Пемыд олӧм (Тима Вень)
Велӧдчытӧм коми войтырлы
«Сьӧд удж бертысь, мувыв пиян!
— Муыс миян!»
Ёна сьӧкыд миян олӧм
Войвыв Коми муын.
Мырсям уджӧн сьӧд вӧр шӧрын,
Кынӧмпӧтъяс перъям…
(Кузь тӧв, лёк ар, кӧдзыд тулыс,
Дженьыд шоныд гожӧм).
Сьӧкыд уджысь, помтӧм уджысь
висялӧны косъяс;
Лым-няйт пиын луасьӧмысь
потласьӧны кияс;
Йиа ваын келалӧмысь
юкалӧны кокъяс…
* * *
Мый нин шуан сэтчӧ содтӧд! —
Сэтшӧм оланінным:
Зэв оз дрӧчит, скупа вердӧ —
ичиньводзьяс ми сылӧн…
Энлӧ, вокъяс, часлӧ, коркӧ,
гашкӧ, лоӧ бур мамӧн,
кодыр кутам ёна тӧдны
сылысь сямсӧ, ногсӧ.
Кодыр кужны кутам уна
велӧдчӧмӧн вӧчны.
Кодыр шыбитам ми важсӧ,
кутам выль ног овны.
Перъям кӧртсӧ, сотчан изсӧ,
изнас — сывдам кӧртсӧ;
Дорам туйяс, чугун вӧвъяс…
Унатор ми вӧчам на!..
(Ӧні кежас нӧ сёрни босьтлам,
Мӧдтор йылысь «мойдлам»).
Шуим — курыд олӧм миян,
Сьӧкыд — пӧтлун перйӧм…
Но сыысь мисьтӧм, жугыль, гажтӧм
пытшкӧс олӧм миян.
Коми аньяс, коми айяс,
миян пытшкын
Мыйтӧм пемыдлуныс!
Думыштан да, юрси сувтас —
сэтшӧмӧсь ми пемыд.
(Шудтӧм войтыр, коми пиян,
жаль ті, муса вокъяс!)
* * *
Ловъяторйысь, ловтӧмторйысь —
Быдӧнысь ми полам:
Полам енмысь, полам мортысь,
Полам олысяысь…
Быд пельӧсын, быд воськолын
Полӧм вылын и олӧм.
Керка помын Бубуляыс,
Вӧрын олӧ Вӧрса…
Пывсян-энька, Рыныш-айка,
Ты пыдӧсын — Васа.
Личкӧ Дедыд узигкості,
Пӧдтӧ Кули-мути.
Сэні вомидз, тані — Шева
Горзӧ пӧ морт пытшкын…
Ставыс «сёйӧ», «виӧ», «личкӧ»,
Кулӧм мортыс «чеччӧ»…
Олысяысь пӧрам весьӧ,
Тӧдтӧм йӧзысь — чудьӧ…
(Быттьӧ кӧчьяс сьӧд вӧр шӧрын,
югыд лунысь полам.
Коньӧр мортӧй, кыдз нӧ тэӧй
мездысянсӧ наысь?!
Ӧти сӧмын пернапасӧн
мынтысян тай ставсьыс).
Эскам енлы, абутӧмлы,
эскам мӧдар югыд.
Стрӧиталам югыд вичко,
пытшкӧсным зэв пемыд.
* * *
Челядьясӧс дзолявывсянь
повзьӧдлам быд ногыс:
«...Бубуляыс Будимеркӧд
мыччасьӧ пач сайсянь»…
«Кулӧм мортыс пиньсӧ гирскӧ», —
шуам, шыр кӧ няньтор гуджгӧ.
«Сю пӧвсын пӧ Пӧлудь ветлӧ,
челядьясӧс ӧктӧ»…
Быд керкаын «кужысь-тӧдысь»,
«тшыкӧдчысь» да «керысь»,
Сэні олӧ «мӧс пель пасйысь»,
Тані — «шева лэдзысь»…
Катша пуксяс ӧшинь улӧ —
Бара жӧ «лёк водзӧ».
Туй вомӧн кӧ сьӧд кань вуджас,
Эн нин виччысь буртӧ…
Аттӧ дивӧ, сё мат олӧм! —
Мый нӧ мортлы керны?!
Кыдз нӧ позьӧ тадзи овны,
быд воськолын повны!
Пемыдлунным ставсӧ сёйӧ —
виӧ ловтӧ, пӧдтӧ,
оз лэдз водзӧ мунны туйӧ,
югыдлунсӧ тупкӧ.
Ӧти сӧмын буртор миян —
Уджӧс вылӧ пуктам.
Мед жӧ сійӧ видза олас,
Сійӧ — миян енным!
Аслас вынӧн мортыд сӧмын
Вермӧ шудсӧ дорны.
Югыд олӧм, садя олӧм
Миян колӧ корсьны.
Велӧдчыны колӧ, войтыр,
Пальӧдчыны шогсьыс,
Сэки вӧлись коми котыр
Кыпӧдчыны вермас.
Велӧдчӧмыд — югыд шонді,
Югдӧдӧ и шонтӧ.
Коми аньяс, коми айяс,
Мунӧй Ликвидпунктӧ!
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1939 году и был посмертно реабилитирован в 1956 году, соответственно эта работа выйдет в России в общественное достояние в 2027 году.
The author died in 1939, so this work is also in the public domain in countries and areas (outside Russia) where the copyright term is the author's life plus 80 years or less. |