Чибориё, чибориё
Сьӧд кашамер кышетэ.
Сьӧд синкашо, ӵыжыт бамо
Яратоно туганэ.
Бызьса туби кызьпу йылэ
Тӧдьы кызьпу туй понна.
Бызьса васьки кызьпу йылысь
Сьӧд синкашо ныл понна.
Эмезьпу пӧлы пырид ке,
Чидалод-а сиытэк?
Гажанэныд люкиськыкуд
Чидалод-а бӧрдытэк?
Эмезьпу пӧлы пыри но —
Мон ӧй чида сиытэк.
Гажанэным люкиськи но —
Мон ӧй чида бӧрдытэк.
Кыӵе потэ, кыӵе потэ
Эмезен чай юэме.
Кыӵе потэ, кыӵе потэ
Ас туганме адӟеме.
Эктыны ке мон потӥсько,
Бурзэ пыдме лёгисько.
Сизьымзэ яратӥсько но
Огез понна бӧрдӥсько.
Ульча кузя курег ваське,
Кытчы пыром шуыса.
Солэн сьӧраз атас ваське,
Зӥбо, зӥбо шуыса.
