Рытъя пуръяс

by Латкин Владимир Павлович

Шондісӧ дзебисны
Кымӧрлӧн юръяс,
Кузь вадорса берегӧс
Кышӧдіс рыт.
Но оръявтӧг ю кузя
Дзуртӧны пуръяс.
Ме лыддя... но уна зэв,
Торкласьӧ лыд.

Виж пуръяслӧн вӧньыс
Оз думыштчы орны;
Тшӧтш быттьӧкӧ кылалӧ
Кузь берегдор.
А ва кузя береглань
Нюжалӧ сёрни...
И сьылӧм...
И серам...
И гудӧклӧн гор.

Пыр кывтыдлань Эжваыс
Пуръяссӧ нуӧ
И гажӧдчиг, сьылігтыр
Шогсӧ оз тӧд;
Дзик тырӧма пемыдыс
Лайкъялан шумӧн,
А колана юӧр
Мем визув оз сет.

Ме кывзыся...
Кыйӧда визувлысь шыяс
И выльпӧв пыр малала
Кабала тор,
Кӧн анькытшӧн киссьӧма
Шыпаса бисер,
Кӧн дзебсьӧма радейтӧм
Окалігсор.

Эк, быттьӧкӧ тӧрыт на
Вӧлӧма ставыс,
А збыльвылас мыш сайын
Кольӧма во.
Ме думайтлі — дыр на
Оз бергӧдчы гажыс,
И аддзысьлӧм — думайті —
Дыр на оз ло.

А тӧрыт, дзик виччысьтӧг,
Воӧма юӧр —
Мем вайӧма гижӧдтор
Сумкаа морт.
Сэн анькытшӧн киссьӧма
Шыпаса чутъяс,
Сэн дзебсьӧма радейтӧм
Окалігсор.

Ме лыдди,
Мый тувсовъя велӧдчӧм эштіс.
И школаӧ волӧмыс
Арӧдз оз сюр.
Но шойччӧмсӧ
Мусаыс неуна вештіс —
И кӧсйысис Котласӧдз
Вайӧдны пур.

А талун со оръявтӧг
Дзуртӧны пуръяс,
Ме тӧда, мый сэн кӧнкӧ
Радейтан ныв,
Код кывтігӧн кӧсйысис
Сетны мем юӧр
Да сьывны медтӧдса мем
Гор сьыланкыв.

Со медбӧръя югӧр нин
Пемыдын сылі,
Со регыд нин вадорсӧ
Шебрӧдас вой,
А син дінті пуръяс
Век мунӧны кывтыд,
А пуръяслӧн дзуртӧмыс
Век на оз ор.

Ме кывзыся...
Кыйӧда визувлысь шыяс.
Пыр, кытчӧдз зэв ылісянь
Гор сьыланкыв,
Кыдз саридз ва содӧм,
Оз паськав, оз вынсяв.
Сэк берегсянь пуръяслань
Тойышта пыж.

Ме веськӧда пыжсӧ
Гор сьылӧмлы паныд, —
Кӧн синъяслӧн рыыс,
Кӧн морӧслӧн пым...
А недыр мысьт сьылӧмыс
Орӧмӧн ланьтӧ,
И вомдор мӧд вомдорысь
Некыдз оз мын.