Со кыдз сійӧс тӧда ме...
Со кыдз сійӧс тӧда ме…
Олӧ чӧв ӧтторъя,
Оз кӧть йӧзысь ылыстчы,
И оз овлы торъя.
Сылы абу пом ни дор,
Сійӧ мича, югыд,
Сылысь ыджыд олӧмсӧ
Кулӧм оз, оз жугӧд.
Сы понда мый торксьыны
Сійӧ оз куж; вӧчӧ
Шойсьыс мича организм,
Кодыр сісьмас пӧчӧ.
Сійӧ абу лёк ни бур,
Сійӧ оз босьт нэмыс
И оз сетав киӧн нем,
Кӧть и помтӧм эмыс.
Сылысь босьтны позьӧ пыр
Аслыд, абу ӧлӧм;
Бӧрйысь ёна эм пытшкас,
Бурмӧд ассьыд сьӧлӧм!
«Со пӧ босьтіс!» — сідз оз шу —
Мый нӧ сійӧ шулӧ?!
Аддзӧ да кыдз оз аддзы,
Мый вылын кӧть сулӧ.
Оз торк, кодыр гажӧдчан,
Кыдзи аддзас мывкыд,
Музыкакӧд, бутылькӧд,
Долыд мича нывкӧд.
И кор вӧйны сы водзын
Пондан — вӧй, оз мездыв!
Кӧть тэ кыдзи кевмысь сэн,
Кӧть тэ кыдзи чездыв!
Сылы быдсӧ ӧткодь дзик,
Олӧ чӧв ӧтторъя!
Локтан дінас — шань, он лок,
Лоан ачыд торъя…
Быдсӧ дінас чукӧртчӧ,
Быдлы сійӧ колӧ —
Видзӧд, ассьыс босьтны нем
Оз ӧв, пыр чӧв олӧ!..
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1875, so this work is also in the public domain in other countries and areas where the copyright term is the author's life plus 148 years or less (if applicable), or the copyright term is 72 years or less since publication for posthumous works (if applicable). |
|