Пичи гуртлэн пумаз
Вуж корка сылэ,
Со вуж коркан огназ
Малання улэ.
Пересь Маланняез
Кин уг тод меда?
Солэсь ӟеч ужъёссэ
Вунэтод меда?
Гужем, аран дыръя,
Со гуртэ кыле,
Пичи пиналъёсыз
Ваньзэ утьылэ.
Бӧрдӥсь нуныосыз
Веша, лӥятэ.
Висись калыкъёсыз
Эмъя, йӧнатэ.
Шулдыр возь вылъёстӥ
Нылпиез нуллэ.
Пеймыт, сьӧд тэльёстӥ
Соосын ветлэ.
Эмъюм турынъёсыз
Ваньзэс октытэ,
Кибы, нумыръёсыз
Кутса возьматэ.
Пиналъёс шумпотса
Дортӥз бергало.
Ваче ки кутскыса,
Шулдыр шудыло.
Чебер выжыкылъёс
Малання шара
Мусо пиналъёслы
Туж уно вера.
Шонер, ӟеч ужъёслы
Ваньзэс дышетэ,
Куанер калыкъёслы
Кужым будэтэ!
Пичи гуртлэн пумаз
Вуж корка сылэ,
Со вуж коркан огназ
Малання улэ.
Пересь Маланняез
Кин уг тод меда?
Солэсь ӟеч ужъёссэ
Вунэтод меда?..
