Сӥзьыл (Корка котырам мерттэм садэ — Герд)

Сӥзьыл («Корка котырам мерттэм садэ…»)
Автор: Кузебай Герд

Поттэмын: 1919. Источник: Куӟебай Герд. Зарни кылчуръёсы. — Ижевск: Удмуртия, 1997. — Б. 42—43.

Сӥзьыл

Корка котырам мерттэм садэ
Сӥзьыл вуса куашетэ,
Уйшор палась туж кезьыт тӧл
Садэлэсь сяськазэ, куарзэ кынтэ.

Зарни бурдо бубыли сямен,
Ӵужектэм куаръёс лобало:
Тӧл тӧламъя музъем вылэ
Ӵаштыр шуса куашкало.

Дунне вылын калыкъёс но
Та куар кадь ик лобало —
Ӧжыт улса, музэ усьса,
Дэри пӧлы нӧдыло.

Кудӥз отысь потны турттэ,
Кудӥз уката пыдло нӧдэ,
Кудӥз дэриез каргаса улэ —
Кудӥз дэриез яратэ.