодам ваисько, улонэнымы ӵошатско.

Кенешо республика дас кык ар ӵоже улэ ини. Дас кык ар ӵоже вожез потса визьтэммем быдэс дуннеысь буржуази, ас тулкыменыз пальккыса, сое выйтыны турттэ. Йӧ люкъёсын со борды жугиське, озьы ик пырдыса, куашка. Озьы ик горд пароход, Кенешо Союз, лек тулкымъёсын нюръяськыса, азьлань мынэ. Кужмо рулевой, компарти, ас кужмызлы оскыса, тулкымъёслы но йӧослы пумит пароходэз шонер сюрестӥ нуэ. Кыдёкын нош, горд тылын ӝуаса, «Коммунизм» маяк пиштэ. Эрико выль улон сӥзе. Дораз ӧте, кыске.