Песьтэр вал (Борисов)
| Песьтэр вал Автор: Трофим Кузьмич Борисов |
| Источник: Борисов Т. К. Песьтэр вал // Инвожо. — 2011. — № 5-6. — 165-тӥ бам.• Печатламын: 2-3-тӥ номеро «Муш» журналын, Сарапул карын, 1920-тӥ арын |
— Мын шуисько, мын — валэз лэзьы! Вал лэзьыны но уд быгатӥськы ук, — шуыса, сизьым арес Микаля нимо пизэ анаез тышкаське.
— Курдасько, олокин кутоз… Вал ӵыжоз, — шуэ Микаля.
— Кутоз ини тонэ! Ойдо, валэз серметаса, вылаз пуктыса лэзё.
Валзы Микаляослэн туж востэм. Ветлыкуз каллее-е-н гинэ ветлэ. Каллен ветлэмысьтыз, Песьтэр шуиллям валзэс. Микалялэн анаез Песьтэр вал дораз мынэ ини.
— Тпу, тпу, — шуэ, медаз ӵыж-мар-а шуыса, серметсэ йыраз понэ. Собере Микаляез валаз пуктэ.
— На-а! — шуыса, Микаля, Песьтэр вал вылаз пуксьыса, Гурезьул возь пала кошке.
Возь вылэ вуэм бераз, «кызьы васьком на» шуыса, отчы-татчы утчалляськыса, бӧрдоно кадь луыса, Микаль вал вылаз пуке.
Лыктӥсь адями ӧвӧл.
Улыса-вылыса васькыны кутскиз ини та. Вал вылысь васькыкуз, зып! гинэ музъем вылэ усиз. Песьтэр валэз серметэныз ик вамышъяса кошкиз. Микаля валэз котырын бергаз-бергаз но, серметтэк ик бертэ ини.
— Мар каром на? Меми жугоз ини, бубы, ужамысь бертӥз ке, чабкы сюдоз ини, — озьы шуыса, ас понназ вераське.
Корка пырыкуз, Микаля, туж зол черектӥськыса, «ой, ой, вал вылысь уси, пыдме чиги!» шуыса бӧрдэ.
— Зэм ик-а? Учкы али, чутэ ук! — шуэ анаез. — Уй, нуные, пыдзэ чигем. Душмон воштон Митрей[1] но ӧз ву ни.
— Эн бӧрд, эн бӧрд… вӧёк потто. Тани выд татчы, — шуыса, Микаляез анаез буйгатэ.
Корка ужам дорысь Митрей пыре.
— Мар та нош бызгетэ! — шуыса черектӥськиз Митрей.
— Пыдзэ чигем, Песьтэр вал вылысь усьыса, — шуэ анаез.
— Чигоз ини…
— Серметэныз ик лэзем валэз, — шуэ Микалялэн анаез.
— Серметэныз ик? Э-э, кытын али сюло? Чигыто мон солэсь пыдзэ! Мын ӝоггес, серметэз вай!
— Ӧз чиг, ӧз чиг!.. — шуыса, Микаля, кык пыд йылаз дымбыр тэтчаса, бӧрдэ.
— Эн бӧрд шуисько… Ойдо ӵошен ваём серметэз, — шуыса, Микаляен Митрей возь вылэ мыно.
Озьы Микаляез Митрей ужлы дышетэ, анайзы Микаляез вӧёкен эркия.
Валэктонъёс
- ↑ Митрей — Микалялэн атаез.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. |