Поладкстомо (2016)/Поладкстомо/3
[28]
III
Лекциясь прядовсь. Кокшапря, човоньга-кува нурькинестэ наразь шержей черь, эцезь рунго аволь сэрей профессорось саинзе трибунастонть конёвонзо ды лиссь. Зярыя студенттнэстэ кадовсть залонтень, седе ламотне шалнозь ютасть коридорс. Таргицятне пурнавсть ушосо. «Кода сынь ды цяркань вечкицятне куроксто мукшныть вейкест-вейкест!» — аволь весть совсесь те мелесь Видяень пряс.
Таргить цёратне, згилить, пеедькшнить, кортнить. Видяй эзь вечке качамо чине, куш тетязо «кезэрень» пухаицяль. Сонензэ эзь чарькодеве, мезекс потсить-нильнить табаконь качамонть ды чиненть лиятне. Тансть марить, пряст оймавтыть? Сась юткозост ялганзо марто, кунсолось.
Вейкесь — бошан чама, келей лавтов — прянь шназь кармась ёвтнеме тейтерь марто вастневемадонзо. Ёвтнесь кувака келесь артонь апак вансто. Понгонесть кортамосонзо аволь аламо визькс валт. Седеяк — «цёрань тевдензэ». Ульнесть кевкстницяткак: кода, зярдо, зяроксть... Теде сон седеяк сыремсь, седеяк пря шнась яксевтезь «тевсэнзэ», сеньсэ, мезде превей, визьксэнь содыця ломанесь весенень ёвтнеме аволь карма.
Видяй аштесь веёно. Лиятнень юткс кортамосонзо эзь совсе. Чатьмонсь, кунсолось. Ды арсесь марязь валтнэнь лангсо. Арсесь, зярдо прядовсь юткошкась ды совась лекциянь залс, тарказонзо озамстояк.
«Се цёранть оно... Монсесь — вийтеме, уды, прянзо тунь а невтни, а сыргозекшны. А чить, а веть. Те мекс истя? Тетянень пшкадемс? Паряк, сон мезеяк ёвты? Кода-бути авадря, визькскак... Маряви, сави, ковгак а молят, пшкадемс пичкавтницятненень. Кинень эно лиянень? Э-эх, визьксэсь кодамо! Ужо, цёра, шкадо икеле пек иля тотно, иля нуваргале. Иля капша, шкась невтьсы... Эряк, пеедькшнек, пря иля чаво...» — арсесь, оймавтнесь прянзо. Кодамоль профессоронть лекциянь темазо, ютась, ловт, вакска.
[29] Дирь-рь-рь... — гайгезевсь баягинесь. Ушодовсь од лекция...
«Валдо кужов», кода лемдезель автобусонь-мезень лотксема таркась, конань эйстэ аволь васололь Видяймезень колмо нупалень од квартираст, цёрась ардсь 6-це номер автобуссо. Се, кода свал, пешксель. Ёжозо аволь вадряль. Яла куйгельдсь прясонзо, эзь максо арсемс лиядо, альгачонть кургосто марязесь, чарасть-лийсть удемсэнзэ седеень ангориця мельтне.
Содавикс, кавто ёнга эрьва кодамо чувтосо пирязь кевъянось ветизе кудов. Кузсь ветеце этажс. Те шкастонтькак, кенкшенть панжомстояк идемевсень тошкамотне прястонзо эзть лисне, эзизь кадно.
Эскельдясь тарчксонь трокс. Каршонзо, мерят учось эйсэнзэ, стясь сэнь балягинесэ мазылгавтозь халатсонзо авазо.
— Седе курок ютак! — вастызе Видяень кецниця вайгельсэ.
— Те ков истя? Мезе лиссь? — варштась капшавтыцянть чамас.
— Ютак, ютак, эйсэть вана мезе учи! — валонзо певердезь, Юлия Григорьевна цюх-цюх эшкизе цёранзо судо ланга сёрмань конвертсэ ды пейдезь максызе сень Видяйнень.
— Те истя кона ёндо? — моткодезь мерсь котанзо комадо юксицясь.
— Тонсь несак, — неть валтнэнь ёвтазь, авазо совась вейсэнь нупальс, поладызе книгань ловноманзо.
Видяй эрязасто ютась «эсензэ пелев», эсь нупалезэнзэ.
Варштась мазыйстэ, зярыя тюссо артозь конвертэнть лангс. «Косто? Владивосток... Эге-ге-гей! — абунгадсь тешкстазь кучома таркадонть — Кинь пельде?..»
Сайсь васоньпеельть ды керизе конвертэнть теине пева. Каштордозь панжизе ды таргизе потстонзо колмоксть мендязь конёвлопанть.
«Шумбрат, Витя-Видяй! — кецневтизе сёрмань кучицясь. — А содан, кода ней, школасо теть мерильть те лемсэнть...»
[30] Видяй ёндолк ютавтызе вановтонзо лопиненть пес. «Истя улияк — Лияна!» — кецнезь тешкстызе эськанзо, маризе, кода пачканзо ютась вечкевикс лембе коволнэ.
Вельместь, кепететсть шкань домка эрькестэнть те тейтеренть марто салава-виздезь вастневематнеде ледстнематне. Эрсесть сынь седе сеедьстэ школав молемстэ, лиясто — кудов самсто. Ульнесть сынь ванькст, теке балягань ансяк-ансяк панжовиця прят, Набойчи эзть сода. Пештязельть икелень шкатнеде кортамосо. Арасель ютксост лелювамояк. Школав ды мекев... Тов — мекев, тов — мекев... Мерят исяк, ансяк исяк эскелясть «эсест» янга, сёксня ожосо, тельня ашосо ацазь киваст; ульнесть гувк ацирьгалемат, оймамот, пелькстамот, ансяк песэ свал сакшныльть вемельс.
Ютасть, а кемевияк, кавто иеде ламо.
Архитектор... Шкась — вана ки инедеяк ине, виевдеяк виев архитекторось! Вана ки шкини весементь Моданть лангсо ды Каргонь Кисэнть!.. Лияна, косот ней тонь менель сэнь сельметь, кинь кецневтить, кие ней мари-кунсолы тонь горниповокс чольдердиця вайгелеть? Сельмень икелев нейгак сакшныть кавто кувака пулос пурназь пинемень тюссо череть... Несынь-арась зярдояк? А кемеви... Оно ков чивалгома ёнксонь варматне салыдизь! Истяяк мереват: мезть ансяк а эрсить эрямосонть...
Васолдонь, валдо ды сюмора ёжодо пешксе сёрмась седеяк колызе, «таргицядонть» мейле, Видяень кайксэнзэ, кундась эйзэнзэ «мезеяк а эрявинь» ормась: мезеяк аволь нее, аволь маря, аволь сода, ковгак оргодевель, ёмаволь... Совась ды кемекставсь превсэнзэ мелесь: кодамояк тейтерьава зярдояк а карми сонзэ туртов Лиянадо малавиксэкс, вастовомат, седе лиятат, тейтерьаватнень марто зярдояк икеле шкасто а кармить. Зяр-до-як! Сондензэ, те мельденть, седеяк пштистэ ютась седеензэ пачк ризксэсь.
Ловнызе Видяй сёрманть весть, ловнызе омбоцеде. Апак капша совавтызе седеень лавшомгавтыця сёрмадовкскенть тарказонзо ды путызе конвертэнть икелензэ стуворонть лангс...
[31] Шканть локшосо а эрязкавтсак. Цётмароськак, кодамо покш-стака илязо уле, а кедьёнкс. Сон аволь мезеяк, сон — Шка. Лездыцят тензэ а эрявить. Седеяк — паницят. Сынтеместкак моли-чии, киньгак а кевкстни.
Маряви, исяк ульнесь васенце лекция, васенце курс. Мельганзо сёксень шкава-малава сакшнось омбоцесь, эзь саво учомс колмоцентькак. Эзть марявояк, кода ютасть университетэнь шалныця вете иетне, эзизе редяяк Видяй, кода сынь теевсть ютазь шкакс. Лекциятне, семинартнэ, лабораториятне, экзаментнэ... велявтсть ютазь эрямокс.
Видяй цёрась неявикс. Сэрьс-лавтовс, чамас — эрьва ёндо ёнсто лиссь. Содамочинь-превень коряскак аволь меельцетнеде. Сырнень медалесь ды якстере дипломось кода а кода мазычинь кис а максневить. Тейтертне сельметь эзть сайне эйстэнзэ, чарасть перьканзо, прок медь парь перька укскат. Ансяк Видяй мерят сокороль, вейкеяк марто вете иень перть эзь малавгадо. Ульнесть кой-кодат вастневемат, ульнесть, кадык аволь пси, палсематкак, сындест башка — пелевеёнкс, вармасо тенсевиця телень пакся.
Мольсь колмоце ие, кода Видяй васенцеде эскельдясь телевизоронь заводонть тарчксонзо трокс. Важодсь конструкторонь бюросо. Тевесь од, савсь ламо ловномс, тонавтнемс, сокарямс инструкциятнесэ. «Псилгалемась» стяко эзь ёма: иешкань ютазь кармась паро конструкторокс.
Эрямось пестэ пес схемас а совавтови. Кой-кона ёнксонзо а шожда тонгомс тов. Нурькинестэ ёвтазь, эрьвань сонсензэ, лия ёнов а молиця эрямозо. Тесэ плантнэ-арсематне а лездыть, нежекс а маштовить. Кемть ансяк эсеть лангс. Муевиндеряй мартот вейсэ, ве лато ало эриця ялга, эряк, ды тесэяк кемть ансяк эсеть лангс.
Сы шкань эрямодонзо, эйсэнзэ ормадонть Витя-Видяй, кадык аволь штелькскень пес, ланга-ланга, содыль. Колмошка иеде теде икеле ардтнесь пичкамкудов. Нейгак сакшны сельмензэ икелев, нусмакавтни, ашо [32] кенкшентень педявтозь кундынесь: «Андролог». Мельсэнзэть чиполасо совамо шкань учиця сонзэ кондят аволь аламо цёратне.
Ванность эйсэнзэ, топавтсть эрьва кодат анализт аволь ве чинь перть. Окойники тевест прядызь, пурнасть консилиум ды путсть диагноз: цёравиень арасьчи.
Кодамо ёжосо теде мейле сась кудов — ансяк сонсь содась. Чамазо теиньгадсь, сельмензэ ваясть, черензэ мерят эзинзе судря таргонь перть. Совась аволь Видяй — раужо пель.
Раужкадат, мариндерят комськолмово иесэ, допрок од цёракс, истямо чопода, седеень невелиця мель.
— Вай, цёрам! Те истя мезе мартот?! — сельведень пачк серьгедсь ризкстэнть Юлия Григорьевна, Видяень чаманзо неезь.
— Мезе... Мезеяк арась, — лепштязь вайгельсэ мерсь тона вийсэ вельмевтезь мизолксонь пачк, мель путсь пря а невтемс. Каня ёвтневить валсо ёжотне, конат сэвезь сэвсть оймензэ?
Авань седеесь мариця, а манясак. Юлия Григорьевна чарькодсь, кавтолдоманзо аламольть, кодамо диагноз марто мурдась Видяй шумбрачинь кудосто. Содыль чачтомадонзо мейле. Секскак кевкстнеме-исковамо, седей марямо эзь карма, апародонть содась умок. Астяко зняро мель, ойме путокшнось пакшастонть те орманть менстемга, кандтнесь эйсэнзэ, якась мартонзо пичкамкудотнева, ансяк... лиссь истя, кода лиссь, кода арсесь ламо-ламо иеде икеле. Ней седеяк келейстэ панжовсь икельганзо аравтозь човине коцтось ды седеяк неявиксэкс теевсь цёранзо икелечизэ, уцясказо. Текекс — эсензэяк.
Видяй каинзе котанзо ды апак корта выр-выр совась эсензэ нупальс, авазо — эсензэ.
Юлия Григорьевна, теке вейксэньгемень иесэ сырькай, кукорьгадозь аштесь кресласо. Шкань-шкань конязь сельмензэ икелев лиснесь Видяень потмура чамазо. Вакска эзь юта, зяроцеде уш сась превезэнзэ се весь, зярдо потсонзо пургондась эйдезэ.
[33] Мирденстэнь сон сельмес теде эзь мерне, кирдсь потсонзо, мекс эйдесь чачсь истямокс. Эськанзо чумондсь Андрей Петровичень, меньксэнтень сюконякшноманзо. Марсесь: алкоголесь — цёравидьмень виев куловтыця. Астяко еврейтне урьвакстомадо икеле иень перть кургозост чапамодонть петнявкскеяк а каить. Те сынь, еврейтне... А минь? Кие илязо уле чумо, тетязо, авазо эли сонсь Вере эрицясь, чумось теевсь, зыянось лиссь, ды те стака канстонть сави кандомс Видяйнень ды аванстэнь меельце минутас.
«Инешки, мезе мон истя теян? — тарск мерсь сазь мельденть Юлия Григорьевна. — Мекс а куш а каш? Мезтни Видяй? Мезеяк берянь илязо тее эсензэ марто...»
Стясь кресластонть ды ютась Видяень нупаль ёнов. Арась кенкшензэ икелев. Кунсолозевсь. Кодаткак гайтть-кашторкст эзть маряво. Састыне панжизе кенкшенть.
— Ярсамо а кармат? — эль марямга кевкстизе кониксэ мадезь аштиця цёранзо.
— Арась, авай, а карман, — таркастонзо апак стя ёвтызе мелензэ Видяй. «Кодат ярсамот... — седейс токизе марязесь. — Мезекс, мезекс нолдымик, авай-авинем, моданть лангс? Майсеме?»
— Мекс? — кевкстизе авазо — ильведькс тейсь; прок сон эзь сода мекс. Чарькодизе тень Юлия Григорьевна, ансяк валось — вал, аволь нармунь, а кундасак.
— Истяк, пекем эзь вачо, — эль марямга, мокнозь мерсь Видяй ды велявтсь копорьёнт.
«Эно стяк куш кайсек, — мериксэль авась, — авадря аштемс таркасо понкссо-костюмсо...» Эзь карма, неть валтнэ улевельть салокс керявозь таркантень.
Юлия Григорьевнанень лиядсь вейке: лисемс, кадомс цёранзо ськамонзо. Лездамс? Содавольгак мейсэ... Лиссь. Мельганзо салавине пекстызе кенкшенть.
Видяй таго мадсь кунст. Кода авазояк, сон яла сувтнесь сы шкань эрямодонзо мельтнень. Содавтнесть удемензэ эрьва кодат кевкстемат: «Мейле мезе, ськамон карман пингем печтямо? Эрить ськамост аволь ансяк ават, цёраткак. Аволь ламо, ды ялатеке... Ды кода аволь ламо? [34] Арасельть эйкакшост Ленинэнь, Чеховонь, Тургеневень, Чайковскоень... Сыречис эрясть эйкакштомо тетянь велень Онаень Миша ды Олдай. Кода илязо уле, прянть нолдамс а эряви. Тень комсьнилееце. Ансяк. Секскак, Видяй, келемтить лавтовот, чирькекс мендик мештеть ды, прянь верга кандозь, — икелев!».
Моли телезаводонь промкс. Залось пешксе. Прявтт, инженерт, лездыцят-важодицят... Ванкшновить иень перть топавтозь тевтне, социализмань пелькстамонь цётавкстнэ.
Вети промксонть заводонь прявтось. Сон ледстни-тердтни, кинень лисемс кортамо трибунанть экшс. Сон — азор. Видяень, Виктор Андреевич Кузоваткинэнь, лиятнень марто пурнызь васень таркас, президиумс. Трибунась тошнакалеме а каднови: эшксэнзэ шныть, сялдыть, пазить... Мезе-мезе, кортамо ломантне тонадсть. Вачо пекеськак келест ливчанячинзэ а озавтсы.
Соцпелькстамосонть, рузкс — соцсоревнованиясонть, изницякс ловизь васенце цехенть. Сцена лангс лиссь сонзэ прявтозо — аволь сэрей, очко пеке, штапо пря цёра. Стясь таркастонзо директорось, мельганзо — профсюлмавксонь сехте покшось. Сынь казизь, венстизь цехень прявтонтень якстере флагонть.
Залось зэрнезевсь цяпамотнеде.
Омбоце рядсо Видяень каршо аштесь, кунсолось-вансь асодавикс тейтерь. Шкань-шкань вить кедьсэнзэ витнесь лавтовонзо ланга нурьгезь нурьгиця валдо кавшаня черензэ. «Ки те истямось? Мекс вестькак эзия некшне? Косто саевсь? Кодамо цехстэ?» — кивчк-кивчк совсесть цёранть превс кевкстематне.
Промксось прядовсь.
Лисемстэ, теке сонсь Пазось мерсь, Видяй эртевсь валдо черь асодавиксэнть, потсонзо толнэнь вельмевтицянть марто. Оршнеме молемстэ зяро-бути эскелькст ютасть чатьмонезь. Васенцекс колызе каштонть Видяй:
— Тон кодамо цехень?
— Васенце. Мекс кевкстнят?
Эзизь редяяк, пачкодсть чувтонь пирявксонть тона ёно аштиця оршневтиця авантень. Максызь тензэ номернэст. Видяй лездась тейтерентень, каизе лавтовонзо ланга ашо пона оронзо-шубанзо.
Лиссть заводстост.
Ушосонть телень чокшне. Зярс сынь лембе таркинесэ аволь ве часонь перть сэвтнесть валтнэнь, прась сэтьме, умок учовикс лов. Китне-янтнэ, кудолатотне, чувтотне копачавсть сельмень кецневтиця, оймень витиця ашосо. Марявсь, келейгадсть юткотне. Неявсь седе васов. Телень коряс лембель. Экше ванькс коштсонть лексевсь шождасто.
— Мерят, васенце цехстэ? — ансяк лиссть ушов, таго ушодсь кортамо Видяй. — Эх, баягапря, допрок стувтыя! Мон — Витя, ялган мерить тень Видяй. Важодема таркам — КБ. Кода тонеть пшкалить?
— Катя, лиясто марсян — Катрин. ОТК-сто, — мештестэ лисиця вайгельсэ чапизе тейтересь весементь, мезде кевкстневсь.
«Кодамо ванькс, гайгиця вайгелезэ...» — арсезевсь вакссонзо эскелицясь.
— Вана истя, сеске тенек теевемаль содавиксэкс, — ёвтызе мелензэ Видяй. — Мазый леметь, нурькине. Шождасто ёвтавиця. Ка-тя! Васолдонь?
— Шабра ошонь, Пензань. Паряк, теть ёвтнемс весе эрямопингем? — пейдезевсь тейтересь.
— Нолдык чумом... Ульнинь Пензасо, мик аволь весть. Мазый, покш, ванькс ошось. Ломанензэяк, меревлинь, истят...
«Кодамат тон, мазыйть ды вечкевикст», — поладынзе валонзо эсь пачканзо.
— Ну...
— Мезе, а истя?
— Пелевидьс — истя! — керизе Катя седе кортакшовонть.
— Тень кода чарькодемс?
— Шождасто: пелест вадрят, пелест...
— Тон, улема, ловить? — марямга скирдызе тейтеренть Видяй.
Видяй тень редизе: «Тевть, паряк, кодаткак кудосо, эли лия кодамояк тувталось..
— Мезесь истя — истя. Кодат ансяк арасть ютксонок, — тейтеренть марто вемельс прась Видяй. — Лиясто содавтнесамам мель: мейсэ, кодамо онкссо — миллиметрасо, метрасо, вайгельпесэ, валдонь эрязачисэ — онкстави юткось кодамояк чопода, коське пряудем атнасто саезь превейдеяк превей академик видьс?
— Ашот, пижеть, раужот... — пеедькшнезь мерсь Катя, прок эзинзе маряяк Видяень валонзо. Марявсь, ульнесь мелезэ кунсоломс седе лия валт. Лиядо.
Видяй тень чарькодизе.
— Истя, истя, ашот, якстереть, сэнть, ансяк эрямосонть, сави меремс, седе сеедьстэ вастневить чопода тюст, — поладызе сон тюстнэде, ломантнень авейкетьксчидест арсеманть.
Састо эскелязь, паро мельсэ кортнесть теде-тонадо. Мартост эсь кельсэнзэ ёвтнесь ваньксчидензэ летьке од ловось — чикордсь эскелицятнень пильгест ало эсь паро ёжодонзо. Эрьвань эсензэ эрямозо. Ловонтькак.
Нурька чатьмонема.
— Тонеть кона ёнов? — нардызе каштонть, пшкадсь Видяй вакссонзо ашо шубасо тейтерентень, «тюсто теориянь» шкиницянтень, лотксема тарканть ёнов пурдамсто. — Мезес, кодамос кармат озамо?
— Мон сисемеце троллейбусос, куншка пелев, — сэтьме вайгельсэ мерсь Катя ды сеске ноцковтызе Видяень ожапеде. — Чиян, сисемецесь, маряви, улияк!
— Пек паро! Моненьгак эряви тона пелев! — серьгедсь Видяй ды келейстэ эскелязь сасызе Катянь.
Совасть удалце кенкшканть троллейбусонтень. Седе виде ули меремс — эцесть. Се тыц пешксель. Ютксост кортамось ялатеке эзь сезеве...
Омбоце чинь валске кавксо чассо вастовсть, кода чокшне кортазель, заводонь келей кенкшенть икеле.
[37] Кельмсемс ушосо а тенень, а тонанень эзь саво, састь кавонест ве шкане. Сеске совасть заводс.
Истя поладовсть Видяень ды Катянь вастневемаст. Видяй эсь асатыкстэнзэ, седеень сэвиця лавшочидензэ, эзь нолда, содави, пельвалгак. Сон марясь-несь тейтеренть марто вейсэ улемасонть манейчи, валдо. Мартонзо ояксчись кирдсь эйсэнзэ нусманячинь домка-кельме леентень совамодо-ютамодо, эзь нолда превезэнзэ нурьганя-навола арсематнень.
Ловов эйзюрковонть поладызе ведьсэ пулькиця, шалныця, лембе ёнов капшиця чадыковось. Сонзэ таркас курок сась панжиков. Апак редяво пачкодсь иенть аволь пек учовикс нусманя-ожо шказояк, кармавтынзе чувтотнень кайсеме сыреждиця оршамопелест пильгест алов. Лов алов видезь розтне-товсюротне те шкастонть шныть пряст ванькс-валдо пижечисэст чипаенть икеле. Теньсэ сынь раштыть ломаненть седейсэ валдо мельть, паро ёжот.
Весть ожосо артозь истямо чистэ, чопотьёнов, зярдо тетязо-авазо аштесть «телепаргонть» каршо, Видяй стясь икелест ды аволь яволявтсь, зэрневтсь куля, конадо...
— Тетяй, авай, илядо талакадо — арсян... урьвакстомо, — каятотсь Видяень вайгелезэ, теке пурьгинень зэрть чинь-зельть, ёвтызе мелензэ апак учо, икеле кортамовтомо.
Каршо — талай гайгиця, пилес эциця кашт.
Тетятне-аватне аштесть вейсэнь нупальсэ дивансо. Анокстакшность мезеяк паро муемс «превиявтыцястонть». Ды сынь эзть сода, кода улемс, мезе меремс. Маряви, кецнемань — цёраст саи-вети тенст урьва, ансяк... Сынь, васняяк Юлия Григорьевна, содасть, кодамо Видяй урьвакстыцясь. Окойники вайгель макссь Андрей Петрович:
— Э-э-э, мон истят превть максовлинь: эрязкалемс а эряви. Теня, колоньгементнень трокс, Видяй, эзить эскельдя. Ков капшамс? А эряви, зярдояк а эряви стувтнемс валмеревксэнть: састо ардат — васов пачкодят. Монь, э-э-э, истямо мелем.
Чатьмонема.
[38] Марявсь залонь стенас понгавтозь частнэнь мадстиця тикаемаст. Курок сень айгизе Юлия Григорьевнань вайгелезэ, талномадонть эйсэнзэ марявсь сорнома:
— Монгак кемекстасынь тетять валонзо: капшамс а эряви. Ансяк тон, Видяй, умок аволь эйкакшат, кода арсят, истя тейть. Ды арсек седе нардевстэ.
Тень эйсэ кудораськень сэредьксэв-кенярксов промкскесь, превень максомась прядовкшность. Кудазоравась таркастонзо стямсто муст-муст мизолдозь пшкадсь цёранстэнь валаня чевте валсо:
— Тон куш невтевлик сы шкань урьванок. Костонь, кить тетянзо-аванзо...
— Тердьса, авай, тердьса, — паро ёжосо, верьга вайгельть алтась Видяй, аванзо лангс цитни сельмесэ ванозь. Прянзо верьга кандозь ютась эсензэ нупалев.
Юлия Григорьевнанень цёранзо яволявтомазо марявсь кежей апаро налксемакс. Эсест нупальсэ мадезь аштемстэ пряванзо чарасть, сакшность-тукшность, Видяень урьвакстомадо эрьва кодат мельть. Теке сёксень чопода, алга уиця пельть ютасть икельганзо, полавтнесть вейкест-вейкест седеень човсиця, эрямонь киртиця артовкстнэ. Сон содась, а стакаль содамс, кодат стакачить учить цёранзо ды эсензэ Юлия Григорьевнань. Весемеде пек майсевтсь кавтолдомась: кармить-арась одтнэ эрямо? Састь мелезэнзэ урьвань саеманть марто керькс стомамотне, тевтне-мелявкстнэ. Сехте покш кажось — сон карми эсь сельмесэнзэ цёранзо пайстомочинзэ, майсеманзо неицякс. Цидярдомс весе тень — шожда меремс! Кодамо эряви нардевчи, кодамо вий...
...Сась аравтозь чись.
Сёксесь элякали, пря шны ожо-якстере каштордыця тюссонзо. Ушосонть коське, маней. Празь лопатнень ланга молицянть пильге алдо коське вайгельтне ледстнить ютазь кизэнть мазый чидензэ, эрямонть паро шкадонзо.
«Вечкемань кужо» ресторанонь вишка залсонть кувака стувор. Экшсэнзэ покшчикс оршнезь ведьгеменьшка инжеть. Серьгедизь сынст Кузоваткинтнэ эрьва кода [39] «онкстнезь». Мель путсть киньгак а тердемасо а покордамс, теке марто велькска а туевеме. Секс а весть мекев-васов кайсесть ноготост, ванкшность сёрмадовксонть.
Стуворонть песэ озадо аштить Витя-Видяй ды Катя. Тейтеренть лангсо оршамось ловдо ашо. Кавшаня, мазыйстэ судрязь-аравтнезь валдо черензэ ланга каязь човине, пачк невтиця ашо вельтявкс. Вить ды керш ёно эйстэст — тетяст-аваст. Катя-Катринэнь авазо одкс-чисэнзэ аволь васов тусь тейтерензэ эйстэ. Мирдезэ ютксост а неяви.
Юлия Григорьевнань покшоль мелезэ ютавтомс урьвань саеманть эрзянь койсэ: кудат, урьвалят, горнойть, урнемат-рамсемат, фатасо копачазь одирьвань ваномат... Арась, теде савсь стувтомс. Шкатне-койтне полавтовсть. А ютавтсак истя. Теяк, чиявтозь тейтересь рузонь кудораськест. Куш покштянь покштянзо эрзяльть, сон уш... Кодат урнемат? Секс савсь кадомс неть мельтнень ды ютавтомс Видяень урьвакстоманзо истя, кода тешкстнить ней ламот, кода лия покшчитнень.
Видяень аванзо ёжонзо а истя коласть те чинть Тешкстамодо мельтне, кода се, мезе карми улеме теде мейле. Эзь кадно эйсэнзэ одтнэнь вандынь валдочизэст акемемась. Секс покш мель учовиця покшчинтень эзь яво, ютавтсь-топавтсь тевтнень аволь седейшкава, мелензэ каршо.
«Стуворонь лувонть» ветясь Миша леляст, Андрей Петровичень лелязо. «Койме» сакалонь кандтний цёра, од атя, валаня, медьсэ вадиця кель. Тердизь нинзэ марто Пичевелестэ.
Стувор экшсэ аштемась мольсь кой-мезень кувалма промкс ёнов: тень лемензэ серьгедьсы, максы шка ёвтамс ниле-вете валт-арсемат, тонань... Васенцекс Миша атя яволявтызе Видяень аванзо.
Юлия Григорьевна стясь таркастонзо, кепедизе винадо пешксе бокалонть, варштась кувака стуворонть кавто ёнга аштиця аватнень-цёратнень, вакссонзо Видяй ды Катя лангс ды талнозь менстинзе турванзо ютксто эрьва кода эсь пачканзо човсезь арсемань валтнэнь:
Неть валтнэнь ёвтазь, турванзо токавтынзе бокалонтень ды путызе сень мекев стуворонтень, комась, кутмордызе-палызе васня Видяень, мельганзо — Катянь. Озась тарказонзо.
Миша атя шканть эзь таргсе, эль кенерсь озамо тарказонзо урьвакстыцянть авазо, маризь Катя одирьванть аванзо лементь.
Рузавась кортась рузкс:
— То, что пожелала детям Юлия Григорьевна (я всё поняла), пожелаю и я: здоровья и взаимопонимания во всём. Видяй и Катя работают на одном предприятии. Поэтому желаю им, кроме семейного благополучия, успехов в работе. Чтобы всё было складно...
Малавгавтызе кургозонзо бокалонть, путызе стуворс. Палынзе мельга-мельцек одтнэнь ды мизолдозь озась тарказонзо, тейтерензэ ваксс.
— А содан, мезде арси кортамо минек ёнкстнэсэ весемеде кол, ёрокчиде пешксе артыцясь-художникесь, урьвакстыцянть тетязо Андрей Петрович Кузоваткин, — кепедьёжосо, верьга вайгельть яволявтсь коень ветицясь, мерят мольсь кодамояк покш концерт.
Стясь, кепедизе бокалонзо Видяень тетязо. Сэрей, аламнеде тутора рунго, сакалов чама...
— Мон, теня, арсян Видяйнень ды Катянень сень, мезе арсесть аваст. Эсень пельде: э-э-э, свал бажамс теемс мезеяк покш, од кенярксонь кандый, ломаннень эрявикс. Неемс-марямс ды эрямс мазычинть марто ояксчисэ. Ну, теня, валдо эрямо тенк, Видяй ды Катя!
Миша атя, стуворонь «енералось», кува пеедькшнезь-згилязь, кува шназь-сялдозь понась-пансь ветямонь пиксэнть. Мель путсь, улезэ залсонть эрьведемат, ойме, [41] улест мизолкст, сельметнесэ кенярксонь сяткинеть, жой морот, киштемат. Макссь кортамо шка телезаводсто одтнэнь ялгаст туртовгак. Тона валсо цилькаеме эзь арсеяк. Кепедизе бокалонзо, мерсь: эряви седе курок нолдамс телевизоронь од марканть. Арсесь одтнэнень мазый, кода телеэкрантнэсэ, эрямо ды сеске пештизе залонть граж вайгельсэнзэ: «Сэпей!».
Видяй ды Катя стясть. Кутмордасть-паласть. Каятотсть цяпамот, мерят сядот гулькат тандадозь либоркс-тасть верев. Кортыця ялгаст костизе бокалонзо ды поладынзе валонзо:
— Заводонь профсоюзось, Видяй ды Катя, кази тенк ней нолдавикс маркань телевизор. Ванодо седеень витиця программат. Эрямонь келей-кувака ки тенк, Видяй ды Катя!
Эрьвела, седеень кецневтиця тосттнэде-арсематнеде, «Сэпей!» сеерематнеде мейле нолдасть морот. Одтнэ ды кить седе байтяк нуртнесть калдордозь айгшизь озамост, лиссть киштеме, кирнявтнеме-чарамо. Сыретне вансть мельгаст, ледстнесть од шкаст, кода танцо-вакшность сынсь.
Вейке киштевтиця моро, омбоце, колмоце. Кутьмеретне, марявсь, летькемсть. Миша атя теде содась, секс тердинзе инжетнень стувор экшс, Курок каятотсть морыцянь лийканя вайгельть. Те Пичевелень аватне топавтызь Юлия Григорьевнань мелензэ, серьгедизь вечкевикс моронзо — «Эрде, ялгат, паро ялгат». Истя мазыйстэ, ваньксстэ, чарькодевиксстэ сравтневсь залганть зярыя вайгельсэ моравикс умонь шкань морось, кунсолость весе, мик кортамонь, седеяк — симезь, вечкицятнеяк.
Ушодкс ды пе. Сынь эрьва косот. Ды эрьва кодат. Паряк, сынтемест аволь уле эрямоськак. А соды ушодкстонть-педенть ансяк Шкась. Кортамот-арсемат, «Сэпей!» сееремат, казнеть, бокалонк зыйниця гайтть, киштемат-морамот... Сась пе сыненсткак. Аламонь-аламонь инжетне срадсть. Залонть пештизе каштмолема.
Аволь куватьс кадовкшность, «чумочинь» теицятне, тетяст-аваст, малавиксэст. Пурнызь стувортнэстэ [42] кадовикс симемапельтнень-мезтнень, учость машинань самонть. Курок састь таксить, ды сыньгак кадызь эрьгелема тарканть, тусть кудов.
Урьвакстома, урьвакстома... Мирденень лисема... Зяро мелявкст, оймень, рунгонь вийть, зяро анокстамот, шка зяро эряви! Дух а умок, сизьгеменынка-кавксоньгеменьшка иеде икеле, сынь янксемас эзть ветне. Бути ветнестькак — чуросто. Ламот ажия юткс вейсэ совицятнестэ юткстост эзть лисне ды усксть кудораськень мелявксто пешксе стака крандазонть куломазост. Те — сестэ.
Ней...
Ней ажиятнень ютксто лисить совицятнестэ Пеледест ламо. Явить. Мазый чиявтомадонть-урьвакстомадонть ледстнемакс кадыть... уроз ды пельсуроз пайстомо эйкакшт.
Ютась весь. Юлия Григорьевна стясь чоподава. Удомаськак... ансяк лемезэль. Котьмась панннупальсэ. Анокстась, куш ламо мезе кадовкшнось чокшнестэнть, валскень ярсамо. Шкань ютазь совась, вал эзь ёвта, Андрей Петрович. Сон кенерсь таргамо, нарамо, шлямо-нардамо. Молема-ардома тензэ мастерскоев, тосо учи эйсэнзэ «Сэредиця сёксь» пейзажозо. Частнэ невтсть сисемде ламо. Важодеме пурнама-сэрняма Видяй марто Катяненьгак. Сеске Андрей Петрович мельга сыньгак совасть панинупальс. Мельцек-мельцек, эль а вейсэ арсесть тетяст-аваст, атявтост-ававтост туртов шумбрачи. Чамасост неявсь сизема ды удомань а явамо.
— Шумбратадо, шумбратадо, — арсесть каршост Юлия Григорьевна ды мирдезэ.
«Кода венть ютавтынк?» — эль эзь кирнявто стуворонь азоронть кельпрясто кевкстемась. Шкастонзо чарькодсь: теньсэ секень вант покордавлинзе.
— Озадо. Тон вана тезэнь, Катя. Тон, Видяй, содасак таркат, — кулдордыця вайгельсэ кармавтнесь ды невтнесь кедьсэнзэ аваст.
[43] Озасть, озавтневсть. Панинупалень прявтось каванясь, топавтсь ярсыцятнень мелест: кинень пенч венсти, сянгине, Нардамине, кинень мезеяк ваканозонзо «верьга» каи... Кенерсь теке марто салавине, илизь редя, кайсеме вановтонзо каршонзо аштиця одтнэнь лангс, мель кирдсь неемс чачостост мезеяк ютавтозь васень веденть кортыця. Кода эзь ванно, мезеяк эзь нее: а паро, а берянь. «Паро куш кезэрень коенть — одтнэнь стямодо мейле невтнемс алгаацамотнень — стувтызь. Се коенть коряс тейтересь лововиль алкуксонь урьвакс сестэ, зярдо кадовиль ашо ацавксонтень якстере таркине. Те кемекстыль: тейтересь мирденень лисемадо икеле лия цёра марто арасель», — кирдевсь Юлия Григорьевнань превсэ. Улевельгак икелекс, лисевель истя, прок Катя а тейтерь, кие-бути марто вастневсь. Эх, эрямо-эрямо! Эх-вай-вай, шкат! Кода пек полавтневтядо...
Эрить Видяй ды Катя чи, омбоце, эрить тарго, лия, эрить ков... Кузоваткинтнэнь урьваст, зярдо чокшнеланга пурнавить вейс, седе ламо чатьмони. Кортамосонзо седе сеедьстэ марсевить «истя» ды «арась» нурька валтнэ. Турванзояк чуросто мизолдыть. Мирдензэ марто васень читнень коряс та-кода киртятотсть келест-валост. Прянь ветямосост сынь неявсть сёксень нувара, кельметнеде тюжалгадыця-пужиця балягакс.
Кудонь тевтнень ускицянть вановт вакска те эзь юта. Кевкстнемс? Ва-ва, иля арсеяк, а ён. Эзизе снартнеяк. Кевкстнемскак теде Юлия Григорьевнанень ульнесь а мезть. Чарькодевсь истякояк: вейсэнь эрямонь лувост а кецневти, кудораськень ёжост эскели ёколдозь, эсь потмоваст вайкстнезь. Юлия Григорьевна — ава. Каня сон а соды, мезе, ламо лиядонть башка, эряви авантень?
Умок эсь пачканзо тень тешкстызе тетясткак.
Ютась ков. Мольсь омбоце.
Шлямочинть лангс апак вано, Андрей Петрович пурнась-сэрнясь, ярсась, сыргась «Сэредиця сёксензэ» прядомо. Зяроце ие уш носки лангсонзо. Те тюсось а туи мелезэнзэ, тона, тесэ эряви седе тустосто, тосо — эль-эль [44] валдосто. Токавтсы цёкинензэ, таго а истя, вельть валдосто лиссь, эряви витемс. Шкинема... Пе а муят «витнематненень».
Лиссь кудосто, яксевтсь кодат-бути эсензэ мелявкст Видяйгак.
Юлия Григорьевна теинзе кой-кодат тевензэ ды вейсэнь нупальсэ вансь шумбрачинь ванстомадо вечкевикс невтевксэнзэ. Апак учо совась Катя. Озась диванс ававтонзо ваксс. Зярс-бути вансь валдо черь сельмукшсо аванть-ёвтницянть лангс. Кодамо ормадо сон ёвтнесь, Катя эзь маря, сонзэ пряпотсо мольсь лия кортамо.
— Авай, энялдан, лоткавтык аламос телевизоронть, — мерсь Катя телекортыцятнень валост пачк.
Юлия Григорьевнань талакавтызе те энялдомась. Зуйк мерсь седеезэ. Эскельдясь «сэнь сельментень» ды лепштизе эрявикс плаштянть. Теевсь општ.
— Пелян, авай, нуваргавттан, ды сави ёвтамс... — эль марявикс вайгельсэ ушодсь Катя ды нолдызе прянзо, теке тейсь кодамояк берянь тев.
— Бути ёвтама, тейтерем, — ёвтык. Кодат казямот валот иляст уле, кортак, кортак, кунсолотан, — седейшкава лемдизе урьванзо тейтерекс ававтось. Пек уш туекшнесь мелезэнзэ кудозост совицясь, секс истя тензэ пшкалесь-как — «тейтерем».
— Мон, авай, ванды туян, — апак капша, мелявтозь ёвтынзе валтнэнь Катя,
Теевсь општ.
— Узко-ужо, а чарькодеви, те кода истя? Ков туят? — кезгемсь-зала кадсь, аволь сеске мусь марязенть каршо валт Юлия Григорьевна. — Истя мелезэнь туекшнить...
— Туян, Юлия Григорьевна, тынк кедьстэ, — сюмора вайгельсэ пачтизе мелензэ вакссонзо аштицянтень Катя.
Кудазораванть пачк кивчк ютась кельме нал. «Мезе учинь — се лиссь», — тешкстызе эськанзо. Теде мейле кевкстнемскак а мезть. Содась — тенень улема. Ялатеке седеезэ эзь кирде, пшкадсь ней уш, ловт, икелень урьванстэнь:
— Тувталось мейсэ, а ёвтасак?
Ававтозо чатьмонсь. Кунсолось. Мезе мерят, урьвазо мезеяк од эзь ёвта. Ней марязденть сон содыль Видяень чачома чистэ саезь.
— Косо кармат эрямо? — лиядо, аволь туемань тувталдонть, пшкадсь Катянень. Седеймарязь путызе керш кедензэ сонзэ лавтов лангс.
— Зярс вейсэнь кудосо, косо эринь. Мон уш кортынь, энялдома сёрмадынь. Шкань ютазь — ванса. Паряк, аванень велявтан, Пензав, истят мельтькак тень сакшныть, —чамдызе потмонзо, ёвтызе, мезе ёвтыксэль, Катя. Озась седе видестэ, кедензэ путынзе кумажанзо лангс, нежедсь диванкопорентень.
Юлия Григорьевна кунсолось сень, кона марявкшнось тензэ эсензэ тейтерекс, марявкшнось эрьва ёндо. Сонзэ арасель тейтерезэ. Муевкшнесь тензэ, аваломанентень, седе малавикс ялга. Секс те кулясь рестедизе марявиксстэ. Превганзо уйсть, прок сёксень чопода, алов новолезь, вейкест-вейкест сасыця пельть, ризкстэ пешксе мельтне.
— Видяйнень ёвтыть туемадот? — сезизе лисезь нурькине чатьмонеманть Юлия Григорьевна, чопода экранонть лангс ванозь.
— Ёвтынь, — укстась Катя. — Талай чатьмонсь, мартон эзь корта. Сонгак майси, эстензэ тарка а муи, пря чави, ансяк... — кирдизе келензэ, эзизе прядо, мезе мериксэль.
— Зярдо, тейтерем, кадомонок кармат? — сорныця вайгельсэ кевкстизе Катянь, зярс невак урьванзо, Юлия Григорьевна. — Истя тонадокшнынь эйзэть, ней — явома. А кемевияк...
— Ванды, авай, таргочистэ, мон уш ёвтынь. Видяй ильтясамам. Чопоньпелев. Чинь ютазь, атяньчистэ, — важодеме. Кода свал.
[46] Теньсэ сэпейдеяк сэпей кортамось прядовсь. Олгонь урьвась састо явовсь диванстонть, ютась эсь нупалезэст.
Юлия Григорьевна кадовсь ськамонзо стака арсеманзо марто. Нолдызе кортамодо-морамодо а сизиця телевизоронть. Яла лезды куш аволь куватьс ахолдамо прястонть навола-педиця мельтнень. Экрансонть лимкаесть чеченэнь ды Кавказонь лия раськень киштицят-киштемат. Вансь — сонсь мезеяк эзь нее. Сон пельксэнь-пелькс ледстнесь, эзь кирдеве, Видяень урьвакстоманзо. Мезть путневсть стувортнэнь лангс симеме-ярсамо, кить сакшность, кить-мезть кортасть, кодат казнеть казнесть. Ледсь мелезэнзэ Катянь рузава авазо, вайгелезэ, мазый чамазо, тейтерензэ кондят черензэ...
Мельть, мельть... Кодат шождат сёлмонк! Ков ансяк а пачтятадо, ков ансяк а сайнетядо! Кивчк — ды Юлянь арсемань керьмезэ полавтовсь, састь — зяроцеде уш! — Видяень чачтомадо ледстнематне. Ледстявсь, кода цёрынезэ тонадсь стядо аштеме, мейле, аламонь-аламонь, стякшномо, якамо, вал мельга вал — кортамо. Кода те умок, умок ульнесь!!! Ды теке — течи...
Васенцекс сыргозсь Видяй. Сельмень апак панжо, талай аштесь кунст мадезь, пельсь лыкамосонзо сыргозтемс тензэ копорьёнт удыця Катя-Катринэнь. Стяко мелявтсь. Низэяк панжинзе сельмензэ. Явась удомазо. Течи таргочи. Эрязкалемс а ков. Катя мадсь кунст. Таргизе керш кедензэ тавадксонть алдо, путызе ланганзо. Тень неезь-марязь, Видяй велявтсь вить ёнов, кутмордызе, лепштизе ёжозонзо штапо нинзэ, вадяшинзе-сюворинзе мештензэ. Оймась.
— Мезе, те вейсэнь меельце венек ульнесь? — ушодсь Видяй тошказь, саизе кедензэ нинзэ мештестэ, мадсь кунст, путынзе-аравтынзе кедензэ прянзо алов, венстинзе пильгензэ, венемсь.
— Ме-е-ельце, — валонть кувакасто таргазь, кемекстызе Видяень кевкстеманзо Катя-Катрин. — Лездат тень кандомс курмом-кармом вейсэнь кудов? Мон уш теде аваненьгак меринь. Канстоськак, мерема, ах-ох...
— Ды тевесь эно а теньсэ, — Катя аламос каштмолезевсь, теке пупордясь, мейле поладынзе валонзо: — Видяй, а чумондат монь?
— Арась. А мезень кис. Тевесь, содат, аволь тонь эйсэ. Монгак... а чуман, — эль марявиксстэ ёвтызе мелензэ Видяй ды одс велявтсь, полавтызе аштема ёнксонзо, путызе керш кедензэ аванть панжадо лавтов лангс.
— Истя, истя, тонгак а чумат. Сестэ кие? — лия ёнов велявтызе кортамо лувонть, ашо потолокс ванозь, Катя.
— Кода меремс... — стакасто, теке кармавтозь, лиссть Видяень валтнэ; мезе ёвтыксэль, эзизе ёвта. — Шказо, вечкенимем, стямонь. Авам умок учи эйсэнек. — Ды пурдызе кортамонь чудильманть аламнеде лия чирев: — Вечкилитинь, Катя, вечктян нейгак, ды вана сави явовомс, — аволь васенцеде мерсь эсь ёжодонзо нинстэнь.
— Монгак. Теке исяк улнесь заводонь се промксось... Эзик стувто? Тон икельце стувор экшсэ, президиумсо. Мон — залсо. Неитинь сестэ васенцеде. Ды сеске, васенцеде неезь, совить седеезэнь. Арась, а поладови се маней валдо чись. Пазось, нать, эзь мере...
— Истя, Катя-Катрин, — валтнэнь ёвтазь, Видяй штавтызе тавадксонть ды эрязасто нолдынзе пильгензэ кияксос, стясь коникстэнть. Мельганзо текень теизе Катя низэяк.
Уцяска...
Аволь чуросто савкшны марсемс: эрьвась сонсь сонзэ чапи, ламось эседеть ашти. Арсят-теят — аволь свал истя. Бути чапови эрямонь лувозо ломанентень, виде — те уцяска. Ансяк истямокс сонзэ — ёроковокс, тевс бажицякс — чачтызь-кастызь тетянзо-аванзо. Тень шожда лемдемс «казезь уцяскакс». Тетятнень-аватнень, эрьвась соды, эйкакшось а кочкси. Те уцяскань тёкш. Сындест, васняяк авадонть, ламосо ашти пакшаст эрямо кизэ, уцясказо. Истя, ансяк эрси лиякскак — берянь авань [48] пакшась касы превей, икелев-верев, мик тештетнень пелев бажиця ломанекс. Ансяк истя эрси вельть чуросто... Уцяска... Соды кияк, кинь кодамо карми улеме?
Видяй ды Катя допрок од ломанть. Меремс, аволь келей киланга эскелить, пайстомот — а виде. Ялатеке Катянь уцясказо карми лия, Видяень — лия. Кодамо?..