Тесэ ды тосо (2013)/Чумовтомо чумо
[361]
| Алтави Гайнинькань Пичайнень |
| ЧУМОВТОМО ЧУМО |
| Ёвтнема |
Кизэнь маней валске. Автовокзалось пильгень чошкаематнеде, кортамотнеде, авань ды цёрань вайгельтнеде лажны-увны. «Ков истя весе ардыть? Кодамо вий эйсэст пани? Мезе вешнить? Каня а мезе теемс кудосо?» — свал содавтнесамизь неть сталмовтомо кевкстематне куш кодамо вокзалс совамсто эли ливтязь ливтиця электропоездтнэнь, лиятнень-мезтнень лангс ваномсто. Мезе тенст, ломантненень, алкукскак, а саты?
Саинь, пачкодсь чиполам, кассань пелькапряшка вальминестэнть билет. «Шлямочи, секс ломантне аштить кассантень мельцек-мельцек, аштить менчевезь пулокс, ламот, неяви, ажияст кирдить велев», — сась превзэнь эземс путозь кансткем ваксс ютамсто. Озынь. «Окойники», — кода-бути апак фатя лиссь кургстон валось. Ванан билет мельга аштицятнень, тей-тов яксицятнень мельга, каршон удалъёнт стядо аштиця кизэнь оршамосо од авиненть лангс.
[362] Икельган перронс лисема кенкшенть ёнов, чиремк-чиремк ве пильгензэ ускозь, юдмине марто ютась нурька ожа ашо панарсо сэрьс аволь сэрей атя. Прясонзо чертне — ансяк човоньсэ ды пилетнень удалга-велькска. Касмось потолоксо лампочкатнень валдодост цитни суликакс. Тейсь цёраломанесь зяро-бути эскелькст, арсезевсь, велявтсь мекев ды озась, мекс-бути стакасто лекстязь, вакссон чаво таркантень.
— Ков истя сыргить, сыречи? — кепедия вановтом шабракс теевицянть лангс, пшкадинь, кода свал, эрзякс. Седеем марясь — ломанесь эрзя. Истя лисськак. Лиякс, куш зяро иляст уле эйстэст перькат, эрзя ломань а муят.
Варштась лангозон. Сеске эзь правто валгак. «Кие тон? Мезекс те тонеть?» — марявсь, кевкстнесть сельмукштнень пачк превей сельмензэ.
— Мон, теня, Сырезьвелев. А мезе? — сорк мерсть келей лавтовонзо, пшкадсь кода-бути машнетезь ды мельтеме.
— Мезеяк, истяк, собой, — меринь сэтьместэ, лангстонзо вановтом апак сае.
— А тон кона ёнов? — ней уш седе чевтестэ кончтась цитний прясь ды кевкстимим ардома ёнкстон.
— Мон шабра велев, Кендев, — вития вакссон озадо аштицянть мелензэ. Монсь комавтыя прям, карминь мезе-бути вешнеме кумажан лангсо котомкинестэнь.
— Вейсэ ардовлинек, ды... — прок таго-мезес эртевсь, «дысэ» прядынзе валонзо «штапо» пря атясь. Валтнэнь ёвтамсто аволь келейстэ келемтинзе кедензэ.
— Кода тень чарькодемс? — сокарямом кадозь, кепедия прям ды пшкадинь Сырезьвелев кинь кирдицянтень.
— Билет тень эзь сато. Сынь Московсто. Ардан патянь калмамо. А кенерян. Мезе теемс, а содан, — панжизе, кодат мелявкст майсевтить эйсэнзэ, мекс истямо берянь кайксэзэ, нусманя чачозо.
— Вокзалонь прявтонтень эзить пшкале? — максынь превть.
— Лезэсь мезень, — нулновтызе прянзо ды келемтинзе кедензэ килангонь ялгам, — арасть ды весе!
— Кода эзинь! Вешнинь, кевкстнинь, песь теке — арась, — кортыцянть вайгельсэ марявсть талномань гайтькеть, седеяк, неявсь, каладсь ёжозо.
«Кодаяк лездама, лездама атянтень, — такшардсть превсэнь валтнэ-мельтне. — Куш монськак калмамо ки кирдян...»
— Вана мезе, атя, ардт! Вана теть билет, — арсинь-теинь, ювк таргия понкс зепестэнь билетэм ды венстия вакссон аштицянтень. — Сырезьвеле ды Кенде маласот. Пачкодят.
— Арась, арась, те а тев. — Сон сеедьстэ ахолязевсь кедьсэнзэ — эзь сае билетэм. — Тонетькак эряви ардомс. Тоньгак учить. Арась, арась... А сайса.
— Иля мелявто, иля, мон кенерян. Патянь Тов кармить ильтеме ванды. Тонь патять — течи. Секскак... — оймавтыя кажос понгицянть ды, сонзэ апак кунсоло, нерьгстыя конёв лопиненть меште зепезэнзэ.
Весе. Сынек ве мельс.
Кендев автобусось сырги часонь ютазь. Зярс учинек лисема шканть, теевинек — од ды сыре — седе малавиксэкс.
— Анатолий Павлович, — ёвтызе лемензэ.
Монгак текекс теинь:
— Бажутонь Видяй.
Кортазевинек умонь шкатнеде. «Тусто черь» атясь ушодсь ёвтнеме эсь уцяскадонзо:
— Тевесь истя ульнесь. 1936-це иестэ прядыя инязом. Московсо. Содылия, ды а беряньстэ, англань келенть. Кортылинь шождасто. Важодеме ушодынь Московонь военной заводсо кельстэ кельс ютавтыцякс. Тевень, нурькинестэ ёвтазь, мольсть. Кода тенст а молемс: од пора, паро, вечкевикс тев, кудосо — ним, аволь умок чачозь тейтернем... Мезе невак эряви од ломаннень? Пеняцямс ульнесь а мезе лангс.
...Лисинь, прядовсь важодема шкам, заводсто. Ульнесь кизэ куншкань маней, лембе чи. Пувсесь лавшо, элякалиця вармине. Апак капша сыргинь автобусонь лотксема [364] таркантень. Кабинетсэ чоп аштемадо мейле эскелян шождасто. Седеем моры. Ванан: каршон ютыть кавто — ава ды цёра. Одт. Паряк, тенст колоньгеменде ламо. Оршазь, кенеринь тешкстамо, аволь минекекс, сельмс седе каявицясто. Ютыксэлинь вакска. Эзь лисе. Вастовомстонок кавшаня валдо черь авась пшкадсь тень англань кельсэ. Косо, келя, те куросонть истямо-истямо номер кудось? Мон — чарькодеви, англань кельсэ — меринь: эрявикс кудось овсе маласо, ваксканзо тень ютама, адядо мартон. Эрявськак ютамс дух аламо. Омбомасторонь ломантненень ниле-вете валт ёвтынь кудонть историядонзо, кинень алтазь стенас понгавтнезь ледстнемань лазтнэ, кодат содавикс ломанть эрясть сонзэ эйсэ. Прядынь валон ды туинь эсень киява.
Омбоце чистэ, кода свал, паро ёжосо панжия кабинетэнь кенкшем, совинь. Озынь. Ушодовсь важодемань од чи. Таргинь конёвтнень. Эль кенеринь вейкенть ловномо, кенкшс апак вачкоде совасть кавто цёрат. Одт. Чуморкст. Эйстэст вейкесь седе сэрей. Лангсост, кизэнь псинть лангс апак вано, раужо костюмт, кирьгасост галстукт.
Совицятне вал эзть ёвта, эскельдясть стувором ваксс ды венстизь сельмень икелев эйкакшонь коморошка якстере «гинигинест». Сеске чарькодия, костонь, кона ёнксонь ломантне. Ялатеке эзинь лондадо — арсинь, састь заводонь тевень кувалма. Та-кода седе икелеяк тень вейке совсесь. Кода а кода заводось минек военной...
Те мелесь ювк полавтовсь допрок лиясо.
— Стяк! — апак учо мезе вий рангстась седе алкинесь, прок икелест аштесь камажа пиле. Те граж вайгелесь челькске эзь кадо кемемадонть — погонтомо алятне састь заводонь тевтнень кувалма.
— Оршнек седе курок ды адя мартонок, — мерсь омбоцесь седе сэтьместэ, кирьгапарень апак разде.
Кедень пурдызь удалов, саимизь.
Ускимизь... Ков арсят? Косо штамповасть кулакт, раськень ятт, зыяндейть-вредительть? Малавгак а истя. Сайть седе верьга.
Панжовсть кшнинь келей ортатне, ды «раужо варакась» [365] совась кардазс. Ветимизь вишка нупальнес. Кевкстизь фамилиям, лемем, зярдо чачинь, косо эрян... Мейле чамдызь зепень, таргизь кшнань карксом, ды кавто солдатт ветимизь камерас. Пекставсь мельган кенкшесь, кадовинь чопода каштмолеманть марто ськамон. Прям увнось...
Содат мезе, Видяй... Кортыть, учомадо стака мезеяк арась. Мон поладовлия те меленть: асодамось, секень вант, учомадонтькак стака. Превстэнь эзь лисне, оймамо эзь сода кевкстемась: «Мезень кис? Мезень кис?». Пелинь, превстэ лисян сондензэ. Саизь зепень чамдомсто часонгак. Эзинь сода чопода камерасонть, зяро шказо, эзинь сода, мезе ушосонть: чи, чокшне, ве...
...Каятотсь кшнинь тандавтыця чикоркс, ды кенкшесь панжовсь. Мельган састь сеть, кить ветякшнымизь тезэнь, кавто ушмант. Шказо, марявсь тень, валске мартонь. Ветимизь покш, сэрей потолок марто кабинетс, вить ёно ужосонть — якстере коцтсо вельтязь келей стувор. Экшсэнзэ ОГПУ-нь кавто следовательть, сыре ды седе од. Велькссэст Кшнинь Феликсэнь портретэзэ. Каршост, совамо кенкшенть велькссэ, — Сталинэнсесь. Кода эно, сонтемензэ курок петлицасто кубикеть скирдасызь. Эзь чарькодеве ансяк, мекс кенкш вельксс понгавтызь, совицянтень сеске а неявияк. Тень кис кодамояк лия таркасо истямо статья теть цяпадевельть, аволить кенере «вай» меремеяк.
Ушодсть кевкстнемень.
Васня лемть-тетялемть, чачома таркат-мезть... «Мон уш некень исяк ёвтнинь...» — ульнесь мелем меремс тенст. «Э-э-э, иля тонавто», — кардыя эсь прям.
— Минек улить кемевтиця кулянок — тон важодят Англиянь разведка лангс, — риштимим валсонзо седе сыресь, пиле велькска шержей черь цёрась.
Марязденть ёжом эль эзия ёмавто! Мезе-мезе, истямо вачкодькс эзинь учне. Те косто, косто саизь истят «кулятнень»? Сынь ёжос, стинь ды серьгединь, эзинь кирдеве, мештезэнь чавозь:
— Мон — шпион?! Мон — шпион?! Те кенгелема, педе-пес — кенгелема!
[366] Талномадонть вайгелем сорнось. Допрок стувтыя косан. Ульнесь тень ялатеке.
— Сэтьместэ! — кардымим конась-бути. — Аволь базарсат. Озак. Тесэ а эрявить истерият...
...Вана истя, Кенде велень цёра, Бажутонь Видяй! Мазый фамилият, седеяк мазый леметь. Видяй! Самай сонзэ, видечинть кис, яжизьгак эрямопингем. Эно поладса...
Вейксэ ковт таргасть, тейсть эйстэнь Англиянь шпион. Мезе мартон ансяк эзть тее! Кодат ансяк кедьёнкст эзть сайне — теемс тень Сэредькс, рунгонь эли оймеёжонь. Лакиця ведь, кенже алов салмукст, кургонь-судонь потомдамс противогазт... Зярдояк а стувтса ледемасо тандавтнемаст. Теде виев пелевтемат — дарманонь, шумбрачинь саицят, нервань костицят — арсеналсост арасельть. Нежедьсы кевкстниця гэпэушникесь конязот пистолетэнзэ ды серьгеди: «Лован ветес, а видькстат, протоколтнэнь а сёрмадстсыть — улят тоначисэ!». Ды ушоды, ушоды, шкань таргсезь: «Вейке... кавто... колмо...». Ну, арсят, весе, пе. Лепштясы ледемань кечказнэнть. Каяты ансяк кшнинь гайтьке... Эль а ёми ёжот. Лекстят. Таргасак ойметь. Эриян? Одс чачат...
Э-э-э, Видяй, Видяй... Мезть мартон ансяк эзть тейне... Яла а кемеви: каня алкукс кадовинь эриекс? Кодамо вий эрявсь весе тень цидярдомс!
Раздесть седеем аволь ансяк «педявтозь» чумочись ды нарьгамотне. Тарка эзинь мукшно кудораськем-семиям кис. Ним эзь сода, косан, козонь ваинь, козонь понгинь. Эзть ёвта. Ёминь ды весе. Вешнемс? Мхы! Иля арсеяк. Кинень эряват... Мон тосо майсинь, Лияна пакшинензэ марто — олясо.
Весть, тюрьмасо вейксэце ковом прядовома лангсоль, саимизь кевкстнемень уш чопоньпелев. Истя эйсэнь «ичесть», пильге лангсо эзинь аштеве. Камеразон ветимизь ды ёртымизь кавто солдатт-ванстыцят. Кода эзть томба эйсэнь, конёвтнес кедем эзия путо.
— Мда-а-а, — кувакасто, стакасто лекстязь, ёвтызе те нурька валонть мартон аштицясь, зярдо нерьгстымизь камерас.
[367] Монь коряс сон седе сырель. Сиясо почодозь прязо наразель нурькинестэ, чоподасонть ашолдсь. Чумондсть эйсэнзэ аламодо лиясо — ловизь «раськень ятокс». Мекс совавтокшнызь «шпион» ваксс, те шкас а содан. «Мендясть» сонзэяк, ялатеке аволь кода монь.
Аштинь киякссо пекекиське лангсо. Копорем лакиведтенть палозь палсь. Сизинь. Аволь истя рунгонь сэредькстнэде, кода ламо шкань перть кевкстнематнеде. «Весе, — арсинь, — виень а сатыть, тоначив ильтясамизь... Комсьветее иесэ? Тов?» Керязь керясь седеем те мельденть. «Мезень кис? Мезень? Косо ней Лияна? Косо вишка тякинем? Паряк, Сталин ялгантень тешкстамс, а? Ха! Тонськак а содат мезть чемердят. Иля уле аптюкокс! Каня тестэ нолдасызь истямо пшкадеманть-пеняцямонть? Те, а мезть кавтолдомс, сынст каршо велявты: гэпэушниктне беряньстэ важодить, койть-законт колсить...»
Седей пувориця арсеман сезинзе мартон аштиця ялгам, «раськень ятось».
— Цёрам, тон а видестэ теят. Видькстак. Иля кавтолдо. Истя мертькак: мон — шпион, сюлмавозян истямо-истямо масторонь разведка марто. Теик тень, теик. Лиякс...
«Арась, те тенст а учови», — меринь эськан ды панжинь сельмень, варштынь маласон эземсэнть аштиця превень максыцянть лангс.
Нурькинестэ наразь, лов ашо черь сыре ломанесь редизе — панжинь сельмень. Стясь ды лездась полавтомс аштема ёнксом. Озась ды поладынзе валонзо:
— А видькстат, содак: эрийстэ тестэ а лисят, сайсызь ойметь. Тувтал кивчк шкас муить: каявить ды маштыксэлик эли натой маштык ванстыцят, снартнить оргодемс, мезть а эрсить эрямосонть — пупордить ды прят эшкевсь кевень ужос... Апак арсе — Тов. Муить тувтал. Иля мелявто. Содак, цёрам: а кундындерясызь мучкицятне-вешницятне шпиононть, эли кшувавтсызь таркастост, эли сынсест тейсызь шпионокс. Истят тевтькак эрсить. Секскак зыяндо арсицянть сыненст куш кода кундама! Питне лангс, содак, ваномо а кармить.
— Мейле? Тень кис, цёрам, парсте важодемань кис, кепедьсызь пандовксост, максыть тенст кодамояк шнамо лопа эли натой орден. Секскак, од ломань, арсек, арсек, лиякс эрийстэ тестэ а менят...
Арсинь. Арсинь эрьва кода. Матедевиньгак неть мельтнень марто, сыргозинь — сынь таго превсэнь.
Содат, Видяй, кие камерасонть тень ялгакс ульнесь? Прокурор. Топавтсь тевензэ аволь ие-омбоце. Кортась теде шержей прязояк. Содась, кода яксевтевить истят тевтне, кода кундсевить «раськень яттнэ», «кулактне», «шпионтнэ»... Содась, а эряви превть яжамс, мейсэ сынь прялевить.
Секскак...
Сась валскесь. Чикор-чикор панжовсь пижестэ артозь кшнинь стака кенкшесь. Таго — уш зяроцеде! — састь мельган. Кода свал, кавонест. Ветимизь содавикс кабинетэнтень. Ушодовсь кевкстнемась. Мон содынь вейке: арась, аздан, эзинь нее... Зярдо кевкстницясь невтсь вакссонзо лакиця чайникенть ёнов, аволдынь кедьсэ весементь лангс ды полавтынь валон. Меринь, сюлмавозелинь Англиянь разведканть марто. Ульнинь манязь тов кавто иеде икеле. Савсь тень «шпиононь тевдень» пенгедемс мезть понгсь.
Кевкстницясь полавтовсь чамас. Кеняркстонть турванзо токинзе кекшезь мизолкс. «Окойники, окойники!» — кортасть сельмензэ. Икелень шаштызе папиросань кувтанзо. Мерсь совавтомс ламбамо пси чай. Теке марто превстэнзэ эзть лисне кевкстнемань конёвтне — тешкставтомс сынст седе курок.
— Ловныть ды сёрмадстыть, — мерсь седе сыресь овсе лия, чевте, оев вайгельсэ конёвтнень икелень шаштомсто.
Путыя кедем, тешкстынь апак ловно. Апак ловнояк содынь, кодат ёвкст ёвтневсть эйсэст мондень.
[369] Ульнесь судонь кондямо...
— Кодат ней? — сертия ёвтницянть.
Теевсь кашт шка. Марявсь, пе тензэ а ули. Теде прок седеяк виевгадсь учицянь залсонть шалтось. Окойники нурьгиця чатьмонемась прядовсь. Тапизе сонзэ вакссон аштицянть аламнеде кижныця, ялатеке вечкевикс баритонозо.
— Сестэ, колоньгеменце иетнестэ, «верцетнень» мелест ульнесь коекс. Кунсолость ансяк сынст! Мезе кармавтыльть, сень теильть. Секскак судтнэ...
— Ярмакт эзть сае... — прядынь валонзо мон.
Умоктояк умонь «шпионось» пейдезевсь, кепедизе вановтонзо икелензэ кассатнень вакссо ломантнень лангс ды нусманясто поладынзе валонзо:
— Шкатне, ялгакай, лиятальть. Васень таркасоль — куш сестэяк эрьва мезть эрсесть — аволь ярмакось, идеясь — седе курок путомс чипаень валдодо пешксе, уцяскадо тороземиця кудонть — коммунизманть. Путомс ды шкань апак таргсе совамс эйзэнзэ эрямо. Сюпавчинть пазокс, кода ней, эзть лово.
— Ней судить аволь судият, судить ярмакт, — кавтолдомань апак сода ёвтыя мелем, ансяк Анатолий Павлович прядынзе валонзо.
— Содат. Се шкань прокурортнэнь-судьятнень важодема лувдост марсить. Колмо-ниле валт — приговор... сеедьстэ — расстрел.
— Тонеть кода? — эзинь кирдеве, сезия кортыцянть ёвтнема лувонзо.
— Монень ледемань таркас педявтокшность комсьветее иеть. Се «судтонть» мейле ушодовсь: Соловецэнь усия, Колыма, Коми, Хабаровск, Красноярск ёнкстнэ...
— Инешки! — лиссь потстон ды поладынь валон эсь пачкан: «Зяро превей, ёроков, ванькс ойме ломанть понгонесть идемевсень ведькевень чаронть алов! Зяро верь валозель! Мезень кис?!».
— «Костинзе» комсьветеетнень... кулома. 1953-це иень эйсюрковсто, кода содат, прядызе эрямопингензэ [370] инетнеде инесь — «вечкевикс, питнейдеяк питней тетянок», кода невак лиякс мерсть вандынь валдо чис ветицядонок, Сталиндэ. Лисни, вете иень «Родинантень» эзть пандово. Кадовсть монь мельга. Зяро пичеть косояк Красноярск ёно кадовсть апак керя! Те мон, мон чумось!.. Вана истя.
— Редия, Анатолий Павлович, молевксэть. Мезе теевсь пильгеть марто? — кевкстемстэ невтинь пильгензэ лангс.
— Кода теть меремс... — прянзо нолдызе, лып варштась алов килангонь ялгам. — Те уш умок ульнесь. Мезть теде...
— Ну а кода, косо? — аламнеде визьксэнь марязь, аволь сеске пшкадинь омбоцеде.
— Те кажось лиссь мартон Енисей чиресэ. Вирь сявордынек. Телель. Арсезевинь мезде-бути ды сеске эзия редя прыця-сявориця чувтонть. Ловось кумажадо верьгаль. Эзинь оргодеве. Токимим тарадсонзо. Кадовинь эрийкс, а вана пильгем тапавкшнось. Седе парсте эзь пурнаво. Вана истя, Видяй.
— Комсьветеестэ — комсь... — арсезевинь марямга. — Шожда меремс... Аволь эрьванень таштавильть зняротне! Аволь. Ламот, содан, муизь пест зярдояк а солсиця, кувака ве ёнкстнэсэ.
— Мезе виде — виде. Тайгась аволь умарь пире. Зяро майсема ойметь нильсь, кияк а соды. Содыть, паряк, ансяк зярдояк а солсиця модатне ды певтеме сеськетне. Моненьгак, секень вант, авольть эскеляво комстне. Апак учонь тев лездась.
— Те таго кодамо? — ювк кепедевсть лавтовон кевкстемстэ. Озынь седе видьстэ.
— Лагерень бухгалтериясо важодсь лагерень прявтонть низэ. Од, раужо сельме, мельстуиця. Монень маряви, наголь цёрань лагерьсэ обезьган ёнов молицяськак Венеракс маряви. Ну, те кадык эно! Мезе ульнесь — ульнесь. Цёрат, чарькодят. Грамотазоль аванть — озязонь нерьшка. Бухгалтериянь таркас киякст тензэ тенсемальть-шлямальть! Эли кедезэнзэ узере ды... вирев. Арась. Те а туи. Ава. Теде [371] башка, истямо циреень ни. Кучик азё... Эсеть ков эряви кучтанзат!
Муимизь монь. Тонь, келя, оно кодат содамочить, мик кельть содат! «Лездак, аравтнек цифратнень таркаваст, дебеттнэ-кредиттнэ иляст човорявкшно», — мерсь тень прявтось. Лездынь. Вирев кой-зярдо эзимизь сайне. Тень таркас лембе нупальнесэ ловомкайсэ цинькаинь, цифрат аравтнинь. Те теть аволь узересэ чоп ахолямс. Лангозон лиякс кармасть ваномо. Васняяк ялгатне. Лиятнеяк эзть кадово. Ярсамсто пидицятне-паницятне венстильть тень мезеяк ды ланга. Пекем седе парсте пештилия. Шкань-шкань макснесть тень розень кши копша. Сан казармав — покшчи. Ялгатненень печтькень-печтьке явшан. Маряви, текеде, «бухокс» улемадон, эзинь понгокшно сявориця чувто алов омбоцеде. Кадовинь эрийкс. Вана истя.
— Комстнень изнить. Седе тов мезе?
— Седе тов, Видяй... Московов. Сынь, тей-тов — совамс а козонь. Кенкштне панжома экшсэть. Кинень эрявсь зэкесь? Седеяк — шпионось... Икелень квартирасон эрясь лия семия — ним Лияна лия цёрань пельде эйкакшонзо марто ды неть эйкакштнень тетяст. Мон сыненст... Тейтерем, эсень тейтерем, кенерекшнесь лисеме мирденень. Косо, кодамо адресэзэ, муик азё. Вана истя, Бажутонь Видяй! Шпион... Кинень мон эряван, «чачома масторонь микшницясь»? Кадык чумомгак нолдазель, тешксэсь кадовсь.
Московсто сынь велев. Эринь авань ташто кудынесэ. Талай — истямо биография марто эль саекшнимизь — важодинь школасо. Тонавтынь эйкакшт немецень кельсэ кортамо...
Вана истямо, нурькинестэ, репрессировазь ломанень эрямоким, биографиям. Кода неят, аволь ламбамотнестэ...
Варштынь кассатнень велькссэ пижестэ палыця частнэнь лангс ды пшкадинь истя мазыйстэ, истя шождасто ды чарькодевиксстэ ёвтницянтень:
— Яла мерить: ушодксось певтеме а эрси. Шканок ули. Энялдан, Анатолий Павлович, поладык седейс токиця ёвтнемат.
«Мезекс теде тень чемердят? — ванан, секень вант, кевкстьсамак. — Каня мон исяк чачинь?»
Вана мезекс. Аволь весеменень чарькодевикс «демократиянь» кемень иетнень перть ялаксом кенерсь-маштсь таштамо аволь аламо ярмакт. Рамась квартират-машинат... Сонсь ськамонзо... А эйкакшт, а ни... Авам умок кулось, ней вана патям... Сайсь мель — шумбрачизэ аволь кеме — сёрмадстомс неть кудотнень-читнень монь лемс. Сёрмадстынзе. Ней мон сюпав ломань. Кемат: икелень шпионось — буржуй... А иетне монь... тонсь неят. Мезе карман тееме неть сюпавчитнень марто, монсь а содан... Таго прянь Сэредькс!..
Каршонок пижестэ палыця частнэ ледстнесть од ялгань туема шкадонзо. Стинек, юдминенек-мезенек марто увол-авол, апак эрязкале лисинек ушов, перронс. Стинек латонть алов. Учотано.
«Кендев молиця автобусонть лоткамо тарказо — нилеце площадкась», — яволявтсь аволь пек чарькодевикс вайгельсэ радиоавась.
Сась автобусось. Сельмеде сельмс ванозь, лепштинек кеденек, ды Анатолий Павлович совась бусонтень.
— Иля тално, атя, келей ки теть, ардт! — серьгединь мельганзо.
Туицятне совасть. Кенкшесь пекставсь.
«Вастомазонок!» — меринь эстень марямга, аволдынь кедьсэ ды сыргинь кассань залонтень вандынень билетэнь рамамо.