Пионеръяс

←

Пионеръяс (1926)
by Суханова Агния Андреевна

→

Гижан кад: 1926, Йӧзӧдан во: 1926. Ӧшмӧс: Школаын лыддянтор. Сыктывдінкар, 1926.

336379Пионеръяс1926Суханова Агния Андреевна

Пионеръяс — вывті повтӧм, ыджыд сьӧлӧма йӧз. Найӧ шогысь, приччаысь оз повны, джынвыйӧ нинӧм оз вӧчны, быдтор нуӧдӧны помӧдз. Сэтшӧм йӧзыс, пионеръясыс и войдӧр вӧвліны уна, найӧ корсьлісны йӧзлы выль оланінъяс, туйдалісны налы выль оланногъяс. Найӧ эз повлыны шогысь, кулӧмысь, ассьыныс олӧмсӧ пуктісны йӧз вӧсна, выльтор вӧсна.

Ӧні сэтшӧм пионеръясыс — уджалысь коммунистъяс-большевикъяс. Найӧ став уджалысь йӧзсӧ му пасьтаыс кыпӧдісны вермасьны озыр йӧзкӧд, личкыны налысь ыджыдӧ пуксьӧмсӧ.

Кодъяс нӧ эськӧ том пионеръясыс?

Найӧ — уджалысь йӧзлӧн посни челядь. Найӧ ичӧтысянь ӧтувтчӧмӧн велӧдчӧны, — лӧсьӧдчӧны мудзӧм вокъяссӧ, батьяссӧ, бур олӧм понда вермасьысьяссӧ вежны.

Том пионеръяс став челядь письыс медвойдӧр ӧтувтчисны, бӧрйисны ас костсьыныс медсюсьяссӧ юралысь пыдди.

Найӧ гӧгӧрвоисны ӧтувтчӧмлысь ыджыд вынсӧ. Том пионеръяс уджалысь йӧзӧс медводдза дорйысьяс озыръясысь, нартитысьясысь, кедзовтысьясысь да. Том пионеръяс — Сӧвет власьтлы отсасьысьяс, сійӧс ёнмӧдысьяс, кыпӧдысьяс ӧтвылысь комсомолъяскӧд.

Кыдзи нӧ лӧсьӧдчӧны, велӧдчӧны том пионеръясыс выль олӧм ногсӧ вӧчны?

Медвойдӧр, найӧ ёнмӧдӧны дзоньвидзалуннысӧ: тӧдӧны, на вывті мунас быд сьӧкыдыс. Ичӧтысянь кокнысӧ, кинысӧ, тушанысӧ ворсӧмӧн, гимнастикаӧн ёнмӧдӧны, сэсся бӧрынджык — уджӧн. Быд пионер тӧдӧ удж керӧм дон. Найӧ медічӧт уджсянь велӧдчӧны пабрик, завод, школа уджӧ. Том пионеръяс тӧдӧны, ки, кок удж этша на лоӧ. Юр вем уджтӧг он на вермы вылӧ кыптыны, мукӧдкӧд вермасьны. Сы вӧсна найӧ тӧдмалӧны ӧнія йӧзлысь, важ йӧзлысь и олӧмсӧ; уджалысьяслысь озыръяскӧд вермасьӧмсӧ; кытысь лоӧма муыс, ваыс; мый му вылас эм; кутшӧм государствояс; эм абу мӧд Сӧвет государство; уна мукӧдтор и.

Том пионеръяс велӧдчӧны овны-уджавны ӧтув, му уджавтӧм, карса пионеръяс мунӧны гожӧмъясын лагеръясӧ. Быдпӧлӧс пионеръяс тӧлын чукӧртчӧны клубӧ гырысьястӧг, ас выланыс лачаӧн, мед водзӧ кежлӧ оз ков виччысьны йӧзсянь отсӧг, мед оз ков некодлы кевмысьны да. Найӧ ӧтувтӧны аскӧдныс мукӧд челядьӧс, нуӧны выль олӧмӧ. Ӧтувтчӧны весиг му пасьталаыс ставпӧлӧс кыла уджалысь йӧзыслӧн челядьыс ӧти гӧрд знамя улӧ, став челядьсӧ чуксалӧны мунны коммунизмлань, вермасьны озыр лёк йӧзкӧд.

Ӧні Сӧвет Республика пасьта уна сюрс том йӧз чукӧръяс уджалӧны. Унджык пионер чукӧрыс шусьӧ «Спартак» нимӧн. Ёна отсаліс пионеръяслы ӧтувтчыны комсомол. Пионерӧ ӧтувтчӧм том йӧзлӧн эм мукӧд государствоын и, сэні миянысь на водз лоины найӧ.

This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:

its creator didn't fight or work for Soviet Union victory during the Great Patriotic War — so the 70-year protection term is applied;
and the creator died before January 1, 1954 (more than 70 years ago), and has been not posthumously rehabilitated since that date;
and this work was first published before January 1, 1954 (more than 70 years ago).

This work is in the public domain in the United States because it was published before January 1, 1929 (more than 95 years ago).

The author died in 1925, so this work is also in the public domain in other countries and areas where the copyright term is the author's life plus 98 years or less (if applicable), or the copyright term is 97 years or less since publication for posthumous works (if applicable).