Федоров - Кеҥеж мучаш
почеламут
А. Федоров
Вер-шӧрым август йыр ончале,
Пелештыш: «Кушто кистычкем?»
Эн сай чияжым ойырен нале
Да толын лекте пакчашкем.
Эн ончычак кияр лышташым
Шапалдыл ончыш изишак
Да пызлыгичкым, тул аршашым,
Чевертыш. Лие ал пешак!
Ончале август ял шеҥгеке,
Шоналтыш: «Мом эше ышташ?
Тошкале кече шыже велке –
Мотор лиеш куэ лышташ».
Кодеш ужаргак кожын лӱсшӧ.
Тӱҥале август чиялташ –
Вашталте ялт кундемын тӱсшӧ
Йомак сӱрет гаяк йырваш.