Повтӧм чирк
Оліс-выліс збой чирк, некодысь эз повлы, быдӧн вылӧ вӧлі воӧ.
— Ме дзик некодысь ог пов! — горзӧ, кузь турун идз вылӧ пуксьӧма да.
— Дерт, он, мыйысь нӧ тэ полан, — шуӧны ен гагъяс: — тэнӧ ӧд быдӧн нин тӧдӧны, быдлаын нин тэ нималан.
— Дерт жӧ, ме ӧд тӧда ассьым нималӧмтӧ, — зэв ыджыдӧ пуксьӧмпырысь, тшапа шуӧ чирк. Ас дорсьыс ёнсӧ да бурсӧ сійӧ эз нин чайтлы.
— Збыль ӧмӧй нӧ турунсӧ видз вывсьыс ытшкӧны? Менсьым юасьтӧг! Виддзыс ӧд ставыс менам, ме ыджыдыс на вылын. Некодӧс весиг матӧ ог сибӧд!
— Часлы, петкӧдла ме налы гаж! — зэв ёна скӧрмис чирк; мыйӧн казяліс ытшкысьлысь шойччыны водӧм, пыр жӧ чеччаліс сы дінӧ.
— Сюрин ӧні менам кипод улӧ! — горзӧ чирк: — он дыр тані куйлы, вӧтла пырысь-пыр.
Чеччыштіс ытшкысьлы веськыда чужӧм вылас, усъяснас вӧрӧ, оз тӧд, мый керны. Ытшкысь чорыда узьӧ, оз весиг вӧрзьыв.
— Часлы, ме тайӧс курчча! — мӧвпалӧ чирк. Ытшкысь он йывсьыс кутіс чиркӧс кокъясӧдыс да чуш-чаш вӧчис.
Ыджыд и причча суис коньӧрӧс: коктӧм коли. Кокыс тай эськӧ быри да, наянлуныс пыр ӧткодь. Паныдасис енгагъяскӧд да садьтӧг повзьӧдіс найӧс, висьтавлӧ ытшкысьыдкӧд косясьӧмсӧ да. Ытшкысьыс пӧ китӧм и коктӧм коли, косаяссӧ пӧ шыблаліс да гортас пышйис. Со кыдзи сійӧ косясьӧма ытшкысьыскӧд, прӧста ӧд коксӧ ассьыс абу воштӧма.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). The author died in 1925, so this work is also in the public domain in other countries and areas where the copyright term is the author's life plus 98 years or less (if applicable), or the copyright term is 97 years or less since publication for posthumous works (if applicable). |
|