Асьмелэн но улэп суредмы (кино картинкамы) вань ини. Туэ гужем «Межрабпом Фильм» шуса нимаськись общество, асьме удмурт областямы кык толэзьлэсь но кемагес улэп-суред лэсьтыны тус-буйёс шуккыса, басьтыса ветлӥз. Тазьы областямы ужаса, быдэсак быдтэмез луымтэен, табере со, со картинаез Москваын, аслаз фабрикаяз быдэстэ ини. Кыӵе мынэ солэн та дыръя со ужез, мон али кызьы вераны умой уг тодӥськы на. Озьы ке но, табере та ужез, со быдтӥз дыр ини шуса малпасько. Солэсь та ужзэ, асьме Иж карын но ӝоген адӟомы дыр ини, шуса малпасько.
Та бадӟым ужез куамын вить мурт артистъёс собере одӥг визьнод кенешчи (консультант) ужазы. Таос пушкысь кызь витез пиосмурт, дасэз нылкышно, ваньзы ик Москваысь вал. Визьнод кенешчи та статьяез гожъясь мурт вал. Та ужасьёс, ваньзы ик асьсэ ужзэс калык пӧртэм устоесь тыршыса ужазы. Суредъёссы тужгес ик чебересь, ӟечесь мед потоз шуса, асьсэзыс асьсэос одӥг но жалятэк тыршыса ужазы; ужан нуналъёссы но туж кельшылӥзы. Соин тӥни та улэп-суредмес мон туж чебер луыны кулэ шуса витисько.
— Кыӵе, мар сярысь, мае возьматэ — шуса юады ке, верало.
Нимыз солэн ӟуч сямен веран дыръя: «Соперницы» луэ, асьме удмурт сямен веран дыръя нош — «Вожмаськисьёс». Кооперацилэсь узыр муртэн нюръяськемзэ но вормемзэ, собере со узырлэн нылызлэсь кооперация тӧролэн Тутыгыш нимо нылыныз одӥг туж визьмо, йӧно, кооперация уж бордын тыршыса ужась Ядӥгар нимо пи понна вожмаськыса пумитаськемзэс возьматэ. Таосын валче (уртче) ик со асьме удмурт калыклэсь улэм-вылэмзэ но туж трос возьматэ.
Нырысь ик отысь шундыё куазен синучкон кадь учкыны луонтэм, чиляса, пиштыса кошкись бадӟым Камез но, со Камлэн меӵ гурезьёсысьтыз инме калляськем кадь, сьӧд нюлэсъёсыз адӟиськод. Собере со Камлэн шортӥз чебер, тӧдьы юсьлэн ву вылтӥ уяса кошкемез кадь, бераз бадӟымесь тӧдьы тулкымъёс кельтыса кошкись паракодэз адӟод. Со паракод нош сьӧраз одӥг узырлы пыжен (баржаен) вуз (товар) нуэ. Сое Сарапул округын но Сарапулын лэсьтӥзы.
Тавар вуэм бере, узырлэсь со таварен шумпотыса вузкаремзэ, кооперациялэсь нош вузан вузэз ӧвӧлӥсь кайгыремзэ; узырлэн Италмас нимо, нылызлэсь кооперациез мыскыллямзэ; собере кооперация пӧрмытӥсь куанеръёслэсь одӥг жресь вӧсясен но, солэн Ядӥгар нимо пиеныз вуз басьтон понна, вань кутылэм пӧйшур куоссэс вузаны огазе люкамзэс адӟод. Отӥяз Тутыгышлэсь со пӧйшур куосын чугын сюрес вылэ пуксьыса Иж каре вуон нерге, жуликъёслы луса, Москвае вуэмзэ; отын со куосыныз аслыз кулэ вузъёс басьтыса ӟечак дораз вуыса, кооперацилэсь узырез вормемзэ адӟиськод. Соку ик, Италмаслэн одӥг ведӥнен валче Ядӥгарлэсь йырзэ берыктын турттыса курадӟыкуз, йырыз кион капканэ сюрыса кулэмез но возьматэмын. Та сяна, та улэп-суредын ӧтчамын (сходкаын) но, вӧсяськонын но калыклэсь ог люкетсэ узыр пала, ог люкетсэ кооперация пала луса куспазы жугиськыны вуымон даулашемзэс (тышкаськемзэс), пересь вӧсясьлэсь инмар ӧвӧл шуса, пуртсэ сэрпалтыса куштэмзэ, пиналъёслэсь шудон ползэс, шайтан уллянзэс, аракы пукемзэс адӟиськод. Быдэсак, вакчи кылын верано ке, та улэп-суред пыртӥ асьме удмурт калыклэсь вань улэм-вылэмзэ ик адӟыны луоно шуыны луэ.
Соин тӥни та улэп-суредмы асьмелэн туж паймоно кадь уж луэ. Асьмемыз табере быдэс дунне вылысь калыкъёс тодозы, асьмелэсь кыӵе вылэммес ас синмынызы адӟозы. Та дырозь нош асьмемыз туж тросэзлэн тодэм-адӟемез ӧй вал на. Адӟем гинэ ӧвӧл, кылэмзы но ӧй вал на. Табере нош кыӵе улэм-вылэммы быдэс дуннеысь калыкъёслэн син азязы пуксёз ини.