Тулыс (Попов Дмитрий Яковлевич)
Кӧнсюрӧ кылалӧ на наридз,
Лым сылӧма нин, гӧгӧр куш,
А Эжва туӧма — дзонь саридз,
Ва кузя быг быттьӧ понпуш.
Рыт-асыв усьӧ небыд зэр,
Му горша юӧ шоныд ва;
Гож водзын турун петӧ нэр
Да этша, пӧтас ыж ӧдва.
Ныв-баба путкылялӧ куйӧд,
Гӧр-пиня лӧсьӧдӧ нин гӧрысь.
Ок, тӧвся мустӧм нин юрсюйӧд:
Гож водзын вугыртӧ пӧль пӧрысь.
Быд лудын челядь шӧйтӧ, ворсӧ,
И налы пӧсь нин — кӧм ни гач!
Код усьӧ, доймӧ, чеччӧ, горзӧ,
И вылӧ качлӧ тэрыб мач.
|
This work was published before January 1, 1929, and is in the public domain worldwide because the author died at least 100 years ago. |