Святое Евангелие (эрзянь)/В/Матфеень/13
Глава 13.
1Се чистэнть Іисус, кудосто лисезь, озась моря чирес. 2Ваксозонзо промсть ламо ломать. Сонензэ савсь венчес совамс да озамс, а весе ломатьне аштесть берёксть лаҥгсо.
[ 33 ] 3Сон притчань ёвтнезь, ламо тонавтсь эснэст, мерезь: Вана лись видиця видьме. 4Сонзэ видьместэ конат-конат видьстьне прасть ки черес; ливтясть нармуть да кочксизь сынст. 5Ліят прасть кевев таркас, косо модась аламоль, да моданть аволь сэреень коряс, сынь сеск листь. 6Кода лись чизэ, сынь пуйшть да, коренэнь аразень кувалт, коськсть. 7Ліят прасть кормалав пулос; кайсть кормалавтнэ да сынст ёмавтызь. 8Ліят прасть паро модас, да каньдьсть видьсть: кона сядо, кона кодгемень, кона колоньгемень. 9Кинь улить марямс пилензэ, — марязо!
10Тонавтницянзо, ваксозонзо молезь, мерьсть Тензэ: мейсь притчасо[1] кортат тенст? 11Сон мерьсь каршост: тынеҥк менелень инязорокс чинть асодамотнеде содамс максозь, а сыненст апак макст. 12Ведь кинь ули, сенень максозь ули, да пек ламолгавтови тензэ, а кинь арась, сень, мезезэ ули, се-як саезь ули. 13Секс притчасо кортан тенст: сынь ванозь анеить, кулцонозь а марить, да а чаркодить-как. 14Сынст лаҥксо топодить Исаія пророконь ёвтазь валтнэ, кона кортась: марязь марятадо, да а чаркоттядо, ванозь-гак вандадо, да а нейдядо. 15Калгодкстомсть, ведь не ломатьнень седеест, сынь пилесэст-как стакасто марить, сельмест-как конизь: сельмесэст-как сынь авольть нейть, пилесэст-как авольть маря, седейсэст-как авольть чаркодть, штобу Монь ёнов авольть велявт, да аволень [ 34 ]віемть сынст. 16Талановт тыҥк сельмеҥк: сынь неить, пилеҥк-как, — марить. 17Видестэ мерян теҥк: ламо пророкнэнь да праведникень тыҥк найматьнень неемс мелест ульнесь, да эсть нейть, тыҥк марямотьнень-гак марямс, да эсть маряк. 18Кулцоныҥк ино тынь — мезе ули видицядо ёвтазь притчась. 19Эрьва кулцоныцястень Пазонь инязорокс чиденть да а чаркодицястень, сы душманць да таргасазо седейстэнзэ видезенть: те ули ки лаҥгс видезесь. 20Кевев модас видезесь се, ки марясазо валонть, да сеск эрьгедезь примасазо, 21ансяк сон коренэнь апак нолдак кеме а эри: сыньдеряй тензэ се валонть кис меньдяк мелявкс, или панцевма, сон сеск маняви. 22Кормалав юткс видезесь се, ки марясазо валонть, ансяк те пиҥгень мелявксось, да сюпав чис манявмось изнясазо валонть да сон видьстеме эри. 23Паро модас видезесь се, ки марясазо валонть да чаркодьсазо, да канды видьсть, кона сядонь кирда, кона кодгемень, кона колоньгемень кирда.
24Лія притча ёвтась тенст, мерезь: менелень инязорокс чись моли истямо ломань ёнов, кона видьсь эсь паксязонзо парт видьсть. 25Ломатьнень удомо шкасто сась сонзэ душманзо, видьсь товзюронть юткова берянь тикшеть да тусь. 26Кода лись товзюрось да кармась прянь каямо, листь сестэ тикшетьне як. 27Азоронть важонзо, сазь, мерьсть Тензэ: азоронок: Тон аволь парт-ли витдьсть эсь паксязот видекшныть? Косто саевсть сонзэ эйс тикшетьне? 28Сон мерьсь тенст: душман ломань тень теизе; важотьне мерьсть тензэ: ули мелеть, [ 35 ]минь, молезь, кочкасынек сынст? 29Сон мерьсь тенст: арась: тикшетьнень тарксемстэ товзюротьнень-гак аволеҥк таргсек-бу. 30Кадыҥк нуймань самс кавонест вейсэ касыть: нуйместэ мон мерян нуицятьненень: васня пурныҥк тикшетьнень, да пултамс сюлмсиҥк сынст пултс, а товзюронть монь утомозон.
31Лія притча ёвтась тенст, мерезь: менелень инязорокс чись моли горчицянь видьсть ёнов, конань саизе ломань да видизе эсь паксязонзо. 32Сон весе видьстьнеде вишкине, а знярдо касы, весе тикшетьнеде покщ эри, чувтокс тееви, сонзэ тарад потс менелень нармуть натой ливтнить да кекшнить. 33Лія притча ёвтась тенст: менелень инязорокс чись моли чапавтума ёнов, конатань саизе ава, да каизе колмо малинкат почт юткс весемест чапаськадмозост. 34Весемень нень Іисус ёвтлинзе ломатьненень притчасо, притчавтомо мезе-як эзь кортак тенст. 35Истя топодест пророконь вельде ёвтазь валтнэ, кона мерьсь: притчасо панчса кургом да ёвтнесынь, мезть масторонть тейме шкасто кекшезь ульнесть. 36Сестэ Іисус нолдынзе ломатьнень да совась кудос.
Тонавтницянзо, ваксозонзо молезь, мерьсть Тензэ: ёвтык тенек, мезе ули паксянь тикшеде притчась? 37Сон мерьсь каршост: паро видьстень видицясь — Ломанень Цёрась; 38паксясь — мастор лаҥгось[2]; паро видьстесь, — менелень инязорокс чинь цёратне, а тикшетьне, — апарт цёратьне. 39Сынст [ 36 ]видиця душмансь, — шайтянсь; нуйма шкась, — пиҥгенть маштумась; нуицятне — ангелтнэ. 40Кода тикшетьнень пурнасызь да толсо пултасызь, истя ули те пиҥгенть маштомсто-як. 41Кучсынзе Ломанень Цёрась Эсь ангелэнзэ, да пурнасызь Сонзэ инязорокс чистэнзэ весе маньчицятьнень да пежетень теицятьнень, 42да каясызь сынст гайни каштомос;[3] тосо ули аварьдема да пеень чикордома. 43Сестэ видеть ломатьне тетяст инязорокс чисэ чи лацо валдомить. Кинь улить марямс пилензэ — марязо.
44Таго менелень инязорокс чись моли паксяс кекшезь ули-паронь ёнов, конань муизе ве ломань да сёпизе. Эзэзэнзэ эрьгедезь, сон моли, да мійсазо, мезезэ ули, да рамасазо се паксянть. 45Таго менелень инязорокс чись моли паро човалянь вешниця купецень ёнов, 46коната, ве питьнев човалянь муезь, тусь, весе микшнинзе, мезезэ ульнесь, да рамизе сонзэ. 47Таго менелень инязорокс чись моли моряс каязь невод ёнов, конатанень совасть эрьва кодат калт. 48Кода сон пешкедсь, таргизь сонзэ берёк лаҥгс, да озазь, партнэнь пурнызь кедьгева, а берятьнень ёртызь ве ёнов. 49Истя ули те пиҥгенть маштомсто-як: лисить ангелтнэ да явсызь апартнэнь праведнойтнень ютксто, 50да каясызь сынст гайни каштомс. Тосо ули аварьдема да пеень чикордома. 51Іисус кевстинзе сынст: чаркодиҥк-ли тынь нень весемень? Сынь мерьсть Тензэ: Ино, [ 37 ]Господи! 52Сон мерьсь тенст: тень кувалма эрьва книжниксь, кона тонавтозь менелень инязорокс чистень, моли истямо куд-азоро ёнов, кона ули-паронь путма таркастонзо ливти ташто-як, од-гак.
53Кода Іисус не притчатнень ёвтнезь прядынзе, тусь тосто, 54да сась Эсь шачмо масторозонзо, да тонавтсь эснэст синагогасост. Сынь, дивазь, кортасть: косто Сонзэ истят превензэ да віезэ? 55Аволь те-ли плотникень Цёрась? аволь Сонзэ-ли аванзо лемзэ Марія да братонзо: Іаков, Іосій, Симон да Іуда? 56Аволь весе-ли патянзо-як минек ютксот? косто ино Сонзэ весе неть? 57Истя сынь маньчевсть Сонзэ кувалма. Іисус мерьсь тенст: пророк эсь шачмо мастордонзо да эсь кудодонзо башка косо-як честьтеме а эри, 58да а кеммаст кувалт эзь тейть тосо ламо чудат.