Поладкстомо (2016)/Поладкстомо/6
[74]
VI
1960-це иетнестэ СССР-нь прявттнэ-ветийтне окойники лекстявсть шождасто — мусть, марявсь тенст, неже, конань лезкссэ велесь велявты панжиця умарь-ламарь пирекс, топавтови иестэ иес атопавтовиця ярсамопелень программась. Истямокс, арсесть, карми улеме модапанксонь явшемась ошонь эрицятненень: максневсть неть «панкстнэ» лейчирева, пандочамава ды лия а ён таркава. Тень лемезэль, видьстэ ёвтазь: нолдамс ломантнень касыця тикшеде ярсамо. «Ярсадо, трядо прянк тынсь!» — а стакаль чарькодемс.
«Ярсамо нолдазтне» капшазь кундасть тевс: озавтнесть умарьчувтот, шукшторовонь-мезень тоярат, атямарть... Тарка кадность эмежтнененьгак: помидорт, куярт, чурькат, пурькат... Путнесть васень иетнестэ, зярс чувтотне вишкинельть, модамартькак...
Сайсть «панкске» Кузоваткинтнэяк. Оштонть аволь васоло. Коське пандочамасо. Зярыя иень ютазь Видяень тетязо путсь кирьпецень кудыне. Путомадонзо икеле кияксонзо алов вачкась кирьпецень аберянь мацтке.
Истят мельтькак Андрей Петрович кирдсь превсэнзэ: шка карми, этюдонь сёрмадомскак тесэ ён ули. Шабрасо виресь, велькссэнзэ седе сеедьстэ ванькс домка менелесь сынсь эцить коцтот лангс. Кедесь веши цёкине. Ансяк курок чарькодевсь: «панкскесь» максозь аволь тень туртов. Этюдонь сёрмадомадо арсематне кадовсть арсемакс, шкань ютазь сыньгак стувтовсть. Пандятне эзть мере ледстнемскак теде.
Андрей Петрович сакшнось «усадьбазонзо» аволь цёкинесэ важодеме — коймесэ ды модакайсэ. Ояксчи [75] мартост кирдсь чадыковсто ловонь прамс. Вана теть этюдт! Атядонзо эзь кадново Юлия Григорьевнаяк. Университетэнь тевдензэ башка, аволь аламо шка ютавтсь пандятнень велькссэ. Якась мельгаст прок эйкакшонзо мельга. Вейкеяк аэрявикс тикшине эзь нолдтне. Лездась цёрынезэяк, тейсь мезе тензэ теевсь.
Инженерэсь, врачось-хирургось, тонавтыцясь, математикань-физикань докторось, балеринась, эсь тевдензэ башка, улезэ умарень-эмежень кастыцякс, сокицякс-видицякс. Мезень кис сестэ зярыя иеть тонавтнемс, яжамс пря, бути профессиясь а карми трямот-андомот? Андрей Петрович, кода низэяк, чарькодсь: коймесэ-модакайсэ барцаязь масторонтень эрицянзо а андовить, сюпавчись а учови. «Пряудемсэ чопода таркат!» — яла мерить сёвнозевезь теде нить-полат. Кодамо лезэ, меремс, балеринанть модасо котьмамо донзо?!
Ульнесь эно парояк дачань тевтнес Совамодонть. Ярсамкаень кастомадо башка, модасонть котьмамось пештясь шканть, конань кой-кинень а ков ульнесь теемс. Рунговийсэ, кедьсэ важодемась кода а кода лездась ванстомс шумбрачинть. Васняяк, озадо нежедицятненень. Неень эрямосонть истятнэде — сёлт сёлтак.
Мезесь эзь тукшно Кузоваткинтнэнь мельс: «панкс-кест» пек веёноль. Ошонть ве пестэ ардомаль омбоце пес. Тень ютазь, малав колмо вайгельпеть пильгеть чавомань ялго. Чавонь кедть — те эно тей-тов. А сёксень самга? Зярдо ушодыть кенереме эмежтне-умартне? Кандт ды ускт ведратнень! Кува-акакс теевить колмо вайгельпетне... Лиясто улемаль тосо чинь-кавтонь ютазь. Кенерть, варчик!
Кода улемс? Кадомс, миемс?
Арсесть-тейсть ды састь мельс: рамамс машина, урныгай, кода корты шабраст Иваныч. Иешка-кавто таштасть ярмакт, иешка Андрей Петрович «порсь» ардтнема койтнень. Видяйгак эзь кадово тетядонзо, сонгак теке тевентень кундась.
Окойники Кузоваткинтнэнь эчке жестьстэ «пидезь» гаражозост совась валдо-пиже тюссо цитниця «Жигули».
[76] Мезть иля корта, пиресь-дачась, «Жигулись», перьканзо мелявкстнэ ульнесть паро ормаменьксэкс Видяйнень ды тетянзо-аванзо туртов минень-сюнонь сэредькстнэде — рунгоньгак. ойменьгак.
Тей-тов ардтнезь, пирень тевтнесэ эрямось мольсь талай. Мейле Кузоваткинтнэ рамасть эрзянь велестэ — ошстонть ведьгеменьшка вайгельпень ютко — кудо. Меремс, вадря, покш, од — а мерят. Кудо кода кудо. Андрей Петрович ловизе вадрякс сень кувалма — юртозо кевень, валозь. Эряк эйсэнзэ, иля мелявто, куш сядодо ламо неть. Паро лато ды нардев алкс — сынст эйстэ аштияк эрямо тарканть питнечизэ.
Ялатеке эрявсть аволь аламо вийть ды ярмакт, Эрявсь лембелгавтомс кудонть потмо ёндо, ацамс-велыямс кияксонть, стенатнень, потолоконть чувтонь пилявксонь плитасо. Вальмакундотнень, коняксонть артызь валдо-сэньсэ. «Теке Есенинэнь чачома кудозо...» — Тешкстакшнызе сестэ ды нейгак ледстни Кузоваткин,
Низкий дом с голубыми ставнями, |
зярдо эряви ды зярдо а эрявияк ледстясынзе Андю ине лирикенть валонзо, сень, конань ундоксонзо ушодовкшность Эрзянь Масторсо.
Пиревтеме, эмежень пандявтомо, умарьчувтовтомо, шукшторовонь-мезень тояравтомо кудось а кудо, Мик эриця мартояк а кудо...
Стакачитнеде ульнесть кирьгава. Таркась покш леень келей лаймесэль. Секскак ведесь маласоль — кавто-колмо коймепенчень сэрьсэль. Савсь чувномс ведень валгстома-нолдама латкинеть. Кудонть перька «элякалесть» Калькуракшт. Сынст эрявсь сандямс ды мейле уш чувномс-чупонемс моданть, тейнемс пандят. Истя, мерема, тейнесть ламо иеде икеле покштянокак. Малав истямо улав савсь ускомс од таркас сыцятнененьгак.
[77] Шожда меремс... Неть лишмень, илязо уле тракторонь. тевтнень савсь ушодомс ды прядомс Андрей Петровичнень, ловт, ськамозонзо. Кудонть рамамсто Видяйнень топодекшнесть кевейксэе, тонавтнесь университетсэ. А мерат, эзь лезда. Лездась, ансяк васень «лишмекс» ульнесь тетязо. Стакаль тензэ. Эрявсь важодемс пиресэ ды аволь аламо шка максомс мольбертэнтень. Артыцянть частнэ кедте эзть кирде: зярдо сы мастерскоев, сестэ сы. Ансяк тевтне сынсь эскелямо а кармить. Теемат. Шкинемадо кортамскак а мезть. Ломанесь теке полонс понги. Потязь потясы тевесь. Сеть шкатнестэ Андрей Петровичень «Тундо велесэ» картинанзо рамакшнызь паро питнеде. Ярмактнень лангс рамакшнызеяк «сэнь сельме» те кудонть.
Юлия Григорьевна важодсь университетсэ аравтозь лувсо. Кодат эсеть теветь иляст уле, максыть часот шкастонзо. Ды парсте анокстазь. Ветясь курсонзо аволь ие-омбоце. Пувтык вень куншкат, ёвтнесы куш кодамо темань уроконзо. Анокстамс ялатеке эрявсь. Те илязо стувтово, лия...
Витя-Видяеньгак прявтозоль шкась. Шлямочиде ды таргозиде башка, кавксо чассто саезь кемзисемгес ульть телезаводонь кабинетсэть, сокаряк-вешнек информация Интернетстэ, лездак, кинь «пупорди» программазо. Меельце иетнестэ сон топавтсь программистэнь тевтнень. Лововсь компьютерэнь кол содыцякс.
Весть буссо кудов ардомсто Видяень превс совась эстензэяк сеске ачарькодевикс мель: «Паряк, весе тень, те стомамонть... псакань пулалов? А? Налкставсь... Мезеяк од арась, чистэ чис теке. Перькат некеть чаматне, некеть кевкстематне, тевтне... Пандытькак... Ансяк ков молят? Ки теть анокстась лия тарка? Зяро а зяро пандыть... Кудосояк певтеме вейкетьксчи, Мезекс те чаво-коське эвтемась?..».
Кармась учомо сюконьчинть.
«Карминдеряй чись лембе, маней, сестэ кудов апак ардтне озан «Жигулизэнь» ды — велев, Чуварлеев. Тосо, вирьчиресэ, седе шождасто лексеви, седе парсте марят ёжот, эрявиксэкс маряви эрямот».
[78] Иетне — кода часонь кувака, минутань налось, конань молемазо а неяви. Ламо мезе ваясь шкань эрькентень. Кадовсть ледстнемакс читнеяк, зярдо тетят-цёрат ардтнесть валномо-кочкомо «панксозост», зярдо «сокасть», тейсть пакся велесэ рамазь кудонть перька. Шкась а соды а ушодкс, а пе. А соды удалкскак, ансяк икелев, ды седе эрязасто!
...Мезе ульнесь, ульнесь. Кадовсь. А велявтсак. Видяй умок кадызе заводсо важодеманзо, теевсь чадыковсто саезь телес велень эрицякс.
Эрямосонть кодат ансяк дюният а эрсить. Икелень электронщикесь, компьютерэнь кол содыцясь теевсь, мерть, агрономокс. Модась, пандятне, эмежтне, каршост пиче виресь — теке кияк муинзе — теевсть тензэ пазонь кондямокс, ламонь кувалма — эрямонь смустекс. Шканзо, виензэ, содамочинзэ макссь сыненст, макссь модантень.
Интернетэсь панжсь тензэ содамочиде пешксе келейдеяк келей пакся. Превскак тензэ, электрононь азоронтень, эзь саеве, кодамо сюпав флорасо-мейсэ Масторось, соксевиця модась, конанень нарьгазь, коськестэ, седейтеме мерить «велень хозяйства».
Кода-бути весть Видяй совась модамасторонь келес сравтневезь алтымантень ды эртевсь «клюква» валонтень. Ловнынзе лезэвчидензэ сёрмадовкстнэнь. Сюпав теньсэ, тонасо, эйсэнзэ Менделеевень таблицасто, ловт, пелест элементтнэ, теде башка эрьва кодат витаминт, чапаськайть, ламбаськайть...
Превть максовсть статьясонть сонзэ путомадо, мельганзо яксемадо, раштамодо. Ёвтневсь эйсэнзэ таркатнеде, косо касы, модадонть.
«Клюква — касынькаесь аволь минек ёнксонь, — арсезевсь Видяй. — А бути варчамс?» Почта вельде сон кучовтсь зярыя нетькскеть Чуварлеев. Шказоль тундонь куншка. Самай озавтнема шка.
Кучовксонть само чистэ чокшне ланга пурнавсть паникудос ярсамо. Юлия Григорьевна кайсесь вакантнэва калонь прясто ансяк пидезь, тантейстэ качадыця ям. Видяй керсесь кши.
— Мекс стяконь? — велявтызе прянзо тетянзо ёнов, эзь са мартонзо вемельс цёразо. — Варчамс эряви, стяконь-аволь.
— Сестэ, теня, тонь мелеть коряс, Африкань пальмаяк озавтома? — эсензэ мендясь Андрей Петрович.
— Африкась — Африка... Архангельск, Коми — те лия тевесь, — псистэ идесь пря Видяй, ды лиссь аволь пек видестэ.
— Саты, саты тенк кечкеремс. Пенчть саеде, ямось кельми, — кардынзе пелькстыцятнень стуворонть вакссо стядо аштиця азоравась.
— Кодамояк аволь лия. Э-э-э, минек ёнксось ды Коми масторось — кавто допрок лия ёнкст. Секскак ушодат, э-э-э, чаволань тев, — апак капша аравтнесь таркаваст валтнэнь Андрей Петрович.
— Тетяй, сестэ кода чарькодемс Хрущёвонь? Сонзэ кукурузанзо ды Ине Петрань модамарензэ? А? А куяртнэ-помидортнэ косто саевсть? Менельстэ? Паряк, ёвтасак? А? Пазось кучинзе? Ней лововить эсенекекс, — «озавтызе» тетянзо Видяй.
— Ды те, э-э-э... — моткодезевсь каршо Андрей Петрович.
— Теяк, тетяй, модась пиресэнек — самай клюквань. Начко. Ведесь маласо. Сон вечки истят таркат, — сэтьместэ поладызе «уроконзо» Видяй.
— Теня, тон уш... — пейдезевсь валтнэнь ёвтамсто тетязо ды комавтызе прянзо ваканонть вельксэс, — зняро иля фантазирова!
Шкась весементь таркава аравтни. Ютась ие, полавтызе омбоце... Пайстомо касынькаесь, кода ансяк эзь яка мельганзо озавтыцязо, эзинзе изня лангозонзо празь стакачитнень, ундокст эзь нолда, коськсь. Мартонзо коськсь Видяень мелезэяк раштамс-нолдамс тесэнь ёнкстнэс од умарь. Эзь чарькодевкшне тензэ: клюквась касы вирьчувто алга, а эряви тензэ видестэ валовиця валдо.
[80] «Лондадсь, эзь топавтово мелем. Эрси... Ней мезес вередемемс, кодамо тевс кундамс?» — совсесть Видяень превс ды липнесть пряпотсонзо арсематне.
Таго идизе Интернет ялгазо. Сон пачтясь кодамо-бути асодавикс топинамбурдо. «Лемесь ансяк мезе ашти — топинамбур... Мейсэ, содамс, сон паро?..» — чачсь Видяень превсэ кевкстема.
Ловнынзе асодавикс касынькайденть сёрмадовкстнэнь: «Астрань буень, тикше, раштави, кода модамареськак, клубнясо; касомань покшолмазо пачколи колмо метрас колоньгемень вете сантиметрас». Сэрденть башка, Видяень абунгавтызе лиясь: сон тештень буестэ, лисни, малавикс чиньжарамонтень. Теке марто ютксост покштояк покш авейкетьксчи, ды аволь ансяк ботаникань. Чиньжарамось видневи видьмензэ кис — эйсэст ламо ой. Топинамбуронть эрявиксчизэ ундокссонзо касыця клубнятнесэ — сынь молить ярсамопелекс ломантненень — ды лопатнесэ-нетькстнэсэ, конат силосокс максневить ракшатненень.
«Мезе, теевтяно содавиксэкс мартот, топинамбур ялгай? А?» — мизолдозь мерсь эстензэ Видяй, ансяк лоткавтызе компьютерэнть. Стясь стуворонть экшстэ, мекев-васов яксезь, ахолясь зярс-бути кедьсэнзэ, кайсесь ды путызе прянзо тодов лангс.
Зярс эзть коняво сельмензэ, чарасть-велясть прясонзо васня од тевдензэ арсематне, мейле прок менельстэ прасть Лиянадо ледстнематне, конантень верьгедекшнесь Видяень васень вечкемазо. Сась мелезэнзэ кечкерезь-пеедькшнезь кортамост зярдо сынь мольсть сёксень сырнесэ ацазь кевень янганть школасто кудов. Вейкень пес ванстовсть превсэнзэ Лиянань валонзо, сонзэ вайгелезэ. «Телекамерат сестэ арасельть. Куш экрансто ней неевлия. Фотозояк эзь кадово... Куш лип меремга чопавтовлинь ламарекс панжовиця шказон», — меельцекс ютась превганзо матедевемадо икеле.
Арсезь — теезь. Чадыковонь прядовомга Чуварлеень почтань кандтницясь ёвтась: Кузоваткин Виктор Андреевичень лемс сась Кучовкске. Сась — паро. Панжиковонь [81] васенце читнестэ пельведра малава од эмеженть путызь. Путызь пирявксонть кувалт модамарень путнема лувсо.
Ней цёранзо те «од эскельксэнть» каршо ульнесь Юлия Григорьевна. Эзь тукшно мелезэнзэ. Ловсь элякалемакс.
— Стяконь тев ушодыть, цёрам. Клюквась, ней те... Кортамотне, келя, сон лезды а ормалгадомс раксо, — мазый, седе виде, нулгодькс кенгелемат. Туиндеряй, ярсамс, зяро путыде, а эряви. Аэрявикс мелявкст эстеть таго раштат. Сынтеместкак ланга чудить: ускт, кандт, кепсек, чувнок, кочкт.., — инзамонь кондямо валсо каванизе авазо Видяень.
— Э-э-э, мезекс весе те, алкукскак? Теня, ботыть-ботыть клюкват марто, ней, э-э-э, таго, — вайгелень апак кепеде, мелень ванозь превть макссь Андрей Петровичкак.
— Виде, касынькайденть сёрмадозь вадрясто, шназь. Рекламань кельсэ. Эряви эстенек варчамс, — эзь са тетянзо-аванзо марто ве мельс Видяй. — Мелем эсень сельмесэ неемс сэрьксэнзэ.
— Кавто иеть, теня, чарыть клюкванть перька, ней, э-э-э, «эсеть сельмесэ» кармат ваномо «гигантонть» лангс, — мотордозевсь Андрей Петрович. — Тикшень сымесэнть эйстэст тёжадо ламо. Каня, э-э-э, «ванновить»! Пиресь — аволь НИИ... Тевть эряви теемс, тевть...
Видяй седе тов кортамост кунсоломо эзь карма. Ютась «эстензэ», озась компьютерэнь стуворонть экшс...
Эзь марявояк, прядовсь кизэсь. Ульнесть зяро-бути пси чить, ульнесть сэтьме лембе пиземеть. Сакшность ёндол-пурьгине марто жойсэ ваныцяткак. Кецнесть, мельспаро кирдсть аволь ансяк Кузоваткинтнэ, сынст «од эрицясткак». Топинамбурось люкштядсь менельс. Марявсь, сэрейгадсь аволь колмо — ниле метрас. Аволь тикше — вирь. Пирявсь пиже пирявкс шабратнень ды эсест пирест юткова.
Течи — читнестэ чи. Маней, шканзо коряс лембе. Теке аволь таштамковгак. Пувси чикуншка ёнксонь лембе важов вармине. Тетят-цёрат Кузоваткинтнэ сайсть латалдо койме, ведрат ды лиссть «паксяв». Каршо чистэнть Видяй «керясь вирь». Узересэ мода ёжова, юрга керсинзе пиже лопа нетькстнэнь ды усксинзе пирепес.
Тетязо поксарясь, теке максазей, моданть, мокшнашка сюракшов клубнятнень кайсесь ведрас.
— Мезе мартост кармат тееме? — кевкстизе цёранзо. — Сэвемс — иля арсеяк, зняротне а сэвевить.
— Мезеяк теян, — каясь вал, эзь сода мезе лия меремс Видяй.
— Пелян, тундос а ванстовить, пелест савить ёртомс, — тевензэ апак кадно поладынзе валонзо Андрей Петрович.
Превсэ сюпавтне умок редизь: ломанень эрямось ашти кавто пельксстэ — неявикс ды анеявикс. Кузоваткинтнэнь эрямо леест лангс ваномс чудсь апак капша, тевсэ-мелявкссо: сайсть дача, рамасть машина, шкань ютазь аламонь-аламонь теевсть пельсвелень эрицякс — рамасть Чуварлей велесэ кудо, путсть пире. Те — эрямонть неявикс ёнксозо.
Эрямосост те шкастонть, арсезеват, кодаткак сёвномань бурят-кандыловт эзть кепсеве, арасельть кодаткак ризкст-кеняркст. Те, содазь, а истя. Эрьва мезть ульнесть, кода весень. Ансяк сынь ютасть киненьгак апак ёвтне, апак невтне, салава.
Те — эрямонть омбоце, кекшневиця пельксэзэ.
Анеявикс эрямось мольсь, а мезть кавтолдомс, Кузоваткинтнэнь юртсояк.
Топинамбуронь таргамсто-кочкамсто пек токакшнызь Видяень сэредькс тарканзо тетянзо валтнэ: «Омбомасторонь тикшетнень марто котьмамот — стяконь тев!». Седейс сынь шоркадекшнизь цёранть.
«О-хо-хо, тетяй-тетинем! Тонетькак превс а саеви, а чарькодеви эрьва кодамо буень тикшетнень марто котьмамом. Видькстан, седеем витеви пиже масторонь касынькайтнень марто вастневематнеде, эйстэст седе ламо содамодонть. Пелян, тетям ды авам нуваргадыть, панжиндеряса потмом неть тевтнеде. Клюкватне-мезтне — локшот. Сынст эйсэ пансян, зяро пансевить, чопода, педлийкс педиця мельтнень. Каня а чарькодить, а содыть [83] теде? Э-эх, лиянь ормась — а орма. Видестэ ёвтазь. Натой малавиксэть туртовгак! А кинь марто кортнемс, а кинень седей панжомс... Сёвномскак а кинь марто».
Маряви, моданть-масторонть лангсо арась кудо, косо аволизь сода валтнэнь: сёвнома, музгордема, кежень пандома, ацирьгалема, тюрема... Ёмить-арась сынь зярдояк? Те — эрямонть анеявикс ёнксс тонзо пелькс.
Тетянзо кургосто марязденть, куш покордамонь чинеяк эйсэнзэ арасель, Видяй мадсь шкадо икеле. Мик эзь ойсе компьютер икелевгак. Кайксэзэ кольсь. Марявсь тензэ, учи эйсэнзэ мезе-бути берянь, стака, нуваргавтыця. Мезе — валсо эзь ёвтаво. Киньгак аволь нее, кияк тензэ эзь эряво, кортамскак мелезэ арасель... Арсесь, мади — удомась весе апаронть сайсы.
Истя эзь лисе. Ледсь мелезэнзэ — зяроцеде уш! — Истляевень Артёмозо, «Видьмевтеме» ёвтнемась.
«Ловсь Артём эсь прянзо уцяскавтомокс, теде ламо майсевсь.
Мезе меремс... Чамазо сонзэ, уцясканть, аволь ве тюсонь, эрси эрьва кодамо. Вант вана, кеменде ламо иеть эрясь ава марто цёракс — лови эсь прянзо пайстомокс. Авиде. Эряви кецнемс сенень, мезе теть Пазось макссь. Монень вана... мезеяк эзь максо. Кецнема? Карминдерят седе келейстэ ваномо эрямонть лангс, те истя. Кецнема. Макссь тень седей, превть, калгодо тулгот, аволь тандавтниця чама... Мекс прянь кепедезь а эскелямс эрямованть? Ломанесь, мерема, истя теезь: свал тензэ аламо, свал мезеяк а саты, правты габордамс мезе понги кедь малас. Мейле мезе, эзь максо тень Пазось содамс авань тансть? Эрян... Кадык аламнеде а истя... Мезе лиси, карминдеряйть весе эрямо ве лувонь коряс?
Секскак, Артём леляй, иля разде седееть. Тондеть уцяскав ломань тынк Пиченькужосо. паряк, араськак. Вейке ава зняро иеть кецневтить, седеензэ витнить, мук омбоце.
Кавто цёрат трить-кастыть — паро. Тетясь аволь чачтыцясь, тетясь — кастыцясь, ломанькс ливтицясь. Икелев, Артём, икелев, моразь...»
[84] Неке валтнэнь-арсематнень марто кутмордызе-саизе эстензэ чанстень казицянь удомань пазось.