Фазыл Мәржәниҙең мәрҫиәһе. 9-сы өлөш. М.Аҡмулла

← 8-се өлөш

Фазыл Мәржәниҙең мәрҫиәһе* (9-сы өлөш) Автор: Мифтахетдин Аҡмулла (1831—1895)

Урыным — зиндан →

ҠАРА: Йөкмәтке. Сығанаҡ: Әхәт Вилданов. Аҡмулла. Шиғырҙар. — Өфө: Башҡортостан китап нәшриәте, 1981. — 224 бит.  

9-сы өлөш

Ул ине — ҡояш бәдиғтән¹¹⁸,
Нуры — йәшендәй ләмиғтән¹¹⁹.
Ғали, шанлы мөназиғтан¹²⁰ -
Жөда¹²¹ булдыҡ, дәриға, аһ!

Уның шөһрәттә ғонуаны¹²²,
Мөхәҡҡаҡ¹²³ дөррә¹²⁴ Мәржәни,
Хаҡлыҡ ғилеменең кане¹²⁵ -
Жөда булдыҡ, дәриға, аһ!

Мәрҫиә яҙҙым мин бисара,
Үткерлеген ҡылып сара,
Был саҡта юҡ уға сама -
Жөда булдыҡ, дәриға, аһ!

Уның үлеүенә пиштәр126,
Көйөндө барса дуҫ-иштәр,
Троицки мөдәрристәр -
Жөда булдыҡ, дәриға, аһ!

Уның камилына ғонуан
Тәсанифе асыҡ борһан¹²⁷,
Басирәтте асыҡ ҡылған -
Жөда булдыҡ, дәриға, аһ!

Ҡасан ул зат китеп барҙы -
Ҡазан күрке китеп ҡалды,
Һәммә әһбаб етем ҡалды -
Жөда булдыҡ, дәриға, аһ!

Уның мәдехе сикһеҙҙер,
Дағстан, Һиндта иҫәпһеҙҙер,
Минең мәдехем йәпһеҙҙер -
Жөда булдыҡ, дәриға, аһ!

Өҫтөнлөгө — зирәклектә,
Камиллыҡ — аҡһөйәклектә,
Оҫта теле — гүзәллектә -
Жөда булдыҡ, дәриға, аһ!

Әңгәмә, йыйған хәбәр,
Асыҡлаған күпме серҙәр,
Асып һалған күпме пәрҙә -
Жөда булдыҡ, дәриға, аһ!

Сафый Алла рухы һаман,
Хурлыҡ ғәфү илә ғофран¹²⁸,
Айырылыуға йөрәк һыҙлай -
Жөда булдыҡ, дәриға, аһ!

Ярҙам ҡылһаңсы, я рабби,
Үҙем байғош, атым арыҡ,
Ҡазан ҡалаһына барып -
Күрә алманым, дәриға, аһ!

Илаһым, бөтә хәжәтем,
Ҡабул иткел мөнәжәтем,
Ҡәбәхәт барлыҡ халәтем¹²⁹ -
Түҙә алманым, дәриға, аһ!

Уны маҡтауға мин ғәҙеб¹³⁰
Ҡаҙаҡса бер бәйет яҙып
Тараттым йортҡа мин, таҙ эт -
Жөда булдыҡ, дәриға, аһ!

---

Аңлатмалар

Аңлатмалар автор хоҡуҡтары менән һаҡлана. Уларҙы Башҡортостан Республикаһының милли электрон китапханаһына ҡуйылған Әхәт Вилданов. Аҡмулла. Шиғырҙар. — Өфө: Башҡортостан китап нәшриәте, 1981. — 224 бит. китабында уҡығыҙ.