Святое Евангелие (эрзянь)/В/Матфеень/16
Глава 16.
1Састь Тензэ фарисейть да саддукейть, да Сонзэ снартумань кис вейшть менельстэ чуда [ 43 ]невтемс тенст. 2Сон мерьсь каршост: чокшне тынь мерьдядо: маней ули, — менельсь якстере. 3Валске: шечо пиземе ули: менельсь чопулгадозь сыреждеме кармась. Эсь пряҥк парокс тейницят! менелень чаманть явмо машттадо, а кодамо те шкась, — а содави теҥк? 4Апаро да ускурявкс родсь чуда вешни, ансяк пророк Іонань чудадо башка, лія чуда тензэ максозь а ули. Мейле, сынст кадозь, тусь тосто. 5Омбоце пелев печкезь, тонавтницянзо стувцть кшень сайме.
6Іисус мерьсь тенст: ванодо пряҥк фарисеень да саддукеень чапавтумадонть. 7А сынь эсь пачкаст арсесть: Сон истя минек кшень асаймеденть чартни эснэнек. 8Теде содазь, Іисус мерьсь тенст: аламонь-кемицят! мейсь эсь пачкаҥк арситядо кшень асаймедеҥк? 9Или тынь нейгак оштё ачаркодьтядо, да мельсэҥк-как айашти, кода вете кшесэ вете тыстят пешкедьсть, зняро кептереть сускомотьнеде пурныде? 10Или, кода сисемь кшесэ ниле тыстят пешкедьсть, зняро кептереть пурныде? 11Кода а чаркодтядо, — Мон пряҥк фарисеень да саддукеень чапавтумадо ванцтомодо мерезь, аволь кшень кувалма меринь теҥк? 12Сестэ сынь чаркодьсть, што Сон мерьсь тенст пряст ванстомо аволь кшень чапавтумадонть, а фарисеень да саддукеень тонавтумадонть.
13Кесарія Филиппень масторс сазь, Іисус кевстинзе тонавтницянзо: ломатьне кикс путнисамизь Монь, Ломанень Цёранть? 14Сынь мерьсть: веенцт Іоанн Крестителькс, омбонцт Иліякс, а ліят Іереміякс, или кодамокс-как пророкнэнь эйстэ. 15Сон мери тенст: а тынь кикс Монь ловсамизь? 16Симон, [ 44 ]конатадо ліякс Петр мерить, мерьсь каршонзо: Тон Христозат, живой Пазонть Цёразо! 17Сестэ Іисус мерьсь тензэ: талановат тон, Іонань цёразо, Симон: тонеть аволь киське да верь тень содавтызе, а Монь менельсэ Тетям. 18Мон-гак тенть мерян: тон Петраят[1], те кевсть лаҥгс Мон тейса эсь церькувам, сон адонь ортатьненень-гак[2] а изняви. 19Тонеть макссынь менелень инязорокс чинь панжуматьнень, мезенть сюлмсисак мастор лаҥгсо, се сюлмсезь ули менель лаҥгсо-як, мезенть укснисак мастор лаҥгсо, се укснезь ули менель лаҥгсо-як.
20Сестэ Іисус кардыньзе тонавтницянзо, кинень-гак иляст ёвтлек, што сон Іисус Христос. 21Теде мейле кармась Іисус эсь тонавтницянстэнь ёвтлеме, кода Сонензэ молемс эряви Іерусалимс, да тосо атятьнень, да архіерейтьнень, да книжникнень пельде ламо Тензэ апаро кирьдемс сави, маштозь улема Тензэ да колмоце чистэ мекев вельмима. 22Петр терьдизе Сонзэ ве ёнов, да кармась каршонзо кортамо: Паз аштезэ, истя илязо ульть марот. 23Сон, Петр ёнов велявтозь, мерьсь тензэ: ва Монь вакстон, сатана, тон Монь эснэнь маньчат; тон арсят аволь сень кувалма, мезесь Пазонь, а мезесь ломанень.
24Сестэ Іисус мерьсь эсь тонавтницянстэнь: кинь мельзэ ули Монь мельга молемс, се эсь прянзо стувтоссо, саессэ эсь крёстозо[3], да Монь [ 45 ]мельга молезэ. 25Кинь мельзэ эсь оймензэ ванстомс, се сонзэ ёмавтсазо, а ки ёмавтсазо оймезэ Монь кис, се муйсазо сонзэ. 26Кодамо лезэсь ули ломаньстень, сайсазодеряй сон весе светэсть эстензэ, а оймезэ коласазо? Или кодамо питьне максови ломань эсь оймензэ идимань кис? 27Сы Ломанень Цёрась эсь тетянзо славасо, да эсь ангелэнзэ марто, сестэ эрьва конанень максы тевензэ коряс. 28Видестэ мерян теҥк: улить конат-конат тесэ аштицятьнень ютксо, конат а кулыть Ломанень Цёранть эсь инязорокс чисэнзэ самонть неймезэст.