Посни челядьлы
Ичӧтик детина гуранын уялӧ,
Кашкӧмӧн палич пом тшалакӧн тувъялӧ;
Тыдалӧ, ёна нин детина пессьӧма:
Чужӧмыс, паськӧмыс няйт ставыс — резсьӧма.
Аръявыв. Войяснас чорыда пужъялӧ,
Лунъяснас вой тӧлӧн буситӧ, кӧтӧдӧ.
Детина «уджалӧ» — палич пом тувъялӧ, —
Мый бара думсьыс сэн, гуранас, лӧсьӧдӧ?..
Туй кузя ворсігмоз челядьяс локтӧны,
Варовӧсь — быттьӧкӧ дзодзӧгъяс готкӧны, —
Быдӧнлӧн нига доз бокас со ӧшалӧ...
Аддзӧны — детина палич пом нӧшалӧ.
— Мыйла нӧ, Микайлӧ, он волыв школаад? —
Медыджыд велӧдчысь сьӧлӧмсьыс юалӧ: —
Велӧдчӧм миянлы кутшӧма колӧ ӧд!..
Видзӧдтӧ, гуранын няйт порсь моз уялӧ!?.
— Эн сэні мешайтчы! — горӧдіс детина. —
Аддзан ӧд, буракӧ, — удж вылӧ петӧма!
Оз на ӧд школатӧ вакульяс кыскыны —
Эштам на тӧвбыдӧн пӧттӧдз сэн бызгыны!..
Ӧні мем некор дзик школаӧ довъявны:
Тӧв кежлӧ колӧ со эштӧдны мельнича, —
Тӧвнад ӧд паличтӧ он вермы тувъявны —
Водзвыв и нӧйта ме изки тув, медмича!..
— Коньӧрӧй!.. Йӧюкӧй!.. — воддзаыс шуасьӧ. —
Мельнича вӧсна тадз няйт пиын луасян?
Изкиӧн кӧсъян тэ мывкыдтӧ бурӧдны?..
Некодлы, тыдалӧ, бур вылас зурӧдны?
— Сэсся ӧд ми воклы, — шуӧ сэн детина, —
Нинӧмла быдпӧлӧс грамота тӧдмавны!..
Батьӧ тай шуӧ жӧ: «Пӧльза пӧ ньӧти на...
Гашкӧ пӧ лоӧ на школатӧ-й пӧдлавны...»
Сенюкъяс, Ванюкъяс,
Ӧдюкъяс, Анукъяс,
Ӧнюкъяс, Сашукъяс,
Васюкъяс, Машукъяс,
Мукӧд пӧлӧс нимъяса
Том гражданинъясӧй,
Посни коми войтырӧй,
Муса челядь котырӧй!
Энӧ жӧ гуранын
Бур кадын шувъялӧй!
Ӧнісянь юраныд
Бур мывкыд тувъялӧй!
Велӧдчӧй, пыр велӧдчӧй!
Лёклы энӧ шедӧдчӧй, —
Важ олӧмысь — ылӧджык,
Выль олӧмӧ — пыдӧджык!
Ещӧ шуа тіянлы,
Дона челядь-пиянлы:
Быдӧнӧс пыр чунӧдӧй:
«Школа энӧ вунӧдӧй!»
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1943 году и был посмертно реабилитирован в 1955 году, соответственно эта работа выйдет в России в общественное достояние в 2026 году.
The author died in 1943, so this work is also in the public domain in countries and areas (outside Russia) where the copyright term is the author's life plus 80 years or less. |