Тесэ ды тосо (2013)/3
[20]
| * * * |
| Колмоце сёрмась |
Тоначив, Лемаень Виянанень, Валскень зорям туртов
Арневикс Вияна!
Иля талакадо. Мельцек-мельцек омбоце сёрма. Озынь стувором экшс ды сынь мельс поладомс ушодозь теде-тонадо кортнеманок. Ансяк кенерть: ловнок, арсек, сёрмадт.
Течи, Вияна, тонь марто минек нусманячинек: топодсь ниленьгемень вейке ие явомадонок мейле. Пинге. Ютасть прок минутат. А кемевияк! Кизэнь опаня, чопода се весь сеедьстэ содавтнесамам ютазь ламо шканть лангс апак вано.
Теке весемесь исяк ульнесь. Сы превзэнь — юты икельган педе-пес.
[21] Чикуншкадо мейле ушодовкшнось пиземе. Мольсь а кувать, ансяк поцердсь. Шкань-шкань кундсесь тевезэнзэ талай чокшнеяк. Пиземель, ялатеке лембель. Велесь лушсо удось. Ансяк Делюнонь, каршонок кудонь, мокшнашка пондакш кискинест дильниця човине вайгельсэнзэ шкань-шкань колсесь вень летьке општонть.
Пиземеденть ды рудаздонть киштема кужос кияк эзь са. Вастовинек — кадык каладсь менелесь! — тынк вальмало. Озынек кузтемпес. Лавтовдо лавтовс нежедезь аштинек ветькссэнек латонть ало, кунсолынек каштмолеманть, пиненть, менеленть начко моронзо, кортнинек икелепелень эрямодонок, теде-тонадо. Явомадо арасель валгак. Сы, кеминек, вандынь чись, сы мельганзо чокшнесь, ды таго вастовтано те таркасонть. Истя арсезь, кутмордытинь, варштынь, комавтыя прям, кенярксто пешксе сельмезэть.
«Вандыс...» — прядык тон сестэ кортнеманок ды пеедькшнезь, эрязасто, теке чомболкс, стить таркастот. Юрк арыть кутьмере ёндо кузтемпень кенкшенть ёжос.
«Вандыс, Вияна...» — тошказь пшкадинь мельгат веркасто стямстон. Арынь каршот. Путынь кедень лавтовот лангс ды палытинь, кода тетя тейтерензэ, прякасмос. Пининесь таго онгозевсь. «Эрьванть эсензэ мелявксонзо...» — арсезевинь ды теке басом псистэ-псистэ палытинь турвас.
«Вандыс...» — тошказь мерить омбоцеде ды кутьмерьсэть панжик кенкшенть.
Кавтолдомань челькинеяк эзь совсе превезэнь: тон, пезеря сэтьме пиземесь ды мон вастовинек меельцеде, те ульнесь минек меельце чокшненек, меельцеде ванынек сельмеде сельмс, меельцеде палынек. Превскак эзь совсе: ули ушодкс ды ули пе. А содави, яла мерить, вандынь чись Пазонтень, седеяк а содави ломанентень.
Пиземесь лоткась. Сизесь. Вальмакс панжовсть тустосэнь пельтне, ды варштась лангозонок ансяк чачозь ковось — ламонь содыцясь. Кунсолось од, ванькс вановт вень ванстыцясь ды мерят кевкстнесь: «Лездыцякс тенк а маштован? Пшкадеде».
Тон кепедик прят, варштыть васолдонь кевкстницянть [22] чамас, ды сельмсэть кувтолк кивчкадсть сиянь тешкскеть.
Вандыс...
Вандыс...
...Арась, эзь учово се шкась, эзь са. Вандынь валскестэнть котомкинем марто ульнинь Калинин лемсэ колхозонь ветямкудонть-правлениянть икеле. Кинть чирева тей-тов «нузякссто» яксезь, учинь машина. Станцияв молемадонзо карминь содамо валске марто. Сон, содынь, сайсамам тов, кува юты кшнинь ки. Те кияванть ардтнить, свал тень марявсь, седеяк пек — школань меельце классон прядомсто, пайстомочинь а содыця, мизолдыця курго ломанть; ардыть сынь, кирдевсь превсэнь, валдодо пешксе уцяскань масторов, тов, косо а содасызь «сельведь» валонть.
Чарынь-велинь колхозонь вейсэнь кудонть икельга ды кортнинь эсь пачкан тонь марто. Ледстнинь ковонь валдодо пешксе сельметь, мазый турват, мештеть ланга нолдазь эчке, кувака пулот, вельмекшнесь пилесэнь эчкела, гайгиця, меште потсто лисиця вайгелеть...
Учинь.
Учинь машина.
Учинь тонь. Куш содынь — а сат. Мекс, тонсь содат. Минек од шкастонок, аволь кода ней, вечкицятне вечкемаст весенень эзть невтне. Сон ульнесь ансяк сынст. Мезекс сравтнемс пирявкс прява? Кекшнезьгак кулятнень сёлмост сезьганонь. Чинь куншкане самс тейтерентень алужонзо ильтеме — визькс тев. Кортавтоматне сеске ливтнезь туить. Весе велесь карми содамо. Виде теяк: туемадон а содылить.
Мон сестэ. Вияна, туинь велестэнть апак учо. Монськак эзинь сода. Секс чокшне эзинь кортаяк теде. Янксян. Кода-бути а мазыйстэ, а оякс лисекшнесь.
Окойники учовсь машинанок. Уцор-уцор кузинь котомкинем марто кузовантень. Ильтицян — конторань лато марто сэрей кузтемпесь ды каршонзо келей лопа од тополесь. Варштынь меельцеде лангозост ды курок уш. прок варма салымим, ульнинь веленек томбале. Раужола [23] эрьгекерькезкс неявсть тень аволь сэрей, вандора пандонть чамава пезнавтнезь кудотне. Ильтиця ломанекс ахолдась тень келей сёлмосонзо чувтонь сыре ведькевесь, ды чачома-ванома лавсем, Орданьбуем, ёмась сельмень икельде. Кадовить тозонь тон, вечкемам, кадовсть эрькень сэншть сельметь, гулькакс кулдордыця вайгелеть. Кадовсь ламаренек...
Чамаван, судом вакска, мария, састыне кеверсть сельведень зярыя лембине байгинеть. Седеем нурьгатотсь. Совась эйзэнзэ нусманячи. Пачкодян-арась зярдояк мекев? Ветясамизь-арась китне мекев эйкакшпингень, кадык се аволь шождынель, келей, валдо, кенярксто пешксе Масторозон? Савить-арась, вечкевиксэм, неемс чамаумарьсэть яндавинетнень?
Нармунтне, марсинь, аволь весе сакшныть-велявтнить чачома пизэзэст. Аволь. Саван-арась мон? Кие ёвты?
Истя явовинек мартот, Вияна...
Теньсэ прядсаяк течинь сёрмам. Чинь-кавтонь ютазь учок поладкс.
Умонь оят Учаень Валдай. Масторланго, 1999-це иень якшамковонь 2-це чи.