Сьӧлӧм

by Попов Дмитрий Яковлевич

Сьӧлӧм, сьӧлӧм, мыйла бӧрдан?
Али локтіс шудтӧм лун?
Дугды, вошны сідзи верман!
Шенышт, горӧд: «Мый нӧ? Мун!»

Мыйла шогсян? Гӧгӧр видзӧд:
Водзӧс тэнсьыд оз кор шонді,
Тэнӧ югыдысь оз удзӧд,
Сы ног толькӧ овны понды.

Мый тэ полан? Кодзув, тӧлысь —
Ӧтув ставнымлӧн, не юкны.
Ва, ни тӧв, ни вынсӧ мулысь
Поскӧн, потшӧсӧн не тшупны.

Ставыс тэнад. Толькӧ уджӧн
Шогтӧ сьылігтырйи вӧтлы!
Ставсӧ босьтны верман надзӧн,
Морт корсьӧмӧн быдӧн петлі!

Сьӧлӧм, сьӧлӧмӧй! Эн вунӧд:
Шонді банӧн пыр на оліс.
Кӧть и вӧвлі кымӧр-сынӧд,
Гожъя лун сы бӧрын воліс.