Пици-палакст/Мон кашт молян
МОН КАШТ МОЛЯН
— Мон ламонь кортамо а вечкан. Мон — ломанесь ветьте сэтьмеян, тикшеде алкинян. Ламонь содамо ды нееме а капшан. Мезе неян — седе ансяк монсь содан. Лиянень а ёвтнян. Рустнэ мерить — „молчание золото“. Вечкса те пословицанть. Тень коряс и эрян мастор ланксо.
Сех пек а вечкса кортамонть ютась тевтнеде. Кона таштонть лецни — сень сельмензэ таргамка. Истя корты народонь валмеревтесь. Монь сельмень ансяк кавто. Пек ванстан эйсэст. Секс каштмолян.
Минек Николаевка велесэ ламо кой-мень рудазов тевть. Председателенек кой-косо алац тейни, сюронь анокстамось беряньстэ моли — сюпавтнэ сюрост кекшнить, заёмонь тевтне пупорькшнить, самогонось велесэнть тундо ведь лацо чуди. Ламо кой-месть минек Николаевка велесэнть. Но мон а карман кортамо нетнеде. Кинень мень тев, кона ломанесь кода эри? Секс мон и каштмолян.
Мон — ламо а неян, ламо а марян. Пачк каштмолян. Секс эрямомгак вадря. Кортамс ули мезде! Саемс куть маень васень чинть. Перьть велетнева те чинть празнувизь пек парсте: ульнесть демонстрацият, митинт, велетнень велькссэ лыйнесть якстере флаг, велетнева цеця ды флаг поцо якавцть тракторт, праздникесь — куть ков празник ульнесь. Минек велесь удось. Минек велень сельсоветчикне, партиецнэ, коператортнэ ды учительтне чинь-чоп удость, меньгак празнувамонь кувалма эсть мелявто. Прок и сынст тевеськак.
[ 105 ] Ата тон мерят — амезде кортамс! Ули мезде кортамс! Ули мезде кортамс. Ансяк уш каштмолян. Авань ловсонзо марто, нать, потия истямо обуцянть.
Каштмолян — и весе секе! Мейсь мон карман ёвтнеме, кода минек велень роботникне ды учителесь празнувизь маень васень чинть ташто стильсэ? Чуман, нать, мон, мекс не ломатне эрить ташто койсэ и маень васень чинть празнувизь маень 14-це чистэ.
Кода ломать празнувасть, сынь сестэ эсть празнува. Сень кис маень 14-це чистэ пурнасть компания: кавто коператорт — Казенных ды Прытков, советэнь председателесь, учителесь Казанцев, сайсть мартост вина ды тусть Киреев Гаврянь нешке-пирев. Тосо кувать симсть-ярсасть. Ламо „мазы“ морот морасть, ламо „кой-месть“ тейнесть. Мейле остаткань пелев турьгацть. Куватьс ды пек турсть. Верь марто. Конань — пей синцть, конань — кедь яжасть, конань сельме чирькензэ алов „фонарь“ пуцть. Ланкстост одижаст панксонь-панксонь нолдызь. Кудов пеле штапсто састь.
* * *
Савсь ли миненек не фактнэнь марямс ломанень курксто, эли минь сынст саинек селькоронь сёрмасто — тевесь аволь тень эйсэ. Тевесь весе сесэ — видеть ли не фактнэ? Да, видеть. Меньгак маньшимкат арасть.
Николаевка велень „начальствась“ ды „культурной виесь“ эсь подвиксэст сёрмадызь эсь лемест ашо буквасо раужо лаз ланкс. Чумось тесэ кияк арась. Те иень маень чистэнть минь весе стетэнтень невтинек кемень иень робутанок, кемень иень достижениянок: месть ульнинек, мезекс теевинек и мезенек улить.
Николаевка велень „воротилатне“ берять достижениятнень невцть. Сынст марто васов а молят. Пупордят трокскаст ды синцак сявдексэт. И тенцитядызь историянь соруголс. Иля меша лиянень.
Новосибирск-ош. 19/VII-1928