Поладкстомо (2016)/Тувор
[177]
| ТУВОР |
Мон, «Чиргуж» совхозонь агрономось, ды Индялонь Петряй, прявт зоотехникесь, Кельведнесэлинек чинь-чоп. Вастневинек отделениянь прявттнэнь ды тракторонь-машинань витницятнень марто, совсинек веленть куншкасо утомокс теезь церьковантень, ваннынек, кода ванстовить ды кодат «ёжост» сы иенень анокстазь сюронь видьметнень. Чикуншкадо мейле уш пачкодинек Кельведнень омбоце песэ сюракшонь фермантень. Совхозонь покшонок, «бодянок», кода тензэ меринек сельме удалга, туемстэнек кармавтсь: «Седе покш мель яводо андомань койтненень, тикшень-олгонь ютавтомантень, Пачкодсть салсемадо кулят. Ды аволь ансяк олгонь... Ванодо». Теинек мерезенть коряс.
Ацамковонь читне капшицят. Ансяк мельде-валдо, нузякссто почкоди валскень чоподась, вант, келемтьсынзе сёлмонзо сундерьгадомась.
Эряви капшамс,
Туемадонок икеле Пётр Васильевич, Кельведнень хозяйствань прявтось, сэрей, эчке, прок кандо, цёрась, тердимизь эжнеме «Якстере ужинес» — ракша мельга якицянь ды фермань ванстыцянь кудынентень. Мезе, видеть алянть валонзо, совама. Кортнема течинь ды валскень тевтнеде. Лембинесэяк аламнешкас а берянь аштемс. Совинек. Кияк арась. Скалтнэнь ды вазтнэнь мельга якицятне теить чокшнень тевест: симдить-андыть, ванськавтыть ракшатнень алксост.
Азорось ниле стенатнень ютксо — рангиця радиось. Рангсь весе вийсэнзэ. Эйстэнзэ, стенас понгавтозь якстере тюс коробкинестэнть, менсь оляс телень чаво паксясо кулыця ямщиктенть ламонень содавикс умонь шкань рузонь морось.
Степь да степь кругом, |
[178] Авань кавто лийканя вайгельть, сэрей ды алкине, «эчке», кода кортыть Чиргужсо, теке чудикерькскеть, нусманя ёжонь раштазь, чольдердезь нудееть кувака-кувака чудильмаваст. Ламоксть марсия те моронть. Ансяк истя мазыйстэ, истя лужанясто гайгицякс эзия.
— Саты тенк сельведть таргсемс! — машнетезь мерсь Пётр Васильевич ды ноцковтызе радионь шнуронть. — Вана мезе, цёрат: адядояк тевденек кортнеме монень кудов, ярсатано-тейтяно, Эжнетядо ды — Чиргужов.
— Теяк а берянь, — икельдимим, кенерсь мереме ялгам, Индялонь Петряй. Сон эсест велень, Чиргужонь, секскак ламот мерить тензэ аволь рузкс — Пётр Кузьмич, мерить велекс, кудо лемсэ.
— Арась, арась, Пётр Васильевич! Сюкпря тердемат кис. Миненек, зярс валдо, сыргама, — кеместэ ёвтынь эсь валом-мелем.
Кортнинек кортамонок. Оршнинек тулупонок ды увол-авол лисинек лембестэнть ушов. Чопавтынек судос-чамас авториця ацамковонь якшамонтень. Меельцекс, мандонензэ лангс нежелезь, валгсь кузтемаванть ды ёколк-ёколк ютась нурдыненть ваксс Петряй. Керш кедьсэнзэ чувтонь пильгензэ кепедезь-кирдезь, озась тарказонзо. Ильтицянок туртов «вастомазонок» мерезь, максынь кедь, саинь кедьстэнзэ ведьметнень ды — лоцьк! — озынь ялгам ваксс.
Кудов! Кудов!
Талай аштемадо лишмесь апак кармавто ноцковтызе нурдыненть, сыргась ардозь. «Паро, атят-сэрдят...» — арсезевинь ды шождынестэ таргия оймем. Ёжом вадряль: тевенек, мезе мерезель, теезь, кельмсематнеде мейле курок ультяно кудосо, малавиксэнек ютксо.
Якстере чама чипаесь, зярс пурнынек-сэрнинек, кенерсь кекшеме качамонь кондямо сувсо копачазь пандынетнень чирева сравтневезь виренть томбалев. Кинть маласо сэрей рацяня каленть прясто келемтинзе сёлмонзо ды тусь та-ков тевензэ яксевтеме шержей варака. Тарадкестэнть, косоль «шержакаесь», прась сиякс цитниця [179] ловонь кувтыне. Ансяк варакась ды полозатнень чикордыця-вешкиця морост колсесть пертьпельксканть сравтневезь телень сэтьмечинть.
Седе ламо чатьмонинек. Саты. Чоп валт сувтнинек. Улевельтькак сталмост, таргавольть, паряк, аволь ве пондо. Те — чизэнзэ. Бути иезэнзэ? Эрямо пингень перть?
— Истя?
— Аволь...
— Истя?
— Виде-виде...
Истямо лувсо шкань-шкань пракшность валтнэ турвастонок. Седе ламо мельтне эвтсть кудов пачкодемадонть. Нинь вечкемань вановт, стувор лангсо пси ям, эйстэнзэ менчевезь верев кузиця сув, тантей чине чай. Мейле ютан икельце кудос, саян кедезэнь од газетат ды сован седе келей, домка эрямос. Мезесь седе парсте мелеть витьсы, эсеть лембе, валдо пизэсэть оймсемадо башка?
Кавто ломаньс нурдынесь лишментень стакакс эзь маряво, усксь эйсэнзэ аволь умонь даволдонть мейле аламнеде «вадезь» кияванть апак нолажтне, шождынестэ. Перьканок ашо каштмолеманть сезнесть алашанть эскельксэнзэ ды шкань-шкань паркстнемазо. Якшамодонть судостонзо кувтань-кувтань лиснесь ашо сув. Каштмолемадонть, эрязасто ардомадонть ды тулуптнесэ зярс кирдевиця лембеденть вельть ангорицякс эзь маряво якшамоськак.
Курок пачкодтяно тундонь самс удыця Чуварлейнентень валгиця вандора пандочамантень. Кадови вайгельпешка. Те, ловт, кудосат, «каваниця» стувор экшсат, конадо мейле учить эйсэть каштлангонь лембе кирьпецтне эли икеле кудосо чевте озамо таркась. Паро-о-о...
— Мекс-бути кувать Чуварлейс а пачкодтяно, — сезинзе «ламбамо» арсемам Петряй, — валгома пандочамаськак зярс эзь понгоне, сэднеденть кортамскак а мезть. Те кода истя? А?
— Муеви, курок ушодови, — оймавтыя эйстэм керш ёно аштицянть. Седеем, теке басом, эсеньгак [180] китнэзевсь. Арась, эзь маряво, видеяк, кинть аловпандт туемазо. Лишмеськак киртинзе эскельксэнзэ.
«Мезень тамаша? Кистэ, чей, эзинек кадово? — токимим кавтолдомань сэпей мель. — Алкукскак, те шкас улемаль лейнентень. Киськак кода-бути кикс а маряви».
— Тон, теня, сайтя аламнеде витев, — превть макссь — каятотсь тулупонть потсто зоотехникенть вайгелезэ.
— Ужо, иля капша, — меринь ды лоткавтыя Арбузонь. Стинь нурдынестэнть. Ютынь тей, ютынь тов, пильгем алдо ки эзинь маря. Каштмолема. Седеень чентиця кашт. Эзинь муе а лишмень кокорка, а олго сэльге, а ...
«Кинть эйстэ ве ёнов туевинек?» — ютась прявам.
Мурдынь. Саинь ведьметнень.
— Варчасынек витев, кода тон мерить, — ды ноцковтыя вить ведьменть. Апокшке ютконь ютазь одс валгинь, таго тей-тов якинь-пакинь, нолажтнинь пильгсэм, вешнинь калгодо эйгажа тарка. Таго пильгень стяконь чавомат.
Кадовинек? Лиси, истя.
— Валгк, пачкодинек! — лиссь кельпрястом, ёвтыя Петряйнень содавикс пеедькшнемань валсюлмавксонть. Ёвтынь неть валтнэнь, ды пачкам ютась мелявксонь ёжо. Теке шкастонть, меленть марто вейсэ васолдо-васолдо верде валгсть ды гайгезевсть пилесэнь ямщикте моронть валонзо:
И, набравшись сил, |
— Саты, Петряй! Валгк, — монськак а содан, мезекс ёвтынь неть чаво валтнэнь, тарказом озамсто.
— Кинть ёмавтынек? — пшкадсь цёрась талнозь. — Истя арсиньгак. Те шкас улемаль тенек Пекшеньсэ. Минь вана...
Чатьмонинь. Марязь валтнэсэ кирдевсь — тешкстыя эсь пачкам — чумондома. Кода эно — ветицясь мон. Ков ваныть? Ёжом седеяк апаркстомсь. Ветия лишменть кинть ёмавтома таркас. Кодаткак челькинеть кинь улемадо эзть корта: [181] а тосо, а тесэ. «Кода истя мон ильведевинь? Мезе теемс, кодамо ёнкс саемс?» — эвтсть превсэнь кевкстематне.
Чопотетсь допрок.
Тельня, седе сеедьстэ якшамо шкасто, тешттне неявить седе покшсто, цивтордыть седе наянсто ды кецнезь, теевить седе малавиксэкс. Раужо пона менельстэнть валдомтыть, ковонтень лездазь, ловонть цяк редявикс сэньсэ. Вана Пелеве ёнксонь Кече Пулось, Каргонь Кись, вана Озяз курось, азорокс ваны сонсь Ковось. «Зяро мазычи велькссэнек!» — яла лангозост ванозь марявиксстэ ёвтылинь валтнэнь. А тукшныть мельс Пелеве ёнксонь эзэльдиця-пупиця варматне. Секс чочнетяно сиве повтнэнь, сюлмсетяно шапка пилетнень... «Пултазь пулты!» — мереват истямо шкасто.
Неень менелесь допрок лия. Куш кодамояк, дёкушке-дёкушке, вишкине-вишкине тештине невтевлизе прянзо! Ков а варштат, ловсо ацазь, модантень лепштиця шержей, якшамо сув. Модась, маряви, човорявсь менеленть марто ды уят та-ков Моданть велямонзо марто, сталмонь апак маря те тустосто ацавозь сувганть. Тешттне кекшнесть, менелесь ёмась. Дух а мезес педявтомс вановтонть. Сув, сув, кельмень-куломань кандыця сув. А Чимадема, а Пелечи ёнкс. Сув, сув, сув...
Ков эйсэнек пачти ускицянок, а соды. А содатано миньгак. Ледстнян Пазонть лемензэ. Пазт, идемевсть, тюгайть, нонайть... — монень ялатеке. А кеман эйзэст. Тень лангс апак вано, мелезэм сась Сонсь Инешкипазось. «Инешкипаз, марить валом! Неимизь-редямизь, чангодть тенек: панжовтыть, куш лип меремс, менелень паксятнень, невтик кудо ёнксонок, идемизь, ванстомизь».
Марявлинзеяк Шкиницясь энялдома валом... Каршо — лишменть пильгензэ ало лазновиця эйгажа ловонь цятордома ды полозатнень салава, теке гуень, вешкемаст. Ансяк сынь ледстнить: эрятано, эрямось эзь прядово, моли, кадык пиштезь, ялатеке эскели.
— Ну, мезе, Петряй? Мезе тееме карматано? А? — пейдькшнезь сеерян вакссом, мерят, кевензавозь аштиця [182] ялганень. — Паряк, морыне моратано? Мельсэть кирдят, мезде морась радиось килангов сыргамстонок? Жойнезь жойнесть вайгельтне! Мон ушодса, тон — поладсак, вадря?
Ты, товарищ мой, |
— Я, тон мекс чатьмонят? — лоткинь морамодо ды, пеедькшнезь, керш кедьсэм сорновтыя цёранть лавтовдо.
— Паро теть згилямс, — маринь каршо.
— Мезе, тандадыть прядомс валтнэнь?
— Саты теть, тевде, эрь, кортак, — каятотсь таргамодонть Петряень корцяня вайгелезэ.
— Тевде тык тевде! Молян, тия-тува ютан! Муема кодамояк ки-яннэ. Эрь, кирдть! — максынь ведьметнень «тевде» кортамо кармавтыцянтень ды чатьмонезь сыргинь мерезенть топавтомо.
Пильгем алов ваннозь, чаран-велян ды таркань-таркань пильгсэм поркснян лишменть перька ловонть. Кирькс, мельганзо омбоце, колмоце, седе васов ды васов... Куш кодамояк челькине, олгонь сэльгине, тешкске вастоволь ды вельмевтевель эйзэнь кемема. Стяконь мелявкст. Вень чоподасонть эрицякс ды эрицянь усиинекс тень кадновсь вейке — нурдынес кильдезь, эль неявиця лишмесь ды нурдынесэнть Индялонь цёрась. Ёмавтсынь сынст, нильсынзе чоподась, — ёман монськак. Перьгедян эйстэст — мерть, отьма потмакссан. Эрьва эскельксэнь ютазь кучкорян ловонь авейкетькс таркинетнень, чукан пильгем. Яла кеман парос. Кода эно лиякс, Кемемавтомо?
Витьстэ-витьстэ саинь ёнкс «усииненть» пелев, «кудов». Эно ков лияв? Кемтяно эйзэнзэ, эрямо пизэнтень, меельце лекстямозонок. Виде, кудынекс ней тень сави ансяк сон, тусто-ашназа тюсонь сувонть пачка эль неявиця раужо таркинесь, нурдынесь. Ну мезе, мезе теемс? «Васняяк, а нолдамс кедтнень! — меринь эстень. — Нолдасыть — учок кажо».
[183] Таго ледсть мелезэм кудосо малавиксэм. Ним ды тейтернем. Учость-учость — матедевсть. Мекс, кода истя матедевсть? Шказо зярс чокшне. Витова эйкакш. Сон ламо мезе эрямосонть а чарькоди, уды кониккесэнзэ эйкакшонь домка, мелявксонь а содыця удомасо. Авазо вана, секень вант, — тарка-эзем а муи: мади — сти, мади — сти. «Косо, косо те шкас? Зярдояк истя арасель... Зыян кодамояк эзь лисе?» — а максыть тензэ важдамо ризкс кевкстематне, лажны седеезэ. «Илядо ризнэ, илядо пиште: юты те кежей-казямо шкась ды мартонк, кавто вечкема покольнем монь, вастовтано одс».
Монень седе шождыне. Пильгем-кедем таркасост. Пряськак эсь тевензэ содасынзе. Теинь кирькс, омбоце, ды, вант, уш ливчакадынь, ёжом марян лиякс. Якшамось аламнеде потась. Петряй вана... Ков сон ве пилысэ? Кодат чийнемат-элякалемат? Таркастонзояк а стяви. Мукорь теке — а тей, а тов. Паро куш мондень од...
Зяро шка сокор пурныцякс усксевтяно зыяндо пешксе паксяванть — а содатано. Маряви — пинге. Учотано оляс менема. А стяко ёвтазь: «Учомадо стака мезеяк арась».
— Кода эрсят, зоотехник ялгай? Генералонь план, зярс паксяванть азгондинь, кодамояк эзить чапо? — бажинь пейдькшнезь, кортамосо вадрялгавтомо ёжонзо.
— Ва-вадрясто, зярс эрян — шумбран, — маринь каршон.
— Эрьга-эрьга омбоцеде ёвтыть валот!
— Ды мезе, мезе?..
— Мезеяк арась. Ёвтыть ёвтазь валот!
— Зярс, меринь, эрян — шумбран...
— Зярс... ёртык те валонть. Илязан марсе истят! Таргака толверьгимат.
— Те-те таго мезекс? — кокнозевсь Петряй.
— Вансак...
Саия паргиненть. Каинь ды путынь нурдыненть икельце пельксс варьгам. Каштор-каштор таргинь зярыя верьгимат, ёзолдынь коробкиненть эзга, ды коморсом типельдезевсь толнэ. Пульзинь кумажа лангс. Коминь седеяк алов, пидезь пидиця якшамонть лангс апак вано, карминь ванномо ловонть потсто лисезь неявиця жниванть.
[184] «Пинемень, неявить. Те сестэ кавксоце паксясотано! Мельсэм — кода а мельсэм! — сонзэ видемань читне. Мейле... Мейле кизэсь пиземевель. Урядынек шкань ютазь, меельцекс. Секс кадовськак те паксясь теле алов апак сока», — ютасть прявам ледстнематне.
Кирвазтинь толнэ омбоцеде. Омбоцеде, зярс сырежди суром ютксо палыця сярдынесь, вешнян ды ваннан, теке покш питнечить, мелень пельснаксадозь олгинетнень. Паксясь кавксоцесь. Кавтолдомс а савкшны. «Ужока, паряк, муеви сеялкатнень якамо ёнксост?» — арсезевинь ды таго кундынь пульзязь ванномо ловдонть верьга «тарныця» олгине петнень. Куш якшамось истя аволь нарьга! Маряви, эйзюрокс теевить суртнэ. Арась, зяро эзинь котьма, зяро кумажа лангсо эзинь бизмолдо, тевем эзь лисе. Каня, ловонть потсто чуросто пряст невтиця олгинетнень коряс содави мезеяк?! Чить улевельгак, аволь кода ней, сардынешка толнэнь валдосо ваннозь.
Видемтия рунгом. Эрязасто тонгинь варьгам, седе парсте тапардыя перькам тулупонть ды — вырк! — озынь ялганть ваксс.
Мезе теемс? Кона пелев ажиятнень аравтомс? Ков а варштат, ловсонь тюс, лепаня, масторс та-кодамо лепштиця сув. Косо Кельведнесь? Косо Чирьгужось, кудонок, козонь, кемекшнынек, пачкодтяно часошкань ютазь? Сув, сув, куломань кандыця сув.
Ты лошадушек |
«Кияк эйстэнек кадови-арась лишмень ветицякс? — нусманясто арсезевинь мон. — Мезе илязо уле, латкостонть, козонь понгинек, лисема. Ды листяно».
Саинь мель ветямс лишменть ков илязо уле: пелеве ёнов, чивалгомав, чилисема ёнов... Ведьметнень тей-тов а ноцковтнемс, кирдемс ве ёнкс. Яла козоньгак эртевтяно.
[185] Ардомадо арсемскак а мезть. Кодаяк куш эскелязь. Ансяк а шунжамс, а ёмамс те идемевсень лепаня чоподасонть.
Апак учо икеленек, аволь васоло, кивчкадсь сятко. Те мезень тюниха?!
Ведьметнесэ аламнеде «токия» айгоронть.
— Курок, седе курок! — вайгель макссь тулупонзо потсто Петряйгак, прок сонтемензэ эзинь сода, мезе теемс. Ансяк вана сяткось кода кивчк вельмекшнесь, истя мадськак. Теке анеявикс кедь копачизе кемемань валдыненть. «Мезень налксемат?» — меринь машнетезь. Лоткавтыя Арбузонь.
— Мезе, Петряй, пачкодинек. Валгат? — меринь пейдькшнезь.
Петряй кургонзояк эзизе панжо. Чатьмонсь.
Минутань-кавтонь ютазь, теке лангсонок нарьгазь, «тештинесь» кирвазсь лия таркасо. Мон таго автордынь ведьметнень. Эзинек кенере сыргамо таркастонок, чоподась таго мадстизе валдо тешкскенть. Сельгинь! Марявсь, тюгайтне-идемевстне кармасть мартонок кончкесэ налксеме. Кирвазекшнесь эрий толнэсь шкань-шкань вить, шкань-шкань керш ёндо. Кирвази — мади, кирвази — мади. Арбуз айгоронок тандадозь паркстась, лоткась ды потазевсь.
«Верьгизт, анамаз саевлинзе! — прынь мельс. — Ансяк те эзь сатокшно».
— Неят, Петряй, кодат лездыцят перьканок чарыть? — Ялгам теке матедевсь, чатьмонсь.
— Мекс чатьмонят, а?
— Мезе меремс? Ке-кецнемс а мезес. Вал-валскесь, секень вант, те-те пориця якшамомосонть а учови. Ке-кельминь, пе-пеем вейс а токшить...
— Кельмить, мерят? Арсят, мон эзинь? Нейке, нейке стяк таркастот!
— Ды мон, ды монень... Стака.
— Содан, содан... Ялатеке стяма. Стяма ды ловажань яжамосо, якамосо, куш аламнеде эждемс рунгонть. Марят?
Марязесь ютась пачкам кельме налокс. Мезе-мезе, истят «кулыцянь» валт пельдензэ эзинь учне. Эрить вана истят. Куш кортак тензэ, куш иля — соды эсензэ. Латя-кадсь. Лавшомсь. «Кода улемс, мезе теемс?» — паряк, сядоцеде совасть превезэм неть кевкстематне, зярс аштинь нурдонть вакссо. Петряй — а неже. Лезэ пельдензэ иля учо: а тевсэ, а превсэ. «Кадомак», «кадомак»... — чавсть пряудемсэм сонзэ ёвтавт валтнэ.
Якшамось азаргадсь, пейть пори. Скири судом, чамам, лавшосто эждить пильгсэм понань цюлкатне ды понань кемтне. «Эзь ашолгадо судопрям? Марявсь, скирьк-скирьк мерсь...?» — ютась прявам. Каия варьгам ды сурсо токия судопрям. Эзия маря. «Вай, авакай! Ужо, ужо, Якшаматя, истя иля тандавтне...» — кардыя эсь пачкам «кежиявтницянть». Теке басом, коминь, автордынь лов паморькске ды лепштия «амариця» таркантень. Эрязасто, седе нардевстэ сюлминь шапкань пилевецтнень, вития мештьсэм-кирьгасом шарфонть. Зярс «таштынь лембе», кедем прок какарьгадсть, цяк тонгинь варьгам. Якшамось, марявсь, кары ловажатнесэяк. Сурневтемадонть шкань-шкань турвастом лиснесь «вы-вы-вы...»
Зоотехникем допрок нолдынзе сёлмонзо. Чатьмони. Мезеяк тензэ а эряви. «Мезе ули, се ули», — мерсь. Седе сеедьстэ стака, седеень разедиця апаротнеде таргицясь правты пыхадемантень. Ней вана а кемевияк: Петряень зепсэ прок араськак махорказо. Кардавсь?
— Мезе, Петряй, чуки-сорновтни аламнеде? Кирты зыяндеесь? Ёртык! Марят? Ёртык «тов» туемадо меленть! Кинень кадови Людмилат, арсить? Сондензэ мазый, вечкевикс ава, мерян теть, Чиргужосо арась. Перьканок велетнестэяк а муят... Марят? Эсеть кондямо аволь сэрейне, виде рунгине... сельмензэ ашназа-сэнть, налксезь налксить. Монень маряви, мазычинзэ кис меритькак [187] тензэ аволь Люда — Людмила, Людмила Павловна. Ансяк тук, ськамонзо эрямо а кадсызь... Эх, Петряй, Петряй...
Мария текень: «кадомак».
— Чапакс, чаула! Эриксстэ прят калмат, — эзинь кирдеве, кепедевсь вайгелем. Озынь тарказом. Седе кеместэ, парсте кирдезь, саинь ведьметнень. «Кадык моли айгоронок тов, ков моли, — саинь мель. — Яла ковгак усксамизь». Ков? Козонь? Содась ансяк Сонсь Пазось. Ков а варштат — тусто кельмесэ лексиця, превстэ ливтиця сув. Ков? Икелев, ансяк икелев! «Ужока. Мекс ансяк истя? Паряк, аштемс ве таркасо ды учомс ашолгадоманть? Арась, учозь, мезеньгак апак тее, а редясак Тоначинь пазонть самонзояк. Икелев, цёрат! Ансяк тов».
Варштавольгак кияк лангозонок ве ёндо, неезесь аволизе кецневте. Кевекс матразь лов ланга эскели лишме. Сон кильдезь нурдынес. Ракшась ды нурдынесэ аштицятне венть аламнеде ашолгавтыця сувсонть неявить чопачакс. А вайгельть, а кортамот. Калмонь кашт. Колси сонзэ ансяк лишменть пильгало лазновиця ловонть пукштяемазо. Лов, лов... Сув, сув... А ушодкс, а пе апаро Чатьмонемасонзо эци чамас, кургс, пилес. Ков, кодамо вий, кодамо вардонь ойме пани неть пайстомо, аволь мода лангонь эриця ёнов молицятнень, сулейкс эскелицятнень?
Зяро шказо — эзинь сода. Частомотано. Содасть ансяк сынь: чопода-сокор весь ды сувось. Мольтяно. Лишменть а капшавтан. Кирдян саезь ёнкс. Апак учо Арбуз — тарск! — лоткась. Полозатнень морост опамсь. Те таго мезе?
Эртевинек кодамо-бути кальпулос. Куракштнэ ломанде кавксть-колмоксть седе сэрейть. Тарадост лекше потсот. Улевельгак ков, неявольть сияждыця сэрей-рацяня балягакс ды кецневтевельть вановт. Нейгак мазыйть. Ашо-сэнь викшневкст. Марявсь понгинек ёвксонь, салавань каштмолемадо, асодавиксчиде пешксе вирьс.
«Кодат неть куракштнэ? Косо, кодамо паксясо нейнинь сынст?»—вельместь сеске кевкстематне ды мельгаст ледстнематне. Путынь ведьметнень. Стинь. Апак капша, [188] ваннозь ютынь аволь келей, кувака кальпулонть перька. Гувныця кемемась — менемс якшамонть палсеманзо эйстэ — мадсь толпандя велькссэ сяткинекс. Таго сась тарказонзо текесь: «Ков ней сыргамс? Кона ёнов? Верев? Алов? Ужо-ужо, ансяк аволь алов».
Теке та-кие бажась максомс тень превть — куракштнэнь потсто марявсь тень састыне морыця цёрань вайгель. «Вай, мекс истя монь ёнов чуди гайгемазо?»
А жене скажи |
Зярс кунсолынь моронь пельксэнть, мезеяк лия эзинь маря, эзинь нее — жойнесть пилесэм ды седейсэм потмура-сюмора валтнэ.
Озынь нурдынентень. Петряй содась эсензэ — чатьмонсь. Арбуз сыргась «но-о-нь» апак мере. Лисинек куракштнэнь тона ёнов. Саия превсэ кирдевиця ёнксонть. Таго кутьки пилем полозатнень салава, теке гуень, вешкемаст, седеенть таго лепшти ёнкстонть, шкадонть, валскень чиденть асодамось. Сувонь мастордонть верьга-томбальга ков-бути уи, а ризны, прок сэняжа тарвазнэ, од ковось. Мекс тензэ а невтемс прянзо минутас-кавтос? Панжоволь тенек ки, кекшевлимизь цят якшамодонть. Арась, а неи. Вельть эчке сувось велькссэнек. Варштавольгак, совавтоволь кемемань ёжот полонсто лисемадонть, ней вана... Цюр! Раужо мельтнень малавгак а нолдтнемат.
Ванан икелев, мель путан кирдемс ки, ветямс Арбузонь, мерят, компасонь коряс, видестэ. Сизесть сельмемгак. Нулк-нулк новольсь прям. Улом токась мештезэм. Карминь сутямомо. «Вант, цёра!» — арсезевинь тандадозь ды — тарск! — кепедия прям. Варштынь икелев. Стакалгадомадом эзь кадово мезеяк.
Апак учо чирькеденть эль вить ёндо, васоло-васоло, верев кепететсь сэняжа валдонь палмань! Кеняркстонть натой [189] саимим лембе. Машина эли, паряк, трактор тейсь нерькс фарасонзо. Сон зярс-бути кирдевсь таркасонзо ды мадсь.
— Идемизь, ялгинем! — серьгединь айгоронтень ды аламнеде лакштядия ведьметнесэ. — Курок, седе курок, Арбузнэ! Тонь лангс кемемась!
Ускицянок прок чарькодинзе валом. Келейгавтынзе эскельксэнзэ. Варматнесэ ацазь-матразь ловонть ланга ускомсто нурдынесь стакакс тензэ эзь маряво. Ардомсто теевикс варминеденть раужо пацякс лыйнесть лишменть черензэ. Кенярксонь коволдонть, седе курок пачкодемс валдонь кивчкадема таркантень, эзть маряво якшамонть палсеманзояк. Менельксэськак теке полавтовсь. Тешкстазь тарканть вановтстом эзия нолдтне. Зяро эйзэнзэ? Вайгельпе, кавто?...
— Тон, теня, седе састо! Седе стамбаро, тон... — макссь, окойники, ялгам вайгель. Валонзо эзть прядово.
У-уф! — каятотсь эль марявикс гайть. Тоцк! лоткавинек.
Вай, те мезе? Эзь чарькодеве, мекс истя сеске алкиньгадсь ускицянок. Вырк! стинь нурдынестэнть. Ванан, айгоронок понгсь ловдо пешксе латкос. Ардомсто эзизе редя. Виев, стакачиде апелиця Арбуз ваясь кирьга видьга. «Каня, те тон, минек вечкевикс, эрьва кода васькавтнезь ялганок, эртевить истямо туворс ды аштят лов потсо вийтеме?» — арсезевинь кажос понгицянть лангс ванозь. Лишмесь снартнесь лисемс ловонь полонстонть. Мезеяк эзь лисе.
Вырновтыя тулупом. Ютынь лишменть пряпес. Турванзо токасть ловонтень. Мезе теемс? Ловонть алдонзо а нардасак: а койме, а лия кедьёнкс арась. Ах, вана мезе теема!
— Петряй, нейке стяк таркастот! — серьгединь ялгантень. Монсь седе курок юксия чирькестэнть панстведьменть ды энялдозь, чевте вайгельсэ пшкадинь ракшантень:
— Но, но, Арбузик, снартык! — кортынь панстведь-меденть ноцкаезь. Айгорось тандадозь вансь лангозом, энялдсь лездамс оляс менеме. «Неже, неже арась, улевельгак — кирнявтозь кирнявтовлинь те «очкостонть» — кортасть цитниця сельмензэ.
Лишмесь эрязасто юхадизе верев-алов прянзо ды удалце пилысэнзэ рестядезь снартызе олякстомтомс рунгонзо. Мелезэ эзь топавтово. Икельце пильгензэ ваясть седеяк домкасто.
Ёколк-ёколк сась ваксозом Петряй.
— Э-э-э, — таргизе кувакасто вайгелензэ ды ахолдась тулуп ожасонзо, — капец, тестэ а лисевтяно!
— Содат мезе, оргодть ваксстом! Тонськак а чарькодят, мезть лабордат!
Мезе теемс?
Пульзинь. Штапо кедьсэ муия супонень пенть ды виень путозь, эрязасто ноцковтыя эсень ёнов. «Сюкпря, Инешкипаз!» — меринь эськам кецнемадонть — шождасто юксевсь сюлмось.
Сивексэсь лавшомсь. Таргия чирькенть, юксия трокс пикскенть ды мельганзо аеленть. Чиинь нурдонть удалов, кундынь удалце нежентень ды весе вийсэм шаштыя эсень ёнов. «Ну, «вармань сасый», ней «пуловтомат»! Седе шождыне карми. Лиси, кеман, тевенек».
Луньк-луньк ютынь лишменть икелев. Саия панстведьменть.
— Ну, Арбуз, ну, оиненек! — чевте вайгельсэ, теке эйкакш марто кортнезь, карминь ноцковтнеме панстведьменть.
Ракшась чарькодимим.
Весе вийсэнзэ, та-кода вейсэ икельце ды удалце пильгензэ лангс нежедезь, таргизе рунгонзо ловонь туворстонть. Паро, латкось аволь келеель. Икельце пильгензэ понгсть калгодо таркас. Улевельгак келей, а содан, мезе теевлинек. Арбуз сорнось. Аволь ансяк минь, сонгак пельсь.
Кильдия лишменть.
Кедем, марявсь тень, теевсть анксемасто таргазь эй-поколекс. Ков молят? Варьгасо а кильдтнить. Кедтне эно эжить. Эжить тулупонь ожатнень потсо, седеяк парсте — кудосо. Истямо зыянсто «оргодевинек», вана мезень коряс эряви тенек киштемс.
Сыргинек седе тов.
— Те мезде тон?
— Самай седе: айгоронок а ёколды! — кецнезь серьгединь кевкстеманзо каршо.
— Мейле мезе?
— Вай, идемкай! Ды те истя корты зоотехник! Арбуз эль пильгевтеме эзь кадово, вана мезе.
— А-а-а...
— Кода тонсь?
— Пильгем, теке аволь моньгак.
— Кирдть, кирдть, Петряй. Вейкесь уш эждеви. Монь кавто, ялатеке эждьсынь, — менсть кургстом, згилямонь таркас, седеень колыця валт. Ансяк сынст пулодо а кундасыть.
Зярс котьминек ловсо эцезь латкосонть, тердиця валдонь лехинесь умок уш мадсь. Одс Тапардымизь шержей якшамо сувось, одс совась потмозом асодавиксчинь майсевтиця ёжось. Анеявикс певтеме-певтеме пакся, тештесэ пештязь каштмолиця менель. Полозань моронть апак учо, васолдо таго сась цёрань секе вайгелесь.
Да скажи ты ей, |
«Ужо, тон-баритон, иля капшавто, тонь коряс а лиси. Ниле пильге лангсо ды листяно те отьмастонть, мусынек кинть-яннэнтъ содавикс кузтемпентень, кудонтень, косо гайги тейтернем вайгелезэ; иля, иля тандавтне, ямщик», — арсинь эськам.
Сельмемгак полгарьгадсть. Ваннан икелев — саезь ёнкс кирдян. Омбоцеде туворс понгомадо пелезь, лишменть а капшавтан. Ардынек ансяк таркань ваннозь.
Якшамось, марявсь, седеяк азаргадсь. Сонзэ казямо-наян лексемадонзо эзть иде лембе оршавкстнэяк. Кедтне, [192] виде, парсте-беряньстэ, ялатеке эжнесть тулупонь кувака ожатнесэ ды вейке-вейкень ёзазь. Шкань-шкань копорьгам ютнесь прок салмукскесэ пупсиця сурневтема. Арбузонь кильдемстэ талномадонть тарьксэсь истя эзь маряво, ней вана... куш курготкак иляк панжо — лепият.
Шкась мольсь. Эзь марявояк, кода кузинек вандора пандыне пряс.
Апак учо эйстэнек аволь васолдо, сувонь эчке коцтонть пачка, кивчкадсь, теке тердсь, эль неявикс ожо-якстере оскине! Аволь мираж? Аволь таго ниле пильгесэтне?.. Мезе илязо уле, ажият аравтыть сынст пелев. Эскелькс, кеменце, сядоце... Оскинесь велявтсь квадратонь кондямокс. Куроксто ланганзо таргавсь «Т» — тешкс.
Ды те, вантая, вальма! Аволь саразонь сельмешка вальмине — вальма! Покш кудонь сэрей-келей вальма! Моряс кадовицятне усиянь неемстэ рангить пиже-ожо вайгельсэ: «Мода! Мода!» Кадовицятне кецнемадонть сеересть: «Толнэ! Толнэ!»
Чоподастонть-сувстонть лиссть-стясть икеленек кодат-бути чапозь-путнезь кардазт-утомт, вишкине, модас лепштявозь, олгсо вельтязь кудыне. Те сонзэ вейкине вальминезэ сыреждсь — ахолясь тенек, тердсь, те сон педе-пес тапинзе пелемань, кавтолдомань ёжонок, майсеманок.
«Теке зярдо-бути неия сонзэ, мейсэ-бути содавикс, те кудынесь», — ций-буй ютась прявам. Малазонзо пачкодезь, кавтолдомастом мезеяк эзь кадово: те ульнесь Кельведнень ревень фермась. Цивтордсь вальминесэнзэ ванстыцянь кудынесь. Чикуншкадо икеле минь тесэлинек! Вана теть куля, вана тамаша! Лисни, косто сыргинек, тов сынек мекев. Вант ков эвсень прявтось ветимизь! Аволинек эртеве тезэнь, ютавлинека вакска, саволь «Степь да степь» моронть таргсемс цицер Овтай вирьсэ. Лисевель ямщикекс. Се ёнкссонть маласо кодаткак велеть-велинеть арасть. Вирь ды вирь. Морось, секень вант, тенек аволь прядово.
Онгозевсь пине. Кода а кенярдомс?! Косо сон, тосо ломань. Чикордозь-лакордозь панжовсь [193] кудыкелькстэме кудыненть кенкшезэ. Лиссь ванстыцясь: почаня, апак судря пря, апак чочне шубасо атя. Керш кедьсэнзэ кенкшенть кирдезь, эстензэяк апак кеме вансь прок менельстэ прыцятнень лангс.
— Кить истямо якшамоне лытыцятне?! — музгордезь пшкадсь тенек лисицясь. Седе парсте лангозонок варштазь, вайгелезэ чевтемгадсь. — Вай, те косто истя тынь? Совадо, седе курок совадо! Ютадо, лишменть сюлмаса, тикшине каян.
Увол-авол стинек нурдынестэнть ды ловсо-лекшсэ почодозь тулупсонок совинек пелькашка кудынентень. Лембе! Качады махорка качамонь, кедень ды ливезень чинесэ. Ванстыцясь, сизьгеменьшка иесэ атя, варштась чамазонок: ашо таркинеть а неявить? Каинек тулупонок. Эйстэст вейкенть азорось саизе ушов — Арбузонь копачамс. Кецневтсь лембесь. Седеяк вечкевсь кортамось, ломанень вайгелесь. Прок ие араселинь ломань ютксо. Атянть эрьва валозо марявсь васьканя, седеень эждиця музыкакс.
Мельтеме, кой-кода вачказь голландкинесэнть кувтолдсть куловсо токазь тонолнэтне. Киякссо, голландкань кургонть каршо — пичень коське пенгеть. Ванстыцясь каясь зярыя поленат ды якстере-тюжа толгельтне курок ашкордызь сынст. Толось лиясто лиснесь каштомкургостонть.
Вальмалангсо типельди, сод нолдтни лампине. Толнэзэ, теке ожо кельне, эензазь вальминестэнть лисиця экше кошттонть сорны-менчеви. Лампине — маяк. Лампине — идиця. Лампине — кецьнемас ветиця.
* * *
— Косолить те шкас, мезе мартот теевсь? — сорныця вайгельсэ вастымим ним, цяк кенеринь эскельдямо тарчксонть трокс.
— Косолинь... — меринь сонсензэ валсо ды, зярс кайсинь, нурькинестэ ёвтния телень чаво паксява азгодемадонть.
Стуворонть лангсо чокшне путозь, умок кельмезь ям, ваканнэсэ печксезь кши, пенч. Сиземадонть, удомань [194] самодонть та-кода лавшоминь, Рипакадынь. Ярсамскак мелем арасель. «Чайне ансяк бути», — меринь нинтень. Тень мерезь, стинь таркастом ды седе марявиксстэ нолдыя радионть. Ёвтнесть валскень кулят.
Радиовайгелесь прядынзе валонзо. Мельганзо аваломань пачтясь: течи ды ванды — якшамо, маней, лов а учневи. Ансяк прядынзе ушоёжодонть, менелькстэнть валонзо, стенас понгавтозь ламонь содыця, мазыйстэ морыця-кортыця пиже динамикстэнть гайгезевсь келей-кувака нусманя моро:
Степь да степь кругом, |
Пси чайде копорязь, нежединь стенантень ды кунсолынь ламоксть марсезь моронть. Истямокс, кодамокс чудесь радиостонть, эзия марсе. Гайгемаськак натой, марявсь, аламнеде полавтовсь, валтнэяк теевсть седе чарькодевиксэкс, седейс педицякс. Ёвтневсь эйсэнзэ аволь та-кодамо асодавикс ямщикте, ёвтневсь эстедень, минденек. Ёвтневсь уцяскадо.
Шказо ульнесь валскень кото чассто мейлень.