Поладкстомо (2016)/Кона пазось седе вере?
[300]
| КОНА ПАЗОСЬ СЕДЕ ВЕРЕ? |
1990 ие.
Сценань удало стенасонть — портрет. Сыреждиця кундостонзо муст-муст пейдезь ваны залонтень Владимир Ильич. Эйстэнзэ а васоло стувор. Копачазь зорякс палыця коцтсо. Экшсэнзэ кеменьшка цёрат ды ават. Мештьсэст палозь палыть эрьва кодат ордент. Чамасост — кеняркс. Моли сёрмадеень промкс. Трибунанть экшсэ келей лавтов шумбра цёра. Лангсонзо чопода-сэнь паро костюм. Сон ёвтни «мировой пролетариатонь ветиенть» эрямо пингедензэ. Течи сонзэ чачома чизэ. Веенстнэ моткодемадонзо нувсить, лиятне каштордыть газетасост. Окойники келей лавтовось прядызе валонь кесаконзо. Сеске стясь сёрмадейтнень прявтост Пекшайкин ды мерсь гайги вайгельсэ: «Течи, ялгат, Покшчи. Тешкстасынек Ильичень чачома чинзэ «Интернационалсо».
Кунсолыцятне ладор-лодор стясть. Витемтизь рунгост, нолдызь кедест. Энгамсть. Вановтост педявтызь штапо коня ломаненть лангс.
Пекшайкин таргизе вайгелензэ. Серьгедсть лиятнеяк. «Вставай, проклятьем заклейменный...». Сеске пештизе залнэнть моронь лувось. Сон вешнесь тарка, кува лисемс те нурька-алкине кудостонть ды стявтомс лия нарьгавицятненьгак. Вана панжовсь, теке тень учоськак, кенкшесь, ды вейсэнь гайтесь юргозь-вешкезь лиссь кудыкелев.
Ильич аламнеде кончтазь сельмсэ ваны морыцятнень кургс. Кунсолы сынст мельспаросо. «А стяко, а стяко зняро верь валозель монь валдо, монь Ине мелем кис, а стяко миллионт путызь пряст те баягакс увныця моронть моразь...» — неявить-цивтёрдыть сонзэ теине сельмсэнзэ валтнэ.
Партпромксось прядовсь.
1992 ие.
Залось теке. Некеть ломантнеяк. Эйстэст седе ламо сиякс цивтердый пря атят. Вастневить тия-тува авань [301] почаня пряткак. Пурнавсть промксонтень Мордовиянь масторонь кол сёрмадыйтне ды зярс апак лаксе, инзэдевкссэ апак токше «активисттнэ». Валонь содыйтне истя пурнавкшновить иезэнзэ весть. Кортамось мольсь чарькодеви мезде: кие кода сёрмадсь. Кода, ламот тонавтсть, эряви тень теемс. Кить ульнесть истят кужотнесэ, содасызь лексемань коштост.
Ялатеке те иень серьгедьксэсь лияталь.
Кунсолыцятнень ютксо ульнесь... поп. Истят тамашат зярдояк арасельть. Поп сёрмадеень промкссо? Арась, арась... Превскак киньгак истямо эзь валгоне. Лангсонзо инженть раужо, теке чопода ве, кочкаряс кувака оршамопель. Мештьсэнзэ — крест. Сонсь од. Сэрей ды, теке очко, эчке. Черензэ раужот, нолдазь ланганзо. Ламот мельспаросо, лиясто мик сюконязь мерить тензэ «батюшка». Вейке копша пря атя промксонть ушодомадонзо икеле венстизе кедензэ Ильиничнэнь паламс. Пазонть пельде кучозесь мельде-валдо палызе венстязь кеденть ды нардынзе турванзо пацинесэ.
Промксось содась эсензэ. Сон кодась коцтонзо эсензэкс. Вейкесь корты, мельганзо омбоде... Кувать цёковокс цёкордсь Пекшайкин ялгась, яла шнась сёрмадомань тевтнень. Поладызе сонзэ теке ладсо лездыцязо Кавтаськин Григорий. Виде теяк: «макснесь-путнесь» тенст лепиямс шнамост кис «сэтьмечинь колсицясь» Валдомелькин. Цёрась од, ансяк превень коряс ды а пелиця чинзэ кис одокс а ловсак.
Кепедизе кедензэ раужосо оршазесь. Максомс-арась тензэ вал? Ды кода эно! Ней шкась аволь икелень кондямо. Валонтень олячи! Кортак куш мезде ды сэныдкадомозот. Промксонь ветицясь, Пекшайкин ялгась, низэльгавтыньзе пеензэ, келемтинзе кедензэ ды мерсь церьковань прявтонтень: «Пожалуйста, батюшка. Мы всегда Вам рады. Проходите». Мейле пшкадсь сыцятненень: «Я думаю, товарищи, батюшку ограничивать не будем во времени. Как на это смотрите?..»
«Валдонь кандыйсь» эрязасто, прок раужо ёндол, лиссь икелев ды стясь трибунанть экшс. Сон крёстызе [302] мештензэ ды верендясь ёвтнеме Иисусонь эрямодо, сонзэ тюнихань тевдензэ. Ёвтнесь, кода ве дюм сокоронть сельгень прамс теизе неицякс, кода ведьстэ тейсь кагор, кода оймавтнесь азаргалиця иневедь... Эзизе стувто ледстямс Христосонь одс вельмемадо ёвксонтькак.
Вайгелезэ човине-сэрей. Ванькс. Эрьва валонть совазь совавтсы ды путсы седей ёжозот. Кургонь автезь кунсолось президиумсо аштицясь, икелень парторгось Лаборкаев Уредей Евлампович. Кунсолось ды арсесь икелень эсь эрямодонзо: «Куш ульниньгак партработникесь дока, сон монень аволь сасаво. Истя валанясто-мазыйстэ викшнемс ёроком аволь сато. Косто ансяк те раужо кренчесь, валтнэнь амоли!»
— Ней, пазонь уреть, терявтсынек тонавтнемс «Отче наш» озноманть-энялдоманть, — пшкадсь «батюшкась» икелензэ аштицятненень ды таго крёстызе мештензэ. — Содадо, пазонь уреть, сонзэ а содыцятнень тоначисэ учить певтеме майсемат толбандя потсо, анксемасо-ведьсэ...
— Мон содан! — каятотсь залстонть авань вайгель.
— Да покается, раба божья, и поймет: во вред сие не пойдет. Да не гневайте, раба божья, Творца и сына его великомученика Иисуса! — «озавтызе» бачкась ламонь содыцянть ды сыремтезь вайгельсэ пшкадсь урензэ туртов:
— Встаньте, рабы божьи блудные, да послушайте божьи повеления.
Малав весе стясть. Эзизе витемте рунгонзо ансяк вейке ава.
«Отче наш, иже еси на небеси...» — эрьва валонть, прок карькс ускозь, педясь моравтомо кувака чересь. Авась, кона ливтнизе нерензэ, лырныця вайгельсэ кундась лездамо моравтыцянтень. Тона шкань-шкань тейнесь конязонзо крёст-чеке. Мельганзо крёстнесть лиятнеяк. Озность весе.
Марязденть-неезденть Ленинэнь лыказевсть сельмепонанзо. Неявсь, кода пиле удалдонзо певерсть меельце черензэ. Апак учо портретэсь чатазевсь ды теевсь... эрий Ленинэкс. Сон сеске венстинзе кувака кедензэ Пекшайкинс, кундыксэлизе черде. Пекшайкин ялгась умок штапо [303] пря ды секскак черде эзь поксардово. Сестэ Ильич кундызе кирьгадо ды кармась повамонзо. Весе таймазкадсть. Эзть чарькоде мезе теемс Пекшайкин вакссо аштиця «заслуженнойтнеяк». Окойники, сась ёжос икелень парторгось Лаборкаев, мельганзо Чатьмоний поэтэсь. Сынь эрязасто стясть, кундызь Ильичень кедензэ ды велявтызь удалов. Тона терявтынзе менстемс. Тень эйстэ мезеяк эзь лисе. Ильич нолдызе прянзо, кепететсь, теке нармунь, мекев кундозонзо...
1993 ие.
Залось теке. Президиумсонтькак некеть: Пекшайкин ялгась, Уредей Евлампович ды лия «заслуженнойтне».
Течинь промксось аволь лиятнень кондямо. Течи — эрзянь келень тонавтницятнень марто вастома. Пурнавсть сынь эрьва ёндо. Кие сась Самарасто, кие Оренбургсто. Улить ютксост Эрзянь Масторсто сыцяткак. Седе ламо ават. Кортнить, зярс эзь ушодово промксось, эсь тевдест. Чоледезь чоледить. Варштат лангозост ды сеске чачи мелесь: «Кодат мазыйть, видеяк, эрзянь аватне!»
Панжизе кортамо кенкшенть, кода свал, Мордовиянь масторонь сёрмадейтнень прявтост Пекшайкин ялгась. Кувать сон кувсесь-пувсесь эсь тевдензэ: ёвтнесь, мезе лангсо «псилгали» ды кодат цецят рашты-кенерсти конёвонзо лангсо. Вайгелезэ алянть эчке, кортамо лувозо пельсудыцянь. Паряк, секскак та-косто апак учо каятотсь корнома, ды «превень видийтне» пейдезевсть.
Зярдо ламот чамдызь потмост, сайсь вал од, валдо чама цёра.
— Мон — историк. Сынь Самара ёндо, — пештизе гайтьсэ васень валстонзо саезь вастома тарканть. — Тедеде, 1993 иестэ, топодеть 250 иеть, кода кирвазсь Терюш буень эрзятнень тюремаст эсь олячист кис. Топодсть 250 иеть, кода пултазель эрзянь Ине цёрась Василень Несмеян. Сонзэ ойменть саекшнызь минек кис «пандокс аштицятне», Христосонь урензэ, конатнень икеле сюконямотнеде ламо эрзят ней мендявсть чирькекс.
[304] Истя сон, православной церьковась, ушодокшнось келенек-коенек яжамо ды яжизе... Ансяк содадо: райс эйстэнк тень кис кияк а понги!
Цёрась козкстась коморозонзо, варштась мекс-бути верев ды нурька шкань каштмолемадо мейле пшкадсь:
— Кундасынек, ялгат-оят, Ине Несмеянонь ды лиятнень лемест, конат маштозельть 1743-1745 иетнестэ, минутань чатьмонемасо.
Чикорк-чикорк, — мерсть стултнэ лангстост стямсто.
Паряк, аволь весень, ялатеке кой-кинь превсэ вельместь сеть умонь шкань тевтне, сеть эрзянь цёратне, конатне стясть Иисуснэнь вийсэ озновтыцятнень каршо. Те минутанть печтязь ютасть, мерят, сеть умонь иетне, валозь сельведтне, валозь вересь...
Кудыкеле апак учо каятотсь эйкакшонь рангома.
Истя, бешом, авардсть эрзянь аватне ды сынст эйкакшост, зярдо савкшнось вензэ лангс, капшазь кадомс чачома масторост ды седе товгак кекшнемс, теке вачо верьгиздэ, кувака черень кантницятнеде, монахтнэде.
— Озадо...
Эзть кенере озамо, таго вельмесь Ленин. Сон кепединзе лавтовонзо. Чиремтизе кургонзо.
«Те мезе, те кода истя? Кить икелем? Каня сынь а содыть: васень пазось — эсь оймесь?» — ульнесь сёрмадозь ветиенть чамасо.
Кой-кинь токизь цёранть валонзо. Редизь Ильичень лавтовонзояк. Неть кадовсть теске ды пшкадсть сёрмадеень прявтонтень, кода седе келейстэ ды марямга тешкстамс Несмеянонь маштома иенть.
1994 ие.
Вирень кужо. Перьканзо килейтне салава морыть пиже морот. Тесэ — велень Репештя. Тесэ, Велень озксто мейле, ютавтсызь эсь промксост Эрзянь Масторонь сёрмадейтне.
Паз, чангодть!