Татю (книга)/Татю/1 пелькс/2
II
Эрямось чуди. Уить читне. Вана варштат ней Чихан пандонть прясто, Губаж сэденть каршо чахракс тветить Чагаевень кавто этажсо кудотне.
Чагай радовакшнось. Тундонь васень цецякс сырежсь эрямозо.
Варштат Чиханонть прясто паксянтень. Чапамо чейсэ мелят ульнесь парина, чудужовдо ды пургине пице-палаксто башка мезияк арасель. Тедиде кавтов сюконякшны пиже розесь. Эли вана Киришка латко прясо меля ульнесь эчке вирь. Сон ламо иеть менчевсь вармадонть. Ней тосо ансяк пенькат. Истя чиде чис эрямось полавсы чаманзо.
Намо Карпа атя кизэнь перть микшнесь раужо медь. Эрьва шкасто арсиль ломаненть манямс. Коть трешник яла теке сонзэ сявады сельмезэ. Бути течи уски вейке боцька, валске уски — кавто. Намо, меденть рамасы целковойде пондонть, мисы гривинникте фунтонть. Те эщо аламо. Кода карми онкстамо, сорныть кедензэ ды эрьва лишной пель золотникенть, конатань путсы веснэнь пачалгтнэстэ секень вант нолцесэ.
Истяня нельгезь, маньчезь лиясто мик салазь пурнась кудот чить.
— Стяк! — Карпа атя тотмадизе пильгсэ Семань. Сема велявтызе боканзо ды матедевсь одов. — Стяк, мор саинзат, седикеле умок уш конзедевлизь удалксот.
[ 10 ]Карпа атянь мельс а тукшны коесь. Сон марсекшнызе, што кода ульнесь крепосной правась — помещикне месть мелест тейнесть робочейтнень лангсо. Намо Карпа атя помещикекс арасель. Сон сюпалгадсь ней. Сон а вечксы роботникензэ. Тензэ маряви, што Сема овсе эйсэнзэ а кунсолы; уды кувать, ярсы ламо, роботасо седеензэ а сейсы. Те апарось чиде-чис кепетець кеж роботникенть каршо.
Вейкень вейкень а вечкемась кассь ютксост чиде чис.
Алкукскак, роботникесь теилисе тевензэ шкастонзо ды хозяйственнойстэ. Но сюпавонь сельмесь а пештяви — яла аламо, яла прок а истя.
Теде мееле Карпа атя лия ендо неждясь эрямонтень. Штобу касозо хозяйствазо ды тень кисэ а пандомс кодамояк нузякс кандонень, кодамо вана Сема, арсись Иванонть урьвакстомо. Сонзэ койсэ Сема ульнесь а Сема — цюрка.
— Кулина, — пшкаць Карпа козейканстэнь — Монь койсэ Иванонь эряви урьвакстомс, кадык котьмить кудо ютксо. Коть сыредема пелев ойматано. Пазось можо несы озксонок, кучи паро ломань: карми кунсоломо, эсинек ловсамизь ломанькс. Мейсь кирдтян ломанень ломань — азе вешнек.
Истя арсесть атят бабат. Намо, ков салмукс — тов суре. Кулина вал каршо эзь евта. Ансяк шнызе те меленть, но кода ютавтомс тевс-тесэ эщо седеяк покш пандт понгить.
— Приметасот ули кияк! — кевкстизе Кулина.
Карпа нолдызе прянзо ды думазевсь.
— Саемс эсь ялга, дотла розорясамизь. Эряви кенде, горобия, вешить од ды подробань шуба... Вешить валинкат ды сядошкадо ламо целковой ярмак. Теде башка пек ламо карми эрявомо свадьбас...
— Кунсолока, Карпа, — кармась кортамо Кулина.
— Эли минек мезенекак арась? Гуртсо якить ревенэк, а лововить пона марто мешоконок, сядосо ловозь овчинанок. Ули мейсэ ставтомс од шуба, ули мейстэ кевердявтомс тензэ понань кемть, ставттано тензэ [ 11 ]сумантькак. Минек кардайсэ ламо прят потявтомо скалт, эли а макстано вейке приданка? Ведь тон думик тонсь, урьвакстома алясь — вейкина. Сайдяно тензэ эсинек ялга. Тонсь думик, бути саемс бедноень, мейле куть ломань юткскак илязо листь алясь. Пингезэнзэ мелезэ а витеви, эрямоськак тензэ ули а эрямо. Ули пароськак седейс а педи. Карпа, арсека тонсь ды иляк бездоля сырнень поколенть, — истя Кулина прядызе кортамонзо. Сонзэ мельс а тукшны саемс бедноень тейтерь, пек вечкилисе Иванонь, вансь алянть мелензэ. Карпа атя арси: мекев лангт.
— Сайдянок бедноень, сон ламо а веши, кисэнзэ ламо ютавтомс а сави. Роботань тееме маштыця, ведень пенгень кандыця, кардаз ютконь ды паксянь робутань теиця. Кармат, Кулина, тонгак видьганзо васькамо, — отвечась Карпа атя.
Сон сельме крайсэ аволь ней бу бедной ломань но хозяйствань трокс ды штобу а нолдамс ломанень ломань, сон лоткась се ланкс, што Иванонь урьвакстомс сехте бедной тейтерь лангс, коната стака роботас кармавтоманзо каршо вал а евты.
Сонзэ роботазо саты. Кенерят нать ськамот: вазт андомс, скалт потявтомс ды нать а ламо тев кудо ютксо „Улевельдеря Кулина кодамояк целак...... Яходть кедсэт“, — кортнекшнэсь Карпа атя шабрасо.
— Тон, Кулина, Татюнь содасак?
— Кинь?
— Филип Иванонь.
— Содаса. Ансяк мезезэяк арась: а котст а оршамо-пель. Сонь прок аволь берянь тейтересь... Недля чистэ обиднясо ульнесь.
— Тейтеренть монгак аламодо содаса. Эряви кортамс видьстэ, тусь мелезэт тейтересь? Мон, аламодо содаса ды тонь евтнемат кувалт мелем ули чиявтомс.
— Берянь куля канды Карпакай. Авась сонзэ умок уш кулось, тетянзо саламонь кисэ маштызь... монь мельс а тукшны.
Кулина ве кедензэ нерькстызе улозонзо, омбоце кедень каизе мештеньзэ трокс ды кирьди кенере [ 12 ]пакаренть, мештезэ новольсь керш кедензэ ланга. Истя, Кулина кувать нурсесь эсь прянзо.
— Давай сайсынек, можо оймавтсы седеенэк, — седей вакска каизе Кулина валонть. Не валтнэ прок пекшень чевте лопат ацавсть Карпань седейс — авась витезе мелензэ. Тарка езем а муи, мельсэнзэяк мезеяк лия а ашти, ансяк секе, кода бу чиявтомс Татюнь.
Шкась ульнесь зоря. Лековтне истяжо чоледсть маней чинть каршо. Лейсэнть пижнесть ватракшт.
Пиже кудряв виресь моры эсь моронзо. Венельксэсь опаня, костояк а пуви варма, ансяк кизэнь лембе коштось налксезь кузи менелентень, сестэ прок весе уды. Чувтнэ а нурить, лопатне копачавить сэтьме коштонтень. Ансяк нармутне чоледить, но косо — а неявить. Истямо мазый валскенть, веселе чинь шачомант ень одкстоми кодкемень иесэ ломань. Вана снартыка кодамо стака явомась истямо эрямосто, снартыка те шкастонть куломо...
Чись уш вере, тюжа лембе срунатне пезнасть модантень, прок мерят алкукс чись сюлмазь не тюжа срунатнень эйсэ модантень.
Ульцяванть ломатне умок уш эвтить. Карпа атя галакс кантли прянзо эйсэ. Васняткеяк мелезэнзэ паро се, што урьва саи, омбоце се, што, кода иля корта ламолгады робочей виезэ. Сон путынзе удалов кедензэ, ютась кияксканть.
— Кулина тонь койсэ кинь кучомс покш кудакс?
— Чай крестной аванзо. Кинь больше... Прок пандо ломанесь. Кортамодо кол. Куратной ломанесь, пейдема таркас уш а пры. — Истя кортась Кулина. Но Карпа атя таго мейсь кежеявсь. Конястонзо сормавкстнэ новольсть, теде мейле сельмензэ плегкашкат кадовсть.
Карпа атя, кода кежеявты, оргодть маластонзо, бути кунды тевень тееме-иля меша — сорновттанзат. Лиясто пузырть кургстонзо ертовить, кода ведь берексо ватракшнэнь — пургсетянзат. Сонсь бойкасто таго ютась кияксканть.
[ 13 ]— Стяк! — ранкстась Карпа церанстэнь. Иван удось каштом лангсо. Севонь пулесь чаманзо, прок охрасо шуба, ваднизе. Прячерензэ дубушки стясть. Алкукскак Иван алясь моли сенькс енов. Чова чама, судозо прок цилим, сонсь сэрей ды човине. Сон эщо те шкас а соды тейтерень седей, эзь кунцоло вечкемань валт. Тейтерень ойме кошт эсь токше пилезэнзэ. Ведь тейтерень седеесь, сынст кортамо коштось — эрямо. Те эрямось пициця тол, кона васня сятко ладсо появи потмозот, аламонь аламонь сон касы истяшкасо што а карми кельгеме потмозоткак. Самай те вечкемась, вечкема мелесь. Кие марто ульнекшнесь истямо, тев, содасы истямо ежонть.
Иван эщо овсе а соды, кода басямс тейтерь марто. Те аволь секс, што сон од эли арасель лома ютксо. Те секс што мастор лангсо арасель сонзэ вечкицязо. Ломатнеяк эйстэнзэ пельсть ды тюсозояк сэвицянь. Куть кодамо илязо уль, яла теке тетязо-авазо эзизь кевксть урьваксты эли арась. Сон эсь прянзо ловсь эйкакшокс ды зярдок мельсэнзэ арасель урьвакстомась. Кода тетязо евтась, што течи эряви кучомс покш кудат чиявтомс тензэ козяйка, весе сывелезэ соракадсь, тандадсь, мерят прок толонь буря появась сельмезэнзэ, эли вачкодизь кирьпиць песэ. Мезеяк а неи ансяк верев-алов тетянзо икеле кепсеви.
— Азе чийть крестной авать кисэ, — кежейстэ пшкадсь Карпа. Сон витизе желетканзо, сакалонзо келейстэ сравтынзе мештеванзо, келей понкс пильгензэ новольсть лаковой кем голяништятне ланга. Ютась столь пентень. Велькссэнзэ понгавтозь кавто гира марто част. Омбоце пеле стенасонть зеркала, столесь вельтязь столешниксэ, чувтонь салдорксось коганякс ашти ашосто муськезь столешникенть ланксо.
— Тетяй, — пшкадсь Иван, — илимизь урьвакст... иешка. — Сон эзь кенерь валонзо прядомо, чамазо пиземсь, лиссть сельведензэ. Кирвайсь Карпа. Кирнявтсь таркастонзо. Сювордыксыль ава лем — такода кирьдизе. Теде мейле раздизе улалксонзо ды весе лаказевсь. Пазавань ликтне вансть кулозь а сыргсевиця вановтсост, [ 14 ]сельмест покшт ды сельме эрьгтне прок пинжак плаштят. Карпа атя не пазаватнестэ несь певтеме вий ды сонзэ койсэ те вийденть виев мезеяк арась.
— Илямак совавт грехс! Истякак пазось стувтымизь. — Карпа атя яла кежеявсь, ков кежеявсь седеяк пек ушодсь мурнеме, ков мурни седеяк пек кежеявты. Кода уш чийсь сэредьксэсь седеезэнзэ, сон стувтынзе пазонь ликтнень вановтост, сювордась ава лем — виськс вал.
— Эх кирдивтеме-кандывтеме! — рангстась Карпа атя сонсь кода кундасы Иванонь пря кедьте. Усксесь, усксесь церанзо масторга ды варсодизе мастор ваксс.
Иванонь удалдо „рожкат“ ертовсть. Теде мейле маштсь ежозо...
— Мень апаро куломань улят ломань, коли нейке тетят ават мезекскак а путат? Виськстэме! Пандя теть чийнемс! Тон паро тензэ арсят, сон, ванта месть... „Тетязо, иляк урьвакст!“... слюнянзо нолдынзе. Толк а ули... Азе крестной авать кис! Адя, мерть, мейсь бути тердидизь.
Тутмадизе церанть човоньс, тоната кенгкшентькак панжизе конясонзо.
Иван лиссь ушов, олясь радовавтызе, сон ней прок конев пангс, кона кепетець верей, конань вармась кантли певтеме коштканть. Сонзэяк ульнесь ливтнема мелезе. Налкстась седеезэ те эрямо чиденть, те ули пародонть, коната кевень пандокс аштесь валязь сявдикс лангсонзо. Сон вадрясто содасы, косто сась те ули парось. Ламоксть арсесь тетянстэнь мереме: „Тон грабат ломать, тонь трокс ломанть ламо сельведь валыть. Тонь кедьсэ кодамояк ломань а эряви, синтресак роботасо, паро ладсо а андсак. Эли теть а мейсэ?! Тон прянек пильгенек правтат ярмак мельга. Вана мик миньць, ломанде апак корта, паро ярсамо пель а варшнетян, ансяк бизнянь чапамо ловсось потсонок пургинекс урны“. — Иван толковась эсь потмованзо, но сельведьтне лопавсть судалксонть ды, конянть алдо, прок крута пандо чамасто, бульдерсэ лисить сиянь ведь каплят. Сон арсесь лоткамс авардемадо, но содеезэ истя уш лавшомсь, теевсь тензэ покш [ 15 ]сэредькс, коната скири, сэвезь сэви. Те авардемась аволь аразь чиде эли ломань обидямодо, те аварьдемась кежей тетядо, сюпав чидест. А весть арсесь тетянстэнь евтамо каршо вал, трокс вал, пельсь кудостонть панемадо, виздесь ломанде.
— Паньсамизь ков мейле молян? Косо карман эрямо? Те апаронть кирдемадо урьвакстан. Урьвакстан... Месть карман козейканть марто тейнеме? Месть карман мартонзо кортамо? В-а-а-й еминь!..“
Те ризнэвтесь седеяк колызе мелензэ, апарось покшолгадсь потсонзо. Сон лоткась эрямонть вечкеме, лоткась тетянзо вечкеме. Васняткеяк секс, мекс эзизь кевксть сонзэ урьвакстомадонть мелензэ. Омбоцекс секс, кинь тензэ саить козейкакс — азе вешник. Самай те стомась, муцясь сонзэ эйсэ. Истяшка апарось сюлонзо пекензояк мекев лангт велявты, кости кирга парензэ: теде мейле киргантень кеверсь ал, коната кодаяк а нилеви ды таго туить сельведензэ.
Сон лоткась кинть лангс, езынзе сельмензэ, штобу крестной авась илязо чарькодть, арсесь совамо смелстэ, ансяк, кодак совась кудонтень, эзь кенерь евтамо валгак, таго одов валызе сельведь.
Крестной авазо ульнесь мадезь каштом лангсо. Кодак неизе Иванонь лоподезь якстере чаманзо истяк прок пропка ертовсь:
— Тон истя мейсь? Ки тонь? Ды мезе теевсь? Корминецькем, мейсь аварьдят? Ванта лангозон мекс тон местькак а кортат?
— Т е-е-е-тя-ям-м-м, кис-с-эт к-у...у-ч-имем...
— Мень тамаша теевсь, ки соды? — моткодсь эсь потмованзо.
Иван прок вейксэ иесэ эйкакш, коната обиданть шлякшносы сельведьсэ. Крестной авась ладсизе-теизе Иванонь ды тусь Карпинканень.