Ҡысҡырмай ғына һөйләш, тип
Тыялар мине өйҙә,
Бик ҡоторһаң, ана, тиҙәр,
Ҡайыш элеүле сөйҙә.
Таҡта янына сыҡтыммы,
Бөтә лә ҡуя тауыш,
Кәрәкмәй бында киҫәтеү,
Кәрәкмәй бында ҡайыш.
- Ниңә өндәшмәйһең, - тиеп
Аптырай уҡытыусым
… Әйтәйемме, нимә мине
Иң-иң-иң ҡурҡытыусы?
Бик ҡысҡырып һөйләр инем -
Әҙер түгел өй эшем,
Дәрес әҙерләр урынға
Уйнап йөрөнөм кисен.
Етер, тиеп үҙ-үҙемә
Бирҙем бөгөн вәғәҙә,
Беләм дә бит, гел әйтәләр:
Тырышлыҡ – яҡшы ғәҙәт.
Мин булдыра алмайыммы
Булдырғанды башҡалар?!
Тырышлыҡ,
бик-бик һорайым,
Дуҫ булайыҡ, ташлама.
