Поладкстомо (2016)/Ильтиця чилисема
[131]
| ИЛЬТИЦЯ ЧИЛИСЕМА |
Автобусонь вальманть тона ёнга ювк-ювк ютнесть вайгельпень палманть, тарадсост сэтьместэ нуриця од килейть, ськамост эриця чувтот, куракшт... Сынтемест юткотнева кецневтсть вановт сырнень тюссост кенериця товсюронь паксятне.
Кизэнь меельце ков... А марявияк, кода сёксесь чалги кочкарязонзо, кайсевтьсынзе чувтотнень ожо оршавксост ды сы иенть чопода, начко, ёжонь колсиця шказо. Кизэ, кизэ, мекс тон истямо нурькинят... Теке исяк видевкстне пижесэст кецневтсть седей, течи уш...
Кись келей, кувака, валаня. Аволь кода икеле, монь од шкасто, машинань чарынь лужмотнестэ лишме а лисевинь. Зяро майсемат, зяро салов валт эздэст ёвтазельть! Ней... Э-эх! Каня путовить сеть шкатне неенсетнень ваксс. Кецнек, усктанзат урныгаесь ков мерят. Оно, арды, арды апак псилгале, натой, маряви, мельспаросо. Капши... Ков? А соды. А минсь содатано?
Эйстэнь маласо эземнесэнть омбоце таркась, ванан, чаво. Стинь ды озынь вальманть ёжосо ськамонзо тошнакалиця аванть ваксс. Зярс-бути эзинек правто вейкенек-вейкенек туртов валгак. Килангонь шабрам седе ламо вансь ушов, икельганзо уезь уиця кизэнь пиже, таркань тарка ожо мазычитнень лангс. Нурьгиця каштмолемась мольсь а кувать. Эзинек редяяк, кода прядовсь ютксонок општось, теевинек содавиксэкс. «Нина» — ёвтызе лемензэ вакссон аштицясь.
Килангонь кортамот васенцеде вастовикс ломань марто... Сынь, содатано, молить олячинь марязь, аволь свал виздезь, апак пеле, видькстазь. Седе, мезде содавиксэть марто кортамсто «сусковлик келеть», вал аволить менсте, веёндонсенть марто кардамонзо а кармат. Кунсолат, эрси, ломаненть потмонь чамдоманзо ды, маряви, ловнат роман, косо келейстэ-домкасто панжови васень с__керенть оймеёжонь масторозо, сонзэ уцясказо. Кода эрьвань — сон эсензэ. Эйсэнзэ, тагояк, кода [132] эрьвань, весе: кенярксонь пусмот, сельведте пешксе кедьгеть, чопода веть, сырнесэ артозь чилисемат...
Кись кувака...
Талай сувтнинек пертьпельксэнть марто сюлмавозь стакачитнень. Эйсэнзэ ломаненть чумочидензэ. Мекс сон, инязор виртнень-паксятнень лангсо, тунь а арси Моданть-Масторонть валскень чидензэ, мекс мелявты ансяк течинь эрямодонзо, эседензэ ды допрок стувтни мельганзо сыця эрицятнеде. Мекс а мелявты мазы ды сюпавчиде пешксе кудодонзо, мекс мезеяк а теи — пирямс кинть Тоначив чиемантень? Ломань, те тон кодамо азор-инязор?
«Те кода истя а теи? — кие-бути эйстэнек лия ёндо велявтызе, мельсэнь, кортамонь лувонок. — А ламодояк ламо сёрмадовкстнэ, книгатне, фильматне, келень човсематне, эрьва кодат министерстватне? Те каня а мелявкс?»
Кортамонь те чудильманть полавтызе лия: масторонть келес церьковань вачкамонь-стявтнемань темась. Ламот, васняяк, аватне, кенерсть понгавтомо кирьгазост тешкскенть — свал кирдть мельсэть, кода маштызь Иисусонь, чинек-венек, пингеть перть канднек мештесэть уловонзо. Теке басом, кемть: Сы ды идесамизь! А содылинь, вакссон аштицянть пельде маринь: поптненень, церьковатненень покш мель явсь Чингизхан ды мельганзо молицятне. Аволь кияк — Чингизхан! Тень кис Христосонь уретне урендясть, сюконякшность монголтнэнень кода маштсть. Таштакшность «иганть» пингстэ истят сюпавчить, кодат киньгак арасельть. «Сестэяк православиясь кандтнесь ...рузонь лем?» — кивчкадсь-ютась пряван. Сеске тень, мезе маринь Нинань пельде, превс эзь саеве. Эзь кемеве. Сонзэ мелензэ-арсеманзо мештьсэ кандтневиця те тешкскеденть, ламо лия аватнень коряс, допрок лиятальть. Сон вансь церьковань ормаза орманть, кочкаря видьга кувака раужо оршамопельсэ якицятнень лангс дух лия вановтсо. Сялдозь. Те монь Кецневтимем ды аламнеде абунгавтымим. Совасть превзэнь кевкстемат. Мекс истя ютксонок вельть аламо [133] вейкест-вейкест чарькодицятнеде? Мекс ламодояк ламот ваныть церьковань «чурька прятнень» лангс прянек-пильгенек сюлмсезь ломанень сельмесэ? Ней малав эрьвань зепсэ эчке керь диплом. Аволь аламонь мик якстере ды аволь вейкеяк. Сестэ эно мекс аламо чарькодицятнеде, мекс истямо покш мель явить «менельсэ эрицятне» поптненень? Мекс попонь кедь палсить? Мекс? Монень маряви, «якстеревтемеяк» а стака саемс превс ков ветить раськенек ды лия раськетнень «крёстнэ»-«чурькатне». Монень... А лиятненень?
Кись кувака...
Киньгак а кунсолы, урны, лембе таркасо мадезь аштиця атяка псакакс, машинанть кшнинь седеезэ, содыть эсь тевест, каштордыть киякссонть ало чарытне — нилезь нилить кинть вайгельпензэ.
Мартонок арды авань эрзянь моронь морыця куро. Гайгить вайгелест. Морыть, морыть... Пе а содыть. Моторонть мотордамозояк а маряви. Минь кортамосонок теке кодатано понань кувака цюлка. Вельть уш а кунсолотано. Вейкеденть вана Каштмолезевинек.
А янксян, а тердян, а авардян,
Пингем тусь, прок валскень стямсто сув. Сёксень поекс пизёл ало тардян — Мештесэм ней аволь тундонь увт.
— Марят? — пшкадинь Нинанень матразь вайгельсэ. Сон вить кедень кавто сурсонзо юх-юх ютавтсь турванзо икельга, чатьмонть, келя. Теке марто, прянзо путызе озамкаенть удалкс лангс, конинзе сельмензэ ды кунсолось седеень нуваргавтыця моронть.
— Кодамо потмакстомо, кодамо пачкат ютыця валдо нусманячи,.. — маринь каршо, зярдо солась моронть меельце нотазо. Ды поладынь сеске валонзо.
— Кода вейс ды ёнсто, вейкест-вейкест поладозь валовсть гайттне ды валтнэ! Кодамо ютксост гармония. Кие соды, паряк, Еенинэнь гениесь музыкаськак теизе [134] гениень музыкакс. Виде теяк. Моронть сёрмадыцязо ютавтызе ине поэтэнть поэзиянзо седеензэ пачка.
— А содан, Кудат леляй, а содан... — эзь муе, маряви, сеске лия мезеяк Нина, зярыя секундат кашт ды поладынзе валонзо. — Истямо казне ломантненень Пазонть пельде, а вана чуросто кие лови сонзэ истямокс.
— Те кода истя? — теинь тарск, озынь седе ёнсто.
— Истя. Тон, арсят, ламо Серьгеень ловныцянзо? Кода икеле кортыльть, миллионт? Мерят, ламот сонзэ Пазокс ловить?
Меремс тень ульнесь а мезе. Кодамо Паз? Христос — Паз. Президентэнь пес тензэ сюконякшнить. Есенин... Фамилиянтькак школасо тонавтнемстэнь эзие марсе! Мейлеяк. Косто, бути стихензэ вечкеманзо кис тюрьмас озавтнесть. Мейле, аволь аламо иень ютазь, панжокшные, сюкпря уцяскам туртов, Серьгеень шкинемань мазычинзэ.
Морот, кортнемат, ванномат... Машинанок урны-арды. Гуекс юты алганзо кись.
Пачкодинек, кадык аволь педе-пес, ёвтнематнес эсь эрямодонок. Кие косто, кодат тевть яксевти-вечки, косо тонавтнесь, мезе прядсь... Эрьвась эйстэнек, карминдеряй эрязь иедензэ сурень керьксэнть пестэ пес калавтомо, кувакакс кинть кувалмозо карми марявомо. Монь кондятнэде, кинень а течи-ванды цярадить кавксоньгемень, кортамскак а мезть. Карминдерян ёвтнеме эсь киден, оштнеде-велетнеде, кува «пансесь» эйсэнь уцяскам, ды педе-пес... Ох, авакай-тирякай... Ламо, ламо часстнэде, паряк, читнедеяк кармить эрявомо!
Вакссон ардыцясь, Нина, эйстэнь кавксть седе од. Иень коряс тейтерекс тень сави. Ялатеке сонензэяк, валонзо коряс, савсь ламо мезень пачк ютамс. Мезе ашти ансяк тунь одсто, кавто эйкакш марто мирдевтеме кадовомась. Сон аволь кулось, аволь чавовсь, ...ёмась. Зяро валозь сельведть, зяро апак удо веть, зяро а кемемат, кортавтомат... Кевкстемась — ков? — сакшны мельс нейгак. Ковгак сонзэ, кода мерсь Нина, превстэть а ёртсак, а ёртсак тоначив туемазот. Учома... Учома пингеть перть.
[135] Кись кувака... «Морыця бусонок» уски эйсэнек кудов.
Весемеде, мезде эзинек корта-арсе ардомань перть, нардевстэ педясть, ды кецневтсть эйсэнь, Нинань валонзо-мелензэ ломантнень а истя, кода эряволь, эрямодост. А стувтса:
— Ломанесь илязо аште ве таркасо, сон свал касозо, касозо рунговийсэ, превсэ, тевсэ, содазо-неезэ эрямонть мазычинзэ. Пек берянь, сэвезь сэвить шканть кудоютконь-пирень тевтне, чуросто-весть савкшны саемс кедезэть книга... — стакасто лекстясь, варштась вальманть тона ёнга лопасост либордыця килейтнень лангс, витизе прянь судрявксонзо, мерсь нусманя вайгельсэ.
— Кодат касомат! Аволь умок ульнинь базарсо. Марявсь, весе, мезе касы моданть лангсо, яки эзганзо, укшны ведьганзо, аравтнезельть лавсятнева. Кодат ансяк калт эзть микшневе, сывель, эмежть...Эль кирдевсть сельведень. Визькстэнть. Эри ломанесь пекеде мелявтозь. Ансяк. Лия тензэ мезеяк а эряви. Мезеяк! А Есенин, а Блок, а Арапов, а Сульдина... — Инжекскак эзть совсе прязонзо валтнэ «вечкевикс чачома мастор», «тетянь-авань кель»... Ансяк — пеке. Ансяк эцемс. Арсияк пекесэ.
— А оймесь, оймесь косо?! — эзь кирдеве, псистэ, вить кедьсэнзэ мештензэ каршо сорновтнезь ёвтызе мелензэ вакссон аштицясь. Чатьмонезевсь. Аламос аштезь поладынзе валонзо. — Монень маряви, нельгизь-таргизь ойменть бачкатне! Алкукс.
«Ломанесь илязо аште ве таркасо, касозо...». Сырнень валт! Марявсь тень, Нина «салынзе» монь арсеман ды ней кельсэнзэ-валсонзо велявты сынст тень мекев. Чуросто, вельть чуросто, седеяк авань кургсто, савкшнось ды савкшны марямс истят валт. Кеман, эрямоськак эскеляволь, аволь кода ней, седе паро ёжонь марязь, седе эрьвеласто, улевельга модась-масторось седе сюпав истя арсиця ломаньсэ.
Ули ушодкс ды ули пе. Те коесь киненьгак а полавтови. Ансяк шканть арась а ушодксозо, а пезэ.
Вейкенек-вейкенек кулясо-кортамосо каванязь, совинек, эзь маряво шкаськак, ошонтень. Зярыя минутань ютазь [136] ульнинек Нинань валгома-озамо таркасо. Стинь. Мельган сеске стясь ды ютась икеле кенкшенть малас корташа ялгам. Лоткась автобусось. Кенкшесь панжовсь. Нина валгсь, тейсь зярыя эскелькст, эзь варштаяк удалов, кудонзо пелев. Зярс кирдевсь автобусось, мон аштинь, прок пединь, панжадо кенкшенть чиресэ ды ванынь мельганзо. Апак учо эйстэнь явовицясь вырк велявтсь, мереват, вановтом кармавтызе, каршон, ды келейстэ, мельспаросо мизолдозь кавксть-колмоксть ахолдась тень кедьсэнзэ. Чачозо кувтолдсь кеняркссто. Вастовомадонок? Паряк, мездеяк лиядо? Кирнэзь пекставсь кенкшесь. Сыргинек седе тов.
Кодамо-бути а ёвтавикс лембе ялтке гувк эждизе мештем. «Вай, те мезе истя? Мезе мартон?» — кивчк чачсь тень каршо превсэнь, зярс кенеринь ваномо Нина мельга. Велявтынь, озынь тарказон. «Ужо, ужо... Те мезе-бути... Мезе? Мезень налтке? Илязо уле... Тон мезть? Арась, арась... Кавксоньгемень малава иесэ? Зярдо, теке вирь пачат, пансить мельгат минень-сюнонь орматне? Арась, арась, тенень а улема, истя а эрси... Те истяк. А бути... бути алкукскак сон?.. Паряк, Шкиницянок ильтямокс кучсь тень истямо казне? Мезть, алкукскак, а эрсить эрямосонть...»
Пачкодинь кудов. Шлинь-нардынь, анокстынь ярсамс. Теде мейле пелевес яксевтинь конёвонь тевен: ловнынь, сёрмадынь, витнинь-нардтнинь, раздинь...Мезе аволинь тее, чокшнень перть се валдо, теке чопода пель удалдо чипаень нал вановтось, кецнемасо пургсиця се пейдемась, сеть мизолдыця турватне, икельдень эзть тукшно. Ванан вальмава вень чоподантень — икелень сынь, ушодан ловномо — ёнкскетнень лангс таго Нина валги, каяты пилесэнь сонзэ вайгелезэ... Панжиков шкань ёжот, нусманячи, янксемат, кавтолдомат ламбамо човорксокс кирдевсть седейсэнь. Мон, умок шержей пря, эрязь иетнеде верьга пешксе парго, апак учо эртевинь — окойники пачкодсь тень! — од шкань валдо бажамодо пешксе масторонть чирес.
Мазый? А содан. Сельмензэ раужот, тюжат, сэнть? Маряви, сэнть. А турванзо? Валдо черь — ансяк те седе [137] кемевикстэ кадовсь удемсормсевксэзэнь. Те од шкась онкстни, кода ней арсян, мазычинть сельмень-черень тюссо ды турвань рисункасо. Сыречись лиякс ваны вечкемань кирвазстиця толкельненть лангс, лият онкстнема-пелензэ. Эно мейсэ пицизе, мейсэ вельмевтизе сыре седейсэнь ламо иень перть мадезь аштиця ёжонть?
«Касозо рунговийсэ, превсэ...», «чуросто-весть савкшны кедезэть саемс книга...».
Вана неть превей, домка смусть марто валтнэ-арсематне ульнесть вельмевтицякс кулозь толнэнтень. Эждсть сынь эйсэнь чокшнень перть. Чокшнень перть эринь кемгавксово иень масторсом, маринь сень, мезе марякшнынь-неекшнынь муюктомо, допрок од цёрынекс.
Ютасть чить, таргот. Ютасть ковт.
Одшкань толнэсь кармакшнось матрамо.
Весть, текекс чокшнеланга, сорнозевсь, редия, мейле вайгель макссь кандтнемкай телефоном. Лепштне пилезэнь. Маринь авань вайгель. «Истя-истя, Кудаш, — каятотсь кандтневкайстэнь эчке, теке ведь торны, вайгель — минь, эрзянь аватне, ацамковонь 30-це чистэ карматано тешкстамо Од иенть самонзо. Сак. Янксеме а кармат!» Текель кортамоськак. Сеске видькстан, мон а пек вечксынь неть минень-сюнонь читнень-чокшнетнень. Лован сынст шкань ёмсевтемакс. Каня конёвтнес правтомась, сёрмадомась, каня иетне истямокс велявтымизь? А содан, а содан... Икеле истямо аштигаекс араселинь. Од, маряви, ульнинь, лия тевть мукшнынь. Мезть теде кортамс...
Гайневтиця авась — содавикс. Морыцянь куростонть, конань марто ардокшнынек автобуссо кизэнь се маней чистэнть. Прявтост. Молян аволь сонзэ мелензэ ванозь. Чокшнесь — эрзянь! Секскак тердицянтень мелем ёвтыя апак кавтолдо, теке эске чавинь — ве валсо: «Молян!»
«Янксеме а кармат...» — талай чокшнес зярыяксть содавтнимизь, вельмсесть превсэнь Од инь вастомо тердицянть кармавтыця валонзо. А содан мекс, марявсь эйсэст кедькоморо саиця кодамо-бути вий. Сынь тердсть, ускозь усксть эйсэнь Од иень те промксонтень.
[138] Лиссь кода алтазель. Кенярксчокшнесь теезельяк-севтезель истя, скирдамс ульнесь а мезень кис. Лиссть сцена лангс Якшаматя ды Ловняське. Сынь кармавтсть икелест озадо аштиця тейтертнень ды од цёратнень кевкстнеме-кармавтомо: кие мезе соды, мезе масшты тееме. Веенст кармасть невтнеме морамонь ёрокчист, лиятне маштсть киштеме, ёвтнеме, содамоёвксонь содамо... Якшаматя пеедькшнезь-згилязь таргсесь якстере, эседензэ покш кескавстонзо казнеть. Лездась тензэ Ловняське. Тень прядозь, ушодовсть Од иень каршо мунямотне. Ветясь те пелькссэнть сынст содыця ава. Кодат ансяк мунямот-чаравтомат арасельть! Кие-зярдо икелев мирденень лиси? Кинень? Ков? Кодамо сон карми: мазый-аволь, сюпав-аволь? Кежей? Кортыця? Карминдеряй чатьмониця?
Якшаматя ды Ловняське ютасть сценанть икеле чирев.
— Ней, ялгат, — мерсь кавшаня ашо сакалонь кандтнийсь аволь покш залсонть озадо аштицятнень лангс ванозь — максови шка тыненк, вечкевикс сыцят-ваныцят!
— Ней, Од иень инжеть, мизолкс чамат, невтинк, кие-мезе машты, тынь, — поладынзе «покштянзо» валонзо Ловняьке, чова рунго, теке од килейне, тейтересь; зярс-бути учось, кие сти таркастонзо.
Лисснесть морыцят. Эрзякс, рузокс. Кие-бути паро эрзянь кельсэ ловнось стихть. Кинь? Мельсэнь эзть кирдеве.
— Морыть, — яволявтсть кавонест верьга вайгельть ветицятне, — патят-сазорт Кельняевтне!
Кузсть сцена лангс .. .Нина ды, чарькодинь, сазорозо.
Ж-у-уйть, — мерсь, зярс-бути капшазевсь седеем. Ледсь мелезэнь се кизэнь чись, автобуссо ардоманок, кедьсэнзэ мельспаросо, мизолдозь ахолямозо явовомастонок. Теке весе те исяк ульнесь! Ды вант вана, Чипазось макссь чансть неемс те ломаненть омбоцеде. Омбоцеде ванан сонзэ, кода мерекшнинь, сэнь сельмес, неян лыкиця, моронь валтнэнь ёвтамсто, верев-алов якиця турванзо. Ней ансяк совась превзэнь: Нина — аволь покшке, ёлганя, теке тейтерень, рунго аваломань. Аволь [139] килограммт, граммт верьга-ланга эйсэнзэ арасть. Те лангс апак вано, сельмес каятыця авань мазычинзэ ульнесть, кода ортыть, мартонзо, эзть ола.
Кунсолан морост. А сатны шкань-шкань кошт лексемскак. Морыть пек содавикс, мик колоньгеменце иетнестэ чачозь рузонь, эрзянь кельс ютавтозь, моронть. А ильвединьгадан, сёрмадокшнызе се шкастонть пек содавикс поэтэсь Исаковский.
Сундерьгадозь яки цёра, |
Мелодиязо теевксэнть аволь стака, сови превс весть-кавксть кунсолозь, морави шождасто. Мазыйстэ гайги кавто, васень ды омбоце, вайгельсэ топавтозь. А стяко масторонть келес ламот содавикс артисткатне истя тейнестькак. Верьга вайгелень партиянть вети, кунсолан, Нина, уски омбоценть — сазорозо, патядонзо аламнеде сэрей, текекс аволь эчке од ава. Теке вейс празь кавто чудикерькскеть шольнить. Валдо черест валанясто судрязь-тапарязь оскакас човоньс.
— Чокшненть васенце, арсезь-теезь пельксэзэ, — яволявтсть Якшаматя ды Ловняська — прядовсь. Весень, инжеть, тердтяно таргазь стувор экшс.
Совинек аволь покш залс. Куншкасонзо покштояк покш кирьксаня стувор. Арсемскак а мезть — аволь чаво, Од иень. Ули аволь ансяк мезе сускомс, ули мезе копордамкак. Ванан, венстизь кувака кирьгаст, теке галат, шампанскоень чопода-пиже суликатне. Улить лияткак. Истя вана, сыречи, кавани эйсэть аволь тонь одшкань, — чаводо пешксе — неень шкань стувор. Симть, ярсак, кишть, морак... «Кодат шкат састь!» — аволь чуросто содавтнесамизь валтне.
[140] «Вай, а се оно Нина!» — эль эзинь серьгеде марямга. Сон, эйстэнь аволь васоло, аштесь стуворонть чиресэ сазоронзо марто ды мезде-бути паро мельсэ кортнесть эсь ютковаст. Инешки, косто, кодамо масторсто тень сонзэ муик, кодамо вирьстэ-паксясто таргик? Аволь менельстэ? Аволь Литовань ды Пурьгинепазонь Ёнкстнестэ? Мекс истя, Шкиницям, кувать вешнить эйсэнзэ, комсь малава иеть? Нолдык, Инешкипаз-Чипаз, пежетень — пеняцян. Теке марто, модас сюконян Икелеть казезь казнеть-чаньгодьксэть кис.
Мель путан а ваномс кавто гулькинетнень ёнов. Каня кирдеват! Кирдян кедьсэнь ожо тюс вина марто бокалонть, паро кайксонь марязь кортнян вакссон аватнень марто, монсь салавине кепсян вановтом патят-сазортнэнь ёнов. «Мезе теемс? Кода улемс?» — токны-кевкстни седеем. Ютамс юткозост, кода-бути а вадря. Ютат, мезе мерят? Эно кода лиякс? Истя! Од ие, атя, иляк стувто. Икелев!» — меринь эстень, кадынь калякардыця ялган ды аламонь-аламонь ютынь, кода-мезе илязо уле, изнинь минек явиця аволь нурькине колмошка метратнень.
— Од иень валдочить тенк, мазый ават, — арсинь тенст, бокалом сынст бокалост каршо венстямсто, ды теке басом пшкадинь, сельмезэнзэ ванозь, Нинанень — эзик стувто, Нина сазорнэм, фестивалев ардтнеманок?
— Арась, арась, каня стувтови умарьковонь маней се чись. — токавтынзе Якстерть мери човине тураванзо бокал чирентень ды ёвтызе мелензэ.
— А ардомань перть, урноманть апак маря, ютавтозь «конференциянок»? — мель путынь ванстомс ды поладомс кортамонь лувонть.
— Вай, кода истя, каня истямось стувтови... — пейдезь, лангозон ванозь, ёвтынзе валонзо, путызе кедьгензэ ды варштась вакссонзо аштицянть лангс.
— Нолдык чумом, — пшкадинь Нинань вакссо сонзэ коряс седе сэрейне авантень, — леметь а содаса, монень маряви, тон Нинань сазорозо. Истя? Мерть, энялдан, минутас-кавтос «саламс» патять. А? Мелем ули ёвтамс тензэ аламошка од иень валт... Вадря?
[141] Каршо валонь апак учо важовнестэ токие Нинань лавтовс ды лисинек фойес. Чаво. Кияк арась. Сон ды мон.
— Со-содат мезекс тер-тердитень? — кокнозевинь, теке од цёра вечкеманзо марто вастовомсто, валтнэнь нильнезь пшкадинь штадо пря каршом аштицянтень. Лангсонзо човине коцтонь ванькс валдо-сэнь платия. Кумажадо алга. Аволь понкст кода ней весень.
— Содан, — мерсь дух апак арсе, прок кевкстеманть максокшные тензэ чиде-кавтодо икеле. Эзь кемеве. Арсинь пеедькшни. — Содан, содан, Кудаш леляй! Содан — се минутастонть саезь, зярдо лисинь автобусстонть ды ахолинек вейкенек-вейкенек туртов, вановтсот, чачосот сёрмадозель весе...
— Виде, — эзинь карма лия валонь кочкамо, — тон вельмевтик сестэ толнэнть, кона мадекшнесь, натой эзь ченге ламо иеть, ды ней уш, марявсь... — лавшо вайгельсэ, аламнеде капшазь, прок пелинь а кенерян, ёвтынь валтнэнь.
— Содат мезе?
— А содан, — ноцк кепединзе лавтовонзо, учозь варштась лангозом.
Мон ёмавтые келем. Сеске эзинь сода кода нолдамс оляв превсэнь валонь таштавкстнэнь, мезе мериксэлинь.
— Мерть куш чуросто, пек чуросто, куш иезэнзэ весть, ну кадык кавксть, вастневемс мартот... — окойники рикстядевсь, кецнинь, кургостом валрисьмесь, — Лиясто, видькстан, анок эрсян кепе лов ланга чиемс — ансяк варштамс сельмезэть!
— Теде а карматано, Кудаш леляй,.. Мезекс? Вай, Вежайне учи, алкукскак мери — патянь салызь, — пеедькшнезь-капшазь ёвтынзе Нина аволь сеть валтнэнь, конатнень учинь, ды эскельдясь кенкшенть ёнов. Кадымим. Кудов? Шказо эзь са. Совинь мельгазо. Од иень вастыцятнень, ярсыця-симницятнень юткс. Стуворонь залось вайгельтнеде увны. Теке мекш веле.
Перькан морасть, кортасть, кирдевсь шалт... А превсэнь монь апак учо гайгезевсь ламо-ламо иеде икелень пек содавикс нусманя, седеень лепштиця морось-[142]арсемась. Косто-бути, прок менельстэ, совасть мештезэнь, пицизь седеем валтнэ. Цийнесть сынь, мелодиясь пилесэнь, зярс эзть карма ломантне срадомо.
Ансяк весть эрси ине вастома, |
...Ськамон. Апак капша эскелян ошонь вень чаво курованть автобусонь лотксема таркав. Моли-певери «нузякс» лов. Чуросто прыця ловтештинетне вастовомо асфальтонть марто а капшить. Сынь валгить эльканясто чаразь, прок Вальсэнь музыкань кунсолозь, танцовицят. Чарыть, чарыть... «Паро тыненк! Вечктядызь весе, аволь ансяк пакшатне», — ютась преван мель чоподань керсиця цивторкайтнень лангс ванозь.
Пильгень ветить тов, ков эряви. Пилесэнь гайгить Нинань вайгелезэ, меельцекс, эрязкалезь ёвтазь валонзо. Сакшныть икелень якстересэ эль токазь мизолдыця турванзо.
Маласон, маласон тон, монь вечкевиксэм, |
ледсь мелезэнь од шкань репертуарстом вейке моронь валтнэ. Кода видестэ ёвтазь! Зяро эйсэст нусманячи! Каня а мондень?
Потмозон совиця «тештеденть» арсезь, содавтымим содавикс параллелесь. Зярдо-бути ловнокшнынь: кавксоньгемень иесэ ине немецесь Гётэ, «Фаустонь» шкиницязо, теке од цёра, вечксь кемгавксово иесэ тейтерь. Вечксь ёжонь ёмавтозь. Палсь. Онстонзояк нейнесь полонс саицянзо. Эзь маря, эзь арсе — тензэ кавкасоньгемень. Ловсь сонзэ пазокс. Мейсэ прядовсь сёлмов, верьга ливтниця романост пряудемем эзизе вансто. Тевесь эно аволь теньсэ.
Те, яла арсинь, — «валт». Пейдемат. Кодат «велязе-вемат» иень истямо сюпавчисэ! Кодат паломат! Э-э-э, [143] лиссни, а истя. Лиссни, шержейтнеяк ютазентень пезнакшныть. Ды кода! Истя кершасызь, тертест аволь свал каявить. Ну, Гёте — поэт, ды кодамо! Содасы Модамасторось. Истятнэнень весе мереви. Сынь а кортавтовить. А мон... Одолинь, ламо-мезе а чарькоделинь, эзинь сода.
Удементь оймсемазо — удома. Зярс а уды, кодат ансяк мельть-валт а ютыть пачканзо, кодат тевть а теи! Вана нейгак. Паряк, сынь мельс, алкуксонь, ванькс, эрьва кода шназь-моразь вечкемась — те улияк сыре, Тов ваныцянь вечкема. Сонензэ, аволь кода од ломанентень, мезеяк уш а эряви: а кирьксаня покш сельметь, а нурьканя виде судо, а сёлмокс сравтовозь сельмечирькеть, а пси кутморемат... Явозо тензэ вечкевиксэзэ куш аламошка мель, лововлизе сонзэ ломанекс, чарькодевлизе, эрьва валскесь казевель тензэ чевтестэ ёвтазь валт. Лия... Те кода ожоковсто укшторонтень. Нусманясто ваны пильгензэ алга-перька сравтозь икелень пиже, ней ожо мазычинзэ лангс ды, мерят, стакасто таргси оймензэ. Кизэнь читнестэ эльнесь-элякалесь чинть пансемадонзо. Налонзо максть тензэ вийть, эрямонь кеняркст. Ней вана, кода илязо наянгале, илязо шна прянзо чипаесь, гайгиця налонзо икелекс а эрявить. Весе. Ютась пси шкась. Мезе ней, икелень оршавксонзояк пильгепесэнзэть.
Пачкодинь, совинь эрямо пизэзэнь. Юкснинь-каинь пильгестэнь котан ды сеске, оршнезь, ютынь икелев. Автордыя пианино лангсто «Вечкевикс морот» книганть, эрязкалезь муие «Вастытень тонь» од шкастон саезь вечкевикс моронть ды серьгедия верьга вайгельть.
Вастытень тонь ды умонь шкатне |
[144] Морынь чаво квартирасонть вайгелень апак тертя, мелезэньгак эзь сакшно — удомаст старян эйстэнь вере-ало этажсо эрицятнень. Марявсь тень, модамасторонть лангсо ськамон, кияк-кияк маласон арась, ськамон. Икельгам сравтовсь Пейделькань мазычисэ почодозь келейдеяк келей луга. Морась келем, морась вайгельсаном, морась седеем, морасть перькан стенатне. Теке мондень, монь чадыця ёжодон, монь туртов начтозель те морось. Куш сёрмадыцязоль Тютчев Фёдор. Эйсэнзэ ледстневи ава марто одс вастовомадонзо малав ведьгемень иень ютазь. Моро — ледстнема. Мон вана Нинань неие васенцеде. Ульнесь сюронь кенерема шка. Ульнесть седейшкавань кортнемат часонь-омбоцень перть. Тютчевень вастовомазо ды ... монь. Малавгак а вейкеть.
Каня улить модамасторонть лангсо мезтькак «вейкеть?»
Кинь кода илязо уле, морынь, зярс эзь каято ветеце этажсто кардамонь зэрь-зэрь-зэрь.. Мекс кецнемань истямо ковол куродокшнымим, монськак а содан. Нина марто фойесэ вастовомадонок мейле, пельдензэ марязь валтнэде ангорясть седеень псакат. Ней вана, валонзо, моронь пельксэсь «ды теште теке васолат» прок марязьгак арасельть.
...Стуваром икеле вальмалангсо эйкакшонь коморошка конёвпанкске. Мезекс сон моненнь? Ёртомс вана кодаяк а ёртови. Саемс ды... Вием а саты. А мери тень теемс эйсэнзэ номерэсь: 8 927 173... Те Нинань телефонозо. Секс кирдеви вальмалангсом. Мезекс? Каня марясамам? Ялатеке арсян, яла арсян... гайневтемс. Илыкем вана — кочкамс эйсэнзэ якстере пастасо тешкстазь цифратнень — а саты. Пелян. Виздянгак, мерема. Мезекс эцемс тов, косо тонь а учить? Козонь тон а эряват? Каня Телесь муи кель-валт кортамс Кизэнть марто? Сестэ эно мезекс, сыре карго, ванстат кевейкие цифра марто ожолгадозь конёвненть? Мезекс сон тонеть? Шукшведрась вакссот. Кодат мелявкст, кедеть венстик ды кишк тов!
Весть чокшнеланга эзинь кирдеве. Кавтолдозь, аламнеде мик пелезь, саия коморозом кандтнемкаем ды [145] лепштнинь тердевтиця цифратнень. Учомс эзь саво. Каятотсь, сеске содые, Нинань вайгелезэ. Арсекшнинь ламо-мезе ёвтамс. Мария вайгелензэ ды весе арсемам нолштынзе талномась. Кок-мок, а содан мезе меремс.
— Шумбрат, Нина! — окойники панжовсь кортамо варясь.
— Шумбрат, шумбрат! Те кие кортыцясь? — скирдизе аламнеде седеем, седеяк талакавтымим — ...эзить содаво.
— Те мон, Нина, мон, Кудаш лелят! — сорнозь вайгельсэ, кудокияксонть мекев-васов эскелязь ёвтые лемем. — То-тон ва-ванды кудосо улят?
— Кудосо.
— Пароль вастовомс мартот, — каршо — пауза, марявсь, пе тензэ а ули.
— Вастовомс? Мезекс? — окойники прядызе «а куш а кашонть», каятотсь кельме вайгель.
«Инешки, кодамо гайгиця, ванькс, кодамо вечкевикс вайгелезэ!» — ютась пряван валонзо марязь.
— Кода теть меремс... Неевлитень...
Таго теевсь општ. Марявсь кода чави седеем. Лоткинь тей-тов эскелямодояк. Окойники кандтнемкаем вельмесь.
— Кудаш леляй, мезекс те весе... Поездэсь, кода кортыть... Монь мелем ... — эзизе прядо мезе мериксэль.
— Неемс, марямс вайгелеть, ютазь кизэстэнть ёвтазь валот, — содынь эсень, энялдынь аламнеде кармавтозь.
— Кодаяк седе мейле, — ...бик-бик-бик поладызь сигналтне Нинань седейтеме ёвтазь валонзо.
«Кодаяк седе мейле...» — мельга мельцек зярыяксть ютасть пряудемган марязь валтнэ. Чарькодемс а стаскаль, мезе те «кодаякось». Нина мель — вастовомс — а яви. Кайксэм марязденть эзь паролгадо. Яла тень эзь кемеве. «Паряк, телефононть марто мезеяк теевсь?» — кемеманть ёмамодо авторинь човс. Ужо, ужо, мезть а эрсить! Эрямо... Шкадо икеле, атя, иля лондале. Мейле мезе, чирес пачкодить? Чиресь — а пе. Гётэ кирдажот оно...кемгавксово иень эрькес чопавтекшнесь.
Эсь прянь ладсезь-оймавтнезь, венстне кедем вальмалангс ды саие телефононь номер марто конёвненть.
[146] Путые икелень. Муинь сэнеласто артозь конёвнень квадратке, кедьёнкс ды одс, раужо пастасо — седе неявозо — сёрмадые номерэнть: 8 927 173.... Педявтыя сонзэ, илязо ёма, ды свал улезэ сельмень икаеле, вальма суликантень. Шождасто, теке кевть шаштнинь-поркснинь, лекстинь. «Вастован, ялатеке вастован! Кеман учовить сеть минутатне, зярдо карман ваномо, Нина, мизолкстонть истямо вечкевикс тонь чамас, марясынь превей арсемат-кортамот», — кирдевсь прясон мелесь. Ансяк кундынь эрьва чинь конёвонь тевезэн, вановтом лыйк кепедевсь суликантень — педявтозенть лангс. «Вадрясто, апак стяяк парсте неяви!» — вадяшизе седеем кецнемань ёжо.
Ютасть зярыя чить.
Телень ве. Кудосонть валдо, лембе, кашт.
Дильнезевсь свал вакссон кирдевиця кандтнемкаем. Лепштне пилезэнь. Стяко. А гайть — а кайть. Тарказонзо путомсто вановтом эртевсь «Нинань конёвнес». «А бути гайневтян?» — Токимем экшине мель. Мезекс... Ков пря чават, кинень эрявить тонь кавксоньгемень малава чарыця иеть?! А ормат-тарвот? Нинанень? Учок... Нина, маряви, ансяк ниленьгементнень трокс эскельдясь. Паряк, зняротнеяк эзть таштаво. Од ломань. А тонеть, покштяй? Секскак, атякай, нардык превстэть те лементь! Стувтык. Мезень кис менчеват икелензэ, энялдат. Каня а неят — умок неезь он мельга пансят?
Содан, а беряньстэ содан: венстемс кедеть ды сеземс вень чоподастонть ламотнестэ вейке тештенть — те ёвкстояк ёвкс. Теемс исень чинть течинь чикс — теяк те керьместэнть. Чарькодян, неян, марян.., а вана тенсть, тенсемс удемстэнь неть ёвкстнэнь, а муян. А мери, седеем а мери вешнемс те кедьёнксонть. Ялатеке а сялдан, а янксян, а пеняцан лангозонзо. Мекевланг, анок прамс кумажа лангс иакелеть, седей! Сюконян тень кис — кучить тень чопода тусто пельтнень пачк чипаень валдо варштавкс. Вастовтнимик умоктояк умок ютазь од шкам марто. Седе ламон-нень кучнезэ Чипазось истямо казне. Сюкпря, седей!
Паряк гайневтемс, а?
[147] Мезекс... Кортамояк мартот а карми...
Седеем эзь кирдеве.
Саие коморозон мариця-кортыця «налкшкем» одс. Таркастом апак стякшно, вальма суликанть лангс ванозь, кочкинь кевейкие цифратнень.
— Нина, те мон, Кудаш лелят, шумбрат! Сестэ сезевсь та-кода кортамонок. Мезе-бути кандтнемкаен марто теевкшнесь. Се-секс.., — муинь тувтал идемс гайневтеман.
— Кунсолан, кунсолан, кортак! — икельдимем, каясь трокс вал авась. Вайгелень коряс марявсь ёжозо, Кецневтимем, а берянь.
— Мельсэнь валот: «Кодаяк седе мейле Учови,
ёвтык, тень те «Мейлесь»? — саевсть кельпрястон валтнэ, ды янксезевинь — кевкстемаль кода-бути седе лиякс, чевтестэ, паряк, пеедькшнезь.
— Те мезде истя тон? — кевкстимем, теке эзь сода, васолдонь, парсте марявиця вайгелесь.
— Секеде, Нина, секеде — вастовомадонок...
— А-а, оно мезде! — пейдезь каятотсь, шольнезевсь прок чудикерькске, Нинань вайгелезэ.
— Самай секеде — варштамс сельмезэть.
— «Седе мейле...». Ледсть, ледсть мелезэнь — ёвтынзе валтнэнь ды чатьмонезевсь. Теевсь кашт. Окойники кортазевсь одс. — Сестэ эно истя, Кудаш леляй. Ванды, кемголмово чассо мон улян «Килейне» кафесэ. Туи? Учан.
Кутмордымим, марявсь, палымим тундонь кольнякай лембе вармине. Кеняркстонть эзинь кирдеве — стинь ды карминь эскелямо комнатаванть. Апак учо ледсть мелезэнь Од иень се чокшнесь, Нина марто нурька шкас лисснеманок фойес, гайгезевсь пилесэнь сазоронзо марто морамост...
Сундерьгадозь яки цёра,
Яки кудом икельга. Коншты-варшты сон лангозон, Чары-вели вальмалга...
[148] Лип ды ламоннень содавикс ташто мелодиянть полавтызе лия, косто-косто совась потмозон, каятотсь пилесэнь Джузеппе Вердинь вечкевикс, пешксе мазый ариядо, дуэттэ, солодо «Травиата» операстонзо «Ствувор экшсэ» морось-вальсэсь.
Верев кепедьсынек эрьвелань бокалонть |
Тердсь Нинамезень морост, тердсть «Травиатасто» хорось ды башка морыцятне. Аноколинь ардомс, ливтямс, шканзо лангс апак вано, те «Килейнентень» куш нейке. Кадык ушосонть талай чокшне, чопода, лов, якшамо... Сыргавлинь шкань апак таргсе, сыргавлинь апак кавтолдо, мездеяк апак янксе, уливельгак Нинам-штатолнэм тосо. Мезеяк а теят, сави учомс кувака-кувака «вандынть».
Учовсь. Аравтозь шкадонть икеле мон уш ульнинь ёвтазь пелька пряшка ошонь парконть вакссо кафесэнть. Кайсинь. Муинь-кочкинь стувор — озамо тарка. Сон веёно, ужосо. Вакссонзо келей-рацяня, теке лато, кудонь роза. Озынь. Учан. Ваннан, кедем кепсян, «будильникезэнь». Кайсян вановтом кенкшенть пелев. Кеветее минутатне марявсть тень часокс. «Учома» — лия тюс сон а соды. Окойники панжовсь кенкшесь. «Учовсь, учовсь учовиксэнь!» — ж-у-уйк мерсь седеем.
Ютынь вастомонзо.
— Шумбрат, Нина сазорнэм! — арсинь совицянтень.
— Шумбрат, шумбрат, Кудаш леляй! — Кецневтимем каршо паро, эрьвела ёжосонзо, чольдерькай вайгельсэнзэ.
[149] Лездынь кайсемс. Понгавтне лов ашо, понав копюшон марто куртканзо тулос. Венстизе тень кодазь, прякасмосонзо ашо цёкине марто якстере шапкинензэ. Мольсь тензэ лангсонзо рунгонь тапардыця якстере тюс, текекс кодазь свитерэсь! Сон нолдазь раужо, валанясто вадяшазь понкстнэнь ланга. «Машты танстень марязь оршнеме... — шные эсь пачкам Нинань, аволь сэрей-эчке рунгонзо лангс ванозь. Саия кавалалдо, ютынек кочказь стуворон экшс.
— Ярсамо-симеме карматано? Мезде? — пшкадинь аванть каршо стядо аштезь.
— Арась, арась, — пейдезевсь Нина ды кепедизе вановтонзо монь лангс. — Мон эзинь стувто кизэнь се чистэнть ёвтазь валот: икеле кирдевсь мельсэ вейке — ярсамс, ней — а ярсамс. Секскак...
— Чарькодинь. Пелят килограммтнеде... Истя?
Нина мезеяк эзь мере. Озась. Саинь буфетстэ шоколадонь плитка, зяро-бути мандаринт, печеният ды кавто кедьгеть тантейстэ качадыця лакиведь кофе. Кандтнем-кайсэ кандынь ламбамо каванямкан кочказь тарказонок.
— Кеман, теде сталмот, дугинем, а кепети, — меринь пеедькшнезь рамаземам стуворс путомсто.
— Сюкпря, Кудаш леляй, паро валот кис, — жой вайгельсэ, мизолдозь мерсь Нина канднемкамйстэнь мандаринэм-мезем стуворс путнемстэ.
— А кемевияк — вастовинек. Арсинь... — тарказом озамсто панжия мезде мелявтынь теде икеле. Каштор-каштор панжия ды явные пелькскень-пелькс шоколадонь плитканть.
— Те мекс истя? — кецневтинзе пилень Нинань, верьга вайгельсэ морыцянть, вайгелезэ. Марявсь тень, гайгезевсь ды пештинзе стенаюткотнень Чайковскоень «Вальс цветов» шкинемазо.
— Васня казекшныть тень, телефонсо кортамстонок, та-кода безардезь, «кодаяк мейле» валтнэнь. Текеньс: кандтнемкаесь кавксть вейсэндявтнимизь, кавксть вайгельсэть, кортамонь лувсот марявсь экшине. Мелень аразь. Секс а «кемевияк».
[150] Айгие Нинань икелев кофе кечиненть. Путынь икелензэ цяплантень шоколадонь зярыя пелькскеть, печеният.
— Мон а карман манчеме, видьстэ мерян: мезекс те весе? Поездэсь туссь. А сасави. Кеман, Кудаш леляй, а покордават, — видькстась, мерсь апак кавтолдо, мезде арсесь вечкевиксэм.
— Истя, Нина, истя. Ансяк аволь педе пес. Тон одат. Секскак вечкемасот улезэ икелечи... Ули-арась тонь кияк, а содан. Арась — улезэ. Улезэ вечкиця, мелень ваныця, нардев ломань, цёра. Мон? Мон — «мезекс те весе?». Видеть валот. Вечктян. Те виде. Онстомгак сакшнат. Мейле мезе?
— Тон, Кудаш леляй, ёвтыть мондень валот. Видестэ ёвтыть. Ней мон тондеть. Содави, эрявикс ялгакс тень, иля покордаво, зярдояк а улят. Монь толпандям лекси псисэ, тонь.. .Вечктян? А мерян. Вечкеват — те истя.
— Тень кода, «толпандинем» чарькодемс? — сезия Нинань кортамонь сурензэ. — ...Вай, допрок стувтынек — яла кортнетяно! Кофенэк... Эрь, весть-кавксть копордатано.
Вечкан, видькстан, копорямс аволь пек пси кофе шоколад марто! Те монь, кортавксонть коряс, лавшочим. Нинань мельскак, ванан, тусть каванямкан, сонгак кепси-токавтни турвазонзо кечине чиренть. Кода эрязасто шкась юты. Ливтязь ливти! Одксшкастон «кофе» валонтькак а содылие. А ней...
— Тень, мерят, кода чарькодемс? — корштась Нина кечинестэнзэ ды поладынзе апак прядо валонзо. — Вечкеват... Мельсэть кортамонок автобуссо ардомсто? Теке се исяк ульнесь. Тон ванат эрямонть лангс, мезе моли перьканок, монь вановтсо, арсят монькс. Совить пилезэнь валтнэ истя, кода тонь, тонь, Кудаш леляй. Секс вечкеват... Секс те «Килейнентень» совавтомикак. Тон — домкасто арсиця, ламо содыця ломань. Эрьва кодамо марто савкшнось вастневемс. Истямо марто — васенцеде. Шожда тенек улевель эрямс.
— Сюкпря, тейтерем, — кеняркстонть — вастовинь чивалгома шкастон истямо ава марто — сельведень эзть кирдеве, та-косто састь ды совасть потмозон «Разные судьбы» фильмастонть Рощинэнь романсто валтнэ.
| [151] | Почему же ты не встретилась, |
Седеяк лавшомгавтызе седеем морось-янксемась. Эх, Нина, Нина, Инешкипазонь тейтерь! Таргинь зепестэнь пацине, нардынь летьке сельмень ды поладые мезе ёвтыксэлинь.
— Паряк, истят мельтькак тонь содавтнить: мезе пельдень, мезе эряви те атянтень? Мекс тень гайневтян? Мезеяк, Нина, пельдеть а эряви. Мезеяк... Содак сыретнень вечкемаст весемеде ванькс, весемеде валдо, пачк невтиця. Прянь шнамо? Мельсэньгак арась. Берянь, эрямом перть мезеяк эзинь ловно Платононь. Визькс. Лиясто мик машнетян. Ансяк мезеяк уш а полавтови. Мезе эзь тееве — эзь тееве. Сон, грекень пек умонь пингень философось, кода тень маряви, максокшнось питне сыречинь вечкемантень. Текекс кадовськак пельдензэ, совась эрямонтень фразась — Платононь вечкема. Нолдык чумом. Кортазевинь. Ков молят — икелень лектор. Иетнеяк...
— Монгак, Кудаш леляй, Грециянь инетнеде мезеяк эзинь ловно. Мельсэнь кирдян. Мезе — а мезе, Сократс кундан. Умок варштни лангозон книгань лавсястом. Яла терди эйсэнь...
— Нина, ёвтык, кода тон кенерят зняро тееме-содамо? — кевкстне допрок лиядо. Саинь цяплынестэнть мандарин, ватксие, лутынь зярыя палнэть ды венстинь Нинанень.
— А тон, Кудаш леляй? — кевкстемам каршо кевкстимем Нина.
— Мон, мезе мон, мон цёра... Кудонь тевтне истя велькссэм эзть аште, нейгак...
Кортась Нина капшазь, валтнэнь путнесь сеедьстэ. Истямо уш, меринь эсь пачкан, кортавксозо. Те лангс апак вано, камажа пилем вакска эзь юта пельвалгак. Истямо ванькс-валаня вайгелезэ, чарькодеви, сови пилезэть эрьва гайтькесь. Кодамо стака «текстэсь» илязо уле, марясак пестэ пес. А стяко сестэ, Од иень вастома чокшнестэнть, патят-сазорт вельмевтекшнизь советэнь шкань эрьва кува морсевиця моронть.
— Сюкпря, тейтерем, казненть кис. Истямо — те аволь шнамо, аволь савтовкс — эрямосон арасель. Сон васенце ды меельце. Секс истямо питней, кадык а вечксая те валонть. Ламо эйсэнзэ, тонсь чарькодят, нусманячи, ялатеке вельть седе ламо кецнемань ёжот. Нина, варштак сельмезэнь. Мон педявтса вановтом тонь сэнь сельмес. Симан меельцеде те ванькс, пачк невтиця сэньстэнть. Ванан чамазот, теке совавтан компьютерс, зярдояк илязо стувтово, покш ёвтнема покш мазычиде ды вечкемадо. Ванан — коншть а мерян: кодат турват, улот, череть... Содан, те минек меельце вастома. Лия зярдояк уш а ули. Кода Пушкин мерекшнесь: «Цветы последние милей...».
Нина вансь апак конштне сельмезэнь, седейшкава кунсолось монологом. Прядые — мезеяк эзь мере. Нолдызе вановтонзо, варштась часонзо лангс.
Вейсэ, теке кармавтымизь кодамо-бути а содавикс вий, стинек стуворонть экшстэ. Путынь Нинань юдмас кадовозь ярсамопельтненнь. Венстне азораванстэнь. Састыне, ёжонь марязь лепштне вить кедьсэнь, киньгак лангс апак вано, мештезэнь Нинань. Ютынек оршнеме. Якстере свитер, раужо [153] понкст, мизолдыця, якстерьсэ эль токазь турват... Кодат мазыйть, кодат мельс туицят ульнесть сынь се чистэнь!
Оршнинек-теинек ды лисинек ушов.
Эйзюрковонь чикуншкадо мейлень валдось сулейнеяк козоньгак эзь кадо. Пештинзе чоподадо пешксе таркатненьгак. Валдо — а вановаткак. А стяко эрзянь вейке сёрмадеесь лемдизе те ковонть валдонь ковокс.
Кафенть каршо сыре тополенть пряс валгсь кулянь прявткандтницясь — сезьган. Чэ-чэ-чэ... — каятотсь верде, лопавтомо, штапо таратдтнэнь ютксто чикоркай вайгелезэ. Те истя сон, арсезевинь, яволявтсь минек вастовомадо ды Нина марто ютавтозь меельце минутатнеде свалшкас явовомадонок икеле.
Варштынек вейкенек-вейкенек сельмс, лепштинек, та-кода цёракс, кеденек ды, валонь апак ёвта, чатьмонезь, эрьвась эйстэнек сыргась эсь кияванзо. Вейкенень пезэ а неявиця, кувака, омбоценень эзганзо молемс кадовсь... Каня, эскели-эскели пры лов лангс, каня мади пейделькасо почодозь луга потс. Уцяска...
Састыне, ваннозь, илязан нолашта-пра, эскелинь эйгажа тротуарганть. Эскелинь ды арсинь эрямонь варматнеде, сынст полавтневемадост, вийдест, лембедест-кельмедест. Яла мерить: кирдть эсь прят кильдезь, свал ульть тевсэ. Эрямонь ажиятнень ютксо эрязь кодамояк варманень а правтоват. Кода меремс... Вастневить истят шкат, кайсевить юргозь-вешкезь истят даволт, изнямс конатнень аволь эрьвань сатыть виензэ. Арась, эзть сато вием кадомс вечкемам эсень потс, ютамс вакска. Изнимизь Нинань муниця валонзо-мелензэ, вановтозо, чевте, седеень эждиця вайгелезэ, иензэ... Эзинь онкстя ёжон, эзинь карда. Лисинь каршост. Ды видестэ теинь. Улемс изнязекс, эрси, — чиревтеме кеняркс.