Сембе ванфтф ярмакнень индустриализацияти/2
| ←Мезе макссихть займатне государствати | Сембе ванфтф ярмакнень индустриализацияти (1929) |
Веле-хозяйствань кредитнай товариществатненди эряви цебярьняста ваномс займань облигациянь кирдихнень мяльсна→ |
| Нолдаец Мокшаэрзянь Облфинотделсь, Госбанкть Облотделенияц. Стенань газета, № 3, декабрьста 1929-це кизоня. |
КЛАССОВАЙ ВРАКСЬ И ЗАЙМАТНЕ
Миндеенек шарьхкодеви, што омба масторонь буржуазиясь аф максси тейнек пандомда ярмакт сяс, што сон фсякай лаца йорай шорьсемс минь совецкай союзсонок народонь хозяйствать касомонцты. Но кода ащи тевсь эсь масторсонок? Сембе ли Совецкай Союзонь ломаттне фкя лаца ваныхть государственнай займатнень ланкс?
Анок содаф, што аф сембе. Фкя лаца ваныхть займатнень ланкс трудяхне, конатне путнихть оцю мяль пролетариатть диктатуранц кемокстаманцты, путнихть вий, штоба касфтомс промышленностть и велень хозяйствать, конат йорасазь цебярьгофтомс эсь эряма-ащема шиснон и машфтомс эсь культурнай афсатыксснон. Марнек лия лаца ваныхть займать ланкс нэпматтне, кулакне, попне, ингольдень акша офицерхне, урятникне, жандарматне и сембе совецкай властень вракне и вредительхне. Синь йофси аф йорайхть, штоба цебярьгофтомс рабочай клазть, сьора-види беднякнень и середнякнень эряма-ащема шиснон, синь фсякай лаца йорахть, штоба кальдявгофтомс рабочахнень и сьора-види беднякнень и середнякнень эряма-ащемаснон, синь лац содасозь, што совецкай власць ащи рабочахнень и сьора-види беднякнень и середнякнень инкса и моли кулакнень каршос.
Вовня — миндеенек аф эрявикс ломаттене и минь врагонекя, сембе вийса йорахть, штоба шарфтомс йоньцнон и васькафтомс аф пяк шарьхкоди сьора-видихнень и корхтайхть теест, што займатне, нят — тяфтама-жа налокт, што синь аф кандыхть киндигя кодамовок пара и ст. тов.
Нят сембе кулакнень, подкулачникнень, попнень и лия контрреволюционерхнень васькафнемаснон ланкс ваномс аф эряви и синь верондамс аф эрявихть. Синь верондамс аф эрявихть сяс, мес синь тяфта васькафнихть сяс, штоба сялгатфтомс рабочахнень сьора-види беднякнень и середнякнень мархта, синь йорасазь сяземс социалистическай строительствань плантть.