Тима Веньлы письмӧ (1923)
Олан-вылан, Вениамин Тимофеевич!
Тэнад гижӧдторйыд воӧма менам ветлігкості. Ме ветлі Казаньӧ да Москваӧ. Муні карысь сентябрь 4 лунӧ, вои октябрь 21 лунӧ. Казаньын вӧлі асыввывса национальностьяслысь неграмотность бырӧдӧм кузя краевӧй методическӧй конференция. Сэні ёнджыка сёрнитісны методъяс йылысь, кутшӧм кывйӧн велӧдны (шуисны — чужан кывйӧн), кутшӧм пособиеяс лӧсьӧдны. Букваръяс пӧ колӧ лӧсьӧдны быдса кывъяс метод серти, йитны политика вопросъяс йӧзыслӧн оласногкӧд. Тшӧктісны 1925 во кежлӧ выль букварь лӧсьӧдны. Тӧдмаси мукӧд йӧз пӧвстын уджалысьяскӧд, Михеевкӧд тшӧтш (не роч школаяслы пӧ тай учебникъяс гижавлӧма). Медбура уджыс вӧлӧм мунӧ марилӧн. Налӧн литератураыс уна нин эм. Велӧдӧны асланыс кыв вылын ичӧт школаын, шӧр школаын да и техникумъясын. Миянлы ёна на лоӧ велӧдчыны.
Казаньсянь муні Москваӧ. Сэні видлалі выставка. Ёна жӧ бур выставкаыс! Позьӧ сэн ёна велӧдчыны, тӧдмасьны став йӧзъяслӧн олӧмӧн, уджӧн, сӧмын колӧ тӧлысь овны. Ме ветлі кӧкъямыс лун да ставсӧ видзӧдлыны эг удит, кысь нин эськӧ тӧдмасьны (изучитны). Тима Сердитов выставка вылас висьтавлысьӧн вӧлі. Олӧны найӧ Надеевкӧд, Лыткинкӧд ӧтлаын. Оланіныс омӧль, гу (пӧдвал), пемыд (лун и вой электричество ӧзйӧ). Надеев пырис велӧдчыны Наркомпрослӧн организаторъясӧс велӧдан институтӧ. Зырцебюроас уджалӧмысь дугӧдчӧ. Колӧ сетны сэтчӧ мортӧс да некодӧс ыстыныыс. Абу-ӧ кодкӧ тэнад дум вылад?
Ме пӧв-мӧдысь тшӧктылі тэныд вӧчны аслад гижӧдъясысь сборник да тэ нинӧм сы йылысь он висьтав. Вӧчан он нӧ? Войдӧр колӧ эськӧ кӧть кывбуръяслӧн сборник. Сэсся вӧчам Ионалысь да Вась Педӧрлысь сборникъяс. Ионалӧн эмӧсь тэ ордын кывбуръяс (тетрадь), сійӧс ысты миянлы. Сэсся ысты сылысь, Вась Педӧрлысь да ассьыд ӧтка карточкаяс, колӧ клишеяс вӧчӧдны. Карточкаясыс эськӧ мед бурджыкӧсь.
Конференция вылӧ тэнӧ ёна виччысим. Тэ понда весиг нюжӧдчылім. Конференцияыслысь шуӧмъяссӧ печатайтам стеклограф вылын да мӧдӧдам тэныд. Шуим лэдзны быд тӧлысь «Парма ёль» да ӧні сьӧмным абу. Обоносянь уна воӧ, да сылӧн сьӧмыс абу, оз вермы вештысьныыс.
Маегов да Молодцов Кавказынӧсь, лечитчӧны. Ирина Игнатова олӧ миян ордын. Кабаланад да мый да, дерт, сылы отсавны понда.
Ыстам выль книгаяс.
Оз-ӧ позь тэныд тӧв кежлас уджавны волыны? Уджалысьыс, редактор, ёна колӧ. Чеусова век лӧсьӧдчӧ мунны.
Видза колян — Н. Шахов.
Мыйсюрӧ зэв уна кывбур ыстіс миянлы Павел Вась Коля *. Гижныыс сійӧ оз на куж, а окотаыс, тыдалӧ, эм. Тэ корлы сылысь гижӧдъяссӧ да велӧд сійӧс гижнысӧ, туйдӧд мортсӧ.
Н. Ш. І /ХІ – 23.
Ыстынысӧ дыр эг вермы: пошта вӧлі оз ветлы. Книгаяс ыстам. Тэнад письмӧыд, кодӧс гижӧмыд сентябрын, воис неважӧн. Удж бур (гижа мӧдысь). Коми кывлы восьтім паськыд туй учреждениеясӧ.
23/ХІ – 23. Н. Шахов.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
This work is in the public domain in the United States because it was published before January 1, 1929 (more than 95 years ago).
The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 100 years or less since publication (if applicable).
Public domainPublic domainfalsefalse