Чард би
Вӧлі зэв жар гожся лун. Видзьяс вылын удж пуӧ. Турун ытшкан да кӧть пыр и курт. Шонді би моз сотӧ. Лӧнь, некутшӧм тӧв абу. Весиг лэбачьяс оз кывны, чиркъяс дугдісны сьывны. Рытладор лунвывсянь гымалігтырйи кутіс локны сьӧд кымӧр. Надзӧникӧн лыбис тӧв. Ужалысьяс повзисны, мӧдісны котравны. Вермасны кӧ эськӧ, ӧтчыдӧн курыштасны ставсӧ. Сьӧд кымӧр ӧтарӧ матыстчӧ. Гымалӧм шы пыр содӧ. Сэсся кымӧр шондіӧс тупкис. Друг мӧдіс ызгыны ведраысь моз зэр. Йӧз повзис. Куранъяс шыблалісны, кытчӧ кодӧс зэр суис, да котӧрӧн кобувъясӧ. Миян вӧлі асланым видз дорын кола. Уджалысьяс ставным чукӧртчим да мӧдім шензьыны: «Аттӧ, шуам, тайӧ зэр, кутшӧма торкис йӧзтӧ». Полігтырйи олам. Гымыштӧм шыысь кола быдӧн вӧрзьывлӧ. Пӧрысь йӧз вомгорулас вашкӧдӧны-лыддьӧны: «Сьват, сьват, Господь, Илля великӧй, батюшко, дугды повзьӧдлыныд». Дугдывтӧг югнитӧмӧн гымыштӧ, ывлаӧ видзӧдлыны он лысьт. Тӧв шувгӧ. Он нин чайт помсӧ воліг.
Регыд кобис. Йӧз быттьӧ ловзисны. Чеччыштісны да ывлаӧ. На бӧрысь ме тшӧтш петі. Кодсюрӧ уськӧдчисны пестыны би.
— Нолтӧ, — кодкӧ кылӧ шуис миян пытшкысь: — кывзылӧй жӧ, оз-ӧ звӧн шы грездсянь кыв.
Би пестӧм эновтім. Ӧти морт котӧртіс ю дорӧ. Ю вӧлі матын. Шуӧны, ю кузя пӧ шы ёнджыка кылас. Сідзи и эм: звӧн шы кылӧ. Грездын кодӧскӧ сир шог суис. Йӧз вӧлӧн и подӧн тэрмасьӧмӧн мӧдісны сиктӧ. Ми кымынӧнкӧ кольччим. Грездӧдз бура ылын дай кадыс нин сёр. Шогсигтырйи, нинӧм тӧдтӧг водім узьны. Аски асывнас йӧз локталісны бӧр, висьталӧны: грездӧ пӧ лыйӧма чардби зэр дырйи да куим керка пыр мунӧма. Ӧтиын нинӧм абу керӧма, мӧдын укват пу чегӧма, коймӧдын кӧзяйкасӧ виӧма. Сійӧ, вӧлӧм, видз вывсянь сӧмын пырӧма, локтӧма идрасигмоз няньла, пыригмозыс и инмӧма чардбиыд. Коньӧр сэтчӧ и кулӧма. Керкаыс ӧзйӧма. Кутшӧмкӧ бур морт удитӧма петкӧдны би пиысь шойсӧ. Лэдзӧмаӧсь звӧн. Недыр мысти эськӧ и локталӧмаӧсь йӧзыд да, сёр нин вӧлӧма. Керкаыс пӧ ставнас нин ыпайтӧ.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1963 году, соответственно эта работа выйдет в России в общественное достояние в 2034 году.
The author died in 1963, so this work is also in the public domain in countries and areas (outside Russia) where the copyright term is the author's life plus 60 years or less. |