Пици-палакст/А шлязь - тык катаязь
А ШЛЯЗЬ — ТЫК КАТАЯЗЬ
Саемс куш пакся-вирень эрицятнень. Нумолось иень перть понанзо кавксть полавцы. Тельня — ашо. Ловонть поцто илязо содавт. Кизна-сёксня — серой. Лопатнень ды цилигатнень поцто илязо содавт. Истя вансты прянзо. Ривезеськак удемев. Кува юты тельня — кесак пулосонзо следэнть прок теньстсэ нартни. Маштыть эрямо вишка зверьтне.
Саемс куш велень ведьгев азоронть. Сон весе виензэ путы, кода бу кундамс однасумокс велень старустанть ды волисполкомонь председателенть. Мейсь сынь пек эрявить? Содазь мейсь: волостень прявтось путы ведьгевтнень ланкс налог. Сонзэ олясь: кона ведьгевенть ланкс седеламо путомс. Секс ведьгев азортнэ кундыть эйсэнзэ однасумокс. Велень прявтонтькак лезэзэ ули: вал каи азоронть кис, салава нолтни тензэ вирь ведьгевенть витнемс. Маштыть эрямо арендатортнэ.
Ки кода машты — истя эри. Самаронь уездсэ ули вейке мазы тарка. Стена экшсэ — парт постройкат. Раковкань манастырь ульнесь тесэ коли бути. Ней тензэ мерить „Якстере ош“.
Икеле тосо эрясть манашкат, ней — эрзянь педтехникум. Эрзянь пакшат тонавтнить. Тонавтнить эрямо. Тонавтнить робутамо эрзя-мокшо ютксо. Тонавтнить...
Ёвтасынек вицтэ: кода тонавтнить эрзянь курсантнэ — минь парсте а содатано. Виськс мик. Тосо ули ломань. „Вадря“ ломанесь!
Д. А. Благовещенской машты эрямо. Сон содасы, коёндо кундамс тевентень. Астяк техникумонь советсэнть секретарь. Удемензэ — Сократонь.
[ 98 ] Благовещенскоень ули мезень кис шнамс. Кодамо кореспонденция сы техникумов — весе Благовещенскоень кедьга юты. Техникумсто кореспонденцияськак юты сонзэ кедьга. Сави кодамояк курсантнэнь сёрмадомс газетэв — а тесэ ульнесь. Благовещенской газетс сёрма а прими. Сонзэ ответэзэ вадря:
— Маркавтомо сёрматнень почтась а прими.
Бути курсантось карми кортамо каршозонзо и мери:
— Газетс сёрматнень кучнитяно умок уш маркавтомо, те уш — умонь правилась.
Благовещенский прок локшосо керясы курсантонть:
— Ней истямо правилатнень полавтызь. Сёрмат кучнить ансяк марка марто.
Сех пек а прими Благовещенской сёрматнень, конат адресовазь „Якстере Тештев“.
Пели Благовещенской „Якстере Тештеденть“: Меля кизна кой-месть ёвтнесь те газетэсь Благовещенскойде. Седе мейле а вечкеви „Якстере Тештесь“.
Аволь умок истямо тев лиссь. Курсант Левкин сёрмаць „Якстере Тештес“ заметка. Кандызе канцелярияс. Благовещенской ве сельмсэ варштась канвертэнть ланкс. И — пеензэ пачк:
— Те сёрманть почтась а примасы. Саик мекев.
Левкин ялгась колмошкаксть якась тензэ, сон яла теке эссе прима сёрманть.
— Саик, — мери, — ды кучик аэроплансо. Мон те сёрманть кис ответственность эсь лангозон а саян.
Истя и кадовсь апак кучт Левкин ялганть сёрмась. Марка саемс акосто, ярмакнэ тю-тю! Сень кис Благовещенскоень ёжозо вадря.
„Якстере Тештесь“ эрьва номерсэ сеери эрзятненень: сёрмадодо газетс велень эрямодонть, пурнадо эрзятнень юткова подписка! Неявомо кармась, кода бузмулгацть эрзянь велетне. Эрьва ёндо сыть сёрмат, тестэ-тосто ливти подписка. А Благовещенскоень кондятне, прок паразит, тормостить те покш тевенть.
... Благовещенской — машты эрямо. Сон содасы коёндо кундамс тевентень. Тевенть вети истя — сеське судонзо а пезнавцы. Азё, мери, аэроплансо кучик.
[ 99 ] Учок курсант, зярдо „Якстере ошс“ моли аэроплан тонть сёрманть кис.
Учок „Якстере Теште“, зярдо сы теть заметкась ды подпискась „Якстере ошсто“.
Благовещенской машты эрямо. А шлязь — тык катаязь.
Москов, ГИЖ 1928 ие.