Удж да удждон корсьӧм

by Тимушев Анисим Петрович

Пурйӧн, плитаӧн кывтім ми,
Вайим кер.
Гребйӧн гурским: гадьмис ки —
Оз кут чер.
Зэр да вой тӧв кулис пыр,
Кывтіг дыр:
Кынмиг, косьмиг, пессигтыр
Вайим пур.
Эстӧн лыа, эстӧн ді —
Зібйыштчам;
Синмысь петӧ кельыд би —
Зорйыштчам...
Воӧ кыркӧтш, зургӧ пур —
Чажмунӧ.
Пыжӧ сӧлам, керйӧ зур —
Зыммунӧ.
Тільсям, пессям, кӧртавлам,
Клячавлам,
Помысь помӧ котравлам,
Йитавлам.
Воам инӧ. „Комилес“
Муралӧ:
Мыйла эн тӧд кер ылӧс —
Лишалӧ?
Колян лун да колян кык —
Оз примит.
Оз тӧд сійӧ дядьӧ тшыг —
Тӧрӧпит.
Ойлас, сьӧкыд аппарат
Вугралӧ.
Кватитчан да — ӧкурат
Игналӧ:
— Талун эштіс, аски лок, —
Бричӧбтас:
Мырсьысь мортлӧн пузяс лёк —
Швачӧбтас:
— Лунтыр ме тай кори тшӧт —
Эн сетӧй.
Кынӧм менам абу пӧт —
Пӧткӧдӧй.
Аски, аски виччысьышт —
Сетыштам.
Виччысьышт да лӧсьӧдчышт —
Мавтыштам.
Содӧ, пуӧ мортлӧн лӧг —
Ёрччыштас:
— Пур вылын кӧ тадз эн тшӧг, —
Сьӧлыштас.
Мыйла мырсьысь ветлӧ тадз,
Ин ни туй?
Ньӧрйӧн кодлысюрӧ швач —
Оз-ӧ туй?
РКИ, вай, дона ёрт
Видзӧдлы:
„Комилеслысь“ аппарат
Шызьӧдлы.
Колӧ доктор, колӧ бур
Бурдӧдчысь,
Кодлысьсюрӧ шырны юр —
Вуж бердтіс.
Нинӧм, эськӧ, абу теш,
Абу пеж.
Классъяс визьысь кӧ оз кеж, —
Син оз веж...