Поладкстомо (2016)/Поладкстомо/9
[109]
IX
Пень а содыця Интернетэнь паксятнева азгондезь, Видяень сельме икелев та-кода понгсь, теке сонсь Пазось кандызе, «абрикос» валось.
«Мезе, бути варчамс? - ёндолк таго кивчкадсь превсэнзэ мелесь. — Ней кизэнь прядовома шка, лисни, тень теема сы иень тельня эли, паряк, тунда. Эряви нейке энялдомс — кучост костояк чикуншка ёндо видьметь. Паряк, лиякскак тееви: ардтнема базаров — кеман, сынь тосо микшневить — ды рамама зярояк. Эрявитькак кеменьшка товт. Маряви, васня путомат чакшкес, кода помидортнэнь. Нерькстнемат модас телень куншкат эли куш ней. Лиси чувтынесь, мейле озавтома сонзэ лембежас — теплицас. Тосо кирдемат колмошка иеть. Ансяк неть иетнень ютазь Озавтомат чувтынетне свалшкань тарказост...»
[110] Сыця чись лиятнеде мейсэяк эзь явово. Тевть, тевть, тевть... Пе тенст арась. Ды тень эйсэ эрямонть аволь ансяк зэмезэ, танстезэяк. Тевтне, кода мерекшнесь классикесь, ломаненть теекшнизь ломанекс. Мезе лиси, кадовиндеряй сон тевтеме? Васов неицятне кирдить мель: ломантнень учи кенярксов шожда эрямо. Нейгак ламодояк ламо тевтнень теить машинат. Сы шка, «превень кандтницятне» допрок лоткить важодемадо. Пенчентькак кургозост карми венстнеме электроника. Кармить содамо вейке: «Оймсек!». Лужалек чувар лангсо косояк лембе иневедь чиресэ, чийнек, кутякстнек, ловнок, морак, ярсак, симть мезе мелеть... Мезес истямо эрямось пачтясынзе ломантнень — ёвтамс ашождыне.
Секскак: ускат, кандат, кепсят, молят, чият, сокат, видят, ловнат... — ловт, чанстев ломанят. Ули нежеть, ули кемемат сыця чинтень, тештесэ пургсезь менелентень.
Течи Видяй ды тетязо чоп таргасть модамарть. Чупонесть-поксарясть моданть, иляст кадово кастозтне. Покштнень кайсесть башка, видьмекстнэнь — башка, сехте вишкинетненьгак явизь — саразнэнь. Кеменьшка эйстэст. Андомат. Таратайкасо усксизь модамартнень мацтс. Котьмамс савсь кувать, кармакшнось уш сундерьгадомо.
Чокшнень ярсамост прядозь, колмонест пурнавсть, кода свал, покш нупальс — телевизоронть икелев. Зярс Андрей Петрович эзизе вельмевте кортыця-морыця «ящикенть», Видяй ёвтась куля: арси мазылгавтомс пирест — озавтомс абрикосонь чувтот.
Марязденть Андрей Петрович эзь кирдеве, стясь — эль эзь кирнявто — чевте диванстонть.
— Тон мезе, ормазкадыть?! Теня, марсить костояк, ловныть — касыть тесэ чикуншкань истят чувтот?
— Бути касы — эсенекак ульнесь — виноградось, касы, содан, черешнясь, мекс а касомс абрикосонтень? — кемекстась эсь мелензэ, эзь максо прянзо изнямс цёразо. — А кукурузась?! Сядо иеде икеле эйстэнзэ эзь марсевеяк. Ней? Ней аволь ансяк силосокс, товокс сонзэ видить. Аволь косояк — тесэ, минек таркатнесэ. Вана кода! А модамаресь?
— Арась, а ёртса! — иердсь, эсензэ содась Видяй.
— Вант, таго... э-э-э, клюквась! — ледстизе, эзь карма сравтнемс валт тетязо.
— Мельганзо топинамбурось, — поладынзе Андю мирдензэ валтнэнь Юлия Григорьевна.
Пелькстазевсть, стувтызь вельмевтемс телевизоронтькак.
— Сынтеместкак тевтнеде кирьгава, — ацирьгалесь Андрей Петрович, — ансяк кенерть. Кизна, э-э-э, кудонть латонзо полавтсынек... Баня эряви путомс... Теде тон арсить? Теня, ярмакт эрявомо кармить.
— Тетяй, иля кортаяк. Мезе арсинь — тейса. Те ламо шка а саи: нерькстынь товтнень модас ды учок...
— Истякак яжат прят-рунгот шкань апак сода. Тесэ таго мелявкс... таго прясэредькс, — бажась валсо лездамс цёранстэнь Юлия Григорьевна.
— Истяттевтнень кис академикень лем макснить, тынь...
Андрей Петрович марязденть тарск тейсь, лыказевсь дивансонть, стясь, ютась ды арась пирев ваныця вальманть каршо. Вансь. Вансь мезеньгак апак нее. Секунда-омбоце, мурдась ды стясь цёранзо каршо.
— Те тон мезе, пеедькшнят? — коське-казямо вайгельсэ пшкадсь кудазорось.
— Мекс пеедькшнян?
— Теня, академик Кузоваткин! Гайги... — эль эзь раказеве тетязо.
— Монень эряволь орден максомс топинамбуронть кис! — эзь варштаяк экранонтень Видяй, мель путсь пачтямс тетянстэнь-аванстэнь, кодамо покш тев тейсь.
— Мон а содан, мекс ботат мартонок, стяконь тевть тейнят. Умок теть улемаль Московсо, э-э-э, академиянь прявтонтень нежекс, — неть валтнэнь ёвтазь, Андрей Петрович лоткавтызе телевизоронть.
— А мезе... Вана вансынк, абрикосонть минек ёнкстнэс совавтоманзо кис сайсамизь. Туян тов, косо седе эряван.
Прянь истят шнамот тетязо марясь васенцеде.
— Кадсамизь... — мусколязь мерсь Андрей Петрович. Мерсь ды янксезевсь: аволь эряво меремс, маряви, цёраст марто мезе-бути а истя.
— Те ков пурнат туеме? — цёрань вайгельтнень юткс совась Юлия Григорьевнань ций вайгелезэ.
— Наукас!
— Видяй, каня аздат — васня эряви максомс экзамент аспирантурас, колмо иеть важодемс кодамояк тема лангсо, — ледстизе цёранстэнь Юлия Григорьевна.
— Экзамент... Мейле мезе? Наукас! — теке киньгак эзь маря, усксь эсензэ ёнов Видяй; стясь ды седе тов ве валоньгак апак ёвта ютась эсензэ пелев.
Ютась умарьковонь сэтьме экшела весь. Лисиця чипаесь кивчкадсь ожо-якстере налсонзо, мазыйстэ, валдо-якстерестэ артызе велькссэнзэ сэнь менеленть. Ушодсь лембень вечкиця Моданть эждеме, тензэ виень-мазычинь максомо. Менелесь ванькс. Ков иля варшта, пелень панкскеяк а неят. Куш вейке козоньгак кадововоль. Мезе карми улеме чикуншка малава ды мейле, сонсь Менельаваськак, паряк, эзь сода.
Аволь ансяк велькссэнек верьксэсь, косо эрить, кода аволь пек умок арсесть, минень-сюнонь пазтнэ ды лиятне-мезтне, сонсь сехте превееськак Модамасторсонть а соды, мезе канды тензэ Вандысь.
[113] Эрьвась Кузоваткинтнэде, кода свал, кундась эсь тевезэнзэ.
Юлия Григорьевна умок а важоди университетсэ. Кудоютконь тевтне-мелявкстнэ ламот лавтовонзо лангсот. Пильгетне вана а кунсолыть, арась мелест якамс. Секс кой-мезе савкшны топавтомс цёратненень.
Видяй ушодсь од, ламонь кувалма ачарькодевикс тев: тетянзо Тюштянь пингень «Урал» мотоцикласонзо кармась паксясто раужо модань усксеме. Пирень модаськак эрьва мейсэ сюпав, раштыця, мезекс паксянсесь, Андрей атянень, сыре ардыцянтень, превс эзь саеве. Тень кувалма ютксост таго верьгелесь «покш» кортамо. Лезэсь? Иля пшкалеяк. Каршо, каршо, каршо...
Истят мельтькак апак учонь инжекс Андрей Петровичень превс сакшность: «Паряк, Видяй истя кежть панды шумбрачивтеме чачоманзо кис? Э-э-э, кие соды... Сон соды: мон, тетязо, од шкастон урекс ульнинь суликантень. Теня, мезе истя — истя, эзия менстне. Секс...».
Андрей Петрович умок пенсиясо, умок нолдась сакалот ды копори неень эрямосонзо арво тикшень чай, лиясто — кофе. С тувтызе «эряза» валонть зэмензэ ды кандтни лавтовонзо трокс кескав эрьва кодат ормат. Сыречи... а путсак чадыкс дорныця иетнень ваксс.
Сонськак а соды, зярдо меельцеде якась лейчирев этюдонь сёрмадомо. Куяртнэ-помидортнэ кардасть ды лия тевтне. Видькстама, ярмакткак эрявсть байтяк. Косто саемс? Лав-сюва пенсиястот? Окойники сыремсь потсонзо мелесь: сайсь этюдник, цёкинеть-мезть ды лиссь ушов. Галань эскелькссэ эскелязь, курок пачкодсь тесэнь таркатнесэ келей-покш леенть чирес. Мазычись — а ёвтави! Кодат тюст сельметь икеле ансяк а нильнить! Мелезэль кундамс ды кандомс коцт лангс нусманя, сэредиця ломань ёнов молиця, талай кизэнь маней чинть.
Виде, эрязь аволь аламо иетне кадовсть удалов. Ливтязь ливтясть, ливтясть ды валгсть козоньгак келей сёлмо нармунекс. Ульнесь од, Инешкипазось максокшнось тензэ ёрокчи. Артовксонзо невтневсть ламо таркава, ламо [114] ошка. Кулялопатне сиземань апак сода шнастькак, скирястькак сонзэ шкинеманзо, сёрмадомань лувонзо, тюстнэсэ ды валдосонть налксемань ёрокчинзэ.
Мезе ульнесь — ютась. Ней «кецневтить» Андрей атянь тия-тува ванстовозь шержей прячерть ды сыречиденть чикордыця ловажат, ормат: валскень стямсто тесэ, мадемстэ — лиясо. Пилетне а марить, пейтне а порить. Сельметне. .. Сельметне вана, артыцянь васень «кедьёнкстнэ», иетненень эзть изняво. Сынтемест, содазь, сыре артыцясь вечкевикс леензэ марто вастовомо аволь сырга.
Чикуншкадо мейле колмошка часонь трокс паро ёжосо — лезэвстэ ютась леенть ды чиреванзо рацяня куракштнень марто вастовомазо — пачкодсь кудов. Низэ озадо аштесь кузтемпесэ.
— Кувать араселить... Озак! — кармавтомань гайтьсэ ёвтынзе валтнэнь.
— Аламошкас... — вить кедьсэнзэ невтсь лавтовонзо трокс каязь этюдникенть лангс ды ютась, лия вал эзь правто, пирепесэ мастерскоень кондямонтень. Куроксто велявтсь мекев.
— Озак, — омбоцеде ледстизе Юлия Григорьевна теке тонсонть.
«Мезе-бути тандавтызе нарвицьканть, — арсезевсь Андю-Андрей. — Аволь вайгель — кшни».
— Вана, озынь. Э-э-э, мезе ёвтавлить? — пеедькшнезевсь озамсто.
— Тон, Андю, иля згиля. Мон Видяйде, цёрадонок. Тон мезеяк эзить редя? — азоравась сялгавтызе вановтонзо Андреень-Андюнь сельмес, учось каршо вал.
Кевкстемась талакавтызе Андюнь, сеске эзь пачкоде тензэ, мезде туи кортамось. Эрявсь самс ёжос, арсемс.
— Рединь-эзинь, ламо мезе тевстэнзэ мелезэнь, э-э-э, а тукшны...
— Седе видестэ?
— Теня, клюкванть марто котьмамозо, васняяк. Куш умокак ульнесь. Неявсь, сельмукштомояк неявсь — весе те, мезе теи, э-э-э, эйкакшонь налксема. Сон...
— Теяк. Мезекс сон сестэ топинамбуронть марто дармант ютавтнесь, э-э-э, сонськак, арсян, а соды, — поладызе нинзэ меленть мирдесь.
— Мельсэть шабратнень марто сёвноматне? Ундоксонзо срадокшность аволь ансяк эсенек пирева — шабратненьгак, — варштась Андюнь чамас Юлия Григорьевна.
— Каня стувтовить... Кавто иеть савсь, э-э-э, «оёвамс». Колмоцестэнтькак лиялесть... Ве ёндо, те вадря — неть ды лия тевтнесэ Видяй панси раужо-навола арсематнень, лия ёндо... э-э-э... — эзизе прядо, мезе ёвтыксэль, вейсэндинзе турванзо, чатьмонезевсь Андрей Петрович.
— Мезе «лия ёндо»? — сеске сертизе кашткенть низэ.
— Пелян, иляст уле оймеёжонь майсематнеде тевтне ормадо кортыцякс. Пеляза... Э-э-э, превтнень марто мезеяк илязо тееве, иляст човоргадо, — видькстась, ёвтызе Андю атя сень, мезде арасель мелезэ кортамс марямга.
— Вай, истя иля корта... — тандадсь, эль эзь пижакадо Юлия Григорьевна, ютась пачканзо сурневкс.
— Аволинь корта, ды сави... Шкань ютазь, э-э-э, — вирьстэ наксадыця лопань, пичесалмуксонь усксемазо. Зяро вийть путсь! Мезекс? Вана истят, Юлия Григорьевна, тевенек, — прядынзе валонзо Андрей Петрович, стакасто лекстясь ды кепедизе вановтонзо икелест «оймсиця» пандятнень лангс.
— Мон цёранок истямо ормантень а кеман, — эзь пра Андю марто вемельс низэ. — Видяй покш мель яви весе одонтень. Цёранок — вешниця ойме. Те невак Интернетэсь мельга-мельцек венстни кевкстемат...
Авась кортась, сонсь педе-пес валозонзо эзь кеме: «Вешницятне-исковицятне бажить муемс видечинть ды самс кодамояк мельс. Сынь васня вешнить, мезе теезель тень коряс сындест икеле, мезе сёрмадозель книгатнесэ, журналтнэсэ, ансяк теде мейле кундыть путнеме экспериментт. Минек тесэ? Пуворькст... Сиземадонть кедень-[116]пильгень сутнозевемат, ансяк... А бути алкукс, мезе мерсь тетязо? Вейке-вейкине эйкакш, сеяк... Аламоль васень ормась, ней... седеяк тандавтниця. Мезень кис истя покордымим Инешкипазось, кодамо чумо теинь икелензэ?».
— Э-э-э, ней таго превс асаевиця тевс кундась — ускси колмо вайгельпень ютко паксясто «паксянь мода»... Мезекс? — келемтинзе кедензэ Андрей Петрович.
— Паряк, сон седе вадря? — каясь трокс вал Юлия Григорьевна.
— Э-э-э, васняяк, пирень моданок — лаймень мода. Сон седе сюпав, седе раштыця-кастыця. Омбоцекс, Юля, те зяро эряви мотоцикласонзо усксемс — теемс-ацамс зярыя минек кондят кувака пандят? Ули-арась мелеть меремс, сави меремс: Видяень превензэ марто мезе-бути теевсь...
— Саты, саты, лоткак! Маряви, монськак мартонк курок превстэ лисян. Кода невак те шкас эзинь веляськадо? — стиксэль таркастонзо Юлия Григорьевна, ды эзть кунсоло пильгензэ.
Андрей Петрович поладынзе валонзо:
— «Максыть тень академикень лем!» Э-э-э, раказевлинь истят валтнэде, тень таркас — сельведень эль эзть туе... Эрявсь тензэ, теня, истят валт чукадемс! Ды, меревлить, пеедькшнезь... Ней педясь абрикосонтень! Вана-а-а...
— Ужо, иля капша. Чарькодема теньгак: эряви тензэ куш мейсэяк пештямс шкань эрьва штельксэнть, ансяк иляст бизмолдо прясонзо эрямонь а лисемадо арсематне. Секс, улема, авторияк эрьва кодамо тевтнес, — Юлия Григорьевна мель путсь невтемс мирдензэ валонзо авидечист, куш эсензэ седейсэяк кирдевсь пелема.
— Мезе ней тееме карматано? Кода улемс? — лия ёндо, вандынь чиденть арсезь, варштась стакачинть лангс Андю.
— Тон — цёра. Арсек. Эряволь монень кевкстемс тонь. Кода улемс, мезе теемс, кода арсят?
— Арсян истя: мезеяк а теемс. Ме-зе-як! Пшкадемс шумбрачинь ванстыйтненень? Седеяк берянь илязо лисе.
«Кадык клюкват-абрикост касты, кадык «панжовкст» тейни. Пазось ванозо, седе беряньс илязо пачкоде. Кевкстнемс — а тев. Корты аламо. Теке марто кельтеметнень юткскак а совавтсак. Кудоютконь тевтнень теемстэ кургозонзо панжома а понгавтни. Тевезэнзэ иля эцне. Превть иля максне. Иля снартнеяк. Сеске керятанзат: ськамон, монсь!
Каня арсекшнинь, пачкодтяно истямо пес? Кеминь, карми урьванок, кармить эйкакшонзо, карман нуцькань ваномо... Ванынь... Ней уш улевельть покшт, прядовольть университетт-мезть. Важодевельть. Сынст таркас-чаво тарка. Кода чаво? А Видяй, орманзо марто? О-ох, авакай-тирякай... Видестэ редязь: чавочи эрямонь крандазсонть а эрси.
Мекс эзинь чачто омбоцеде — ильведькс, покш ильведькс. Андюяк мернесь. Паряк, чачтовлиньгак, кунсоловлия, аволь сюконякшнояк цяркантень. Чачтовлинь, паро улевель, тейтерне эли омбоце цёрыне...
Сыречи... Теке кадови — ледстнемс, мейсэ-бути янксемс, кортамс эсеть марто покш ды вишкине ильведькстнэде, топавтозь кецневтиця тевтнеде, од шкань тундонь балягатнеде, ледстнемань кенярксто пешксе мастордонть, ков ки арась.
Видяй... Вейкине, лелявтомо-патявтомо эйкакш, сонгак пайстомо. Соды, парсте соды эрямосонть эсь таркадонзо, седей сезни, ризны-мелявты. Текеде, самай текеде ажиятнень юткстояк а лисни, свал улезэ кильдезь — а нолдамс превень утомонтень седеень раздиця мельтнень!»
Чатьмонсь, арсесь эсь арсеманзо, Андю атяяк. Кодат мелявкст эвтсть пряудемсэнзэ? Эрьва кодат... Васняяк, содазь, Видяень икелечидензэ ды ламодо мезде лиядо.
[118] «Паряк, зярдояк наукась пачкоди истямос, зярдо кармить сайневеме-путовомо вейкестэ омбоценень аволь ансяк рунго пелькст, седейть-мезть, лия ёнксткак. Мезе, саемс, э-э-э, арась Видяень, монь — верьга. Куломадо арсемаль, кодат сыргозекшнемат, сон... Лездаволь медицинась, ютавтовлизь монь виенть Видяйнень, лисевель кода, э-э-э, кенерсь цёрань: мотордыця ни, кольнякай эйкакшт, вейсэнь мельть-мелявкст... Сы, а мезть кавтолдомс, те шкась, ансяк минь уш... Зярс кадови истя, кода ули.
Видяй... Каня сон ськамонзо? Ков а варштат, сельведть, майсемат, ормат, покордамот, сялдомат... Мекс ламодояк ламо од ломантне ушодыть эрямост «куломас» вечкемасо, мейле эрить сёвнозь-лайшезь, пачколить тюремаскак? Умонь шкатнестэ марсевсь велетнева явомадо? Пек, пек чуросто. Ней? Ней Пеледест ламотнень вечкемаст тееви сувокс: явить. Сеедьстэ неть «вечкицятне» кенерить нолдамо эйкакш. Кадови сон аванзо марто, тетявтомо. Теде, ковгак а молят, ламолгадыть-пештявить урозонь кудотне, мельгаст — тюрьматне. Ков сравтови кись седе тов, превть яжамс а савкшны.
Мейсэ тувталось?
Койсэнь, вейкесэ: а анокставить... тетят-ават. Тетятне-аватне, эйдень кужотне, школась, институттнэ-мезтне — весе-весе тонавтыть инженерт, докторт, сантехникть, токарть, тонавтыцят... Аволь вейке тёжа эрьва кодат профессиятнеде! Ансяк косояк, ве школасояк а тонавтови, кода «чапомс» алкуксонь, ушодкссто пес вечкезь эриця кудораське-семия, кастомс тетят ды ават. Арась истямо наука. Арась книгаяк. Урокт косояк а ветявить... Кода маштат, истя тейть, пурнак семия. Ды тейтяно: эйкакшт толс ёртнетяно...
Мекс, мекс истя? Мекс школатне-мезтне а кундыть те тевентень? Мекс? Улить университетт, эрьва кодат академият. .. Мекс сынь аштить веёно?
Сеедьстэ содавтнесамам те кевкстемась».
Кузтемпестэ, верде, парсте неяви, ков коми чипаесь. Кудонть сулеезэ чивалгома ёндо каштмолезь эскельдясь [119] чилисема ёнов, копачизе пелензэ пирест, якстерькаень, чурькань ней уш чаво пандятнень. Чикуншкань коряс экшендсь. Юлия Григорьевна ды Андрей Петрович чатьмонезь вансть кизэнь прядовома чинть нусманя оламонзо мельга.
Каятотсь мотоциклань аволь виев урнома. Видяй сась паксясто. Усксь пешксе лавсь-очко раужо мода. Валгсь «лишмензэ» лангсто, ютась ды келес панжизе пирекенкшенть. Совась эзганзо ды ускизе паксянь сюпавчинть пирепотс, эрявикс таркантень. Лоткавтызе моторонть, саизе койменть ды эрязкалезь кармась очконть чамдомо. Теевсь тевесь. Цятадизе-сялгавтызе коймензэ. «Ужока, аля! — сась превезэнзэ. Варштась часозонзо, варштась верев. — Кенерян? Кенерян!» — мерсь эстензэ ды таго кармавтызе урномо «лишмензэ».
Кенерсь... Кенерсь чикуншкадо мейле ардтнемс-ускомс колмоксть. Колмоксть чупонемс моданть, пештямс очконть, колмоксть чамдомс ускозенть...
Важодсь прамозонзо. Теезельгак прок аволь пек ламо, ялатеке сизесь. Мода, кода а сизят...
Стакасто пильгензэ кепсезь Видяй кузсь кузтемаванть, совась кудос. Ярсамс мелезэ арасель. Сусксь кой-мезде ды лиссь стуворонть экшстэ, стувтсь натой ёвтамс аванстэнь сюкпря.
Ютась эстензэ.
Панжизе Интернетэнть. Муинзе «Одноклассниктнень». Мезеяк седейс педиця тосо арасель. «А-ах!» — менстясь машнетезь ды лоткавтызе «превейде превеенть». Мадстизе толонть ды мадсь. Матедевсь, ансяк прянзо токавтызе тодовонтень. Тевтнесэ чинь-чоп нерьгемаськак тенень лездась.
Удомазо явась шкадо икеле. Капшамс ульнесь а ков. Лембе таркастонть стямо эзь эрязкале.
«Мезес течи кундан? Мейсэ карман пештямо чинть? Васняяк, содазь, поладса «од модань» усксеманть. Ламо, ламо эрявомо карми эйстэнзэ!
Таго теке, авань вайгельдензэ ды кирьгазон каявикс «сивекстэнть» башка лия мезеяк а ули. Сюкпря вальманок икеле менельс сэрей пичетненень: кепети варма — [120] ушодыть весемень лангс пеняцямо. Седееть калавтсызь, эй токасы лужаня кувака мородост-пеняцямодост. Маряви, эрзянь нусманя моротне зярдо-бути умок лисекшнесть пичень лажныця моротнестэ.
Авам, тетям, шкань-шкань сельмень икелев понгониця шабратне — ниле-вете ават, ютксост весемеде одось Лиля — вана вейсэнь куром. А ялгат, а содавикст, а малавикс ава... Ськамон, ськамон, теке нуезь паксясо апак арсе кадовозь нартемкс нетькске!..
Паро, улить тевтне. Вана кить ялган! Кортнян мартост: лиясто вайгелень кепедезь, седе сеедьстэ — сэтьместэ, дёлязь, топавтомстост — важовсто. Ялгат дык ялгат! А митядызь, а полавттадызь, зярдояк а инзатадызь... Видькстама, вастневить ильведьксткак...
Ялатеке эсеть кудораськесь, эйкакшонь вайгельсэ чольдердиця кудось, нинь мизолдыця кургось... а полавтовить мейсэяк, сынь аполавтовицят...
Умок, ансяк ушодокшнынь важодеме телезаводсо, савкшнось неемс истямо сцена. Ардылинь заводсто кудов. Кода свал, троллейбусось пешксель. Аштинь стядо. Икелень кресласонть ардсь мазыйстэ-ваньксстэ оршнезь кавто тейтернензэ марто од ава. Вейкенень эйстэст ветешкальть, омбоценень, паряк, колмошкальть. Час малава, зярс ардынь, чоледсть вейкест-вейкест марто, мезть-бути кевкстнесть, невтнесть сурсост, чольдердсть апак лотксе. Аваст, прок левксэнзэ вакссо мадезь аштиця псака, чуросто, валсо-кавтосо пшкалесь чольдерькай пакшанзо туртов.
Мекс, мекс Вере эрицясь эзь казе тень истят горниповнеть? Мейсэ чумом?»
Сезизь умонь шкань неезденть ледстнематнень сельведтне. Видяй маризе: сельмеужонзо летькемсть. Маризе, кода чамаумарьганзо састыне кеверсь-валгсь сельведь байгине. «Инешки, те истя мезе мартон?» Ускизе вельксэнть ды нардызе летьке тарканть. Эзь кенере тавадкс пенть нолдамо, «эрьгинетне» таго лиссть. «Ну-у, допрок бриндат нолдыть! Те ков маштови?» — таго кепедизе велькс пенть сельмезэнзэ ды арсезевсь лиядо.
[121] «Ськамон, ськамон... Течи содавтома Лилянь. Лиякс келем каназкады. Куш човсема аламошкадо. Ансяк ошов илязо туе. Ардтни лиясто. Ютан, ютан. А мезть чапаськалемс».
Нардынзе сельмензэ ды штавтыксэлизе удома тарканзо. Косто, кодамо варминень зэхель кандызе пряудемезэнзэ лия меленть, сонськак а соды. Икелензэ лиссь «Иень гайтть» журналонть валдо-сэнь лангозо. Токакшнызе седеензэ таркась, косо ёвтневсь эсензэ чаво кудос Артёмонь ськамонзо кадовомадо. Ледсть мелезэнзэ вейсэнь-авейсэнь цёрынест... «Э-э-х! Мекс менеленть ало зняро авидечи ды кежть?!» — эськанзо ёвтынзе валтнэнь Видяй, зярдо ёвтнемастонть неть таркатне стясть икелензэ. Артём зярыя иень перть теевсь тензэ ялгань кондямокс. Уцяскаст малавикст. Те «сюлминзеяк».
Окойники Видяй брикстядизе тавадксонть, явовсь лембе чевте ацавксстонть.
Ушодовсь од чи.
Сондензэ яволявтсть, стявтызь куринканть, мотоциклань пых-пых-пух мотордома-урнома ды атякшонь жой морамо. Видяй каизе мотолавсезэнзэ койменть, озась резинань чевте озамкаезэнзэ, сыргась «од модас».