Удмурт Республикалэн Конституциез
| Удмурт Республикалэн Конституциез |
Удмурт Республикаысь Вылӥ Кенеш,
Удмурт Республикаысь калыклэсь историын кылдэм государственностьсэ утён мылкыдзэ возьматыса,
солэн гражданъёсызлы умой улон кылдытон понна кыл кутонэз валаса,
адямилэсь правооссэ но эрикъёссэ, калык пӧлын тупаса улонэз но огкылысь луонэз, ӟеч но шонер лэсьтонлы осконэз юнматыса,
Удмурт Республикаысь калыклэсь Россия Федерациын улӥсь трос йӧскалыкъем калыклэн люкетэз луэмзэ санэ басьтыса,
Россия кунлэсь быдэслыксэ утьыны тыршемез возьматыса, кутэ Удмурт Республикалэсь Конституцизэ.
1. Россия Федерациысь трос калыкъем калыклэн мылкыд каремезъя Удмурт Республика — Удмуртия — Россия Федераци пушкы пырись кун, кудӥз историын юнмамын, удмурт йӧскалыклэсь но Удмуртиысь калыклэсь улонзэс ас мылкыдзыя радъяны нокин талантэм правозэс быдэсъяса, но кудӥз ас улосвылаз кун властьсэ ас кожаз быдэсъя Россия Федерацилэн Конституциезъя но Удмурт Республикалэн Конституциезъя. Удмурт Республика туала кунгожъёсаз азинтӥське, республикаын улӥсь вань йӧскалыкъёс но калыкъёс кунэз радъян ужлэн вань удысъёсаз огкадь правое пыриськыса.
2. Удмурт Республикаын осконлык кылдытӥське удмурт калыклэсь кылзэ но культуразэ, солэн улосвылаз улӥсь мукет калыкъёслэсь кылъёссэс но культураоссэс утьыны но азинтыны; кун сюлмаське Россия Федерациысь субъектъёсын огинын улӥсь удмуртъёслэсь диаспораоссэс утён но азинтон сярысь.
3. Удмурт Республика но Удмуртия нимъёс — валатонзыя огкадесь.
1. Адями, солэн правоосыз но эрикъёсыз котьмалэсь вылӥ дунлык луо.
2. Адямилэсь но гражданинлэсь правооссэ но эрикъёссэ санэ басьтон, чаклан но утён — кунлэн одно быдэсъяно ужез.
1. Удмурт Республикаын государственность возись но власть кылдытӥсь луэ отын улӥсь калык.
2. Калык аслэсьтыз властьсэ быдэсъя меӵак, озьы ик кун властьлэн ёзэсъёсыз но интыосысь аскивалтонлэн ёзэсъёсыз пыр.
3. Калыклэсь властьсэ вылӥ но меӵак возьматон амалъёс луо мылкыдъюан но эркын быръёнъёс.
4. Удмурт Республикаын нокин уг быгаты властез киултыны. Властез талам яке власть полномочиосты киултэм понна кыл кутытӥське катъя.
1. Удмурт Республикалэн правоя кун инлыкез тупатӥське Россия Федерацилэн Конституциеныз, Удмурт Республикалэн Конституциеныз.
2. Удмурт Республикалэн улосвылэзлэсь кунгожъёссэ воштыны уг луы, Удмурт Республикаысь калыклэсь мылкыдъюанын соглаш луэмзэ лыдэ басьтытэк.
1. Удмурт Республикаын кун власть радъяське катъёс кылдытӥсь властьлы, быдэсъясь властьлы но судъясь властьлы люкиськыса, озьы ик быдэсъяно удысъёсты но полномочиосты Россия Федерациысь кун властьлэн ёзэсъёсыз но Удмурт Республикаысь кун властьлэн ёзэсъёсыз куспын люкылыса.
2. Удмурт Республика ас кожаз тупатэ кун власть ёзэсъёслэсь сӧзнэтсэс Россия Федерацилэн Конституциеныз тупатэм радлыклэн инъетъёсызъя но Россия Федерацилэн субъектъёсаз кун властьлэсь катъёс кылдытӥсь (быръем) но быдэсъясь ёзэсъёссэ радъян ласянь огъя возетъёсъя, кудъёсыз тупатэмын федерал катэн.
1. Удмурт Республика — мерлыко кун. Мерлыко политика нуиське котькуд адямилы но быдэс мерлы умой улыны но эркын азинскыны луонлыкъёс кылдытон понна.
2. Удмурт Республикаын утисько адямиослэн ужзы но тазалыксы, осконлык кылдытӥське уждунлэн одно тыроно ичи быдӟалаез ласянь, юрттэт сётӥське семьялы но анайлыклы, атайлыклы но покчилыклы, егитъёслы, сӧсыръёслы но арлыдо гражданъёслы, азинтӥське мерлыко юрттэт сётон сӧзнэт, тупатӥсько кун пенсиос, юрттосъёс но мерлыко утетъёсъя мукет осконлыкъёс.
1. Удмурт Республика — правовой кун. Солэн вань ёзэсъёсыз но ужъюртъёсыз, интыуже кутэмъёс, гражданъёс но соослэн огазеяськонъёссы ужало, Россия Федерацилэсь Конституцизэ но федерал катъёсты, Удмурт Республикалэсь Конституцизэ но Удмурт Республикалэсь катъёссэ юн чакласа.
2. Удмурт Республикалэн Конституциез, Россия Федерацилэсь быдэсъяно ужпумъёссэ но Россия Федерациен но Удмурт Республикаен валче быдэсъяно ужъёсъя Россия Федерацилэсь полномочиоссэ вератэк, вылӥ юридик кужымо луэ, со меӵак быдэсъяське но Удмурт Республикалэн быдэс улосвылаз кутӥське. Удмурт Республикаен кутӥськись катъёс но правоя мукет актъёс Удмурт Республикалэн Конституциезлы ваче пумит луыны кулэ ӧвӧл.
3. Удмурт Республикалэн катъёсыз нимлыко печатласькыны кулэ. Печатламтэ катъёс уже уг кутӥсько. Удмурт Республикалэсь гражданъёслэн правоосынызы, эрикъёсынызы но обязанностьёсынызы гepӟаськем нормативной правовой актъёссы уже кутэмын луыны уг быгато, соос вань калыклы тодматскыны нимлыко печатламын ӧвӧл ке.
4. Россия Федерациен но Удмурт Республикаен валче быдэсъяно ужпумъёс радъясько федерал катъёсъя но соослэн инъетсы вылын Удмурт Республикалэн катрадлыкезъя.
5. Россия Федерацилэн Конституциез, федераци катъёс, Удмурт Республикалэн Конституциез но Удмурт Республикалэн катъёсыз Удмурт Республикалэн улосвылаз кун ласянь утемын луыны кулэ.
6. Удмурт Республикаын быдэсъясько но уже кутӥсько дуннеысь праволэн ваньмыныз санэ басьтэм возетъёсыз но нормаосыз но Россия Федерацилэн калыккуспо огкылъёсыз.
Удмурт Республикаын кун кылъёс луо ӟуч но удмурт кылъёс. Удмурт Республикаын мукет калыкъёслэсь кылъёссэс утьыны но азинтыны праволы осконлык сётӥське.
1. Удмурт Республикаын кун властез быдэсъяло Удмурт Республикаысь Кун Кенеш, Удмурт Республикалэн Тӧроез, Удмурт Республикалэн Правительствоез, Удмурт Республикаысь Конституцияя Суд, Удмурт Республикаысь мировой судъёс. Удмурт Республикаын кылдылыны быгато кун властьлэн мукет ёзэсъёсыз. Соосты кылдытон рад но соослэн полномочиоссы тупатӥсько Удмурт Республикалэн катъёсыныз, федерацилэн катрадлыкез вылэ инъяськыса.
2. Катъёс кылдытӥсь, быдэсъясь но судъясь властьёслэн ёзэсъёссы асьсэлэсь полномочиоссэс ас кожазы быдэсъяло но ог-огенызы кусыпъёс возё Удмурт Республикаысь калыклэсь кулэяськонъёссэ быдэсъян понна. Кун властьлэн ёзэсъёсысьтыз интыуже кутэм муртъёс полномочиоссэс уг быдэсъяло яке сьӧраз ортчо ке, кыл куто Россия Федерацилэн Конституциезъя но федераци катрадлыкъя, Удмурт Республикалэн Конституциезъя но Удмурт Республикалэн законодательствоезъя.
Удмурт Республикаын осконлык сётӥське интыосын аскивалтонлы. Интыосын аскивалтон аслэсьтыз полномочиоссэ ас кожаз быдэсъя. Интыосын аскивалтонлэн ёзэсъёсыз Удмурт Республикаысь кун власть ёзэсъёслэн сӧзнэтазы уг пыро.
Удмурт Республикаын огкадь утисько кунлэн, интыослэн, нимаз кузёослэн но мукетъёсызлэн асваньбуръёссы.
1. Удмурт Республикаысь музъем но мукет инкуазь ваньбуръёс уже кутӥсько но утисько, Удмурт Республикаысь калыклэн улоназ но уж удысаз инъет луыса.
2. Удмурт Республикалэн улосвылаз музъемез, недраез, ву но мукет инкуазь ваньбуръёсты возён, уже кутон но соосын кузёяськон радъяське федерал катъёс но кун властьлэн федераци ёзэсъёс но Удмурт Республикаысь кун властьлэн ёзэсъёсыз куспын быдэсъяно ужъёсты но полномочиосты люкылон сярысь огкылъёсъя но Удмурт Республикалэн соосъя кутӥськись катъёсызъя но нормативной правовой катъёсызъя.
1. Удмурт Республикаын санэ басьтӥсько политика но идеологи удысын унопӧртэмлык но унопартилык.
2. Одӥг идеология но пӧрмытэмын луыны уг быгаты кун идеологилы яке одно быдэсъяно идеологилы.
Удмурт Республикаын одӥг вӧсьлык но кутӥськыны уг быгаты, кун вӧсьлык яке одно осконо вӧсьлык чотын луыса.
1. Удмурт Республикалэн Конституциезлэн та йыръетысьтыз гожтэмъёс Удмурт Республикалэн Конституциеныз юнматэм радлыклэн инъетъёсыз луо но соос та Конституциен тупатэм радэн сяна воштэмын луыны уг быгато.
2. Удмурт Республикалэн Конституциысьтыз нокыӵе мукет гожтэмъёс Удмурт Республикаысь конституцияя радлыклэн инъетэзлы ваче пумит луыны уг быгато.
1. Удмурт Республикаын адямилэн но гражданинлэн Россия Федерацилэн Конституциеныз тупатэм правоосыз но эрикъёсыз одно утисько, калыккуспо праволэсь ваньмыныз санэ басьтэм возетъёссэ но нормаоссэ чакласа но Россия Федерацилэн Конституциезъя но Удмурт Республикалэн Конституциезъя. Та гожтэмез уг яра лыдъяны адямилэсь но гражданинлэсь мукетъёссэ ваньмыныз санэ басьтэм возетъёссэ но нормаоссэ палэнтонэн яке пичиятонэн.
2. Адямилэн но гражданинлэн инъет луись правоосыз но эрикъёсыз солэсь люконтэм луо но котькудӥзлы вордскемез дырысен ик сётӥсько.
3. Адямилэсь но гражданинлэсь правооссэ но эрикъёссэ быдэсъян кулэ ӧвӧл тӥяны мукет муртъёслэсь правооссэс но эрикъёссэс.
Адямилэн но гражданинлэн правоосыз но эрикъёсыз быдэсъясько меӵак. Соос тодмосто катъёслэсь пуштроссэс но кутӥськемзэс, кат сётӥсь но быдэсъясь властьёслэсь, интыосын аскивалтонлэсь ужамзэс но утисько правоя правосудие пыр.
Удмурт Республикаын поттэмын луыны кулэ ӧвӧл адямилэсь но гражданинлэсь правооссэ но эрикъёссэ палэнтӥсь яке пичиятӥсь катьёс.
Удмурт Республикаын адямилэсь но гражданинлэсь правооссэ но эрикъёссэ утёнэз гарантировать каре кун.
1. Удмурт Республика кун властьлэн федераци ёзэсъёсыныз герӟаське, быдэсъяно удысъёсты но полномочиосты куспазы люкылыса.
2. Россия Федерациысь кун торлыклэн ёзэсъёсыз но Удмурт Республикаысь кун властьлэн ёзэсъёсыз куспын быдэсъяно удысъёсты но полномочиосты люкон радъяське Россия Федерацилэн Конституциезъя, Федерациен гожтэм огкылъя но быдэсъяно удысъёсты но полномочиосы люкылон сярысь мукет огкылъёсъя, кудъёсыз тупатӥсько Россия Федерацилэн Конституциезъя но федерал катъёсъя.
Удмурт Республикаысь кун властьлэн ёзэсъёсыз федераци полномочиосты быдэсъянэ пырисько Россия Федерацилэн Конституциеныз но федерал катъёсын чакламъя но отын пусъем кабъёсъя.
1. Россия Федерацилэн Конституциезъя Россия Федерацилэн но Удмурт Республикалэн валче быдэсъяно удысъёссы луо:
а) Удмурт Республикалэсь Конституцизэ, Удмурт Республикалэсь катъёссэ но мукет нормативной правовой актъёссэ Россия Федерацилэн Конституциезлы но федерал катъёслы тупамон карон;
б) адямилэсь но гражданинлэсь правооссэ но эрикъёссэ утён; ичи лыдъем йӧскалыкъёслэсь правооссэс утён; катлыкез, праволыкез утён, мерын кышкытлыктэк улон кылдытон;
в) музъемез, недраез, вуосты но мукет инкуазь ваньбурез возён, кутон но соосын кузёяськон ужпумъёс;
г) кун асваньбурез люкон-висъян;
д) инкуазез уже кутон; котырысь инкуазез утён но экология ласянь кышкытлыклэсь утиськон; инкуазьлэн нимысьтыз чакласа возёно улосвылъёсыз; историяя но культурая синпелетъёсты утён;
е) визьнодан, дышетон, тодос, культура, физкультура но спорт, егитъёсын ужан политикаысь огъя ужпумъёс;
ж) тазалыкез утён ужпумъёсты радъян; семьяез, анайлыкез, атайлыкез но покчилыкез утён; мерлыко утет, мерлыко юрттэт сётонэз но вераса;
е) шукырес учыръёсын, инкуазьын шукыръяськонъёсын, алясь висёнъёсын нюръяськонъя, соослэсь бервылъёссэс быдтонъя ужрадъёс ортчытъян;
и) выт тыронъя но коньдон октонъя огъя возетъёс тупатон;
к) администраци кивалтон, администраци кусыпъёсты радъян, уж, семья, улонни, музъем, ву, нюлэс сярысь катрадлык, недра, котырысь инкуазез утён сярысь катрадлык;
л) суд правоез утись ёзэсъёсын ужасьёс; адвокатура, нотариат;
м) ичи лыдъем йӧскалык дэменлыкъёслэсь ялан улон интыоссэс но вашкала дырысен кылдэм сямъёссэс утён;
н) кун власть ёзэсъёслэсь но интыосын аскивалтон ёзэсъёслэсь сӧзнэтсэс радъянъя огъя возетъёс тупатон;
о) Удмурт Республикалэсь калыккуспо но внешнеэкономической кусыпъёссэ радъян, Россия Федерацилэсь мукет кунъёсын огкылъёссэ быдэсъян.
2. Та ёзэтлэн 1-тӥ люкетаз верам ужпумъёс радъясько федерал катъёсын но Удмурт Республикалэн соосъя кутэм катъёсыныз но мукет нормативной правовой актъёсыныз.
3. Валче быдэсъяно кыӵе ке удысъя федерал кат кутэмезлэсь азьло Удмурт Республика быгатэ сыӵе удысъя ужъёсты аслаз катъёсыныз радъяны. Федерал кат потэм бере Удмурт Республикалэн катъёсыз но нормативной правовой мукет актъёсыз тупатӥсько федерал катъя.
4. Удмурт Республикалэн катъёсыз но нормативной правовой мукет актъёсыз федерал катлы уг тупало ке, кивалтӥськоно федерал катэн.
5. Россия Федерациысь кун властьлэн ёзэсъёсыз но Удмурт Республикаысь властьлэн ёзэсъёсыз куспын валче быдэсъяно удысъёсъя тупамтэос палэнтӥсько огкылэ вуон амалъёс пыр, нош огкыл шедьтыны уг луы ке — суд пыр.
Россия Федерациен ас кожаз но Россия Федерациен валче быдэсъяно полномочиосты лыдэ басьтытэк, кун власть быдэсак сётӥське Удмурт Республикалы.
Удмурт Республикаысь быдэсъясь властьлэн ёзэсъёсыз, федерал быдэсъясь властьлэн ёзэсъёсыныз кенешыса, ог-огзылы сётъяны но ас вылазы басьяны быгато асьсэ полномочиоссылэсь люкетъёссэс быдэсъянэз, со пумит уг луы ке Россия Федераци Конституцилы но федерал катъёслы, Удмурт Республикалэн Конституциезлы но Удмурт Республикалэн кун катъёсызлы.
1. Удмурт Республика аслаз улосвылаз вузъёсты, юрттэт сётонъёсты но коньдонэз эркын нуыны-вайыны лэзе, чылкыт вожвылъяськонлы но экономика удысын эркын ужанлы дурбасьтэ.
2. Республикалэн улосвылаз вузъёсты но юрттэт сётонэз кӧнялы ке сюбегатыны луэ федерал катьёсъя, со кулэ ке адямиосты кышкытлыклэсь, соослэсь улонзэс но тазалыксэс, инкуазез но культура удысысь дунлыкъёсты утён понна.
3. Удмурт Республика Россия Федерацилэн мукет субъектъёсыныз экономика удысын кусыпъёссэ радъя, огкадь правовой луыса но соослэсь котькудзылэсь экономиказэ ас сяменыз нуонзэ санэ басьтыса.
Удмурт Республикалэн асваньбурез луись объектъёсты, кудъёсыз тужгес бадӟым инты басьто республикалы улонлыксэ утён понна яке солэсь ваньбурлыко но духовной культуразэ возён понна, нокызьы муртлы сётыны уг луы. Сыӵе объектъёслэн списоксы юнматӥське Удмурт Республикалэн катэныз, федерал катрадлык вылэ инъяськыса.
Удмурт Республикаын вытъёс но коньдон октонъёс тупатӥсько федерал катъя но Удмурт Республикалэн катъёсызъя.
1. Удмурт Республикалэн вань Кун Куншетэз, Кунпусэз но Кункрезез, соослэн кыӵе луэмзы но соосты кутон рад юнматӥське Удмурт Республикалэн катэныз.
2. Удмурт Республикалэн шоркарез луэ Иж кар.
1. Удмурт Республика улосвылзэ кивалтонъя люкылон ужпумъёсты ас кожаз быдэсъя.
2. Удмурт Республикае пыро таӵе улосвыл кивалтонния огметъёс: Алнаш, Балезино, Вавож, Вотка, Глаз, Грах, Дэбес, Дэри, Эгра, Камбарка (ёросэ пырись Камбарка карен), Каракулино, Кез, Кизнер, Кияса, Красногорск, Пичи Пурга, Можга, Сарапул, Сьӧлта, Сюмси, Ува, Шаркан, Юкаменск, Якшур-Бӧдья, Яр ёросъёс; Иж, Вотка, Глаз, Можга, Сарапул республика статусъем каръёс.
Удмурт Республикаын улосвыл кивалтонния огметъёсыз кылдытон, быдтон, соос куспын кунгожъёсты тупатон но вошъян, соосты ниман но нимъёссэс воштон, улосвыл кивалтонни ёзэсъёслы люкылонэн герӟаськем мукет ужпумъёс быдэсъясько, со интыосын улӥсь калыклэсь мылкыдъёссэ но кулэяськонъёссэ лыдэ басьтыса но Удмурт Республикалэн катъёсыз вылэ инъяськыса.
1. Удмурт Республикаысь Кун Кенеш луэ Удмурт Республикаысь кун властьлэн кат кылдытӥсь (быръем) но эскерись ёзэсэз.
2. Удмурт Республикаысь Кун Кенеш — Удмурт Республикаысь кат кылдытӥсь властьлэн ялан ужась но вылӥ одӥг гинэ ёзэсэз.
1. Удмурт Республикаысь Кун Кенешын луэ 90 депутат, соос бырйисько огъя, огкадь но меӵак быръён правоя, куараез лушкем сётон амалэн.
Удмурт Республикаысь Кун Кенеш ужаны быгатэ, отчы чаклам вань депутатъёс пӧлысь ичизэ кык куиньмосэз быръемын ке.
2. Удмурт Республикаысь Кун Кенешлэн одӥг созывысь депутатъёслэн ужан дырзы — 5 ар.
3. Удмурт Республикаысь Кун Кенеше депутатъёсты быръёнэз ортчытон рад тупатӥське федерал катъёсын, Удмурт Республикалэн Конституциеныз но Удмурт Республикалэн катъёсыныз.
1. Удмурт Республикаысь Кун Кенеше депутатэ быръемын луыны быгатэ Россия Федерациысь 21 аресозь вуэм но бырйиськыны правовой гражданин.
2. Федерал катъя Удмурт Республикаысь Кун Кенешлэн депутатэз ас полномочиоссэ быдэсъян дыръя уг быгаты огдыре ик Россия Федерациысь Федерал ӧтчамлэн Кун Думаезлэн депутатэз, Россия Федерациысь Федерал ӧтчамлэн Федерал Кенешезлэн ёзчиез, судъясь луыны, Россия Федерациысь мукет кун иныужъёсын, Россия Федерацилэн субъектысьтыз кун ужысь кун интыужын, кун федерал службаысь интыужъёсын, Россия Федерациысь субъектлэн кун граждан службаысьтыз интыужын, озьы ик муниципал интыужын но муниципал службаысь интыужын ужаны, ваньмыз со Россия Федерацилэн катрадлыкеныз мукетыз чакламын ӧвӧл ке.
3. Федерал катъя Удмурт Республикаысь Кун Кенешын уждун басьтыса ялан ужась депутат уг быгаты уждун тыриськись мукет ужын тыршыны, дышетон, тодос но музон творческой удысъёсын сяна, Россия Федерацилэн катрадлыкеныз мукетыз чакламын ӧвӧл ке. Со дыре ик дышетон, тодос но музон творческой уж понна уждун тыриськыны уг быгаты кунгож сьӧрысь кунъёсын, калыккуспо но кунгож сьӧрысь огазеяськонъёсын, кунгож сьӧрысь кунъёслэн гражданъёсыныз но гражданствотэм адямиосын коже гинэ, мукетыз Россия Федерацилэн калыккуспо огкылэныз яке Россия Федерацилэн катрадлыкеныз чакламын ӧвӧл ке. Федерал кун ужысь интыуж сярысь сюбегатонъёс, кудъёссэ пуктэ та ёзэт, уг кутӥсько Россия Федерацилэн Президентэзлэн указэныз юнматэм учыръёсы.
4. Удмурт Республикаысь Кун Кенешлэн депутатэз уг быгаты аслэсьтыз инлыксэ кутыны мукет удысын, кудӥз депутат полномочиосты быдэсъянэн герӟаськемын ӧвӧл. Удмурт Республикаысь Кун Кенешлэн депуатэзлэн уженыз герӟаськем мукет сюбегатонъёс федерал катэн кутӥсько.
5. Удмурт Республикаысь Кун Кенешын уждун басьтыса ялан ужась депутатъёслэн лыдзы тупатӥське Удмурт Республикалэн катэныз.
6. Удмурт Республикаысь Кун Кенеш депутатлэн инлыкез тупатӥське федерал катъёсын, Удмурт Республикалэн Конституциеныз но Удмурт Республикалэн катъёсыныз.
Удмурт Республикаысь Кун Кенешлэн депутатэз ас полномочиоссэ быдэсъян вакытаз йӧтылонтэм луэ, сыӵе оскет тупатӥське федерал катэн.
1. Удмурт Республикаысь Кун Кенеш созывезлэн нырысетӥ сессияз люкаське вань депутатъёс пӧлысь ичизэ кык куиньмоссэ быръем бере куамынэтӥ нуналаз.
2. Удмурт Республикаысь Кун Кенешлэн валтӥсь ужан амалэз луо сессиос, кытын эскерисько Удмурт Республикаысь Кун Кенешен быдэсъяно ужпумъёс.
Удмурт Республикаысь Кун Кенеш сессилэн кенешонъёсыз шара ортчытӥсько, федерал катъёсын но Удмурт Республикалэн законодательствоеныз чаклам учыръёс сяна.
3. Созывысь нырысетӥ сессиез усьтэ но сое Кун Кенешлы Тӧро бырйытозь нуэ Удмурт Республикаысь быръёнъёсъя валтӥсь комиссилэн Тӧроез.
1. Удмурт Республикаысь Кун Кенешлэн полномочиосаз пыро:
1) Удмурт Республикалэсь Конституцизэ кутон но отчы воштонъёс пыртон;
2) Удмурт Республикалэсь кун пусъетъёссэ юнматон, Удмурт Республикалэсь кун наградаоссэ кылдытон но Удмурт Республикалэсь силы карон нимъёссэ тупатон;
3) Удмурт Республикалэсь Конституцизэ, Удмурт Республикалэсь катъёссэ но Удмурт Республикаысь Кун Кенешлэсь пуктонъёссэ Россия Федерацилэн Конституциезлы но федерал катъёслы тупамон карон;
4) Удмурт Республикалэн полномочиосызъя быдэсъяно ужъёсты но Россия Федерациен но Удмурт Республикаен валче быдэсъяно ужъёсты Удмурт Республикалэн полномочиосыныз катлыко радъян;
5) мерлыкез но экономикаез азинтонъя республиканской программаосты юнматон, соосты быдэсъянъя отчётъёсты юнматон;
6) Удмурт Республикалэсь бюджетсэ юнматон, сое быдэсъянъя отчётэз юнматон;
7) сыӵе ик уполномоченной мукет ёзэсъёсын ӵош Удмурт Республикалэсь катъёссэ, Удмурт Республикаысь Кун Кенеш пуктэмъёсты, мерлыкез но экономикаез азинтонъя республиканской программаосты, Удмурт Республикалэсь бюджетсэ но Удмурт Республикалэсь бюджетэ пырисьтэм улосвыл кун фондъёслэсь бюджетсэс быдэсъямез чаклан, Удмурт Республикаын тупатэм радъя асваньбурен кузёяськонэз эскерон; эскерись ёзэсъёсты кылдытон;
7.1) Кужымзэ ыштӥз.
7.2) Россия Федерациысь Президент ӵектэмъя Удмурт Республикалэн Тӧроезлэсь полномочиоссэ дырызлэсь вазь дугдытон;
7.3) Удмурт Республикалэн Тӧроезлэсь Удмурт Республикалэн Правительствоезлэн быдэстэм ужъёсыз сярысь, озьы ик Удмурт Республикаысь Кун Кенешен пуктэм юанъёсъя арлы быдэ йылпумъянъёсты кылзон.
8) Удмурт Республикаысь Кун Кенешез кылдытонъя но солэсь ужзэ радъянъя инъетъёс тупатон;
9) Удмурт Республикаын мылкыдъюан ялонъя но сое ортчытонъя рад тупатон;
10) Удмурт Республикаысь Кун Кенеше быръёнъёс ортчытонъя рад тупатон, Удмурт Республикалэсь Тӧрозэ быръёнъёс но Удмурт Республикалэсь Тӧрозэ ӧтён ортчытонъя рад тупатон;
11) интыосын аскивалтон ёзэсъёсы быръёнъёс ортчытонъя рад тупатон;
12) вытъёс но коньдон октонъёсъя, кудъёссэ федерал катъя Удмурт Республика радъяны быгатэ, озьы ик соосты бичанъя рад тупатон;
13) Удмурт Республикалэн бюджетаз пырисьтэм улосвыл кун фондъёслэсь бюджетъёссэс но соосты быдэсъян сярысь отчётъёсты юнматон;
14) Удмурт Республикалэн асваньбуреныз кивалтонъя но кузёяськонъя рад тупатон;
15) Удмурт Республикалэсь огкылъёссэ кутонэз но дугдытонэз юнматон;
16) Удмурт Республикалэсь администраци-улосвыл кивалтонъя люкылонэз радъянъя но сое воштонъя рад тупатон;
17) Удмурт Республикаысь кун властьлэн быдэсъясь ёзэсъёсызлэсь сӧзнэтсэс тупатон;
18) Удмурт Республикаысь Кун Кенешлэсь Ужанрадзэ кутон но Удмурт Республикаысь Кун Кенешлэсь пуш ужпумъёссэ быдэсъян;
19) Удмурт Республикаысь Кун Кенешлэсь Тӧрозэ, Удмурт Республикаысь Кун Кенешлэн Тӧроезлэсь воштӥсьёссэ, Удмурт Республикаысь Кун Кенешлэн ялан ужась комиссиосызлэсь тӧрооссэс но Удмурт Республикаысь Кун Кенешлэн Президиумаз мукет ёзчиосты быръён, депутат фракциосын кивалтӥсьёсты вератэк, но соосты ужысьтызы мӧзмытон; Удмурт Республикаысь Кун Кенешен кылдытэм эскерон ёзъёслэсь кивалтӥсьёссэс быръён, юнматон но ужысьтызы мӧзмытон;
20) Удмурт Республикаысь Кун Кенешлэсь ялан ужась комиссиоссэ кылдытон;
21) Удмурт Республикалэн Правительствоезлы Тӧрое, Удмурт Республикалэн Правительствоезлэн Тӧроезлы воштӥсьёсы, Удмурт Республикаысь коньдон ужпумъёсъя министре Удмурт Республикалэн Тӧролы дэмлам муртьёс пумысен кыл тупатон;
22) Удмурт Республикаын адямилэн правоосызъя Уполномоченнойез интыуже пуктон;
23) Удмурт Республикаысь Кун Кенеше быръёнэз, Удмурт Республикалэн Тӧроез быръёнэз но Удмурт Республикалэсь Тӧрозэ ужысьтыз ӧтёнэз юнматон;
24) Удмурт Республикалэн катэныз чаклам учыръёсы Удмурт Республикаын мылкыдъюан ортчытон сярысь пуктон;
25) Удмурт Республикалэн Тӧроезлы оскымтэез возьматон сярысь ужпумез эскерон;
26) Удмурт Республикаысь Правительстволэн Тӧроезлы, Удмурт Республикаысь Правительстволэн Тӧроезлэн воштӥсьёсызлы, Удмурт Республикаысь коньдон ужпумъёсъя министрлы оскымтэез возьматон сярысь ужпумез эскерон;
27) Удмурт Республикалэсь кунгожъёссэ воштон сярысь тупанкылэз юнматон;
28) кун властьлэн федерал ёзэсъёсыз но кун властьлэн Удмурт Республикаысь ёзэсъёсыз куспын полномочиосты люкылон сярысь огкыллы ӵектосэз умоен лыдъян;
29) Удмурт Республикаысь Конституцияя Судлы судъясьёсты юнматон;
30) Удмурт Республикаысь мировой (кусыптупатӥсь) судъясьёсты юнматон;
31) Удмурт Республикаысь Быръёнъёсъя валтӥсь комиссие пырись ёзчиос пӧлысь ӝынызэ федерал катъёсын но Удмурт Республикалэн катъёсыныз чаклам радлыкъя юнматон;
32) Россия Федерациысь Федерал ӧтчамлэн Кун Думаяз кат кылдытонъя кичӧлтонэн вазиськон;
33) кун властьлэн федерал ёзэсъёсыныз, Россия Федерациысь субъектъёслэн ёзэсъёсыныз, интыосысь аскивалтон ёзэсъёсыныз валче ужан;
34) самороспуск сярысь ужпумез эскерон;
35) Россия Федерациысь Конституциен, федерал катъёсын, Удмурт Республикалэн Конституциеныз но Удмурт Республикалэн катъёсыныз тупатэм мукет полномочиосты быдэсъян.
2. Удмурт Республикаысь Кун Кенеш кутэ Удмурт Республикалэсь катъёссэ но Удмурт Республикаысь Кун Кенеш пуктэмъёсты.
3. Удмурт Республикалэн катъёсыз кутӥсько та ёзэтлэн 1-тӥ люкетысьтыз 1-тӥ, 2-тӥ, 3-тӥ, 4-тӥ, 5-тӥ, 6-тӥ, 7-тӥ, 8-тӥ, 9-тӥ, 10-тӥ, 11-тӥ, 12-тӥ, 13-тӥ, 14-тӥ, 15-тӥ, 16-тӥ, 17-тӥ, 35-тӥ пунктъёсын чаклам ужпумъёсъя.
4. Удмурт Республикаысь Кун Кенешлэн пуктэмъёсыз кутӥсько та ёзэтлэн 1-тӥ люкетысьтыз 7-тӥ, 7.2-тӥ, 7.3-тӥ, 18-тӥ, 19-тӥ, 20-тӥ, 21-тӥ, 22-тӥ, 23-тӥ, 24-тӥ, 25-тӥ, 26-тӥ, 27-тӥ, 28-тӥ, 29-тӥ, 30-тӥ, 31-тӥ, 32-тӥ, 33-тӥ, 34-тӥ, 35-тӥ пунктъёсын чаклам ужпумъёсъя.
1. Удмурт Республикаысь Кун Кенешын каткичӧлтонэн вазиськыны правозы вань Удмурт Республикаысь Кун Кенеш депутатъёслэн, Удмурт Республикаысь Кун Кенешлэн депутат огазеяськонъёслэн, Удмурт Республикаысь Кун Кенешлэн ялан ужась комиссиосызлэн, Удмурт Республикаысь Кун Кенешлэн депутат фракциосызлэн, Удмурт Республикаысь Кун Кенеш Президиумлэн, Удмурт Республикалэн Тӧроезлэн, Удмурт Республикалэн Правительствоезлэн, интыосысь аскивалтонлэн быръем ёзэсъёсызлэн, мер огазеяськонъёсысь республика ёзэсъёслэн но Удмурт Республикалэн улосвылысьтыз ичизэ дас сюрс гражданинлэн.
Удмурт Республикаысь Кун Кенешын асьсэ удыссыя каткичӧлтонэн вазиськыны правозы озьы ик вань Удмурт Республикаысь Конституцияя Судлэн, Удмурт Республикаысь Вылӥ Судлэн, Удмурт Республикаысь Арбитраж судлэн, Удмурт Республикаысь Прокурорлэн, Удмурт Республикаысь Быръёнъёсъя валтӥсь комиссилэн.
Удмурт Республикалэн Конституцияз воштонъёс пыртыны каткичӧлтонэн вазиськыны правозы вань Удмурт Республикалэн Конституциезлэн 10-тӥ йыръетаз верам субъектъёслэн.
2. Удмурт Республикаысь Кун Кенеше Удмурт Республикалэн Тӧроеныз сётэм каткичӧлтонъёс солэн дэмламезъя нырысь ик эскерисько.
3. Выт тупатон яке сое куштон, сое тыронлэсь мозмытон, Удмурт Республикалэсь коньдон тыронъёссэ воштон сярысь катӵектосъёсты, озьы ик Удмурт Республикалэн бюджетысьтыз уксё тыронъёсын герӟаськем мукет ӵекосъёс Кун Кенешын эскерисько Удмурт Республикалэн Тӧроезлэн ӵэктэмезъя яке, вань ке, солэн та пумысен гожтэм йылпумъянэзъя. Та йылпумъян Удмурт Республикаысь Кун Кенеше сётӥське толэзь куспын.
1. Удмурт Республикалэн катъёсыз кутӥсько Удмурт Республикаысь Кун Кенеше кӧня депутат бырйыны тупатэм лыд пӧлысь ятыреныз депутатъёсын, Россия Федерациысь субъектъёсын кун властьлэсь кат кылдытъясь (быръем) но быдэсъясь ёзэсъёссэ радъян огъя возетъёсъя, кудъёсыз юнматэмын федерал катэн, Удмурт Республикаысь Конституциын мукет амал чакламын ӧвӧл ке.
2. Удмурт Республикаысь Кун Кенешлэн пуктэмъёсыз кутӥсько Удмурт Республикаысь Кун Кенеше быръем депутатъёс пӧлысь ӝынылэсь ятыреныз, Россия Федерациысь субъектъёсын кун властьлэсь кылдытъясь (быръем) но быдэсъясь ёзэсъёссэс радъясь федерал катэн юнматэмын огъя возетъёсъя, Удмурт Республикалэн Конституцияз мукетамал чакламын ӧвӧл ке.
3. Удмурт Республикалэн катӵектосэз Удмурт Республикаысь Кун Кенешын ичизэ кык пол лыдӟыса эскериське.
Катӵектосэз кутон яке палэнтон, озьы ик кат кутон сярысь ужпумез быдэстон юнматӥське Удмурт Республикаысь Кун Кенешлэн пуктэменыз.
1. Удмурт Республикаысь Кун Кенеш Удмурт Республикалэсь кутэм катъёссэ дас нунал куспын келя Удмурт Республикалэн Тӧроезлы, соос вылэ гожтӥськон но калыке вӧлмытон понна.
2. Удмурт Республикалэн Тӧроез дас нуналскын Удмурт Республикалэсь Конституцизэ, Удмурт Республикалэсь катсэ калыке поттыны кулэ, соос вылэ гожтӥськыса я указ поттыса, яке со катэз палэнтыны кулэ.
Удмурт Республикалэсь Конституцизэ но Удмурт Республикалэсь катъёссэ калыке поттон рад тупатӥське Удмурт Республикалэн Конституциеныз но соя Удмурт Республикалэн кутэм катэныз. Удмурт Республикалэсь катсэ Удмурт Республикалэн Тӧроез палэнтон учыръёсы Удмурт Республикалэн палэнтэм катэз Удмурт Республикаысь Кун Кенеше берыктӥське сое малы палэнтэм сярысь валэктонэн яке отчы вошонъёс но ватсанъёс пыртон сярысь ӵектонэн.
3. Удмурт Республикалэн Тӧроеныз Удмурт Республикалэсь катсэ палэнтон учыръёсы Удмурт Республикаысь Кун Кенеше кӧня ке депуат бырйыны тупатэм лыд пӧлысь ятыреныз ичизэ кык куиньмосэныз депутатъёсын со катэз умоен лыдъяны луэ азьло кутэм редакциеныз.
Удмурт Республикалэн азьло кутэм редакциезъя умоен лыдъям кат Удмурт Республикалэн Тӧроеныз выльысь палэнтэмын луыны уг быгаты но сизьым нунал куспын калыке поттэмын луыны кулэ.
4. Удмурт Республикалэн катэз кужыме пыре сое нимлыко печатлам бере. Удмурт Республикалэн адямилэсь но гражданинлэсь правооссэ но эрикъёссэ утёнэн герӟаськем катъёсыз но нормативной правовой мукет актъёсыз кужыме пыро, соосы нимлыко печатлам бере ичизэ дас нунал ортчыса.
1. Удмурт Республикаысь Кун Кенешлэн Тӧроез, куараез лушкем сётыса бырйиське, Кун Кенешлэн депутатъёсыз пӧлысь но удыслыко но яланлыко инъетэн ужа.
Удмурт Республикаысь Кун Кенешлэсь Тӧрозэ ужысьтыз мозмытыны луэ Удмурт Республикаысь Кун Кенешен, куараезлушкем сётыса.
2. Удмурт Республикаысь Кун Кенешлэн Тӧроез:
1) Удмурт Республикаысь Кун Кенешлэн но солэн Президиумезлэн кенешонъёсыныз кивалтэ;
2) оглом кивалтэ Удмурт Республикаысь Кун Кенешын эскероно ужпумъёсты дасянэн;
3) гожтӥське Удмурт Республикаысь Кун Кенешен кутэм пуктэмъёс вылэ;
4) радъя Удмурт Республикаысь Кун Кенешлэн ялан ужась комиссиосызлэсь ужзэс;
5) Удмурт Республикаысь Кун Кенешлэн нимыныз ужа Удмурт Республикаын но солэн палэназ;
6) быдэсъя Удмурт Республикалэн катъёсыныз тупатэм мукет полномочиосты.
3. Удмурт Республикаысь Кун Кенешлэн Тӧроез поттэ радъетъёс.
4. Удмурт Республикаысь Кун Кенешлэн Тӧроез интыяз луымтэ яке солэн аслэсьтыз полномочиоссэ быдэсъяны быгатымтэез дыръя, озьы ик солэн косэмезъя, Удмурт Республикаысь Кун Кенеш Тӧролэсь ужзэ быдэсъя солэн одӥгез воштӥсез.
1. Удмурт Республикаысь Кун Кенешлэн Президиумез луэ Удмурт Республикаысь Кун Кенешлэн ялан ужась но солэсь ужзэ радъясь ёзэсэз.
2. Удмурт Республикаысь Кун Кенешлэн Президиумаз ужзыя пыро Удмурт Республикаысь Кун Кенешлэн Тӧроез, Удмурт Республикаысь Кун Кенеш Тӧролэн воштӥсьёсыз, Удмурт Республикаысь Кун Кенешлэн ялан ужась комиссиосызлэн тӧрооссы, озьы ик депутат фракциослэн кивалтӥсьёссы.
Удмурт Республикаысь Кун Кенеш Удмурт Республикаысь Кун Кенешлэн Президиумаз бырйыны быгатэ Удмурт Республикаысь Кун Кенешлэсь сомында мукет депутатъёссэ но, кӧня тупатэмын Удмурт Республикалэн катэныз.
3. Удмурт Республикаысь Кун Кенешлэн Президиуменыз кивалтэ Удмурт Республикаысь Кун Кенешлэн Тӧроез.
4. Удмурт Республикаысь Кун Кенешлэн Президиумез:
1) Удмурт Республикаысь Кун Кенешлэсь сессиоссэ люка но солэсь кенешонъёссэ дасянэз радъя;
2) Удмурт Республикаысь Кун Кенешлэн ялан ужась комиссиосызлэсь ужзэс радъя;
3) Удмурт Республикаысь Кун Кенешлэн депутатъёсызлы полномочиоссэс быдэсъяны юрттэ но соослы кулэ луись ивортонъёс сётэ.
4) Удмурт Республикалэсь катъёссэ ӵектосъёсты но кун улонысь мукет кулэ луись ужпумъёсты эскеронэз радъя;
5) Удмурт Республикаысь Кун Кенешлэсь пуктэмъёссэ, Удмурт Республикаысь Кун Кенешлэн Президиумезлэсь пуктэмъёссэ печатьын поттэ;
6) Удмурт Республикалэн катъёсыныз чаклам мукет полномочиосты быдэсъя.
Удмурт Республикаысь Кун Кенеш кылдытэ Удмурт Республикаысь Кун Кенешлэсь ялан ужась комиссиоссэ, кудъёсызлэн кылдытон радзы, огинлыксы но полномочиоссы тупатӥсько Удмурт Республикалэн катэныз.
1. Удмурт Республикаын Кун Кенешлэн полномочиосыз дырызлэсь вазь дугдытэмын луыны быгато таӵе учыръёсы:
1) Удмурт Республикаысь Кун Кенеш самороспуск сярысь решение кутыку. Самороспуск сярысь решение кутӥське Удмурт Республикаысь Кун Кенеше кӧня депутат бырйыны тупатэм лыд пӧлысь ичизэ кык куиньмос люкетэныз, Удмурт Республикалэн катэныз чаклам радъя;
2) та ёзэтлэн 2-тӥ но 2.1-тӥ люкетъёсаз пусъем мугьёсъя Удмурт Республикалэн Тӧроез Удмурт Республикаысь Кун Кенешлэсь ужзэ дугдытыку;
3) Удмурт Республикаысь Вылӥ Судлэн Удмурт Республикаысь Кун Кенеш депутатъёслэн таиз огинлыксы полномочной уг луы шуыса решениез кужыме пырыку, озьы ик депутатъёс полномочиоссэс дугдытыку но.
4) Удмурт Республикаысь Кун Кенешез федерал катэн чаклам мугьёсъя но радлыкъя Россия Федерациысь Президент лэзьыку.
2. Удмурт Республикалэн Тӧроез Удмурт Республикаысь Кун Кенешлэсь полномочиоссэ дырызлэсь вазь дугдытон сярысь решение кутыны быгатэ, куке Удмурт Республикаысь Кун Кенеш кутэ Россия Федерацилэн Конституциезлы, Россия Федерацилэн быдэсъяно удысъёсызъя но Россия Федерацилэн но Удмурт Республикалэн валче быдэсъяно удысъёссыя федерал катъёслы, Удмурт Республикалэн Конституциезлы тупасьтэм Удмурт Республикалэсь Конституцизэ, Удмурт Республикалэсь катсэ, Удмурт Республикаысь Кун Кенешлэсь пуктэмзэ, со вачепумитлыкъёс тупась судэн умойтэмен лыдъямын ке, нош Удмурт Республикаысь Кун Кенеш судлэн решениез кужыме пырем дырысен куать толэзь ӵоже соосты ӧз палэнты ке.
2.1. Удмурт Республикалэн Тӧроезлэн Удмурт Республикаысь Кун Кенешлэсь полномочиоссэ дырызлэсь вазь дугдытыны правоез вань соку, куке суд решение кутэ, Удмурт Республикалэн быръем Кун Кенешез куинь толэзь ӵоже бӧрсьысь бӧрсе кенешон ӧз ортчытъя шуыса.
Удмурт Республикалэн Тӧроезлэн Удмурт Республикалэн правомочной инлыкен выль быръем Кун Кенешезлэсь полномочиоссэ дырызлэсь вазь дугдытыны правоез вань соку, куке суд решение кутэ, Удмурт Республикаысь Кун Кенеш быръем дырысеныз куинь толэзь ӵоже кенешон ӧз люкалля шуыса.
Судлэн решениез кужыме пырем бере куинь толэзь ӵоже Удмурт Республикалэн Тӧроезлэн Удмурт Республикаысь Кун Кенешлэсь полномочиоссэ дырызлэсь вазь дугдытыны правоез вань.
3. Удмурт Республикалэн Тӧроез Удмурт Республикаысь Кун Кенешлэсь полномочиоссэ дугдытон сярысь решениез указэн кутӥське.
4. Удмурт Республикаысь Кун Кенешлэн полномочиосыз дырызлэсь вазь йылпумъяськыку, федерал катъя, Удмурт Республикалэн Конституциезъя но Удмурт Республикалэн катэзъя Удмурт Республикаысь Кун Кенеше дырызлэсь вазь быръёнъёс тупатӥсько. Со быръёнъёс ортчытӥсько федерал катэн пуктэм вакытъёсы.
1. Удмурт Республикалэн Тӧроез интыужезъя Удмурт Республикалэн Вылӥ кивалтӥсез луэ но кивалтэ Удмурт Республикаысь кун властьлэн вылӥ быдэсъясь ёзэсэныз — Удмурт Республикалэн Правительствоеныз.
2. Удмурт Республикалэн Тӧроез Удмурт Республикалэсь Катсэ, адямилэсь но гражданинлэсь правооссэ но эрикъёссэ быдэстыны оскетлык сётӥсь луэ, луонлык кылдытэ катрадлыклы но праволы.
1. Удмурт Республикалэсь Тӧрозэ, огъя быръён право вылэ инъяськыса, лушкем куара сётон амалэз кутыса, Удмурт Республикаын улӥсь Россия Федерацилэн гражданъёсыз быръё, кудъёсызлэн федерал катъя активной бырйиськон правозы вань.
Удмурт Республикалэсь Тӧрозэ быръён радлык федерал катэн но соя кутэм Удмурт Республикалэн катэныз пуктӥське.
2. Удмурт Республикалэн Тӧрояз бырйыны луэ 30 арес тырмем Россия Федерациысь гражданинэз, кудӥзлэн Россия Федерация Конституцияя но федерал катъя пассивной бырйиськон правоез вань, кудӥзлэн ӧвӧл кунгож сьӧрысь кунлэн гражданствоез яке мукет кыӵе ке ужкагазэз, кудӥз Россия Федерациысь гражданинлы кунгож сьӧрысь кунын ялан улыны право сётэ.
3. Удмурт Республикалэн Тӧроез бырйиське 5 арлы но та интыужын бӧрсьысь бӧрсе кык сроклэсь кема ужаны уг быгаты.
Удмурт Республикалэн Тӧроезлэн полномочиез интыужзэ кутскем нуналысеныз лыдъяське.
4. Федерал катъя Удмурт Республикалэн Тӧроез уг быгаты огдыре ик Россия Федерациысь Федерал ӧтчамлэн Кун Думаезлэн депутатэз, Россия Федерациысь Федерал ӧтчамлэн Федерал Кенешезлэн ёзчиез, судъясь луыны, Россия Федерациысь мукет кун иныужъёсын, Удмурт Республикаысь мукет кун интыужъёсын, Россия Федерацилэн субъектысьтыз кун ужысь кун интыужын, озьы ик муниципал интыужын но муниципал ужысь интыужын ужаны, уждун тыриськись мукет интыын ужаны, дышетон, тодос но мукет творческой удысъёсын сяна, Россия Федерацилэн катрадлыкеныз мукетыз чакламын ӧвӧл ке. Со дыре ик дышетон, тодос но музон творческой уж понна уждун тыриськыны уг быгаты кунгож сьӧрысь кунъёсын, калыккуспо но кунгож сьӧрысь огазеяськонъёсын, кунгож сьӧрысь кунъёслэн гражданъёсыныз но гражданствотэм адямиосын коже гинэ, мукетыз Россия Федерацилэн калыккуспо огкылэныз яке Россия Федерацилэн катрадлыкеныз чакламын ӧвӧл ке. Федерал кун ужысь интыуж сярысь право сюбегатонъёс, кудъёссэ пуктэ та ёзэт, уг кутӥсько Россия Федерацилэн Президентэзлэн указэныз юнматэм учыръёсы.
Удмурт Республикалэн Тӧроезлэн инлыкеныз герӟаськем мукет право сюбегатонъёс Федерал катэн юнматӥсько.
1. Удмурт Республикалэн Тӧроез, интыужаз пырыкуз, таӵе анткыл сётэ: «Кыл сётӥсько, Удмурт Республикалэн Тӧроезлэсь полномочиоссэ быдэсъякум, адямилэсь но гражданинлэсь правооссэ но эрикъёссэ гажаны но утьыны, Россия Федерацилэсь Конституцизэ, федерал катъёсты, Удмурт Республикалэсь Конституцизэ но Удмурт Республикалэсь катъёссэ быдэсъяны но утьыны, калык понна оскымон ужаны».
2. Анткыл сиё-дано сётӥське Удмурт Республикаысь Кун Кенешлэн кенешаз.
3-4. Кужымзы ышемын.
5. Удмурт Республикалэн Тӧроез интыужез борды кутскемен лыдъяське анткыл верам дырысеныз.
Удмурт Республикалэн Тӧроез:
1) Удмурт Республикалэн нимыныз ужа кун властьлэн ёзэсъёсыныз, Россия Федерацилэн субъектъёсысьтыз кун ӧрлык ёзэсъёсын, интыысь аскивалтонъя ёзэсъёсын кусыпъёс тупатонын, калыккуспо но внешнеэкономической герӟетъёс возёнын; сыӵе дыръёсы Удмурт Республикалэн нимыныз огкылъёс но тупанкылъёс вылэ гожтӥськыны быгатэ.
2) Удмурт Республикаысь Кун Кенешен ӵош пусъе Удмурт Республикалэсь кунпуш политиказэ;
3) Удмурт Республикаысь Кун Кенеш азьын республикаын югдур сярысь арлы быдэ доклад лэсьтэ, Удмурт Республикаысь калыклы вазиськонъёсын пота;
3.1) Удмурт Республикалэн катрадлыкез вылэ инъяськыса, Удмурт Республикалэсь Правительствозэ кылдытэ но Удмурт Республикалэсь Правительствозэ лэзён сярысь решение кутэ.
4) Удмурт Республикалэн Правительствоеныз кивалтэ;
4.1) Удмурт Республикаысь Кун Кенешлы арлы быдэ Удмурт Республикалэн Правительствоезлэн быдэстэм ужез сярысь но Удмурт Республикаысь Кун Кенешен пуктэм ужпумъёсызъя отчётъёс лэсьтэ.
5) Удмурт Республикалэн Правительствоезлэн но солэн Президиумезлэн кенешонъёсаз тӧро луыны быгатэ;
6) Удмурт Республикаысь Кун Кенешен кылтупатыса, Удмурт Республикалэн Правительствоезлэсь Тӧрозэ, Удмурт Республикалэн Правительствоезлэн Тӧроезлэсь воштӥсьёссэ, Удмурт Республикаысь коньдон ужпумъёсъя министрез интыуже юнматэ;
7) Удмурт Республикаысь кун властез, Удмурт Республикаысь Правительство бордын ужась, быдэсъясь ёзэсъёсын кивалтӥсьёсты, Удмурт Республикаысь кун властьлэн музон быдэсъясь властьёсынызы кивалтӥсьёсты интыуже юнматэ но мозмытэ, Удмурт Республикаысь кун властьлэн быдэсъясь ёзэсэз бордын ужась кивалтӥсьёссты, Удмурт Республикалэн Тӧроезлэн но Правительствоезлэн Администрациеныз кивалтӥсез лыдэ басьтытэк;
8) Удмурт Республикаысь Кун Кенешлы Удмурт Республикаысь кун властьлэн быдэсъясь ёзэсъёсызлэсь сӧзнэтсэс ӵектэ, Удмурт Республикаысь Кун Кенеше сое воштонъя дэмланъёссэ сётэ;
9) Удмурт Республикаысь кун властьлэн быдэсъясь ёзэсъёсызлэсь структуразэс пусъе;
10) Удмурт Республикалэн Тӧроезлэн но Правительствоезлэн Администрациезлэсь структуразэ юнматэ;
11) Удмурт Республикалэн Правительствоезлэсь Тӧрозэ, Удмурт Республикалэн Правительствоезлэн Тӧроезлэсь воштӥсьёссэ, Удмурт Республикаысь коньдон ужпумъёсъя министрез интыужысьтызы мозмытэ;
12) Удмурт Республикалэн Правительствоезлэн Тӧроезлэсь, Удмурт Республикалэн Правительствоезлэн Тӧроезлэн воштӥсьёсызлэсь, Правительстволэн мукет ёзчиосызлэсь ужысьтызы ас мылкыд каремзыя мозмытон сярысь куронъёссэс быдэстэ;
12.1) Удмурт Республикаысь кун властьлэн быдэсъясь ёзэсъёсызлэсь Удмурт Республикаысь кун торлыклэн мукет ёзэсъёсынызы ужанзэс тупатэ но, Россия Федерациысь катрадлык вылэ инъяськыса, Удмурт Республикаысь кун властьлэн быдэсъясь ёзэсъёсызлэсь федерал властьлэн быдэсъясь ёзэсъёсынызы но соослэн улосвыл ёзэсъёсынызы ин тыосысь аскивалтонъя властьёсын но мер огазеяськонъёсын куспазы ужамзэс радъя;
13) федерал катрадлыкен, Россия Федераци но Удмурт Республика куспын огкылъёсын но тупанкылъёсын чаклам учыръёсы Удмурт Республикалэн улосвылаз ужась федерал властьлэн быдэсъясь ёзэсъёсызлы кивалтӥсе юнматыны ӵектэм муртьёс пумысен соглаш луэмзэ яке луымтэзэ вера;
14) Россия Федерацилэн полномочиосаз, федерал властьлэн быдэсъясь ёзэсъёсаз но мукет кунъёслэн улосвылъёсазы Удмурт Республикалэсь ыстэм муртъёссэ федерал катъя юнматэ но мозмытэ;
15) Удмурт Республикалэсь мерлыко кышкыттэмлыкъя кенешсэ, кудӥзлэн инлыкез тупатӥське Удмурт Республикалэн катэзъя, кылдытэ но соин кивалтэ. Федерал катрадлыкъя Удмурт Республикаын мерлыко кышкыттэмлыкез радъясь ужрадъёс кутэ;
16) Удмурт Республикалэсь катъёссэ калыке поттэ, соос вылэ гожтӥськыса я указъёс поттыса, яке Удмурт Республикаысь Кун Кенешен кутэм катъёсты палэнтэ;
17) Удмурт Республикаысь Кун Кенешлэсь азьло чакламтэ сессизэ люкан сярысь курон пуктыны, озьы ик Удмурт Республикаысь выль быръем Кун Кенешез созывлэн нырысетӥ сессияз, Удмурт Республикаысь Кун Кенешлы со понна Удмурт Республикалэн Конституциеныз тупатэм дырлэсь вазьгес люканы быгатэ;
18) Удмурт Республикаысь Кун Кенешлэн ужаз кенешымон правоен пыриськыны быгатэ;
19) Удмурт Республикаысь Кун Кенеше мерлыко удысэз но экономикаез азинтонъя республиканской программаослэсь ӵекоссэс сётэ.
20) федерал катъёсын тупатэм учыръёсы Россия Федерациысь Конституцияя Судэ вазиське;
21) Удмурт Республикаысь Кун Кенешлы ӵектэ Удмурт Республикаысь Конституцияя Судлы судъясьёсы дэмлам муртъёсты;
22) Удмурт Республикаысь Конституцияя Судэ Удмурт Республикалэн катъёсызлэсь, Удмурт Республикаысь Кун Кенеш пуктэмъёслэсь но интыосын аскивалтон ёзэсъёслэсь нормативной правовой актъёссылэсь Удмурт Республикалэн Конституциезлы тупамзэс эскерон вылысь куронъёсын вазиське;
23) Удмурт Республикаысь Быръёнъёсъя валтӥсь комиссилэн ёзчиосыз пӧлысь ӝынызэ федерал катъёсын но Удмурт Республикалэн катъёсыныз учкем радъя юнматэ;
24) Удмурт Республикалэн Правительствоезлэсь, кун властьлэн мукет быдэсъясь ёзэсъёсызлэсь актъёссэс огдырлы дугдытэ яке воштэ, куке соос Россия Федерацилэн Конституциезлы, федерал катрадлыклы, Удмурт Республикалэн Конституциезлы, Удмурт Республикалэн катъёсызлы, Удмурт Республикалэн Тӧроезлэн указъёсызлы уг тупало.
25) Удмурт Республикалэн кун наградаосыныз пусъе но Удмурт Республикалэсь сӥё-дано нимъёссэ сётэ, федерал катрадлыкъя Россия Федерацилэн кун наградаосыныз пусйыны ӵектэ;
26) федерал катъёсъя, Удмурт Республикалэн Конституциезъя но Удмурт Республикалэн катъёсызъя мукет полномочиосты быдэсъя.
1. Удмурт Республикалэн Тӧроез Россия Федерацилэн Конституциез, федерал катьёс, Россия Федерациысь Президентлэн нормативной актъёсыз, Россия Федерациысь Правительстволэн пуктэмъёсыз, Удмурт Республикалэн Конституциез но Удмурт Республикалэн катъёсыз вылэ инъяськыса но соосты быдэсъяса указъёс но пуктэмъёс поттылэ.
2. Удмурт Республикалэн Тӧроезлэн актъёсыз но Удмурт Республикалэн Правительствоезлэн актъёсыз, соос кутэмын ке полномочиоссыя, Удмурт Республикаын одно ик быдэсъяськыны кулэ.
3. Удмурт Республикалэн Тӧроезлэн актъёсыз, Удмурт Республикалэн Правительствоезлэн актъёсыз ваче пумит луыны кулэ ӧвӧл Россия Федерациысь Конституцилы, Россия Федерацилэн быдэсъяно удысъёсызъя но Россия Федерацилэн но Удмурт Республикалэн валче быдэсъяно удысъёссыя федерал катъёслы, Россия Федерациысь Президентлэн указъёсызлы, Россия Федерациысь Правительстволэн пуктэмъёсызлы, Удмурт Республикалэн Конституциезлы но Удмурт Республикалэн катъёсызлы.
1. Удмурт Республикаысь Тӧролэн правоя актъёсыз, Удмурт Республикаысь быдэсъясь властьлэн ёзэсъёсызлэн нормативной правовой актъёссы Удмурт Республикаысь Кун Кенеше ыстӥсько кык арняскын.
2. Удмурт Республикаысь Кун Кенеш быгатэ вазиськыны Удмурт Республикаысь Тӧролы яке Удмурт Республикаысь быдэсъясь властьлэн ёзэсъёсаз та ёзэтысь 1-тӥ люкетын пусъем актъёсы воштонъёс но (яке) ватсанъёс пыртыны яке соосты воштыны дэмланэн, нош озьы ик быгатэ судэ вазиськыны та актъёсты умойтэмен лыдъян пумысен яке тупатэм радлыкъя вазиськыны Россия Федерациысь Конституцияя Судэ нормативной правовой актъёслэн Россия Федерациысь Конституцилы тупамзы сярысь валэктон сётыны куронэн.
3. Удмурт Республикалэн Тӧроез быгатэ Удмурт Республикаысь Кун Кенеше вазиськыны Удмурт Республикаысь Кун Кенешлэн пуктэмъёсаз воштонъёс но (яке) ватсанъёс пыртон сярысь яке соосты воштон сярысь дэмланэн, нош озьы ик быгатэ вазиськыны судэ та пуктэмъёсты умойтэмен лыдъян пумысен.
1. Россия Федерациысь Президент федерал катэн чаклам мугъёсъя Удмурт Республикаысь Тӧролэнлэн актэзлэсь яке Удмурт Республикаысь быдэсъясь властьлэн ёзэсэзлэн актэзлэсь ужзэс дугдытон учыре Удмурт Республикаысь Тӧролэн правоез вань сояз яке таяз судэ вазиськыны соин поттэм яке Удмурт Республикаысь быдэсъясь властьлэн ёзэсэныз поттэм актлэн Россия Федераци Конституцилы, федерал катъёслы но Россия Федерацилэн калыккуспо вачекыл тупамез сярысь ужпумез быдэстон пумысен.
2. Россия Федерациысь Президентлэн та ёзэтысь 1-тӥ люкетын возьматэм актъёсты дугдытон сярысь указэз ужан вакытэ Удмурт Республикаысь Тӧро но (яке) Удмурт Республикаысь быдэсъясь властьлэн ёзэсэз уг быгато поттыны та ужпумез ик радъясь мукет акт, сыӵе актэз вератэк, кудӥз воштэ Россия Федерациысь Президентэн ужамысь дугдытэм актэз, яке отчы кулэ воштонъёс пыртӥсь актэз.
1. Удмурт Республикалэн Тӧроез аслэсьтыз полномочиоссэ быдэстыны кутске анткыл сётэм дырысеныз.
1.1. Сыӵе учыръёсы, куке Удмурт Республикалэн Тӧроез огдырлы (висеменыз яке шутэтскны кошкеменыз сэрен) ас полномочиоссэ быдэсъяны уг быгаты, соосты огдырлы быдэсъя Удмурт Республикалэн Правительствоезлэн Тӧроез (сыӵе учыре, куке Удмурт Республикалэн Правительствоезлэн Тӧроез уг быгаты Удмурт Республикалэн Тӧроезлэсь огдырлы сётэм ужъёссэ быдэсъяны, соосты быдэстэ Удмурт Республикалэн Правительствоезлэн Тӧроезлэн воштӥсез, кудӥзлы огдырлы сётэмын Удмурт Республикалэн Правительствоезлэн Тӧроезлэсь ужзэ быдэстыны), та ёзэтысь 8.1-тӥ люкетын пусъем учырез лыдэ басьтытэк.
2. Удмурт Республикаысь Тӧролэн полномочиосыз дырызлэсь вазь йылпумъясько таӵе учыре:
1) Удмурт Республикаысь Кун Кенеш оскымтэзэ верамен валче сое Россия Федерациысь Президент интыужезлэсь палэнтыку;
2) со ас мылкыдызъя кошкыку;
3) Россия Федерациысь Президент сое ужысьтыз палэнтыку, куке Россия Федерациысь Президент солы оскемысь дугдэ полномочиоссэ кулэезъя быдэсъямтэеныз сэрен, озьы ик федерал катьёсын чаклам мукет учыръёсы. Россия Федерациысь Президентэзлэн осконзэ ыштонлы инъет луыны быгатэ Удмурт Республикалэн Тӧроезлэн коррупциен герӟаськемез сярысь яке пӧртэм тунсыкъёслэсь вачепумитлыксэс радъямтэез сярысь учыръёс, кудъёсыз федерал катэн катэз тӥян шуыса лыдъясько.
4) сое суд ужаны быгатӥсьтэмен яке тырмыт ужаны быгатӥсьтэмен лыдъяку;
5) сое суд ивортэк ӧвӧлтэмен лыдъяку яке кулэмен ялыку;
6) сое судлэн янгышатӥсь пумкылэз кужыме пырыку;
7) со Россия Федерацилэн палэназ яланлы улыны кошкыку;
8) со Россия Федерацилэсь гражданствозэ ыштыку, кунгож сьӧрысь кунлэсь гражданствозэ яке кунгож сьӧрысь кунын улыны луонлык басьтыкуз, яке мукет ужкагаз басьтыкуз, кудӥз Россия Федерациысь гражданинлы кунгож сьӧрысь кунын ялан улыны право сётэ;
9) со кулыку.
10) Удмурт Республикаын улӥсь бырйисьёс сое ӧтьыку но ужысьтыз куштыку, кудӥз федерал катъя но со вылэ инъяськем Удмурт Республикалэн катэнызъя ортче.
2.1. Удмурт Республикаысь Кун Кенеш, Россия Федерациысь Президентлэн ӵектэмезъя, Удмурт Республикалэн Тӧроезлэсь полномочиоссэ дырызлэсь вазь дугдытон сярысь решениез пуктэ, та ёзэтлэн 2-тӥ люкетысьтыз 1-тӥ, 2-тӥ, 3-тӥ, 9-тӥ, 10-тӥ пунктъёсын чаклам учыръёсты лыдэ басьтытэк.
3. Удмурт Республикаысь Кун Кенеш таӵе учыръёсы Удмурт Республикалэн Тӧроезлы оскымтэзэ вераны быгатэ:
1) со Россия Федераци Конституцилы, федерал катъёслы, Удмурт Республикалэн Конституциезлы, Удмурт Республикалэн катъёсызлы вачепумитлыко актъёс поттыку, сыӵе вачепумитлыкъёс солы тупась судэн шараямын ке, нош Удмурт Республикалэн Тӧроез та вачепумитлыкъёсты ӧз ке палэнты толэзь куспын, судлэн решениез кужыме пырем нуналысен;
2) куке тупась судэн шараямын солэн Россия Федераци Конституциез, федерал катъёсты, Россия Федерациысь Президентлэсь указъёссэ, Россия Федерациысь Правительстволэсь пуктэмъёссэ, Удмурт Республикалэсь Конституцизэ но Удмурт Республикалэсь катъёссэ юн тӥямез, маин сэрен гражданъёслэн правооссы но эрикъёссы тросэн тӥямын ке;
3) Удмурт Республикалэн Тӧроез ас ужъёссэ кулэезъя уг быдэсъя ке.
4) Удмурт Республикаысь Кун Кенешлэн Удмурт Республикалэн Тӧроезлы оскымтэез сярысь пуктэмез кутӥське депутатъёслэн огъя лыдзы пӧлысь кык куиньмос люкетэныз, кичӧлтон сётыны кулэ огъя лыдзы пӧлысь ичизэ одӥг куиньмосэз.
5. Удмурт Республикаысь Кун Кенешлэн Удмурт Республикалэн Тӧроезлы оскымтэез сярысь пуктэмез федерал катъя ыстӥське Россия Федерациысь Президентлы Удмурт Республикалэсь Тӧрозэ интыужезлэсь палэнтон ласянь решение кутон понна.
6. Россия Федерациысь Президентлэн Удмурт Республикалэсь Тӧрозэ ужысьтыз палэтон сярысь решениез кошкытэ солэн кивалтэмез улсын ужась Удмурт Республикалэсь Правительствозэ.
7. Удмурт Республикалэн Правительствоез та ёзэтысь 6-тӥ люкет чакламъя кошкон учыре ужзэ азьланьтэ, Удмурт Республикаын выль Правительство кылдытытозь.
8. Удмурт Республикалэсь Тӧрозэ бырйтыозь, Россия Федерациысь Президент, федерал кат вылэ инъяськыса, Удмурт Республикаысь Тӧролэсь ужъёссэ огдырлы быдэсъясь муртэ пуктэ таӵе учыръёсы:
1) Удмурт Республикаысь Тӧролэн полномочиосыз дырызлэсь вазь дугдытэмын ке;
2) Удмурт Республикалэн Тӧроез ас интыужезлэсь огдырлы палэнтэмын ке;
3) Удмурт Республикалэн Тӧроезлэн полномочиоссэ быдэстон дырыз йылпумъяськемын ке;
4) Удмурт Республикалэсь Тӧрозэ быръён ортчымтэен яке шонертэмен лыдъямын ке.
8.1. Удмурт Республикалэн Тӧроез аслэсьтыз полномочиоссэ быдэстыны уг быгаты ке тазалыкеныз яке мукет югдуръёсын сэрен, кудъёсыз огдырлы люкето быдэстыны Удмурт Республикалэн Тӧроезлэсь полномочиоссэ, соку Россия Федерацилэн Президентэзлэн федерал катъя Удмурт Республикалэн Тӧроезлэсь ужъёссэ огдырлы быдэсъясь муртэ пуктыны правоез вань.
9. Удмурт Республикалэн Тӧроезлэсь ужъёссэ огдырлы быдэсъясьлэн правоез ӧвӧл Удмурт Республикаысь Кун Кенешез лэзьыны, Удмурт Республикалэсь Конституцизэ тупатонъёс сярысь ӵектонъёс сётыны но Удмурт Республикалэн Правительствоезлэн составаз воштонъёс пыртыны.
1. Удмурт Республикалэн Правительствоез луэ Удмурт Республикаысь кун властьлэн ялан ужась вылӥ быдэсъясь ёзэсэз.
2. Удмурт Республикалэн Правительствоез радъя Россия Федерацилэсь Конституцизэ, федерал катъёсты но Россия Федерацилэсь нормативной правовой мукет актъёссэ, Удмурт Республикалэсь Конституцизэ, Удмурт Республикалэсь катъёссэ но Удмурт Республикалэсь нормативной правовой мукет актъёссэ Удмурт Республикалэн улосвылаз быдэсъянэз.
3. Удмурт Республикалэн Правительствоезлэн структураез, сое кылдытон но ужан рад тупатӥсько Удмурт Республикалэн катъёсыныз.
Удмурт Республикалэн Правительствоез ужа, Удмурт Республикалэн Тӧроезлэн ужан дырыз бырытозь, но ас полномочиосызлэсь куштӥське Удмурт Республикалэн выль быръем Тӧроез азьын но аслэсьтыз ужъёссэ быдэсъя, Удмурт Республикаын выль Правительство кылдытытозь.
1. Удмурт Республикалэн Правительствоез Удмурт Республикаын мерлыко но экономика удысъёсты огъето азинтонъя ужрадъёс дася но кутэ, коньдон ужпумъёсын, тодосын, дышетонын, тазалыкез утёнын, мерлыко юрттэт сётонын но инкуазез утёнын огъя кун политикаез быдэсъянэ пыриське.
2. Удмурт Республикалэн Правительствоез:
1) аслаз полномочиосызъя быдэсъя адямилэсь но гражданинлэсь правооссэ но эрикъёссэ улонэ пыӵатонъя, соосты быдэстонъя но утёнъя, асваньбурез но мер радлыкез утёнъя, терроризмлы но экстремизмлы пумитъяськонъя, йыртэманэн нюръяськонъя ужрадъёсты;
2) Удмурт Республикаысь Кун Кенеше сётон вылысь Удмурт Республикалэн бюджетэзлэсь ӵектоссэ дася, Удмурт Республикалэн бюджетэзлэсь быдэстэмзэ радъя, Удмурт Республикаысь Кун Кенеше сётон вылысь Удмурт Республикалэсь бюджетсэ быдэстэм сярысь отчёт лэсьтэ;
3) Удмурт Республикаысь Кун Кенеше сётон вылысь Удмурт Республикалэн Тӧроезлы мерлыко удысэз но экономикаез азинтонъя республиканской программаослы ӵектонъёс но соосты быдэстэм сярысь отчётъёс дася;
4) кылдытэ Удмурт Республикаысь быдэсъясь властьлэсь мукет ёзэсъёссэ;
5) Удмурт Республикалэн катъёсызъя кивалтэ но кузёяське Удмурт Республикалэн асваньбуреныз, нош озьы ик федерал катъёсъя но Россия Федерацилэн нормативной правовой мукет актъёсызъя Удмурт Республикалы кивалтыны сётэм федерал асваньбурен;
6) котькыче пӧртэм асваньбуръёсты возёнэз шонер герӟаса но экономикаын огнын кузёяськонэз быдтыса, луонлыкъёс кылдытэ огъя вузпӧрлы ужаны;
7) быгатэ интыосын аскивалтонлэн ёзэсэзлы, интыосын аскивалтонэ быръем яке интыуже кутэм мукет муртлы соосын поттэм правоя актъёсты Россия Федерацилэн катрадлыкезлы тупамон карон вылысь ӵектон сётыны, та актъёс ваче пумит луо ке Россия Федерацилэн Конституциезлы, федерал катъёслы но Россия Федерацилэн нормативной правовой мукет актъёсызлы, Удмурт Республикалэн Конституциезлы, Удмурт Республикалэн катъёсызлы но Удмурт Республикалэн нормативной правовой мукет актъёсызлы, озьы ик быгатэ судэ вазиськыны;
8) федерал катъя федерациысь быдэсъясь властьлэн ёзэсъёсыныз лэсьтэ асьсэ полномочиоссылэсь оглюкетсэс ог-огзылы сётон сярысь тупанкылъёс;
9) куштэмын;
10) быдэсъя федерал катьёсын, Удмурт Республикалэн Конституциеныз но Удмурт Республикалэн катъёсыныз, озьы ик федерациысь быдэсъясь властьлэн ёзэсъёсыныз Россия Федерацилэн Конституциысьтыз 78-тӥ ёзэтъя тупатэм мукет полномочиосты.
3. Удмурт Республикалэн Правительствоез поттэ пуктэмъёс но радъетъёс.
4. Удмурт Республикалэн Правительствоезлэн актъёсыз вылэ гожтӥське Удмурт Республикалэн Тӧроез яке со косэмъя Удмурт Республикалэн Правительствоезлэн Тӧроез.
1. Удмурт Республикалэн Правительствоезлэн Тӧроез радъя Удмурт Республикалэн Правительствоезлэсь ужзэ но Удмурт Республикалэн Правительствоезлэн ужамез понна кыл кутэ Удмурт Республикалэн Тӧроез азьын.
2. Удмурт Республикалэн Правительствоезлэн Тӧроез:
1) Удмурт Республикалэн Тӧроезлы сётэ Удмурт Республикаысь Правительстволэн Тӧроезлы воштӥсьёслэн, министръёслэн, кун комитетъёслэн интыужъёсазы тӧроосы юнматон муртъёс пумысен ӵектонъёс;
2) Удмурт Республикалэн Тӧроезлы дэмланъёс сётэ Удмурт Республикаысь Кун Властьлэн быдэсъясь ёзъёсызлэн структуразыя но Удмурт Республикалэн Тӧроезлэн но Правительствоезлэн Администрациезлэн структураезъя;
3) тӧро луэ Удмурт Республикалэн Правительствоезлэн но солэн Президиумезлэн кенешонъёсазы;
4) Удмурт Республикалэн Правительствоезлэн Тӧроезлэн воштӥсьёсыз куспын ужъёсты люкылэ;
5) Удмурт Республикалэсь Тӧрозэлэн ужоскемезъя Удмурт Республикалэн Правительствоезлэн нимыныз кусыпъёс возе федерациысь быдэсъясь властьлэн ёзэсъёсыныз, Россия Федерацилэн субъектъёсысьтыз быдэсъясь ёзэсъёсын но гожтӥське Россия Федерацилэн субъектъёсысьтыз быдэсъясь властьлэн ёзэсъёсыныз тупанкылъёс вылэ;
6) Удмурт Республикаысь Кун Кенешлэн ужаз кенешымон правоен пыриськыны быгатэ;
7) Удмурт Республикалэн Конституциезъя но Удмурт Республикалэн катъёсызъя мукет полномочиосты быдэсъя.
3. Удмурт Республикалэн Правительствоезлэн Тӧроез радъетъёс поттэ.
1. Удмурт Республикалэн Правительствоезлэн ялан ужась ёзэсэз луэ Удмурт Республикалэн Правительствоезлэн Президиумез.
2. Удмурт Республикалэн Правительствоезлэн Президиумезлэн составез но солэн полномочиосыз тупатӥсько Удмурт Республикалэн катэныз.
1. Удмурт Республикаын правоя судъян быдэсъяське судэн гинэ.
2. Удмурт Республикаын судъёс луо Удмурт Республикалэн Конституцияя Судэз но Удмурт Республикаысь мировой судъясьёс, кудъёсыз ужало Россия Федерацилэн Конституциезъя, федерал конституцияя катъёсъя, федерал катъёсъя, Удмурт Республикалэн Конституциезъя но Удмурт Республикалэн катъёсызъя.
1. Удмурт Республикаысь Конституцияя Суд вить судъясьёслэсь луэ.
2. Удмурт Республикаысь Конституцияя Суд Удмурт Республикаысь Кун Кенеш, Удмурт Республикаысь Кун Кенеше кӧня депутат бырйыны тупатэм лыд пӧлысь одӥг витьмосэз депутатъёс, Удмурт Республикаысь Тӧро, Удмурт Республикаысь Правительство, Удмурт Республикаысь Вылӥ Суд, Удмурт Республикаысь Арбитраж суд, Удмурт Республикаысь Прокурор но интыосын аскивалтон ёзэсъёс вазиськемъя сэрттэ-пертче Удмурт Республикалэн катъёсызлэсь, Удмурт Республикаысь Кун Кенешлэн, Удмурт Республикалэн Тӧроезлэн, Удмурт Республикалэн Правительствоезлэн, интыосын аскивалтон ёзэсъёслэн нормативной правовой актъёссылэсь Удмурт Республикалэн Конституциезлы тупамзэс.
3. Удмурт Республикаысь Конституцияя Суд та ёзэтысь 2-тӥ люкетын пусъем ёзэсъёс но интыуже пуктэмъёс вазиськемъя Удмурт Республикалэн Конституциезъя валэктон сётэ.
4. Удмурт Республикалэн катъёсыз, нормативной правовой мукет актъёс но отысь нимаз валатонъёс Удмурт Республикалэн Конституциезлы тупасьтэмен лыдъямын ке, кужымзэс ышто.
5. Удмурт Республикаысь Конституцияя Судлэн структураез, сое кылдытон рад, солэн ужан радэз но полномочиосыз тупатӥсько Россия Федерацилэн Конституциеныз, федерал конституцияя катъёсын, федерал катъёсын но Удмурт Республикалэн соосъя кутӥськись Конституциеныз но катъёсыныз.
6. Удмурт Республикаысь Конституцияя Судлы уксё висъяське Удмурт Республикалэн бюджетысьтыз но со окмымон луыны кулэ, правоя судъянэз тырмыт но нокин пыриськытэк быдэсъян понна.
1. Удмурт Республикаысь мировой судъясьёс Удмурт Республикаысь огъя юрисдикци судъясьёс луо но Россия Федерациысь огъя суд сӧзнэтэ пыро.
2. Удмурт Республикаысь мировой судъясьёслэн полномочиоссы, ужан радлыксы но Удмурт Республикаысь мировой судъясьёслэсь интыужъёссэс кылдытон радлык тупатӥське Россия Федерациысь Конституциен, федерал конституцияя катэн, федерал катэн, нош Удмурт Республикаысь мировой судъясьёсты юнматон но соосты ужатон радлык тупатӥське озьы ик Удмурт Республикалэн катъёсыныз.
Удмурт Республикаысь Кун Кенеш но Удмурт Республикалэн Тӧроез Удмурт Республикаысь Прокуроре юнматоно муртэз кылтупатъяло федерал катэн но Удмурт Республикалэн соя кутӥськись катъёсыныз тупатэм радъя.
1. Удмурт Республикаысь адвокатура адвокат ужен вырись муртъёслэн удысужлыко эрико огазеяськонзы луэ.
2. Адвокатуралэн Удмурт Республикаын ужамез но радлыкез тупатӥське федерал катэн но Удмурт Республикалэн катэныз.
1. Удмурт Республикаын нотариат Россия Федерацилэн Конституциезъя, федерал катъя, Удмурт Республикалэн Конституциезъя луонлык сётыны кулэ гражданъёслэсь но юридик муртъёслэсь правооссэс но кат кулэяськонъёссэс утьыны, кат сётӥсь актъёсын чаклам нотариат ужъёсты Россия Федерацилэн нимыныз нотариусъёс быдэсъяса.
2. Нотариатлэн Удмурт Республикаын ужамез но радлыкез тупатӥське федерал катэн но Удмурт Республикалэн катэныз.
1. Удмурт Республикаысь интыосын аскивалтон луонлык кылдытэ интыен герӟаськем ужпумъёсыз калыклы ачиз кыл кутыса ас кожаз быдэсъяны, муниципал асваньбурез возьыны, уже кутыны но соин кузёяськыны.
2. Интыосын аскивалтон быдэсъяське гражданъёсын мылкыдъюан, быръёнъёс пыр, ас мылкыдзэс мукет амалъёсын меӵак возьматыса, интыын аскивалтонлэн быръем но мукет ёзэсъёсыз пыр.
1. Удмурт Республикаысь каръёсын, гуртъёсын но мукет улосвылъёсын аскивалтон улонэ пыӵатӥське, отысь историез но интыосын кылдэм музон сям-йылолъёсты лыдэ басьтыса.
2. Интыосын аскивалтон ёзэсъёслэсь структуразэс калык ачиз тупатэ.
3. Муниципал кылдытэтлэсь кунгожъёссэс вошъяны луэ Удмурт Республикалэн катэзъя, кудӥз инъяське федерал кат вылэ.
Удмурт Республикаысь интыосын аскивалтонлэсь ёзэсъёссэ кылдытыны катрадлыкъя инъет луо Россия Федерацилэн Конституциез, федерал катъёс, Удмурт Республикалэн Конституциез но Удмурт Республикалэн катъёсыз.
Куштэмын
1. Интыосын аскивалтон ёзэсъёс ас кожазы кузёясько муниципал асваньбурен, кылдыто, юнмато но быдэсъяло интыысь бюджетэз, тупато интыын выт тыронэз но уксё октонэз, быдэсъяло интыен герӟаськем мукет ужпумъёсты.
2. Интыосын аскивалтон ёзэсъёслы Удмурт Республикалэн катэныз сётэмын луыны быгатэ кунлэн куд-ог полномочиосыз, соосты быдэсъян понна кулэ луись ваньбур но уксё висъяса. Сётэм полномочиосты улонэ пыӵатон эскериське Удмурт Республикаысь кун власть ёзэсъёсын.
Удмурт Республикаысь аскивалтонлы оскетлыко право сётӥське суд пыр утиськыны, Россия Федераци Конституциен, федерал катъёсын, Удмурт Республикалэн Конституциеныз но Удмурт Республикалэн катъёсыныз интыосын аскивалтонлы юнматэм правоосты сюбегатыса, кун власть ёзэсъёслэсь кутэм решениоссэс быдэсъямен валче ватсаса быдтэм коньдонэз басьтыны.
1. Интыосын аскивалтон ёзэсъёс, улосвылъёсысьтызы калыклэсь кулэяськонъёссэ лыдэ басьтыса, кун власть ёзэсъёсын валче ужало.
2. Интыосын аскивалтон ёзэсъёс но интыосын аскивалтон ёзэсъёсы интыуже кутэмъёс федерал катъёсъя кыл куто муниципал кылдытэтын улӥсь калык, кун, нимаз адямиос но юридик муртъёс азьын.
Удмурт Республикалэн Конституцияз тупатонъёс пыртон сярысь дэмланъёс сётыны быгато Удмурт Республикаысь Кун Кенеше кӧня бырйыны тупатэм депутатъёс пӧлысь ичизэ одӥг ньыльмосэзлэсь кылдэм депутат группа, Удмурт Республикалэн Тӧроез, Удмурт Республикалэн Правительствоез, Удмурт Республикаын улӥсь ичизэ 50 сюрс бырйись.
1. Удмурт Республикалэн Конституцияз тупатонъёс Удмурт Республикаысь Кун Кенешен яке Удмурт Республикаын ортчем мылкыдъюан пыр кутӥсько.
2. Удмурт Республикалэн Конституцияз тупатон кутэмен лыдъяське, со понна луэмзэс возьматӥзы ке Удмурт Республикаысь Кун Кенеше чаклам депутат лыдысь ичизэ кык куиньмосэз. Удмурт Республикалэн Конституциезлэн нырысетӥ, кыкетӥ но дасэтӥ йыретъёсаз тупатонъёс кутэмен лыдъясько Удмурт Республикаысь Кун Кенешен чаклам депутат лыдысь ичизэ куинь ньыльмосэз куара сётэмъя.
3. Удмурт Республикаын мылкыдъюан ортчытыку, Удмурт Республикалэн Конституцияз тупатон кутэмен лыдъяське, со понна луэмзэс возьматӥзы ке куара сётонэ пыриськемъёс пӧлысь ӝыныезлэсь ятырез мылкыдъюанэ ветлэмъёс сыӵе учыре, куке мылкыдъюанэ пыриськизы ӝыныезлэсь уноез адямиос, кудъёсыз пыртэмын мылкыдъюанэ пыриськисьёслэн списокъёсазы.
1. Удмурт Республикалэн Конституциез кужыме пыре сое нимлыко печатлам нуналысен. Соин ӵош ик ужамысь дугдэ Удмурт Республикалэн 1978-тӥ арын 31-тӥ куартолэзе кутэм но отчы бӧрысь воштонъёс но ватсанъёс пыртэм Конституциез (Инъет Катэз).
2. Удмурт Республикалэн Конституциез кужыме пырытозь, Удмурт Республикалэн улосвылаз быдэсъяськем катъёслэн но правовой мукет актъёслэн сыӵе люкетсы уже кутӥське, кудӥз Удмурт Республикалэн Конституциезлы пумит уг луы.
3. Удмурт Республикалэн Конституцияз пыртэм воштонъёс но ватсанъёс, соос герӟаськемын ке Удмурт Республикаысь Конституцияя Судлэн полномочиосыныз, кужыме пыро сое кылдытэм бере.