Тесэ ды тосо (2013)/16
[104]
| * * * |
| Кемготовоце сёрмась |
Тоначив, кевев менель масторов,
Лемаень Виянанень, Валскень тештинем туртов
Сюк-сюк, Вияна кстыйнем!
Зярыяксть ловныя ризксэнь кандый сёрмат, ловныя ёвтнемат меельцеде ды арсезевинь: «Мезень кис эрятано ды эрясть ламодояк ламот минденек икеле? Мезекс сынек Модамасторонть лангс? Мезень кис валовить зняро сельведть? Лиясто лейнекс, лиясто леекс чуди верь?». Те Тесэ. Тынк Тосо, Тоначинь Масторсо, койтне, кеман, лият, истят тевть а эрсить, верень лейде эзть марсеяк. Те сыргозти паро ёжот. Тонь кондятнэде Тосо зяро тештетнеде менельсэ, зяро лопатнеде виртнесэ. Ансяк, кодамо стака, кажов ды казямо илязо уле Тесэнь эрямось, кандолазс эсь олясост мадицятнеде аволь уш пек ламо. Берянь-берянь тесэ, Тов кирякстомс мель чуросто кие саи. Мик палыведень-нарконь вечкицятнеяк тынк ёнов а пек капшить.
«Мезень ма-зы-зэ? Мезень ма-зы-зэ?» — сеедьстэ кевкстни седеем, Тесэнь эрямонть лангс ванозь. Мекс, алкукскак, бути эрямось истямо берянь, истямо казямо,урьвась эйстэнек ёлдорсо чии шумбрачинь витеме? Мекс, ёвтык, малав эрьвась истя мелявты эрямонть кис?
«Варштак тия-тува сравтневезь, нусманясто арсиця сэнь-ашо пельтнень лангс: сынь кунсолыть чипаенть валдо-лембе гай моронзо!» — кармавты-тонавты велькскан келей сэняжа пацякс сравтовозь менелесь.
Варштынь.
«Кармат седе тов кевкстнеме, мезень мазызэ эрямонть?» — поладынзе валонзо ванькс-ванькс сэнь тонавтыцям.
«А карман», — прынь превс путыцям марто ве мельс.
Ёвтыя мелем ды таго педявтыя вановтом сэняжанть келей чамас, ванан, а лексян. Кодамо сон ванькс, кодамо сэрей-келей! Каня те а мазычи?!
Мелезэнь ледить тон, Вияна.
[105] Каня минек вастневематне, кенярксто пешксе мештенек эзть мазылгавто эрямонть? Каня кортнеманок, неень ды мейлень шкатнеде арсеманок, пелезь, салава палсеманок эзть ульне мазычинь тешксэкс? Кода сынст кис а ютамс эрямонь верде казезь келей-теине, виде-менчевезь китнень?
Варштан лиясто, седе сеедьстэ чинть чопода векс марявомсто, фотографият лангс, конань ванстан кеменксть зярыя иеть, ды ютыть икельган горниповокс мизолдыця иетне, од шкам, каятыть пилезэнь вейсэнь моронок-пеедькшнеманок.
Фотосонть кавоненк: Паксютонь Марюш ды тон. Саезтядо карксамо видьга. Шказоль талай сёксь, секс оршазтядояк лембестэ. Прясонк пева цёкинесэ каярдозь шальть. Ванан кирьксаня, покш сельме чамазот. Мекс истямо нусманя вановтот? Паряк, содасть сынь, сэняжа сельметь, ды мартост ойметькак, лангозот прыця цярахмантнэде? Секс сюмордт ды ламодо арсицят?
Ванан лангозот ламо иетнень пачк ды кевкстнян: мезень кис тынь, Виянань сэнь сельметь, вечкилимизь, мезень паро мукшныде эйстэнь?
Келя, а мазыенть ансяк превензэ ды ванькс оймензэ кис вечкеме кияк а карми. Кода меремс... Мазычись — аволь тунь а полавтневиця ёнкс. Те — келей-кувака мастор. Панжиковсто кодат ансяк тюст а вастневить пертьпелкссэнть! Текесь ломантнень ютксояк. Вейкесь, ванат, мельс тукшны мазый судонзо кувалма, омбоцесь — тюжала, теке чентязь, чама тюсонзо кис, колмоцесь превстэ ливттянзат розакс палыця турвасонзо. Иля кавтолдо, редясызь превтненьгак, обуцянтькак. Аволь сеске, редямс ялатеке редясызь. Келейть, келейть мазычинь лугатне, эрьвась мусы се баляганть, конань вешни, кона туи мелезэнзэ. Малав эрьва кинень эйзэст панжадот янтнэ.
Ванан умонь, тюжалгадозь фотографиянть лангс...
Ванан, ды ютыть потмован а неявикс налтнэ-ледстнематне. Мазый, неявикс ульнить велень тейтертнень ютксто. Мелезэнь тукшныльть молевксэть, вайгелеть, эчкине мазый турват, аволь сэрей, аламнеде «пешксе» [106] рунгот. Ды аволь ансяк монь мельс... Эзик стувто, Вияна, зяро мельгат чийницятнеде ульнесть? О-о-о...
Сеедьстэ сакшны превезэнь вейке а стувтовикс, виень пурныця тундонь ве.
...Самай солавтома шказо. Ловдонть кадовсь аламо. Чадыковонь лембесь нолсезь нолси эйсэнзэ. Рудаз. Коштось летьке. Менелесь копачазь тусто пельсэ. А ков, а тештеть. Дюм чопода. Шкань-шкань тестэ-тосто кайсетить а мезень теемадо пинень онгомат. Вень чатьмонемасонть парсте маряви куринканть кувалт чудиця набойне чудикерькскенть теке цёрань вайгелезэ-торномазо. Эль марявиксстэ, норовжорчонь вайгельсэ чольдердить лиятнеяк, седе вишкинетне. Теке телень удомадо мейле сыргозиця Модась моры: длинь-длинь-длинь... Кортамстонок вайгелест а марявить. Лоткатано — одс пештьсызь пиленек хрусталень гайтьсэ.
Кода те, Верепаз, умок ульнесь! Ней, ламо-ламо иень ютазь, снартнян аравтомс сынст Шопенэнь фортепианань пассажонзо ваксс, кунсоломс те гениенть музыканзо. Стяко. Кодамояк генийнень пертьпельксэнть мазычизэ, сонзэ гай вайгелензэ зярдояк а омбокставить. ’
Ёвксонь ве. Ламотнестэ истямо ульнесь ансяк весть. Ванстовсь прясон сыречизэнь, эзь румо. Маряви, текень кувалма вечксыньгак седеень витиця, ловонь паниця, чольдерькстэ пешксе тундонь чопода ветнень. Кода, кода сынст а вечкемс!
Аштинек озадо, вейкенек-вейкенек эйс кукшкадозь, Калдоронь кузтемпесэ. Эйстэнек ушкс, куринканть пачк-кувалт ютыця кинть тона ёно, чопода пандокс неявсь олгосо вельтязь кудонк. Кортнинек, кунсолынек каштмолеманть, сиянь вайгель чудикерькстнэнь вень урнемаст. Кортнинек — верьга-верьга ливтнинек — икелепельксэнь эрямодонок...
Чо-чож, чо-чож... — чоподасонть марязевсть эскелькст лушсо удыця кудонк ёндо. Аволь пек марявиксстэ каятотсь, сезинзе аламнес чудикерькстнэнь морост, цёрань мокныця, марявсь, машнетиця вайгель. Бу-бу-бу... — ботнось мезе-бути алясь. Кузсь кузтемпес, весть-кавксть кальцядизе [107] циндеренть: кенкшесь эзь панжово. Мотордозь, бот-бот валгсь чалгамотнева ды тусь кудотнень ёжова тов, косто сакшнось, Алопе ёнов.
Минь салава цихельдинек мельгат пансицянть лангсо ды кеняркшнынек а муевикс, седеяк истямо чопода вестэ, тарканок кувалма. Азё вешнек минек...
— Те Эчкур, — нежедик лавтовот монь лавтовс ды тошкстыть, палымик оймекоштсот пилес.
— Содан, содан, — текекс пшкадинь каршот; сювордыя кельме, кода монень марявсь, кедькоморот ды марямга пейдезевинь мельспародонть — эзь лисе тевезэ цёранть.
— Ютамо ки тень а максы, эчке парь! — мерить ды пейдезевить тонгак, лекшкадыть эйзэнь.
— Содан, парсте содан, кие, прок лытагай пине, азгонди те шкава вальманк алга! Чопача... — кемекстынь валот, вадяшия, седе эжезэ, кедеть.
Содылинь: аволь ансяк мон кандтнинь мештьсэнь мельстуиця вановтот. Лиятнестэ вейкесь — Дудоконь Эчкур. Мельгат, мельсэнь, чийнесь келень ливтезь. Те тень, видькстан икелеть, вечкевсь. Тон ульнить аволь киньгак — монь!
Чопода вень општсонть чудиця «норовжорчтнень» вайгелест-сияст колынзе велень келес марявиця атякшонь вайгель. Мельганзо моразевсть омбоце, колмоце... Прок пелькстазевсть саразонь прявттнэ, кинень седе кувакасто таргави моронь меельце нотась. Шказо таргавсь. Эрявсь арсемс «вандыс» валдонтькак. Тон нежедить кумажам лангс ды ливчанясто стить таркастот. Стинь монгак.
Те мезе, Эчкур... Паулонь Костюш гармонистэнек марто тонь кис тюремаскак пачколинек. Теке кавто од атякшт. А кемеви? Кемть-иля... Се недявомась ульнесь кизна. Аштем-кужодо а васоло. Од шка... Мезть а эрсить! Пеедькшнемат, згилямот, сёвномат, мик маштомас пачколить... Мельсэть Костюш? Аволь монь кондямоль... Сэреель. Прок од туминель. Редик, ледстнеса ютазь шкасо? Иешка уш, кода кирякстсь тынк Масторов. Иешка... Кренчведесь аволь тумо, пандояк сяворды. Шумбра, дёр цёра ульнесь, лангс ваномскак а берянель. Вант вана, ят ведесь пултызе, пурнызе-сэрнизе допрок [108] одсто. Вай, тунь стувтокшныя! Эчкургак уш тынк Масторсо. Оно кодамо мараля ульнесь. Эзь цидярдо сонгак.
Эчкур ды Костюш — комсь иесэ кавто маралят. А вана вановт путокшныть монь лангс. Мезе-мезе, лавтовсон пря шнамс а савкшны, аволь келейть. А карман седе тов сокарямо эсь «сюпавчисэнь», содасамак. Мелень витиця кодамо-бути товне муекшнить эйстэнь, а стяко ногодот пракшность монь пелев, а стяко айгекшнить Эчкур марто Костюшонь ве ёнов. Истя?
Мезень кис, алкукскак, вечкилимик? Сельмень, черень, турван кис?.. Эли а эрсить истят вечкемат? Эли, мекевланг, ансяк сынст эйстэ ушолеви те ёжось?
Сеедьстэ, ламодояк ламо ютазь иетнень лангс апак вано, те кевкстемась совси ды талай кирдевкшни сыре превсэнь. Совси, ансяк а содан, мезе меремс каршонзо.
Мезе ёвтат кевкстемам каршо?
Цят паро вес нурсинь столенть велькссэ. Арсинь, сёрмадынь те сёрманть; кой-мезть лият тешкстнииь-ваднинь конёвтнень ланга. Тевть... Стакалгадсь, марян, прям. Стомавинь. Пурнынь ве таркас конёвон. Мадинь. Кувать эзинь матедеве. Секскак валскестэнть талай эзинь стяво. Мик онс пачколинь.
...Совась удома тарказон од. келей лавтов, мерят Илья Муромец, цёра. Лангсонзо кувалт-кувалт якстере кикс марто ашо панар. Олгонь тюс кувака черензэ валанясто судрязь удалов. Цитнить. Сельмукшонзо пачк неявить салава пеедькшнемадонть кивчкаиця сельмензэ. Кедьсэнзэ койме недень сэрьсэ... карандаш! Артозь валдо-якстерестэ, лактонть мик цивтёрды. Сювозь пштидеяк пштистэ. Секень вант, лазоват. «Вай, тень косто саик?!» — тандадомадонть пижакадозь пшкадинь совицянтень. Мекс тандадынь — эзинь сода. «А максса, тонь ули истямо кедьёнксот», — мерсть каршон «сельмукштне». Чарькодинь: икелень аштесь од пингем. Сестэ мон алкукскак кандтнинь сельмукшт ды вечкилинь рисовамо... Ансяк лавтовтне... «Карандашось» келейстэ эскельдясь ды стясь сёрмадома столем ваксс; стясь ды кежейстэ варштась [109] лангозон, мик конязояк сормсевсь. Лыказевсть судонзо лангсо ласте аштиця суликинетне.
«Тон мекс сестэ, од цёракс... Тонеть ней вадря, вадря. Тон оно кодашка начальникекс теевить, оно зяро ломанть кедеть ало, — пеняцязь ушодсь скирямон лавтовсонзо тей-тов якавтыця «карандашось». — Эрят а беряньстэ. Оршнят оно кода, мерят бояр... Виянань вана... кадык, кода кадныть чопода вирьс эйкакшт, ды, мерть, ёмавтык, ильтик, седейкельмевкс. Тоначив. Содак: те пежетесь ойместэть мейсэяк ды зярдояк а шляви».
Од, комсешка иесэ, бурина цёрась ёвтынзе валонзо ды якстере карандашонзо марто ювк ваясь сеске теевезь тусто сувонть потс.
«Ужо, ужо, — серьгедиксэлинь мельганзо. — Ужо, ёвтнеса!» Серьгедиксэлинь, вайгель тень эзь таргаво, прок та-кодамо вий лепштизе кирьгапарем. Лиссь корсяня нурькине гайть: ы-ы-ы... Теде сыргозиньгак.
«Вай, те мень тамаша?» — вайкстазевинь лавшо, сорныця вайгельсэ ды арсезевинь, таркасонть кунст, сельмень конязь аштезь, онстон марязь тандавтниця валтнэде.
...Эрямось — чинек-венек керьксавиця эрьгень кувака-кувака керькс. Меельцекс суринентень тонгови раужо покш эрьге — кулома. Тевтне, кортамотне, ризкстнэ-мелявкстнэ, кеняркстнэ... шкань ютазь теевить кадовозекс, теевить чияконсекс, исяконсекс, улконсекс, теевить... раужо эрьгекс. Ютась чись — кулось, ютась иесь — кулось, явовсь, кадовсь удалов од шкат — сонгак кулось. Ды истя весе эрямось, пестэ пес, трокс-кувалт; весе сон ашти куломинестэ ды куломасто.
Ули мелеть, Вияна, кунсоломс «начальникекс» улемадон?
Видестэ ледстизе тень ононь цёрась, «од пингем»? «Виянань ёмавтык, ильтик, седейкельмевкс, Тоначив» — мерсь сон. Стака видькстамс, ды сави. Те, кадык аволь весе, виде. Эзить ванстово тень, ёмавтытинь.
А вана «начальниктенть» «карандаш» ялгась мерсь аламнеде а истя, манявсь. Истямокс араселинь. Зярдояк. Лия киява уцяскам эйсэнь ветнесь: тонавтницянь ды [110] тонавтыцянь. Тевесь аволь тень эйсэ, кикс-мезекс ульнинь. Седеем оймавты лиясь: кодамо а кодамо лезэ максынь раськем туртов, эрямонть стяконь тевсэ эзинь пулта, бажинь сонзэ — кода эсень, истя лиятненьгак — куш аламнеде, куш пелькань сэрьсэ ды вадрялгавтомс, теемс седе кенярксовокс. Мон пингем перть топавтынь вечкевикс, седеень витиця тевть. Лисинь, кода кортыть, ломанькс. Аволь покшке «бояркс». Ансяк аволь начальникекс.
Ней кадомадот. Седеяк — Тоначив ильтемадот.
Кадововлиньгак велес ды урьвакстовлиньгак, теевлитькак тень никс, истямокс, тонавтыцякс-мезекс, секень вант, аволинь карма. Сестэ кикс-мезекс? Содык азё ней! Превей машинатнененьгак а ловови. Совавтовлияяк прям колхозонь тевтнес, паряк, копорямо тонадовлинь, паряк, лиякс, паро ёнов велявтоволь эрямонок — кастовлинек мартот превей, тевень вечкиця, эсь превсэ эриця эйкакшт. Лован тень эрямосонть — башка кикстаса — весемеде питнейкс, эрявиксэкс, кенярксонь-лезэнь кандыцякс. Кадомс виев паро видьметь — каня ули седе эрявикс, седе шнавикс тей модамасторонть лангсо.
Тонь марто минек истя эзь лисе. Велем кадыя. Тонавтнемась тапардымим сисемень кирда. Сон увтинзе лия мельтнень-бажамотнень. Видькстан: сонзэ лангс, лисни, полавтыя... вечкемам. Тонь. Чумо те, аволь? Максьггинь лиянень? Ильтитинь, кода мерсь карандашось-цёрась, Тоначив?
Кода меремс... Ули, ули зяро-бути видечи неть валтнэсэяк. О-о-о... Кода весе човорявозь моданть лангсо! Превс а саеви. Лисни, монь бажамотне — тонавтнемс, содамс седе ламо, касомс превсэ-ёжосо — вечкемадон, вечкемань варматнеде виевельть? Лисни, истя. Чуман? Чуман. Кадытинь... Истяяк, Вияна, арсезеват: урекс вечкемаськак, мезде а весть кортнинек, парос а вети. Мезес пачкодевлинь, аволинь пецяяк тонавтнеме? Кода «аволинь», бути истямокс авам чачтымим? Мон — истяман... Тон, лиятне — лиятат... Ломантне а вейкеть, ков молят. Весе эрямось авейкетьксчистэ ашти.
Эрьва кодат арсемат сакшныть тень. Улевельгак, мерян, вечкеманок седе нардев, велень кадомась, арсян ней, [111] явоманок тувталокс аволь тееве. Самай ламо иешкань ютазь савлить монень ошов. Сеть шкатнестэ студенттнэстэ аволь ламот урьвакстнесть васенце иестэнть. Те ней... Савлить мельган, муевлинек эрямо таркине ды ушодовлинек вейсэнь эрямо. Мон тонавтневлинь, тон косояк важодевлить. Пургондаволь какиненек. Маряви тень, ёвтнемам ёвкс ёнов аламошкадо моли. Тон эйкакш марто аштевлить. Монь — студентэнь «стипешка». Эрямс кавтонень ве стипендия лангс — те стяконь кортамот. Стака. Ялатеке изнявольть, изнявольть неть стакачитнеяк! Кудосто кодамояк ды лезэ пачкодевель... Вечкемась минек, видькстама, аволь кевень ульнесь. Вана косо зыянось.
Вай, Верепаз, те мезде истя мон?! Мезть певердян стяконь валт... Мезесь ютась — ютась. Мекев а велявтсак, сельметь начтнемс а мезть. Весе минь — аволь ансяк мон ды тон — превейтяно шкадо мейле...
Мелеть, дугинем, топавтыя. Аволь умок якинь велев. Варштынь таштодояк ташто кудонк лангс, ды вельместь превсэнь сонзэ кузтемпесэ вастневематне, эземнесь, косо лавтовдо лавтовс нежедезь мартот аштекшнинек. Совсинь тынк пирес. Теке ведьс ваныть: «минек» ламаресь умок коськсь. Сень кис лиссь ундоксстонзо ды касы-кецни лия — седеяк мазый, рацяня ды виде комель, теке тон тундонь шкастот. Содавтыя, содавтыя чувтонок, иля мелявто. Кадык аволь сонсензэ. Тейтерензэ. Сюконинь тензэ. Якинь уш вензэ ланга. Совсесь превезэнь мартот ютавтозь умонь чокшнетнеде вейкесь.
...Пешксе ковось почолесь сиянь почт ды мизолдозь вансь лангозонок. Теде седеяк ашокс неявсть ламаренть цюцёвнензэ. Тештетне кенярдозь кончтнесть тенек. Элякалесь, пря шнась моросонзо, седеяк пек — валаня-ванькс вайгельсэнзэ, цёковось...
Истя ульнесь умок. Ней тон вакссон араселить. Эзь цёкордо, кода сестэ, ламо иеде икеле, цёковось. Монгак ульнинь умок уш аволь кевейксэе иесэ цёракс. Чуролгадозь черень а содангак зярдо вельтявсть ашосо. Мик сэншть мерить. Иетнеде оно зяро полавтовсть!
Ток-ток-ток... — токнозевсь сыре седеем пижестэ [112] оршазь чувтонть ваксс молемстэ. Текекс сон чавсь каштмолиця, коввалдодо пешксе умонь-умонь вестэнтькак. Эскельдинь ёжозонзо, кутмордыя, зярыя минутат эзинь маря, косан, мезе мартон, кинь кутморян. Превс сынь чинеденть. Шказо ульнесь аволь панжиков. Ламаресь лексесь кизэнь корсяня, виень раштый чинесэ. Аволь истя, кода сестэ. Араселить, тагояк ледстяса, тонгак, арасельть тонь кемгавксово иеть...
Явовинь вастневема тарканок марто пильгень илыкень маштозь. Паряк, корсяня чинеденть ирединь? Ледстнематнеде? Ковонь валдодонть? Таштазь иетнеде, паряк? Сыньгак, секень вант, эзть аште ве ёно. А содан.
Кода седе тов, Панянь калмамодо мейле, поладовсь эрямот? Ёвтнесак? Сёрмадт. Учан. Вант, карминдеряй стака, карминдеряй нувара ледстнематнеде сеедьстэ чавомо седееть, иля сёрмадо. А покордаван.
Масторланго, течис вечкицят Валдай. 2001-це иень умарьковонь 10-це чи.