Поладкстомо (2016)/Шожда кить сон эзь вешне
[322]
Очерк
| ШОЖДА КИТЬ СОН ЭЗЬ ВЕШНЕ |
Тёжа вейксэсядт сизьгеменце иень чадыковсто мон Горький ошсо, велень хозяйствань институтсо, идинь кандидатонь диссертация. Зярдо прядовсь идемась, ваксозом озась аволь сэрей, шержей черь ава ды кевкстимим, костонян. Мон ёвтнинь, костонь, косто сынь. Истя теевинек содавиксэкс биологиянь наукатнень коряс докторонть профессоронть Елена Петровна Хрущева марто, кона чачсь ды эйкакшпингензэ ютавтызе минек республикань Ицяло эрзянь велесэнть.
Елена Петровна мельспаросо ледстни икелень ды неень эрямодонть. Сон вадрясто кирди мельсэнзэ, кода ветешка-котошка иесэ тейтернекс кепе чийсь ульцява тетянзо вастомо. Петр Григорьевич Куклин сась апак капша, крандазсо. Розень ды товзюронь сювасо почодозь оршамопельсэ, сизезь, сон лоткавтылизе лишмензэ, каподизе тейтерьканзо ды озавтылизе элезэнзэ. Кудов мольсть чатьмонезь. Ленань мештезэ пешксель кеняркссто, цитниця сельмсэнзэ ваннось эрьва ёнов. Петр Григорьевич, паряк, уш сестэ арсезевкшнесь тейтерензэ сы шкадонть. Эрьва кодат мельть сакшность превезэнзэ. Семиясь покшоль. Вейкес кемсь кудазорось: касы-кепеди Лена, кода весе ялганзо-оянзо, лиси мирденень, тееви кудоюртонь лембень ванстыцякс, азоравакс. Мейсэ берянь истямо уцяскась?
1913 иестэ Лена Куклина прядызе эсест велесэ церковань-приходонь школанть. Ней ков? Ды кемгавтово иесэ тейтернесь апак учне яволявтсь тетянстэнь ды аванстэнь, келя, покш мелезэ туемс... монастырев. Тосо, келя, ламо книгат, карми тонавтнеме седе тов. Кудосо талакадсть. Лена содась эсензэ: а нолдасызь монастырев — оргоди. Савсь пурнамс-сэрнямс те ознома таркантень. Ды тесэ лездась сонсь монастырень прявтось. Сон яволявтсь инжетненень: кадык эйкакшось аламодо касы, ды мейле, келя, сайсынек.
[323] Ленань бажамодонть марясь васенце тонавтыцязо. Мария Герасимовна Морозова. Сеске чийсь тенст кудос, саизе Ленань ве ёнов ды кувать кортнесь мартонзо. Мария Герасимовна яла седе сеедьстэ кармась сакшномо Куклинтнэнень. Сон кармась Ленань анокстамо Починковской кавто классонь школав тонавтнеме. Секе кизэстэнть якасть школанть ванномо, теевсть содавиксэкс тосонь прявтонть марто.
Починкась сеть шкатнестэ лововсь Нижегородской губерниясо вишка ошкекс. Ды вана сёксень васенце читнестэ Петр Григорьевич кильдизе лишмензэ, каясь крандазонтень тикшеканст ды тейтерензэ марто сыргась Починкав. Истя 1913 иестэ Лена Куклина теевсь кавто классонь школань тонавтницякс.
Тейтерьнентень васня пек стакаль. Тонавтниця ялганзо ютксо сон ськамонзоль эрзясь. Весть священникесь истя мерекшнеськак: «Путовлинь теть, Куклина, «вете», да ведь тон а содасак, кода видестэ евтамс «похлёбка» валонть».
Лена нилизе покордавксонть ды бажась тонавтнеме седе вадрясто. «Куроксто тевем тусть парсте, — ледстни Елена Петровна, монь кармасть ловомо школасонть омбоце ученицакс».
1916 иестэ, зярдо модамасторганть гувнось империалистической васенце войнань толось, Елена прядызе тонавтнеманзо ды сась чачома велев ушодома школасо тонавтыцякс. Топодекшнесть тензэ кеветее иеть.
Еленанень эзь саво тонавтомс эйкакшт. Сон сонсь бажась тонавтнеме седе тов, содамс седе ламо. Те арсеманть седеяк сыремтизе-кирвазтизе фронтсто лелянзо сёрмась. «Кадован эрямо, — пачтясь лелясь, — сан, карман теть лездамо». Содазь, Елена эзь аште кедень кундазь: кизэнь перть нурьгсь книгатнень велькссэ. Секе сёксестэнть сон вадрясто максынзе Лукояновань омбоце ступенень школав экзаментнэнь (революциядо мейле истя лемдязель гимназиясь) ды колмо иень ютазь прядызе сонзэ.
[324] Пек стакальть сеть шкатне. Советской од республиканть снартнесть повамо контрреволюционертнэ ды омбо масторонь интервенттнэ. Пултазь ошт ды велеть. Вачочи. Кажов ломантне ялатеке кемсть вандынь валдо чинтень. Куш педе пев зярс эзть истожавкшно апак учонь инжетне ды контрреволюционертнэ, коммунистэнь партиясь, од властесь арсесть уш ГОЭЛРО-нь пландонть, грамотас ломантнень тонавтомадост.
...Нижегородской педагогической институтось бизны прок мекшвеле. Молить экзамент. Озадояк ды стядояк аштить кенкштнень каршо сеть, кить снартнить виест понгомс тонавтнеме, теевемс тонавтыцякс. Вана панжовсь вейке кенкшесь ды аудиториястонть ливтязь ливтясь Лена Куклина. Сельмензэ цитнесть кецямодонть, чамазо палсь чилисемакс. «Вете» — кенярдозь яволявтсь ялгатненень. Эрьва ендо, прок озязт, пурнавсть перьканзо лия абитуриенттнэ. Веенст шнасть сонзэ, омбонст цяпасть. Истят кеняркст ульнесть лия экзаментнэнь максомадо мейлеяк.
Улемс тонавтыцякс — тенень бажамось чачсь Ленань седейсэ умок. Те кшикочомонть танстензэ сон уш кенерсь варчамо: иеде ламо важодсь Од Ицяло велинень школасонть тонавтыцякс ды школань прявтокс. Тесэ сон ветясь ботаникань урокт. Кургонь автезь кунсолость эйкакштнэ сонзэ ёвтнеманзо вирденть, лугатнеде, тикшетнень, чувттнэнь эрямодост. Куклина вечксь вишкинетнень марто котьмамонть.
Секс педагогикань институтов сась уш школасо роботань опыт марто ломанекс.
— Теке шкастонть, — ледстни Елена Петровна, — сельмем сявалесть ормань пансицятнень — врачтнэнь тевест лангс. Пек уш жальть марявсть эрзянь аватне, конатненень рузокс кодаяк а ёвтавиль, мезест сэреди. Мейле чарькодинь: эряви васняяк ломантнень тонавтомс рузокс кортамо, сёрмас содамо. Секс алтыя прям тонавтыцянь тевентень.
Елена Петровна якась Нижноев экзаменэнь максомо салава, тетянзо-аванзо апак кевксте. Илязт ризнэ, мерсь [325] тенст, келя, моли ошов учителень конференцияв. Теде икеле салава анокстась прянзо ве ёно эрямо: стякшнось аванзо марто чапаксонь човорямо, кшинь панеме, ярсамопелень пидеме. Содась: весе неть тевтнень, сы шка, савить теемс эстензэ.
Кудосто эзть нолда эйсэнзэ вейке тувталонь кувалт: нужачись пек кеместэ кирдсь семиянть кшнинь коморсонзо ды а мезе лангс улевель ильтямс тейтеренть васолонь ки лангов.
...Студентэнь чить. Кие ульнесь студентэкс, се сырнень казнекс вансты косо-бути седеензэ вакссо сеть шкатнеде ледстнематнень. Аудиториясо занятиятне, колхозонь ды совхозонь паксясо роботатне, заводов якамотне, ошонь театратнесэ концерттнэ ды спектаклятне тонавтызь ламонь содамо, кемекстызь обуцянть. Кодат псить ульнесть вейсэнь эрямо таркасо ашолгадомс гайгиця пелькстамотне-кортнематне!
Советэнь масторонь васенце студенттнэнень а шождынель тонавтнемс ды эрямс. Сеедьстэ савкшнось мадемс вачодо. Ламот сэредсть тифсэ, кулсесть. Пек вачоль 1921 иесь. Куломась теке пелюмасо ледсь ломантнень.
Студенттнэнень, конат анокстасть пряст тонавтыцякс, агрономокс ды лия специалистэкс, макссть кодамо — а кодамо паёк (сахар, почт, ямкст ды мик спицькат). Студенттнэ, конат ветясть занятият грамотас асодыцятнень марто, эрясть сыненст максозь ярмактнэнь лангс. Неть ялгатненень паёк эзть максне.
Колмоце курссо тонавтнемстэ Куклина сайсь научно-исследовательской роботань тема. Ветицякс ульнесь С.С. Станков профессорось. Эрявсь тонавтнемс лей чирева касыця тикшетнень.
Тетрадесь, козонь сы шкань биологось сёрмалесь, мезе несь, марясь ды ловнось, курок эчкелгадсь. Теке покш тодов аштесь тумбочка лангсо мазыйстэ теезь гербариесь. Вень-вешка савкшнось ловномс, ансяк муемс, кодамо лемезэ ды «тетялемезэ» те эли тона тикшиненть, лопиненть. Лейтнень чирева якамотне, апак удо ветне эзть ёма стяко.
[326] Вейке гербариенть марто, кона лемдязель «Лукояновской уездэнь паксянь зыянов тикшетне» («Засоренность посевов Лукояновского уезда»), Е.П. Куклина студенткась якась Московов Всероссийской выставкав.
1925-це иень ацамковонь вейке чистэ институтсонть ушодовсь кортнема дипломной роботатнеде.
— ...Вал максови Елена Куклинанень, — яволявтсь Государственной экзаменационной комиссиянь прявтось — ашо черь ды сакал марто апокш атинесь.
«Мельсэм, — евтни Елена Петровна, — се а стувтовикс чистэнть лангсом ульнесь тюжа платия, пильгесэнь алкине кочкаря котат, кутьмерьсэм, теке локшо, нулнось черь-пулом. Зярдо прядыя кортамом, стясь шержей сакал атясь ды кармась кевкстнеме: зяро ием, костонян. Мон ялгатнень коряс ульнинь пек седе од ды сэремгак апокшке. Арсян, атянтень марявиь вишка тейтерьнекс...
— Елена Петровна Куклинань вадеманзо, — яволявтсь прявтось, — комиссиясь ловизе сехте вадрятнестэ вейкекс. Сонзэ арсетяно кучомс тонавтнеме аспирантурав...
1925-1934-це иетнестэ Елена Петровна Хрущева важодсь Нижнеень университетэнь машиностроительной рабфаксо: васня лаборанткакс, мейле биологиянь ды эрзянь келень тонавтыцякс. Колмо иеть ульнесь рабфаксо эрзянь ды татаронь отделениятнень прявтокс.
1930-це иеть... Лондадыть-каладыть пингеде пингень ташто койтне. Ломантне пурнавсть вейсэнь хозяйствас, вейсэ ушодсть сокамо-видеме, од эрямонь тееме. Эрявсь теемс аволь ансяк эрямонь од койть — сокамонь-видеманьгак. Ды Горький ошонь велень хозяйствань институтонь од тонавтыцясь Елена Петровна Хрущева, кода кортыть, прянек-пильгенек чопавтсь вейсэнь мелявкстнес.
Од колхозтнэ, моданть лезэвчинзэ покшолгавтомга, сеть иетнестэ ливтнесть паксяв ламо навоз ды торф. Эрявсь содамс: чапаськады-арась тень пингстэ модась, кодат зыянов тикшеть кармить касомо сонзэ лангсо, кода эряви каршост тюремс.
Секс уш зяроцеде савсь кундамс определительтнес, вешнемс ответ аравтозь кевкстнематнень лангс! Текень кис савсь теемс истямо прибор, конань эйсэ ваннови модась зыянов тикшетнень видьмест марто
Зыянов тикшетнеде анокстазь тевенть кис 1935-це иестэ Елена Петровна Куклинанень максозель биологической наукань кандидатонь лем. Секе иестэнть СССР-нь Наркомземень Квалификационной комиссииянть мелензэ коряс сон кемекстазель доцентэкс.
Вейке профессор-растениевод кармавтсь седе домкасто ванномс лисохвостонть — коромокс тикшенть санонзо. Те ульнесь 1938 — 1939-це иетнестэ.
Микроскопонь пачк сантнэнь ванномсто апак учне кармасть неявомо... (косто, каня, саевсть!) боба тикшень умарнеть. Ванкшныцясь абунгадсь: лисохвостонь — злакоконь тикшень — сансо умарнеть?! Ютавтозь вейке опыт, омбоце, колмоце... Ды те кодамояк а умарне, те — микоризной пангонь везикула (байгине). Истя Елена Петровнань эрямос совась аволь эрзянь ды аволь рузонь «микориза» валось. Рузонь кельс сон ютавтови кода «грибокорень», эрзякс — «санпангине». Смустезэ истямо: касовксось (тикше, чувто...) саи пангиненть эйстэ вейке ярсамопель, пангось касовксонтень — лия. Ботаникань наукасонть теде содыльть умок, но ансяк чувттнэнь ютксо. Ды вана куля: вейке иень тикшетнень ундокссо, кода чувттнэнь ундокссояк, эрить микоризань пангинеть!
Шкань ютазь Московов, минек масторонь покш ды содавикс ученоентень-физиологонтень А.Л. [328] Курсановнень кучозель энялдома — максомс консультация. Эрявсь сыргамс прявтошов. Ды вана тесэ Елена Петровнань икелев стявтозель пирявкс. Ды аволь алкине. Институтонь директорось, конанень кевкстеме мольсь Куклина, а кемезь мерсь: келя, Московов тынь весе сакшнотадо аволь паро тевс, — колошань рамамо. Елена Петровна эзь учне истят а мазый валт прявтонь, седеяк пек цёраломанень пельде. Сон таргизе юдминестэнзэ Курсановонь пельде сазь конёвонть, венстизе институтонь прявтонтень. Тона чатьмонсь. Сестэ Елена Петровна велявтсь ды лиссь кабинетстэнть, киньгак апак кевкстне, командировкавтомо, рамась эсензэ ярмак лангс билет ды озась поездс.
Прявтошонь учёнойтне шнызь Елена Петровнань тевензэ. Од учёноесь ливтязь ливтясь мекев кудов. Кодат ансяк мельть ды плант эзть сакшно превс!.. Ды весе сынь лондадсть. Нерькстынзе сынст эсензэ раужо карандашсонзо идемевсень войнась.
1941-це иень аштемковонь 22-це чись кежей даволокс совась ломантнень лембе кудозост. «Войнадо икеле» ды «войнадо мейле» валтнэ кеместэ совасть ломантнень превс-седейс ды явизь эрямонь лувонть кавтов.
— Ине войнань иетнестэ, — ледстни Елена Петровна, — мон ульнинь Горький ошонь Автозаводской районсо менельстэ каявоматнень каршо инструкторкс. 1943-це иестэ совавтомизь партияс.
Неть валтнэ совасть автобиографияскак. Ней уш кармась стувтовомо, кода немецень самолёттнэ кайсесть куломань канстост ошонть ды заводтнэнь лангс, косо тейсть танкат ды лия леднемапельть. Автобиографияс эзь тешкс — таво се, зяро веть апак удо печтясь Елена Петровна кудо прясо, санитармонь юда марто, зяро сельведть валсь а шкасто кулозь малавикс ломантнень кувалма.
Прядовсь войнась, ды ломантне таго кундасть сезевезь тевезэст. Елена Петровнань прясто эзть лисне микоризадонть арсематне. Васенце опытэсь теезель лияназонть марто. 1950-це иестэ тень коряс сёрмадозель статья. Кавто иень ютазь печатазель «Значение микоризы [329] в формировании урожая пшеницы» роботась. Кармасть лисеме ученоенть лия сёрмадовксонзояк.
1957-це иень даволков. Таблицатнень ды графиктнень икельга, конат понгавтнезь стенава, мекев-васов састо эскелязь, Елена Петровна Хрущева ёвтни СССР-нь Наукань Академиянь микробиологиянь институтонь ученой советэнь, члентнэнень эсензэ ламо иень вешнематнеде. Колоньгемень минутат... Те шканть перть эряви кенеремс ёвтнемс весемеденть, мезе теезь. Пуромозтне седейшкава шнызь диссертациянть. Минек масторсо те ульнесь докторской васенце диссертация, кона сёрмадозель микоризатнеде. Лемдязель сон истя: «Микориза пшеницы и ее влияние на рост и развитие пшеницы». Важодемасонть невтезель, кода раштыть-касыть товзюронть ундокссо микоризань пангинетне, зярдо сокамодо икеле паксяв ускить ламо навоз, минеральной удобреният, зярдо эрьва кода полавтневи модань лембесь ды коштось. Диссертациясонть ванкшнозь, кода касы товзюронь ды кой-кона лия культуратнень чачомаст неть сельмсэ а неявиця пангинетнеде. Весе те вельть сюпалгавтызе биологиянь науканть, покш лезэ макссь велень хозяйствань ветямонь тевентень.
1958 иень панжиковсто Высшей аттестационной комиссиясь макссь Елена Петровна Хрущеванень биологиянь наукань докторонь лем, 1960-це иестэ сон кармась улеме велень хозяйствань Горьковской институтсо «Ботаника и физиология растений» кафедрань профессорокс.
1960-це иестэ саезь 1970-це иес шкась сехте сюпаволь. Те ульнесь прок сёксня сюронь урядамо шка. Неть иетнестэ сонсь «микоризань авась» ды сонзэ тонавтницятне (сисемтне юткстост идесть кандидатонь диссертацият) ютавтсть паксянь ды лабораториянь ламо эрьва кодат опытт, конат макссть наукантень ды практикантень а вишкине лезкс. Сёрмадозельть малав колоньгемень эрявикс важодевкст.
Содавикс биологось А.А. Любищев эсензэ девизэкс ловсь: кенереманть туртовс, а эряви эрязкалемс.
[330] Елена Петровна Хрущевань эрямонь лувозо ды наукасонть тевензэ седе а ков парсте невтить неть валтнэнь видечист. Елена Петровна зярдояк эзь капша, зярдояк эзь машнете. Тень лангс апак вано, сон кенерсь тееме ламо: кода полавтови микоризань пангинетнеде кукурузанть аминокислотань зэмезэ-составозо, мезе теить микоризань пангинетнень марто удобрениятне, ядохимикатнэ, лия веществатне, кода сеть эли лия культуратне виензыть эли кадовить касомасо неть вишка пангинетнеде...
...Минь Елена Петровнань марто кортнетяно сонзэ кудосо. Оршазь сон лембе, раужо-пиже халатсо, лавтовонзо ланга каязь чопода-якстере кофтыне. Азораванть шержей черензэ судрязь удалов ды пурназь кеме сюлмос. Кода неяви фотокарточкатнестэяк ды ёвтни сонсь Елена Петровна, од пингева черензэ ульнесть, теке дёготь, раужот. Эзть полавтово, паряк, раужо сельметне. Сынст эйсэ нейгак цитни одкспорань тол. Ванькс, гайтев вайгелесь, лембе мизолкстнэ пансить арсематнень: икелеть ашти малав кавксоньгемень иесэ ломань.
Вальманть томбале стамбарнэ пры лов. Сон ашо палясо орши эрьва чувтонть, эрьва тарадткенть.
— Бути ули меленк, невтьса тенк корреспонденциям. — Елена Петровна тусь. Лия комнатасто ливтсь покш кувта конёвт.
Те ульнесть сёрмат, конатнень Елена Петровнанень кучнизь лия масторонь ученойть. Ламот энялдсть кучомс тенст «Микориза и корневые гнили у яровой пшеницы» статьянть. Сёрмадсть США-нь Калифорнийской ды Мичиганской университеттнэстэ, Канадань велень хозяйствань институтсто, Австриянь экологиянь институтсто. Сёрмадсть Индиясто, Италиясто, Бразилиясто, Швециясто, Франциясто ды лия масторсто. Эрьва кодамо кельсэ, эрьва кодамо конёв лангсо. Весе континентнэстэ чудезь чудить энялдомат: кучинк статьянть, конань сёрмадызе профессорось Хрущева — Ицяло велень эрзянь авась.
[331] Елена Петровна невтни неть конёвтнень, ды сельмесэнзэ цитнить кенярксонь сяткинеть. Ды кода а кецямс! Икелень «инородецэнь» тейтерь-ава кузсь биологиянь тёкштнес! Тень кисэ сон казезь кото казнесэ!
Сельмень икелев понгсь фотокарточка, кона ульнесь аволь лиятнень кондямо.
— Те снимкантень ведьгеменде ламо иеть, — корты кудазоравась, — Сон ледстявты од порадом, сеть шкатнеде, зярдо ансяк ушодокшнынь тонавтыцякс важодеме. Ульнесь те 1925-це эли 1926-це иестэ. Пурнымизь минек сестэ Московс. Эрявсь вишка нациятнень ды народносттнень весень ветямс сёрмас тонавтомо. Тень кувалма пурназельгак Весероссиянь васенце промксось.
В.И. Ленинэнь Мавзолеенть вакссо стядо ды озадо аштить ламо ломанть. Аватнень лангсо эрзянь оршамопельть. Цератнень ютксто пек явови келей лавтов, ашо сакало марто атя. Оршазь пальтосо, прясонзо шляпа. Те — эрзянь содавикс тонавтыцясь М.Е. Евсевьев профессорось, конань лемензэ умок кандни тонавтыцянь анокстыця Саранонь институтось.
— А те ки? Содави тенк? — Елена. Петровнань сурозо лоткась вейке тейтерень чама лангс — А содави? Косто.... Ведь зняро иеть ютасть! Те мон истямолинь...
Лангозом ванныть тейтерень покш ванькс сельмть. Мештеванть каязь кувака раужо черьпуло.
Те фотографиянть ды микроскопонть, конань пачк Елена Петровна комсте ламо иень перть ваннось ды тонавтнесь микоризань теиця пангинетнень, сон казинзе Мордовиянь краеведениянь музеентень. Ванстовить тесэ текекс наукань важодевксэнзэ, копият, лия курмот-кармот.
Зярдо мон ледстия Елена Петровнанень, кода а пек умок якинь Ицялов, ульнинь буень малавиксэнзэ кедьсэ, школасонть, косо зярдо-бути тонавтнесь Лена Куклина тейтернесь, азоравась мелявтозь мизолгадсь.
— Тынсь умок ульниде чачома велесэнк? — кевкстия.
— Аволь пек умок школам содавтыя, вастневинь тонавтыцятнень ды эйкакштнэнь марто. Паро школась, мазый.
[332] Ансяк монь седеесь кадовсь те од школанть вакссо каладозь кудынентень, косо кодгеменде ламо иеде икеле тонавтнекшнинь церковно-приходскойсэнть — Аламос арсезевсь, поладсь: — Монсеньгак а стувтнить. Сакшныть тень Ицялсто. Ламоксть ульнесь кедьсэнь Сарансто биологиянь факультетэнь деканось Н.Ф. Санаев. Совсесь «Советская Мордовия» газетань корреспондентэсь Епишин ялгась. Сеедьстэ сёрмалить тень краеведениянь музеень важодицятне.
Эзь марявояк, кода ютась шкась. Талайс мольсь седейшкавань кортнеманок: мезе ульнесь, мезде ризныть, кенярдыть, арсить течинь од ломантне.
«Сятко», 1982, 3 №