Пуйырымашем

Сидукова Тамара

Пуйырымашем

Кышты ылат тӹньӹ, цӓшем,
Йымы пуйырымы пелӓшем?
Кышты ямын каштат тӹньы?
Ужмет ак шо, виднӹ, мӹньӹм.

Ӓнят, кӹзӹт ылат тӹштӹ,
Кышты вашток лым дӓ ӱштӹ.
Ӓнят, кенӓт шокшы вӓрӹш,
Кышты мардеж ошмам сӓрӓ.

Изи мардеж лиӓм мӹньӹ
Дӓ ӹнянем, моам тӹньӹм,
Эртем вӹдӹм, тылым, шӹргӹм,
Эртем хоть мӱлӓндӹ тӹрӹм.

Но вет моам тӹньӹм, тӓнгем,
Лыктам ире ӹдӹр йӓнгем
Дӓ кычыктем тӹлӓт кидӹш:
«Ӹнде тидӹ тӹньӹн лиэш».