Туно (Герд)
| Туно Автор: Кузебай Герд |
| Поттэмын: 1920. Источник: Куӟебай Герд. Люкам сочинениос : куать томен / Люказ Ф. К. Ермаков. — Ижевск: Удмуртия, 2004. — Т. 3. — Б. 50—62. |
| Mapпа — пересь кышномурт. |
| Катерна — 16 арес ныл | Марпалэн пиналъёсыз. | |
| Лёва — 11 арес пи |
| Марья — Марпалэн кенэз. |
| Огафья | кышноос. | |
| Домна |
| Гириш — 12 арес дышетскись пи. |
| Туно — пересь кышномурт. |
| Надежда Миколаевна — пинал дышетӥсь. |
Марпа. Map уд сиськиськы, весь куректыса пукиськод? Асьмелэсь гинэ ӧз басьтэ ук солдатэ: гуртын одӥг корка но ӧз кыль ни, вань пиос солдатэ басьтэмын. Вань гуртысь калык куректэ… Сиськы ӧжыт ке но. Весь куректыса, бамыд дэра кадь кӧсэктӥз ук ини, укыр весь озьы, пе, дугдылтэк куректод-а?
Марья. Ой, мемеймы… Туж кема иворез ӧвӧл ни ук Лёгормылэн. Оломарлы сюлмы шугектэ. Кызьы ке но мар ке луиз, дыр. (Бӧрдэ.)
Марпа. Озьы ваньмы бӧрдны, куректыны ке кутким, умой луоз-а? Лёгор мыным но мурт ӧвӧл ук: аслам вордэм пие. Мон но туж куректӥсько но — чидасько. Map карод?
Катерна. Анай, кылзы али. Толон асьме гуртэ Куреггуртысь туно лыктэм. Картаен туж усто тунаны быгатэ, шуо. Оломар мында со доры калык ветлэ. Асьмелы но, со доры ветлыса, Лёгорез тунаса утчаны кулэ вылэм.
Марья. Зэмзэ ик (чын ик) ветлыны кулэ вылэм, мемеймы (анаймы)! Оло, мар ке но туно верасал. Эсьмаса, сюлэм ӧй шугъяськысал ни.
Марпа. Вераз, вераз толон Дарья кумае, туж умой быгатэ тунаны, котьмае но тодэ шуса.
Катерна. Умойтэм котьмае тодэ, шуо. Карта вылаз учкыса, киньга вылысь лыдӟем (чирдэм) кадь вера, шуо. Ветлыны кулэ вылэм со доры, анай!
Марпа. Ветлоно, ветлоно…
Марья. Оло, сокем сюлмы но уз шугъяськы ни. Таки амалы ик ӧвӧл ни: иземе но, сиеме уг лу ни… Сюлэм висе…
Лёва. Анай, городъёсын пиналъёсыз но, пе, солдатлы басьто ини шуса верало: пыӵалъёс сёткаса, дышетыса войнае, пе, жугиськыны лэзьяло. Тон но монэ лэзь вал, анай: мон, отысь тӧдьыосыз виса куштыса, Лёгорез шедьтысал. Зэмзэ ик лэзь монэ, анай!
Катерна. Йӧспӧртэм, нош ик куткиз сапальтыны! Тонтэк отын тӧдьыосыз уз ик ворме кожаськод, лэся.
Лёва. Мон со шайтанъёслы возьматсал! Соку ик йырзэс кораса быдтысал, сэбре штыкен отчы донгасал…
Дышетӥсь (ӧсэтӥ пыре). Ӟеч-а улӥськоды?
Марпа. Пуксьы али. Улонэз эн вера. Куректыса ик кулӥськом ини…
Дышетӥсь. Нош тон, Лёва, кызьы улӥськод? (Лёвалэсь йырзэ маялля.) Марлы-о школае ветлэмысь дугдӥд? Уд тод ни ук.
Марпа. Тӥни ук, Надежда Миколаевна, Лёватэк милям нокин ужасьмы ик уг кыль ни. Со милемлы юрттэ: со куддыр тэльысь пу но вае, пудо но сюдэ. Котьмар шу но, ми кышномурт бере кышномурт ини. Со, пичи ке но, пиосмурт.
Дышетӥсь. Молодец тон, Лёва. Зэмзэ ик воргорон кадь уга ини тон. Только дышеткыны ветлы, эн вунэты. Марпа, тон сое ӝытазе ке но мон доры лэзья, мон ӝытазе но сое дышето: туж вала со.
Марпа. Тау сюлмаськемедлы. Ойдо мед ветлоз тон доры: ӝытазе ужез уг луы.
Дышетӥсь. Ветлы, ява, иське, Лёва. Эшъёстэ сутом. Соос кыдёке вуизы ини.
Марпа. Мар-о кылӥське али та война сярысь?
Дышетӥсь. Асьмелэн ужъёсмы умой мыно шуса, газетын толон гожъямын вал.
Марпа. Ойдо инмар мед юрттоз вал ини со тӧдьыосыз вормыны. Соосыз ке быдтӥм, оло, улонмы но каньылгес луоз… Оломар али милям Лёгормылэн туж кемалась одӥг гожтэтэз но ӧвӧл ни. Олокытчы бырны ӧз сюр меда? (Бӧрдэ.)
Дышетӥсь. Ойдо эн куректы, Марпа. Оло, берыткоз али Лёгор.
Марпа. Куасьмим ук ини ми, весь малпаськыса, уйбыт куректыса.
Дышетӥсь. Ойдо эн бӧрдэ. Сокем куректонэ, пе, усёд-а? Бӧрдса куректондэ уд быдты ук. Чиданы кулэ. Туэ вань калыклэн улонэз шугомиз уга ини. Оло, сэбре, ӧжыт улса, каньыл улон но вуоз.
Марпа. Зэм вераськод. Ваньзэ тодэ инмар.
Дышетӥсь. Нош тон, Лёва, мар-о война сярысь малпаськиськод?
Катерна. Эн вераськы! Со умойтэм весь войнае мынны турттыса куриське. Тӧдьыосыз виса быдто, шуэ.
Дышетӥсь. Со номырлэсь кышкасьтэм уга… Войнаез тонтэк но… луоз быдтэмзы. Тон татын, эсьмаса, анаедлы юртты. Дышеткод. Татысь школаез быдтӥд ке, мон тонэ городэ нуо дышеткыны.
Лёва. Нош кыӵе-о учильшаын мон городын дышетко?
Дышетӥсь. Татын гинэ дышеткы. Городын школаос тырос, шедьто дышеткон инты.
Лёва. Та Лёгор чаляк (ӝог) мед берыткоз вал ини.
Марпа. Инмар тодэ: оло берыткоз на со, оло уз ни? Тунаськоно шуса малпаськом али, Надежда Миколаевна. Умойтэм усто туно толон гуртамы лыктэм — туж усто туна, шуо.
Дышетӥсь. Тунам, пе! Туноослы, пе, оскод-а? Ӧрекчало гинэ тӥледыз оломар пыдйыл калыкъёс, тӥлесьтыд берпум уксёдэс окто.
Марпа. Эн вераськы, Надежда Миколаевна. Дунне вылын вань сыӵе адямиос: котьмае тодо — азьланьзэ но, ортчемзэ но.
Дышетӥсь. Ортчемзэ асьмеос туноостэк но тодӥськом. Тодӥськом ук асьмеос, ку война куткиз. Ку война дугдоз — нокин но сойзэ уг тоды. Тӥляд туноосты азьланьзэ верало ке — ӧрекчасько соос.
Катерна. Кызьы-о озьы сэбре, Миколаевна: вашкала тырысен ик тунаськыса улэмын ук — туноос весь ӧрекчаськизы кожаськод-а, мар-а?
Дышетӥсь. Веранэз ӧвӧл — ӧрекчаськизы.
Марпа. Эн ик вераськы, Миколаевна. Вань дунне вылын сыӵе адямиос: тунаса вань улэм-вылэмдэ вералозы.
Дышетӥсь. Вераллям! Вить пол ӧрекчалозы, одӥг пол гинэ шонер вераны шедьтозы. Али мон тынысьтыд юало. Кудӥз-о пельы та виын мынам жонгетэ? Тон шуод «бурыз». Зэмзэ ик мынам бур пельы жонгетэ но — тон сое тодтэк верад ук. Озьы тодтэк, оло, шонер вераны шедьто шуса, тӥляд туноды но вераське.
Катерна. Ойдо, иське, Миколаевна, уд оскиськы ке, ми сьӧры тунаськыны. Адӟод ук али — со ваньзэ шонер вералоз.
Дышетӥсь. Адӟо солэсь ӧрекчаськыны (пӧяны) быгатэмзэ.
Марпа. Зэмзэ ик, ойдо ми сьӧры, тунаськод, оло, тон но.
Дышетӥсь. Ма, ойдолэ, иське. Тӥ только тырос эн вераське: тӥ понна мон верасько. Сое ӧрекчаны кутки ке, эн серекъялэ, чал-чал пуке. Вае мыным кышет. (Катерна сётэ кышет. Дышетӥсь керттэ. Лёва серекъя.) Мар-о, Лёва, чебер-а?
Лёва (серекъяса). Серекъяно кадь. Дышетӥсьлы ик уд тупаськы ни, крестьян кышно кадь.
Дышетӥсь. Туннэ, иське, асьмеос пӧртмаськыса ветлом.
Лёва. Зэмзэ ик, пӧртмаськыса манер. Ха-ха-ха! (Серекъяло ваньзы.)
Дышетӥсь. Тӥни ук, мон тӥледыз кыӵе шулдыртӥ. Чик юнме весь пуксалды, Лёгор котыр куректыса. Я, ойдолэ туно доры. Соин тырос эн вераське: мон тӥ интые верасько…
Катерна. Яралоз, яралоз.
Дышетӥсь. Тон, Лёва, ми ветлытозь, киньгадэ лыдӟы вал. Сэбре, анайёсыд бертэм бере, мон доры лыкты.
Гириш (пыре). Лёва, ойдо войнае. Пиналъёс ваньзы Исьпирдонлэн итымаз кошкизы. Отын война каром. Ойдо чаляк (ӝог), Лёва.
Лёва. Нош асьмелэн командирмы кин луоз?
Гириш. Тӧдьыос луэмез нокинлэн но уг поты. Пус куштыса, Эртэмей Педорлы усиз асьме командир луны. Лёвантей Педорлы усиз тӧдьыослэн командирзы луны.
Лёва. Ой, Эртэмей Педор кышкась! Уз быгаты. Адӟоды ук али, тӧдьыос асьмемыз вормозы.
Гириш. Я ойдо, мынод ке, Лёва. (Книгазэ кыске киысьтыз.) Мар-о весь киньгадэ учкиськод? Ойдо чаляк (ӝог)!
Лёва. Эн иса, Гириш, уг мыны мон: дорамы нокин но ӧвӧл, тунаськыны кошкизы. Миколаевна но соос сьӧры кошкиз…
Гириш. Кытчы-о? Кырныж Васьлейлэн корказ улэ уга пересь кышно, со доры-а?
Лёва. О-о, со доры кошкизы.
Гириш. Туж усто быгатэ, шуо, со тунаны. Иван Мавралы чиста ваньзэ шонер верам.
Лёва. Ӧрекчаське (пӧяське) со, Гириш. Кышноослэсь гинэ уксёзэс сузя.
Гириш. Нош марлы-о туноос котьмае тодо, шуо?
Лёва. Чик юнме сапальто. Инмар сяна, кин-о, пе, тодэм мар луэмез.
Гириш. Нош марлы-о кудӥз тодэ?
Лёва. Вить пол ӧрекчалоз, одӥг пол шонер вераны шедьтоз. Вера, а кудӥз мынам та виын пельы жонгетэ? Тон шуод «бурыз». Зэмзэ ик, мынам бур пельы жонгетэ но, тон сое тодтэк верад ук. Озьы тодтэк, оло, шонер вераны шедьто шуса, туно но вераське.
Гириш. Оло, сэбре зэмзэ ик, Лёва, ӧрекчасько туноос, тон верам сеен?
Лёва. Веранэз ӧвӧл, ӧрекчасько, уксёез гинэ басьтон понна. Тани милям мар мында уксё быдтӥзы ини сыӵе чутыриослы! Эсьмаса, мар ке мед басьтозы вал. Туно, ӧрекчаськыса шедьтэм уксёеныз чечы басьтыса, чай юэ, дыр, асьмеос кӧсын но сюпкетӥськом.
Гириш. Зэм, Лёва. Ойдо со туноез уллялом!
Лёва. Зэмзэ ик, улляны кулэ сое гуртысь.
Гириш. Ойдо, ойдо! Мар-о пукиськод?
Лёва. Нош корка ворсатэк кылёз ук. Анай тышкаськоз.
Гириш. Ойдо ворсаны (пуньяны) замок шедьтом.
Лёва. Ойдо, иське, лобатом со ӧрекчи бигерез.
Туно (Огафьялы). Туж умой верало тыныд картаос. Тани оломар шумпотон тыныд войнаысь вуоз.
Огафья. Нош чаль вуоз-а ни, песяй, со ивор?
Туно. Чаль вуоз ини, чаль, нуные, ог витёй ӵоже возьма, табре берт ни.
Огафья. Тау, иське, тунамед понна. Бертса пудо сюдоно вал, искал но кыскымтэ на.
Домна. Табере, песяй, мыным туна ини! Солдатэ кошкиз, иворез ӧвӧл.
Туно. Карт луоз-а со тыныд?
Домна. Картэ вал, картэ. (Бӧрдэ.)
Туно. Картъёс сярысь укыр шуг тунаны.
Домна. Малы озьы?
Туно. Секыт, туж шуг картъёсыз тунаны. Пиосыз каньылгем. Полтинник сылоз. Талэсь дунтэм нокызьы уз луы.
Домна. Ой, чик ӧвӧл ук мынам со мында уксёе, одӥг дас копейка сяна. Улонме туж начар улӥсько: пиналъёс сюдон тырос, нянь басьтоно луэ. Жаля вал, песяй, туна дас коньыен!
Туно. Начар улэмед понна, иське, витьсэ кушто, дас вить коньыен тунало.
Домна. Мар-о каром али сэбре? Чик, дас коньы сяна, уксёе ӧвӧл ни — шунды понна! Я, ойдо дасэн туна ини!
Туно. Оло, тынад сэбре етӥнэд вань? Етӥн ваёд ини.
Домна. Вань, вань! Ӝытазе ваё ини.
Туно. Кыӵе-о тынад картэд, сьӧд-а, горд-а?
Домна. Тӧдьы, гордалэс йырсиё со.
Туно. Я, иське, тунало… (Картазэ тыре.) Ну, нуные, шумпот, туж умой улэ тынад картэд! Тани кыӵе умой возьматэ карта, талэсь умой кулэ ӧвӧл.
Домна. Осто, Инмаре, сюлмы ик каньыл луиз! Тау тыныд, песяй, только вера вал, марлы туж кема ӧвӧл солэн иворез?
Туно. Дугды али, тайзэ но туналом. (Картазэ тыре.) Э-э, ма, гожтэтъёсыз сюрес вылын ышиллям: ог вить нуналъёс возьма, вуоз ини шумпотон ивор.
Домна. Нош дэремъёсыз но вань на-а меда солэн сьӧраз нуэмез?
Туно. Тайзэ но тодом. Дэремъёсыз сярысь но туналом. Кыӵе-о вал, гордэсь-а, пужыесь-а?
Домна. Одӥгез горд, одӥгез пужыё вал.
Туно (картазэ тыре). Умоесь на али дэремъёсыз, нуллоз али. Учкали, берыткоз картэд, тырос уксё ваёз.
Домна. Кытысь уксё ваёз, ачиз но ёрмыса улэ, дыр, ук?
Туно. Кытысь-о, войнаын котьку луэ уксё поттыны. Я, мын ини, возьма картэдлэсь иворзэ.
Домна (дас коньы ӝӧк вылэ поныса). Нош ку-о берыткоз дорамы?
Туно. Верамелэсь уно картае номыр уз вера ни. Соослы но ӧжыт ӵыдэткыны кулэ. Тани етӥндэ ке ваид, соку ваньзэ тодод.
Домна. Я, ӟеч лу, иське, пересь, тау ӟеч шумпотон кыл верамедлы! Гуре эстӥськыса кылем вал али. Пиналъёс но оломар медаз турттэ, кема ӧвӧл.
Туно. Мын-мын, етӥндэ гинэ вайны эн вунэты.
Домна. Ваё, ваё, эн кышка!
Туно (огназ). Тусьтыям пень поно али. Таки кышноос ӧрекчамез но уг валало. Пеллян вуме пожасько но, зэм ик Германь пожа кожало.
Дышетӥсь. Ӟеч-а, песяй?
Марпа. Ӟеч-а?
Туно. Умой, умой, гажанъёсы, мар-о, тунаськыны лыктӥды-а?
Дышетӥсь. Тунаны, песяй, тунаны!
Туно. Та гуртысь ик луоды-а, оло, сэбре кытысь ке кыдёкысь луоды-а?
Дышетӥсь. Ӧвӧл, тани таиз (Марья шоры возьматэ) Куректонгуртысь, таиз (Марпаез) Сюлмогуртысь.
Туно. Нош кыдёкын-а со гуртъёс луозы?
Дышетӥсь. Ог дасо иськем луоз, дыр. Укыр усто тон тунаськыны быгатӥськод шуса кылӥм но лыктӥм тон доры пудэн.
Туно (дышетӥсьлы). Нош тон ачид кытысь?
Дышетӥсь. Мон-а? Мон Ӧрекчигуртысь, татысь ӧвӧл.
Туно. Солдатка, дыр?
Дышетӥсь (бӧрдэм кадь кариське). Солдатка, песяй, солдатка!
Туно. Ойдо эн куректы, оло, сэбре тунаса мар ке шумпотон усёз!
Дышетӥсь. Туна али, туна! Туж умой быгатӥськод шуса верало тонэ.
Туно. Сойзэ эн малпа, мон кадь устоез татӥ котыр ненокин но ӧвӧл. Мон мар ке верасько ке, со ик луоз. Мон уг ӧрекчаськиськы. Вань кудӥз, ӧрекчаны но турттэ, мон уг. Пуксе, гажанъёсы!
Туно (Марпалы). Азьло тыныд тунало. Кӧня-о сётод тунаме понна?
Марпа. Одӥг петаке сяна ӧвӧл. Берпумзэ кызь вить коньыме толон пызь басьтыны быдтӥ.
Туно. Петаклы уг туна. Котьмар кар, дас витьлэсь ултӥ уз лу.
Марпа. Ма, сэбре кытысь-о мон шедьтом дас коньы-о?
Туно. Кинэ-о туналод?
Дышетӥсь. Солдат сярысь. Солэн пиез, Лёгор нимо мар ке, солдатын улэ.
Туно. Солдат сярысь дас коньылэсь ултӥ уг туна.
Катерна. Нош толон тон, песяй, Мавралы вить коньыен тунад ук лушкаськись сярысь.
Туно. Ма, соиз вор сярысь вал ук.
Дышетӥсь. Мар-о, одӥг кадь ӧвӧл-а тунаны коть вор сярысь, коть солдат сярысь?
Туно. То-то одӥг кадь ӧвӧл.
Дышетӥсь. Нош марлы-о, песяй, озьы?
Туно. Соин. Солдатъёс сярысь туж шуг тунаны.
Дышетӥсь. Нош марлы-о шуг?
Туно. Соин шуг: Германь олокызьы но мешать каре. Солдатъёс сярысь тунаны куткиськод ке, оломаин ӵын кадь вуэз кыске. Пелляны уг луы ни.
Дышетӥсь. Уть, кыӵе мастер Германь, о-о-о (серекъя), нош тон Германьлэсь но ӧрекчаськыны усто, лэся?
Марпа. Я, туна ини, иське, вить коньылы уг сылы, берло лыктыкум ваё.
Туно. Ваёд-а меда?
Дышетӥсь. Ваёз, ваёз, со ӧрекчи ӧвӧл.
Туно. Я, иське, кутком тунатыны. Кыӵе-о вал Лёгоред?
Дышетӥсь. Мон тодӥсько солэсь Лёгорзэ, тӧдьы но ӧвӧл, пурысь но ӧвӧл сыӵе.
Туно. Иське, гордалэс черви карта поном. (Тыре.) Уй, умойтэм чебер тыныд усиз! Лёгоред Лёгор нунал дыръя дорад берыткоз. Тани та десятка оломар шумпотон вае.
Дышетӥсь. Зэм ик, лэся, ук.
Марпа. Тау, песяй, сюлмы ик каньыл луиз.
Туно. Тау на, нуные. Верасько ук мон, Неньла песяй тодтэк уз вера шуса. Одӥг кыл но ӧрекчаса уг вераськы. Соин мон доры трос калык ветлэ.
Дышетӥсь (серекъя). Ма, ветлытэк, тон усто уга.
Катерна. Я, табре мыным братэ сярысь туна ини. Чаляк войнаысь берыткоз-а ини?
Туно. Дас вить коньы сылэ, дыды, тунаськонэ.
Дышетӥсь. Мар-о, кыӵе-о сыӵе, песяй? Пизэ — дасэн, братсэ — дас витен. Одӥг кадь, дыр, ук?
Туно. Одӥг кадь ӧвӧл. Анайёслы мон ӧжыт дунтэмгем. Пидэ будэтса войнае лэзид ке, соку тунало.
Дышетӥсь. Нош апае сярысь тунай ке, одӥг-а луоз дуныз?
Туно. Коть вындэ, коть сузэрдэ — дуныз одӥг.
Дышетӥсь. Нокӧня но уд усьы-а?
Катерна. Я, ӵок ини, басьты, песяй, дас вить, только ваньзэ вера, эн ӧрекча.
Туно. Верасько ук мон тыныд, Неньла песяй уз ӧрекча шуса. Кыӵе-о агаед?
Дышетӥсь. Горд, мон сое тырос адӟи.
Туно. Нош ик червиез куштом. (Тыре.) Ну, дыдые. Агаед улэп на, пленэ сюремын, только эн куректы, тани таиз сюрес возьматэ, бертоз, дыр, дораз. Егит на вылэм агаед.
Дышетӥсь. Ма, паймоно кадь ук. Ваньзэ та Неньла песяй зэм вера.
Марья. Табере мыным туна ини, песяй.
Туно. Кин-о сярысь туналод? Картэд, дыр?
Марья. Картэ. Кема гожтэтэз ӧвӧл ни. (Бӧрдэ.)
Туно. Дас вить коньылэсь ултӥ уг туна.
Дышетӥсь. Ойдо солы дасэн но луоз: со ёрмыса, начар улэ.
Туно. Мон но узыр ӧвӧл, нуные, ужасько пайдатэк, шалтай-балтай карса уг лу, капчи уж ӧвӧл та.
Дышетӥсь. Ма, шуг, дыр, о-о-о, песяй?
Туно. Умойтэм шуг, нуные. Ваньмыз тунаны но уг тоды уга.
Дышетӥсь. Ма, мар веранэз ини, кин котькудӥз сое тодоз? Ми тани ум быгатӥське. Оломарлы но визьмо калык дыше ук. (Серекъя.)
Марья. Ойдо туна ини, уксёлы уг сылы. Зэмзэ гинэ вера.
Дышетӥсь. Мар-о уд оскиськы. Неньла песяй ноку но уг ӧрекчаськы уга. (Ас понназ серекъя.)
Туно. Эн ик вераськы, татын умойтэм калык. Верам кылыдлы одӥг нунал сяна уг оско.
Дышетӥсь. Сыӵе, сыӵе татын калык, неномырлы уг оско.
Туно. Кыӵе-о картэд вал?
Дышетӥсь. Гордалэс вал, дыр. Со Лёгор кадь ик вал.
Туно. Иське, червиез нош ик поттом. (Туна.) Э-э-э, нуные, начар вал ужед но — табре умой луоз ини. Ӧлексы луны сюрем, лазаретын кылле но — йӧнам ини. Бертоз. Тани учкы, вини десятка бусые кошке, бубни солы сюрес возьматэ.
Дышетӥсь. Ма, паймон тон котырын ук, о-о, Неньла песяй. Киньга вылысь чирдэм сеен вера.
Туно. Кинлы туналом на? Тынад черодэд, лэся?
Дышетӥсь. Зэм ик, мынам черодэ.
Туно. Кызьы-о тыныд туналом, картаен-а, венен-а, вуэн-а?
Дышетӥсь. Вуэн туна, песяй, яралоз.
Туно. Уй, вуэн туэ шуг тунаны! Чиста Германь олокызьы пож каре, номыр уг адкы ни.
Дышетӥсь. Ойдо соиз умой, песяй, пож вуэн ӧрекчаськыны каньылгем.
Туно. Map вераськод? Оломар ӧй кылы.
Дышетӥсь. Германь озьы пожа, дыр, шуко. Туна ойдо.
Туно (вуэ учке). Адӟисько, нуные, тынысьтыд карттэ. Сьӧдалэс вал-а со?
Дышетӥсь. Сьӧдалэс вал, сьӧд. От кыӵе со тодэ!
Туно. Ӝужыт, тӧдьы чебер бамо.
Дышетӥсь. Озьы, ӝужыт, чебер. Однако, песяй, патрет сеен тодӥськод.
Туно (вуэ учке). Однако чебер ук соид тынад, таки эксэй кадь. Ӝужыт, чебер, солэсь чеберез ик нокин ӧвӧл ни, дыр.
Дышетӥсь. Оло, синмаськиськод-а, песяй?
Туно. Кызьы уд синмаськы, нуные? Сыӵе чебер муртэз мынам адӟеме ӧй вал на али.
Дышетӥсь. От зэм тон верад, сыӵе чебер муртэ нокин но ӧз на адӟы на, дыр, али. Нош марлы кема гожтэтэз ӧвӧл?
Туно. Дугдали, сылы, пелляло. (Пелля.) Фу, чиста вуэз со Германь шайтан пожамен, номыр уг адскы ни, коть тунаськемысь дугды.
Дышетӥсь. От кыӵе, тазэ но тупатыны быгатэ ук со Германь!
Туно. Табре нош чылкыт луиз. Картэд пленэ сюрем но — бертоз ини. Прансуз сое пленэ басьтэм.
Дышетӥсь (серекъя). Тодӥд, веранэз ӧвӧл. Ма, песяй, тон, карта сярысь, войнаез но тодкод, лэся?
Туно. Тодко, тодко, дыды! Неньла песяй, та дырозь ултозяз, ваньзэ адӟиз ини. Кызьы мон уг тоды!
Лёва. Катерна, бертса самовар пукты, урадник асьме доры пыриз!
Катерна. Марлы асьме доры, земской станция вань ук?
Гириш. Земскойын кузёос олокытчы кошкиллям.
Марпа. Лёва, мар-о, ворсатэк кельтӥд-а коркадэ?
Лёва. Ма, сэбре урадник номыре но уз лушка ук.
Туно. Ма, тӥ та гуртысь, лэся, ук, марлы-о ӧрекчады?
Катерна. Тон ӧрекчаськиськод, ми сэбре марлы тонэныд зэмзэ вералом?
Туно. Маин-о мон тонэ ӧрекчай?
Катерна. Монэ гинэ тон ӧд ӧрекча, ваньмес. Одӥг Лёгормы сярысь тон милемлы ваньмылы оломар но верад, одӥг пуртыысь куинь пумо шыд понэм кадь ик.
Туно. Кызьы озьы одӥг Лёгор сярысь?
Катерна. Озьы, кылзы! Лёгор — мынам агае, тани солэн (Марпа шоры возьматэ) пиез, солэн (Марья шоры) картэз; таиз нош татысь дышетӥсь, солэн чик картэз ӧвӧл, тон солы кыӵе чебер картэз верад.
Туно. Татын кадь адями нокытын уз улы. Ялан ӧрекчаны туртто.
Катерна. Мар-о тон мон шоры черекъяськод? Тау тыныд, Надежда Миколаевна, милесьтым синмес усьтӥд! Табере ми адӟим ини, туноос весь ӧрекчасько вылэм берпум уксёмес милесьтым кысканы.
Гириш. Урадник но кесяське.
Дышетӥсь. Марлы-о, Лёва?
Лёва. «Кытчы-о тӥляд кошкизы?» шуса юа. Ми Гиришен «туно татын вань но, со доры тунаськыны мынӥзы» шуим.
Гириш. Нош со кыӵе кесяськыны куткиз! Мон, шуэ, чай гинэ юо, солы сэбре тунало али, тюрьмае ог дас нуналлы пукто.
Лёва. Соку тодоз кызьы калыкез ӧрекчаны.
Гириш. Татчы но вуоз али со.
Лёва. Со ас сееныз тунаны куткоз.
Туно (дӥсяське). Татын калык, адӟеме ӧй на вал али сыӵе калыкез.
Гириш. Ӧрекчаськыса уд ветлы ни.
Катерна. Муртэ тодэ, аслысьтыз куректонзэ уг тоды.
Лёва. Зэм ик, берт, Катерна, ато урадник татчы лыктоз!
Гириш. Песяй доры тунаськыны.
Туно. Ойдо уг кышкаськы урадниктылэсь, губернатор ке но лыктӥз ке, уг кышкаськы.
Гириш. Уть, кыӵе со, кизэ кутса, губернаторен «ӟеч-а» карид, дыр?
Туно. Тон туж эн кесяськы!.. Ну, татын калык… Ултозям таӵе калыкез адӟеме ӧй на вал. (Дышетӥсьлы.) Тонэн артэ, дыр, али со, шайтан! Дышеткем карса, ваньзэ тодко кожаськод, лэся?
Дышетӥсь. Мон ӧй ке лусал, тон али ке но уксё кыръяса пуксалыд. Мон тынысьтыд шуддэ быдтӥ.
Гириш. Дугды, урадниклы туна мар ке но. (Педло сое донге.) Ха-ха-ха! Лобӟиз, лэся.
Лёва. Лобӟиз, небось, ас янгышсэ шӧдыса. Сое кемалась озьы кулэ вал.