Тесэ ды тосо (2013)/12
[75]
| * * * |
| Кемгавтовоце сёрмась |
Тоначив, Лемаень Виянанень, эрзянь авантень, кона мерекшнесь тень: «Иля яжа мазычинть!»
Паро ёжо теть, Вияна!
Сюконян сёрмат кис, килейнем.
Васняяк тетядон. Кевкстни, мезень кис «ине» войнасонть саекшнизь оймензэ? Монгак а содылинь. Мейле, уш сыречи ёнов, чарькодекшния: маштокшнызь а мезень кис. Тетямгак теде а содыль. Сонзэ превтнес, кода ламо лиятненьгак, эцесть вейке: «За Родину!». А сон, Родинась — эрзякс Чачома Масторонок, Эрзянь Масторось, — умоктояк умок ульнесь нельгезь. Мезень ды кинь кис сестэ эрзятне валсть верь? Ят шабрань, ят раськень, кодамо-бути идём «отечествань» кис? Истя, истя улияк, Вияна. Самай секс, Вияна, Тоначисэяк разди тетянь седеензэ «Мезень кис?» кевкстемась.
Тон уш истя эйсэнь иля «скиря» олячинь вечкиця, аламнеде пициця кель-валон кис. Теке марто а ава кармат, ёмавтындерясак дерябамонь обуцят. Кинень эряви ношка, а дерябиця пей ялгась? Те тынк, аватнень, кедьёнксось — васня васькавтнемс, мейле лаксемс, мейле, а сатындеряй, валакавтнемс цёратнень човсема конёвсо. Цюр, иля капша! А чумондан! Содан, «лаксемань» кедьёнкстомонть-инкстэменть минь, сакалонь нарсицятне, умок велявтовлинек нузякс атяка псакакс, допрок лоткавлинек «чеерень кундсемадо». Истят валткак корязонк марсинь: келя, тынь, аватне, бажатадо теемс поланк-мирденк эсенк сулеекс, весементь теезэ истя, кода тынсь тейтядо, кунсолозо, сырк илязо мере, эрьва валонк. Истя?
«Сёрмадт седе нурькинестэ ды чарькодевиксстэ...» — таго энялдат, омбоцеде эли, паряк, колмоцеде уш. Видеть валот. Бажан витемс мелеть. Ансяк, куш локшосо тонавтомак, а маштан нурькинестэ, седе лепштязь-киртязь. Сёвнок, дугай, [76] иля, монь лувом тонь коряс лия: ёвтнемс седе келейстэ, эрьва ёндо, эрьва валось улезэ путозь тарказонзо, кортазо ламодо ды домкасто. Энялдт-кармавтт — сулей эйстэнь а лиси. Ривезентень Пазось макссь пуло, нумолонтень — пулыне. Кияк киткавонть а кармавты нурькалгавтомс пулонзо, кияк тень кисэ а сёвны эйсэнзэ. Мертяно, нумолось кувалгавтсы. Мезе лиси? Секскак кувакасто ёвтавикс кель-валон кис пек илямак мурне.
Удемсэнь икеле кирдевсь мель: сувнетне-ойминетне вейкест-вейкест марто а вастневить, а неить, а марить, вейкедест-вейкедест мезеяк а содыть. Лисни, манявкшнынь, сёрмат, паро вал ёвтан, панжизь сельмень. Ней кой-мезде карминь содамо.
Косто лиясто, тондеть башка, марят седе ламо? Тынк чопода ёнкстнэстэ зярс кияк эзь сакшно, сёрматкак моданть пачк тей эзть пачколе. Тон, Вияна, — васенцесь. Тон муик ды келик минек пелев кинть. Тон панжик вальманть. Тондеть икеле кияк мезеяк Тоначиде, тынк Мастордо, эзь ёвтне. Бути а ловомс кувака черь-сакало бачкатнень. Мезть ансяк сынь а моткодить, мекев-васов теке «аллилуйянть» пансезь! Те эно сынст тевесь, те кшист.
Сюконян теть: полавтыть вановтон, сюпалгавтык аламнеде колганом. Карминь содамо, кодаттадо тынь лангс ваномс, кодат эрямонь-аштемань коенк, меленк-арсеманк. Кецневтимик теньсэяк: вастован, кемезевинь, Тестэ туемадон мейле тонь марто. Те тень карми покшчикс. Валтнэнень, кортамотненень пе а ули. Сэвтневлинек эрьва чинть. Тон сельмень икеле, превсэнь аштят валдо черь, валанясто судрязь пря од тейтерекс. Покш мелем неемс, кодамолить се шкастонть, варштамс сэняжа менель сельмезэть, неемс мизолксот...
«Ламодо, атя, арсят, — содан, мерят тон сёрмадон мейле. — Ох, авакай-сиякай, каня а содат, кодаттано минь, икелень эрицятне? Мон уш ёвтнинь: минь иень-кавтонь эйдень покшолмасотано, кодаткак сельметь-турват эйсэнек арасть. Секскак сельмень, мизолдыця турван а несыть. Некшневсть. Умок ваясть сынь шкань домкадояк домка [77] иневедентень. Зяроцеде уш мерян, совавтык прязот: минь — сэняжа тусто сув пакшкеть. Теемс тень — свал кирдевезэ сельметь икеле сэнь сувнесь — а шождыне. Содан, аштян икелеть кемгавксово иесэ аволь сэрей тейтерекс».
Тынк ёнов кенкшем, Вияна, — ёжом ледстни — ушодсь панжовомо: прясь чинь-чоп увны, пштикст сялгонить, седеесь нузякскали... Пилетнеде а мезть кортамс, допрок потомсть. Сыре панго. Зяро тень кадовсь такшардомс моданть ланга, зяро ботамс тевтнесэ — а содан. Зяро илязо уле, се чинть вешксеманзо марявить. Сыця вастовомадо кулят кис сюконян. «Ансяк «учан» валонть, седеяк — «неемазонок», бажак а ёвтнемс», — сёрмадокшныть тень. Тонсь превть максокшныть: тей иля капша, кенерят. Истя, истя...
Васня тесэнь тевень сорновтнемат, тешкс путома тенст. Эйстэст кемень улавт. Ансяк вейкесь мезе ашти — идемс куломадо чачома келенек. Седе виде ули ёвтамс — куловтомадо. Те пандось — аволь алкинетнеде, аволь венежатнеде. Берянь ёжозо келенек, берянь! Ашти, ловт, эземпрясо. Цяк лекси. Секскак тевентень — стявтомс сонзэ пильге лангс — путан весе виень. Чить тевть яксевтян важодема таркасо, кабинетсэ, чокшне, веть — кудосо. Пелевес аштян конёвтнень велькссэ. Вийть путан ды карман путомо, зярс... Меельце лекстямозон. «Паз, чангодть!» — неть валтнэсэ ушодан эрьва чим. Энялдан Инешкипазонтень, максозо тень шумбрачи, шка. Содавлитькак, кода сынь а сатныть! Кода сынь эрявить. Тевтнеде ламо. Ансяк те тевенть, ванан, эрявиксэкс ламот а ловить. Мекевланг, ламодояк ламот, сонмат, чувить келенек калмамс латконть, теить кандолазтнэнь, анокстыть кувака кортамот... Берянь. Пек ризнэвти весе те. Секс а эряви эрязкалемс — вант, иля покордаво — Тов, тонь марто вастовомантень. Кенерян. Вейсэ ультяно. Кадовсь аламо.
Эх, Вияна! Содавлитькак, зяроцеде уш ледстян, мезе тесэ моли! А ёвтавияк. Валон а сатыть. Ужо эно, ёвтнеса седе валанинестэ.
Минь тонь марто кемилинек Тоначис?
Арась.
[78] Мезе ней моли — преветь чополгадыть! Прявттнэ кармавтыть кемеме евреень пазонтень, Христоснэнь, весень. Эйкакшонь пес. Тень туртов киулотнева нерьгстнесть ниле метрань сэрьсэ крёстт, эрзянь эрьва велес стявтсть церькова. А оштнесэ... Часовнят, монастырть, храмт... Якицятне эйзэст — колмо-ниле ёколкай сырькайть, велязат... ды пежетень нолдамо совсить салыцят-колыцят. Мезекс эйсэст стявтнить? Кинень? Койсэнь, вейке мель кирдить: шлямс ломантнень прясто меельце превтнень. Попт, попкеть, бачкат, кувака, оев черь монахт, иеромонахт, архимандритт... Ламот эйстэст икелень алкашт, зэкть, райкомонь секретарть... Кие кедь малас понги — тов, церьковав: кенгелеме, ломантнень манчеме, кирдийтнень кирдеме. Кемат-арась Иисус евреень покштянтень, «сонзэ» кудос анокт совавтомс весень! Ансяк ульть сонензэ озныцякс, «урекс»! Лия мезеяк а эряви. Исяк яжасть неть самай церьковатнень, зэрть мольсь модамасторонть келес, течи некетне, икелень яжицятне, одс вельмевтить эйсэст. Касыть-кепетить эрзянь велетнева «храмтне» — теке пангот. Истят тевть тейневить ансяк чаулань масторсо. Теевтицяст — седе превейтне. Мукшновить истят.
Томбалень мастортнэсэ, ламонь таркава, ознома кудотне умок теевсть гостиницакс, спортонь залокс, ресторанокс, музеекс, тесэ — одт панжить. Секс лангсонок пейдить Моданть келес. А стяко, лисни, лемдизь иневедьстэ иневедьс келемезь масторонть чаулань эрямо таркакс! Кие соды, паряк, теезенть калавтнемеяк вередемить. Каня васенцеде? Теить — яжить, теить — поркснить... Ды истя иестэ иес, пингестэ пингес. Секскак Христоснэнь сюконякшныцятнень эйстэ ламотнень «церепкасо» аволь превть — чиньжарамо лукшт, сюват.
Симагай поптне — косто зняротне муевсть? — мотордыть текеде: а карминдерятадо кунсоломо прявттнэнь, а карминдерятадо кемеме миненек, поптненень, Тоначисэ понгтадо адс. Тосо, келя, рестатадызь толпандясо. Мезе тынк Тосо моли — теде аламо содатано. А вана Тесэ, Эрицянь Масторсо, зяро ломанть ваявтыть Чаула эрькентень ризасо яксицятне — теде содатано! Кода ансяк сеянь [79] сакало бачкатне а кенгелить, кода ансяк а тандавтнить! Манчить, Паздонть допрок стувтозь. А-а! Те сынст тевесь, тень кис тенст ярмакт пандыть. Лавгицятненень кемицятнеде, васняяк аватнеде, аволь аламо. Вана мейсэ зыянось! Васня комсомолонь, партиянь промксов чийнесть, Ленин антихристэнть портретэнзэ кува ансяк эзть понгавтне, ней Христосонь сакалов чаманзо икеле сюконякшныть, коняст сэнынкавтнить. Эрьвась эйстэст бажи, бачкатнеде башка, модас мендявомс «бояртнэнь» икелеяк. Кода эно, сынь, эрьва кодамо сэрень-тюсонь прявттнэ, — Пазонь кучовкст! Весементь тейсызь, ансяк а понгомс самай те адонтень.
Кода арсят, Вияна, мезень кис нолдызь истя азаргалеме крёсттнэнь-церьковатнень? Содак: аволь ансяк ломантнень пульзядо кирдемга, аволь. Теде башка, — Христоснэнь озныцятнень чачома кельтеме кадомга, рузонь келенть лангс сонзэ полавтомга. Вана кодамо церьковань стявтницятнень васень мелявксост, ёнамост-целест. Вана кодамо зыян, певтеме ризкс кандыть сынь эрзянь раськентень.
Сюкпря теть, Вияна! Зярдояк Библиянь лабордоматненень, тюнихань ёвкстнэнень эзинь кеме: цёравтомо пачтниця ават, куломадо мейле вельмемат, адт-мезть... Ней кемекстык теде мелем тонгак: куломадо мейле ломанесь тееви сув пакшкекс; лакиця пичой марто кодаткак соргавкст арасть; койтне тынк Тосо допрок лият — мекевланг, косо а эряви сюконякшныцятне, попонь кедень палсицятне понгонить натой аламнеде седе берянь таркас. Истя эрявияк! Сполать тенст! Панжить сельмень, кода а сюконямс тень кис.
Визькс видькстамс, ялатеке ёвтаса: педе-пес а кеман Тоначиденть ёвтнематнес. Истямс истя, ды сёрмат сыть... Тосто. Аволь костояк... Кода тенень а кемемс? Арась-арась, потмаксос кода-бути а кемеван. Кие истямокс теимим — монськак а содан! Маряви, тетян-аван. Сынь васенцекс совавтызь потмозон кавтолдомань видьминенть. Сынь эсь эрямосост невтизь ды тонавтымизь — зярдояк а манчемс, а кенгелемс, улемс видечинь кис аштицякс, сонзэ ванстыцякс. Арсян, тосто, лайшиця-морыця эйкакшпингень масторстон, пачкодськак сыречизэнь видечинтень кемемась.
[80] Нолдык чумом набойчим ды визьксэнь аразем кис, кевксттян седе, мезде цёранень а лади кевкстнемс. Ансяк тон иля сэрькставо. Иляк нолда прят. Аваломанде башка, теде кияк тень а ёвты. Секс эскельдиньгак визьксэнть трокс.
Мезе тон арсят тейтерьксчинь шкадо икеле ёмавтомадонть? Мезе канды? Кодамокс тейсы валскень чинть, эрямонть чиявтомадо икеле цёрань виенть варчамось? Кодамо армотькс кады обуцянтень? Полавтови-арась кодаяк се ломаненть эрямонь лувозо? Одтнэнь ютксо, ды аволь ансяк одтнэнь, эрьва мезть лиснить. Кода тон теде арсят?
Кевкстнян, чарькодемак, аволь тевень аразде. Мель а кирдян сокарямс киньгак муськемасо, седеяк — невтнемс сурсо. Пачкодсть тенк кулятне, мезе моли Тесэ, Течисэнть? А содындерятадо, содадо: симемат, тюремат, саламот, маштнемат, мирдевтеме чачтнемат, эйдень кадномат... Ох уш те вечкемась! Кода ансяк а кортыть эйстэнзэ, кода а шныть! Маряви, пелевеёнксонь варматнеяк морыть вечкемадо морот. А вана уроз эйкакшонь кудотне, Вияна, таго ледстяса, пешксеть войнавтомо. Те ков маштови?! Косо те самай вечкемась? Эсь прянь аванстомась тенень а лезды? А содан кода тон, мон арсян, лезды. Койсэнь, бутрав, чинев ведьсэ экшелямось, вечкемань «тортатне», сеедьстэ шкадо икеле теить тейтертнень авакс. Мезес те пачти? Кодат тешкст кады вандынь чинтень терний, нулгодькс чинесэ лексиця те чеядавксось?
А содан, мезе ёвтат тон, эсень арсеман истят.
Тейтересь ванстозо ваньксчинзэ сельмезэнзэ сардынень понгомадо пек. Казезэ поланстэнь чансть ды кеняркс. Истя вана, Вияна. Истят ульнесть эрямонь-кудонь койтне минек од шкасто ды минденек икеле. Вант, иля кежиявто, те монь мелесь. «Кезэрень, куштазь лувсо арсят, атя!» — пелян, ноцковтсамак валсот. Кадык ули истя. Зяро тень лиякс иляст корта, мелем а полавтови. Секень вант, текеде понгинекак домкадояк домка, кельмесэ лексиця латконтень — стувтынек сырьмаенек-сырькаенек прянь ветямонь, кодат казямот иляст уле, коест. Сынст ёмавтозь, ёмасть оймень ваньксчись, седеймарямось, вейкень-вейкень лангс кемемась. Полавтызь, [81] састь тарказост певтеме кенгелемат, визьксэнь арасьчи, сялдомат, эрьва кодат тюнголькс тевть. Мендявиндеряй горниповокс панжовиця тейтересь чиявтомадонзо икеле, карми менчевеме ававтонзо кудос совамодо мейлеяк.
Паряк, неть сыречинь музгордемат? Режнезь мельть? Кармавтомс одтнэнь минекекс эрямо? Кемеви стакасто! Пек.
Ламот сялдыть покштянь покштянок эрямо коест: чоподальть, келя, тухмужальть, мезескак а бажицяльть... Келя, эзть сода, пиштякат, букваткак, книгатнеде кортамскак а мезть, эзизь марсеяк те валонть. Истят «паро» куляткак пачколить: рузтнэвтеме, маряка, кадовольть эрзятне чувто прява кузницякс-кирнявтницякс. Обезьганокс. Сюкпря, келя, сыненст, рузтнэнень! Кодат чаво валт ансяк а ёвтнить! Ды весе те асодамодонть! Васняяк, мерема, рузтнэнь.
Виде, покштянок эрямост а медь ульнесь. Кудост уштневсть раужосто — теде качамо, сод. Эрясть ракша марто вейсэ: тулевкст, вазт, реветь... Пукштор якшамо шкасто савкшнось кудосо потявтомс скалонтькак. Таракант, кендялт, сийть... Парось аламоль. Седе вадря а ледстнемскак. Сялдыцятнень эряволь кевкстемс: те мекс истя лиссь, мекс эрзятне уштнесть раужосто ды сийть трясть? Кие чумось? Кодамо тувталось? Ансяк те лия кортамось. Зярс токшемензэ а карматано.
Кода иляст эря тетянок-аванок, покштянь покштянок, оймест кирдсть ашо пацякс. Вана мейсэ мазычист ды нардест! Сынтемест эрзятне течинь чис авольть пачкоде, авольть цидярдо. Мазя прев, цябай ломанекс сынь эзть ульне. Палыця ведте, кода ней, эзть треска, вансть сыретнень мелест, лездасть вейкест-вейкест туртов... Улевлинекак тень кувалма сынст кондямокс, ёмамонь визьксэнтень раськенек, теке марто келенек, авольть пачкоде.
Икелень эрицятне беряньстэ пряст ветицятнень эзть элякавтне. Мартост эзть кольне. Казямольть койтне. Ды видельть. Лангозост пеняцицят арасельть. Марсить, кеман, койденть: одирьвась поланзо марто васенцеде удомадо [82] мейле невтилинзе одирьвань саицятненень ацамост. Редявиль ацавкссонть якстере таркине — тейтересь ульнесь тейтерь. Арась — кортамскак а мезть, валтомояк чарькодевиль. Истят апарот велесэнть вастневсть пектеяк пек чуросто. Ней те ловови ташто идем коекс, покордамокс. Кияк а арси: сонзэ вельде ламонь кувалма кирдевсь стакадояк стака эрямось.
Вейке эчке книгасонть, вадрясто кирдевсь мельсэнь, ёвтневсь велень тейтерень кардазонь ды кудонь кенкшень дёготьсэ ваднемадо. Тувталось вейкель: мекс шказонзо, чиявтомазонзо эзизе вансто икельчинь урьвась тейтерьксчинзэ. Ловнынь книгасонть сёрмадозенть сорнозь. Ёвтневсь эйсэнзэ... Мезть кортамс! Каня ансяк книгатнесэ ёмсевтить пряст, повсить, лазныть, ваявтнить... визьксчинь ёмавтомадо, валонь акирдекмшо, а вечкевикснэнь максомадо... Ней истят тевтнень-кирдатнень мезекскак а путыть. Раксить лангсост. Те, келя, кевень пингень кой, покордамо. Аволь пек умок тейтерень корось, ваньксчись лововсть каштанчикс. Кувака, кумажадо алга покайть-руцят кандтнесть аволь ансяк мазычинь кис. Ней... Мезть «нейденть» кортамс! Анокт лангстост ёртомс меельце нулынентькак, ансяк штавтомс визькс, цёратненень вечкевикс, таркаст. Икеле, минек шкасто, штавтовиндеряйть тейтеренть кумажанзо — якстерьгадыль.
Ней истямо тюс а неят. Ёмась, мерят. Мик истямо мель кирдеви: рунгось, вантая, — мазычи, невтнек зняро, зяро маштат, тува, кува мелеть. Якстерьгалемат? Умок уш сынь румсть. Марят, Вияна? Паряк, неть валтнэсэ сыречим апак вадне крандазокс чикорды? А? А мерят, саты теть, атя, поксарямс ташто, чапамо чинесэ качадыця парготнесэ?
Кода улемс? Мекев содсо артозь кудос — чичавонь кундсеме, кендялонь модерямо, сярконь чавномо? Ды ушодтано ашо, прок ансяк празь лов, эрямосо эрямо?
Кинь превс сови истямо мель, совазо, кенкшесь панжадо. Кинзэ трокс кияк а пры. Потамс а стака. Ансяк истят, кеман, а муевить. Монгак тов а капшан. Карьсэ, кодат чевтеть ды лембеть иляст уле, якамояк а кармавтсамак. Ревелевкс марто [83] киякссо удсемеяк а арсян. Тевесь лиясо: а эрявить стувтнемс кезэрень паро, домка зэме, мазый коенек-кирданок, покшчинек, локсейкс ливтниця моронок... Эряви эскелямс моданть ланга, зяро Пазось макссь, прянь кепедезь, эрямс эсь превсэ, кирдемс каштанчи; а туемс чиезь аловпандт киява эли, копорень аравтозь, варма мельга.
Кемгавксово иесэ, тундонь балягинекс панжовома шкастот, мирденень ней а лисят. Шка арась. «Прогресс»... Эряви кочкамс специальность, прядомс институт, академия, теемс карьера. Аволь кода икеле — семия пурнамс... Зярдо?! Шка арась. Рунгось вана соды эсензэ.
«Прогресс»... Каня свал сон канды лезэ? Мекс, Вияна, арась меленек теде арсемс? Козонь, ков эйсэнек сон вети? Валдос, аволь чопода таркас — пес? Седеяк эчкелгавтызь эйзэнзэ ветиця карьксэнть, теизь седеяк нардевекс книгатне. Сынь кармавтызь эрямонть седе эрязасто эскелямо икелев.
Книгась тень ульнесь — кода вачо скалонтень пиже тикшесь. «Поринь» эйсэст сиземань апак сода, ламодо-мезде стувтнезь, «поринь» мезе понгсь «пеень» алов. Ков ансяк сон, «книгань карькскесь», эзимим сайне, кодамо масторс ансяк эзинь пачколе, кие марто ансяк эзинь вастневе. Эрямонь перть таштазесь таштавсь, сюконян, тетянь-авань ды книгатнень вельде.
Зярдояк а стувтса эсенек велень школасо тонавтнемань васенце ием. Телесь, мельсэнь, кежеель, пеензэ пштильть. Вант, судот иляк невтне! Кудосонть сурть якшамо. Оршамкат иля кайсе. Сеедьстэ валскенть пелев ведратнесэ веденть ланга таргавиль эй. Солыль ансяк каштомонть уштомадо-явамодо мейле. Мезть кортамс, орькс ульнесь 42-це иень се телесь! Война...
Шкась мольсь. Якинь васня эсенек велень школав, мейле — шабрань. Телень киява мекев-васов кавксо вайгельпетнень ютазь, каштлангось марявиль кизэнь пси чикс. Валанясто ёзазь кирьпецтнень калгодочисткак а марявиль. Саилия те эли тона ловновиця книгам ды «туилинь» лия ёнксов-масторов, совилинь лия, превсэнь эриця ломантнень [84] юткс; ушодовиль кувака, седеень пачк ютыця, книгань он. Вай, кодамо те покш чансть — эрямс те онсонть!
Паронь арсезь, Валдай. Эрицянь Мастор.
2000-це иень медьковонь 12-це чи.
Поладкс: ули мелем содамс явовомадонок мейле эрямодот; тешкстак, энялдан, ёвтнек. Учан, сяткинем, пек учан. Ансяк теде икеле, энялдан, ёвтык мелеть монь «прявт кевкстемадон». Эзик стувто?