Сталинград
Волга дорын юрсӧ лэптіс
Сталинград крут берег вылын.
Кутшӧм кыпыд сылӧн баныс,
Кутшӧм мича нимыс сылӧн!
Мыйла ӧшйис сэн сьӧд кымӧр?
Мыйла пемдіс Волга ваыс?
Тайӧ сы вӧсна, мый воис
Сэтчӧ Гитлерлӧн ордаыс.
Пансис грознӧй поединок
Волга ю дорын кык вынлӧн —
Дикӧй, вир юысь ордалӧн
Да сӧветскӧй исполинлӧн.
Лун и вой оз лӧньлы битва,
Оз и ланьтлы канонада.
Зільӧ полчище фашистскӧй
Овладейтны Сталинградӧн.
Гымалӧны лыдтӧм пушка,
Миномётъяс, пулемётъяс,
Помся шыблалӧны бомба
Гитлеровскӧй самолётъяс.
Вывсянь, увсянь биыс резӧ,
Уна керка киссьӧ карас.
Равзігтырйи людоедъяс
Штурмӧн уськӧдчисны яра.
Славнӧй кар оз сетчы враглы.
Краснӧй флаг пыр шпоргӧ вылын.
Повтӧм сьӧлӧма да ёнӧсь
Храбрӧй дорйысьясыс сылӧн.
Дзонь квайт тӧлысь бойлӧн гымыс
Сыркӧдіс карбердса мусӧ,
Биӧн, тшынӧн сійӧс вевттис,
Гызьӧдліс и Волга юсӧ.
Ыджыд доблесьт да геройство
Петкӧдліс боец сӧветскӧй.
Воштіс водзӧ мунан ӧдсӧ
Рӧзбой чукӧр людоедскӧй.
Мыйла морӧс вылӧ ӧшйис
Паулюслӧн пӧрысь юрыс?
Нинӧм чайттӧг став орданас
Стальнӧй кытшӧ сійӧ сюрис.
Чирсіс зверӧс краснӧй воин,
Уна дас сюрс босьтіс пленӧ,
Мездіс карӧс — и Берлинлань
Мӧдіс чорыд наступленньӧ.
Слава тэныд, кар великӧй,
Сталинград непобедимӧй!
Слава тэныд, слава, слава,
Краснӧй Армия рӧдимӧй!
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 77 years or less since publication (if applicable). |
|