Святое Евангелие (эрзянь)/В/Маркань/16
Глава 16.
1Субутань ютазь, Магдалинань Марія, Іаковонь Марія да Соломія рамасть тантей чинень ваднимат Іисусонь киськензэ ваднемс. 2Недля ютконь васенце чистэнть рана-як, чинь лисьме шкане, састь сынь калмонть лаҥгс 3да кортыть эсь ютковаст: ки сявордасо тенек калмостень совамо таркастоньть кевсть? 4Кода вачтасть, неизь — кевсь сявордазь, а сон пек покшоль. 5Калмостень совазь, нейсть сынь вить пель ёно ашо одижас орчась озадо аштиця од ломань, да тандацьть. 6Сон мерьсь тенст: илядо пельть, тынь крёст лаҥгс чавозь Назарянинэнь Іисусонь вешнитядо. Сон арась тесэ, — вельмесь. Вана тарказо, козо Сон путозель. 7Азёдо, ёвтадо тонавтницянстэнь да Петранень, што Сон васттадызь тыҥк Галилеясо: тосо Сонзэ нейсыҥк, кода теҥк кортась. 8Сынь, лисезь, чіезь тусть калмонть ваксто; сынст пелькс саинзе да сорнума. Секс сынь кинень-гак мезе-як эзть ёвта, — пек пельсть.
9Недлянь васеньце чистэнть рана-як вельмезь, Іисус васнят-как прянзо невтьсь Марія Магдалинанень, конайстэ Сон панць сисем амазыть. 10Марія мольсь да ёвтнесь сетьненень, конат Іисус [ 136 ]марто яксесть (а ней) Сонзэ кисэ раҥгазь да аварьдезь аштесьть. 11А сынь, марязь, што Сон жив да Сонзэ неизе Марія, эсть кемть. 12Теде мейле Сон лія шачосо прянзо невтсь сынст эйстэ кавтотьненень ки лаҥгсо, велес ютамсто. 13Сетьне-як, мекев мурдазь, ёвтлесть ліятненень, аньсяк сынест-как эзть кемть. 14Меельсь пелев Сон прянзо невтсь кевійкетьненень, сынст ярцамо шкане, да сялгавтнинзе сынст акеммаст да калгодо седеест кис, мейс сынь эзьть кемть Сонзэ вельмемеде мейле неицятьненень. 15Мейле мерьсь тенст: азёдо весе мастороньть келес, яказь, эрьва ойменень евангеліядонть ёвтледе. 16Ки кеми, да прянзо лемди, се ванозь ули, а ки а кеми, — чумондозь ули. 17Кемицятненень истят содавкст улить: Монь лемсэнь кармить амазынь панцеме, кармить од кельсэ кортамо; 18кармить кедезэст гуень сайнеме, да меньдяк кулума пельде-як симитьдеряй, — берянь тенст а ули, сэредиця лаҥгс путсызь кедест да сынь шумбралгадыть. 19Истя мартост кортамодо мейле Іисус кепетьсь менельс да озась Пазонть видть пелев. 20А сынь тусть да эрьва таркава евангеліянть ёвтнесть. Пазось тенст пособлясь, валост эснэ-як чудасо кемекстась. Аминь.