Ойдо мыном, ой, возь вылэ
Сяська пӧлтӥ шудыны;
Ойдо мыном дышетскыны,
Удмурт газет лыдӟыны.
Шулдыр гужем, тылобурдо мадьыку,
Улон капчи, удмурт газет лыдӟыку;
Уӵы маде — тэлез шулдыртэ,
Удмурт газет сюлэмез ик буйгатэ.
Толон кытын меда мадид
Тон, ӵуж уӵы-пӧесы?
Валлян мар ужаса улӥллям
Аслэм удмурт дышетӥсьёсмы?
Льӧмпу сяська усьтӥськем, лэся,
Ойдо садэ шудыны;
Удмурт дышетӥсь лыктэм, лэся,
Мыном дышетӥськыны.
Шундыед ӧй ке ӝужасал,
Югытэз ку адӟысалмы?
Удмурт дышетӥсь ӧй ке лусал,
Асьмеос ку сайкасалмы?
Буртчин пояс нуллысал но,
Ӧй вал мынам басьтэмез;
Дышетскыны ветлысал но,
Ӧй вал удмурт дышетӥсь.
