Пици-палакст/Чись лись
ЧИСЬ ЛИСЬ
I
Судонзо кувалт чудесь сельведь. Сакалзонзо ды усазонзо педязь покш эй тулкат.
Чиремкшнэзь ютась эзембряв, каизе ланкстонзо шубанзо, озась столь экшэс — думазевсь. Кувать думась. Месть — ки соды. Кодамо дурак прев а моли ирецтэнь пря поц. Друк — сыргойсь. Прок кияк пукшос уросо нерькстызе. Кепедизе прянзо и варштась кудонть перьк. Пецька ланксо сыре тетязо ашти мадезь, прок согом. Пельс палозь пипказо чинек-венек курксонзо: поти табак качамонть, паметэнзэ маштомс. Седой усонзо истя коптявсть табак качамосонть — тюжалгацть, тюжалгацть — морязь мушконь понас паншсть.
Пецька икеле, вальмало, ашти озадо кемготово иесэ тейтерезэ — Лиза, цюлкат коды. Варка, низэ, кудосо арась.
Захаронь кежензэ састь.
— Лиза, косо ават?
— А содан, тетяй; ков бути лиссь аумок...
Лизань седеезэ сормавсь куцяс. Авазо туемстэ эзь мере ёвтамо, ков сон тусь. Ва ней тетязо чавоманзо карми маньшиманть кис.
— Тон, гуй левкс, содат. Авать жалят, секс а ёвтат... мон кедеть валтаса маншиманть кис...
Лизань седеесь не валтнэде мейле седеяк сормавсь. Содасы тетянзо обуцянть парсте — сон а й‘ашти кедь ланксо.
— А содан, тетяй, — салава лацо мерсь Лиза, чекась-покась мик пазава уголонтень; чекась — а эсинзэ потмозо качамодо пешкець: — мелезэнзэ лецть вейке черничкань [ 34 ]валт: «кода сы тона-чись — маньшиманть кис келеть раздясызь кейчкайсэ.»
— Маньшат, шайтян левкс! — сергець Захар ды сырьгась Лиза ёнов. Лиза каткакс кирнавць эземстэнть — секе неевтезэ кудостонть.
Захар пек чиремкшнэзь ютась кудонть келес, прок мезе бути вешнесь: сельмензэ паншть пидень дурак-куяронь понас. Прязо кармась сталгадомо. Удомазо сась. Койкак пачкоць кроватентень ды венемсь лангозонзо.
„Мон тонавца ведьманть!“ — корты Захар эсь прянзо марто кровать ланксо. — Мон, гуляй-скал, спокойс правттан... Монь — кармат ловоман мирдекс...монь...эка — сатана кодамо!.. сат кудов: кедеть синца, эли черь-клок а кадан прязот...эли...эли... — Захарнэнь эзь ёвтавт валось. Матедевсь.
II
Валське паро завторк малав Захар сыргойсь, озась кроватенть ланкс. Варштась вальмаванть: чизэ уш куйсь кавто чувтонь сэрь. Колияк Захар те шкас эзь уце. Кодамо Захаронь пря ёжось — кельсэ а ёвтави. Курго потмозо коськсь, эйстэнзэ мольсь апаро чине, мерят куркань полк тосо удось. Захар варштась кудонть келес. Пецька ланксо тетязо пули пипкасонзо, пецька икеле Лиза тев пряды. Варка арась.
— Лиза, косо ават? — кевстизе Захар.
— А содан. Кода исяк обед шкава тусь...
Лиза таго манизе тетянзо. Сон парсте содасы, ков тусь авазо, а ёвты ансяк: авазо — паро видьганзо, тетязо — секе тев чавносы. Захаронь тетясь пецька ланксонть бизмулгаць.
Вайгелезэ чикорк мольсь, прок каладо кенкш панжовсь. Валтнэнь каи чуросто:
— Мезес пачкодинек... колоньгемень вете иесэ ава чийни, прок паньсевти туво... кудонь тевензэ ланкс ансяк ве сельме крайсэнзэ варшты. Мезес а эряви пеци — цёрань тевс кунци... велень тевть якавты, ки марто понксь прят-пильк путни. Мирдензэ ломанькс а ловсы... Ёмат, Захар, истямо нинть марто... Ливтьтянзат ломаньстэ... Повник валом.
[ 35 ] Атянть моткодимась Захаронь пси вецэ валызе. Стиксэль таркастонзо Захар, — эзь стявт. Ансяк ёзызе удалксонзо кроватентень, прок мекшень пупамодо мейле, ды думазевсь эсь пачканзо:
„Лац корты шайтян атясь... ёмат те нинть марто.“
Но — Захар а невти горянзо:
— Тон, тетяй, оймак! месть пророчат, кода а эряви?.. Адя рест оно пецьканть ланксо, солавт сыре ловажатнень... А тевезэть иля пеце!..
Атясь таго чикорды. Прок подпилкасо эске прят човси:
— Мон, Захар-цёрам, сизьгемень ие эрян мастор ланксо... Ломаненть ушо ёндояк, потмо ёндояк парсте содаса секс... мерян теть: а тукшныть монь мельс Варка-урьванть тевензэ-валонзо... Минек роцонть арасель истямо ломань вейкеяк... Мон пелян, Захар, кабу Варка овси аволь туе кудостонть... Аволинзеть кат овси, цёрам... Виськс чамась кодамо ули. Эх!
Захаронь майшть валонзо. Свистизе кавто кецэ прянзо ды маць мекев кровать ланкс. Удемезэнзэ пшти эскекс сялговсь:
— Ков жо тусь Варка?..
Вальмаванть весёласто вансь тундонь чись.
III
Обед-шкас аштесь Захар мадезь кровать ланксо. Лиза умок уш тевензэ прядызе, ялганзо марто налксеме тусь. Тетязо пецька ланксо удось.
Ламо думась Захар. Стакальть не думтнэ. Весе икелень эрямось ютась икельганзо. Течемс повнясы се мазы шканть: Варка — од тейтерь, сон — од цёра. Эрьва чокшнэ некшнэсть вейкест-вейкест. Вейс вастума таркаст ульнесь каль-пуло, ведь чиресэ. Пароль се таркась. Кияк а мешиль тенст.
Повнясы Захар — састь урьвакстома иензэ. Тетятне-аватне кармасть тензэ ни вешнеме. А Захар уш умок приметизе кинь саемс. Повнясы сон, субутань чокшнэ ульнесь. Варка марто озасть каль пулонтень. Захар, седеень чавозь, кортамо кармась:
— Варка, монь урьвакстома шкам сась...
[ 36 ] — Те — паро... карматано теть нинь вешнеме, — мерсь Варка прянь нолдазь.
— Мон, Варка, умок уш муинь...
— Кинь?..
— Вана кинь. — Захар каподизе Варкань пеке нучк ды кармась палсиманзо. Варка эзь деря каршозонзо. Сынст рунгост плетявсть вейс кеместэ-кеместэ...
Кемгавксово ие ютась, кода сынь эрить Варка марто ве кудо поцо. Не иетне ютасьть прок ардозь — эсть марявткак пек. Эрясть парсте. Пек эсть сёвнокшно. Эрьсекшнэсть апокшт сёвнумат Захаронь винадо симеманть кувалт, сетькак аволь пек сеецтэ.
Ансяк революциянть сисемце иеде мейле Варка марто Захаронь юткова ютась раужо катка.
Тевесь истя лиссь. Сась весть велентень ошсто ава кодамо бути. Черензэ наразь, тарги попиросто.
Пурныньзе аватнень промксос. Кувать баснесть те промкссонть ава-ломатне. Меельсь пелев кочкасть авань комитет. Прявтокс — тевень ветицякс кочкизь Агий Анкань. Кода велень цёратне ды атятне марясть те комитеттэнть ды сонзэ прявттонть — дивадо пешкецть:
„Кода истя? Мень комитет? Ней Агий Анка карми улеме начальникекс? Те гуляи-скалось, кона уш колмо мирть каць? — Те лытка-панксось ней карми велень тевс пецеме?..“
Пек ацирьгалесть атятне. Но мезе теят те пингень поряткатнень марто. Авань комитетэсь кармась куть ков робутамо. Агий Анка куть-ков ломанькс велявць. Авань тевтненень оймензэ пуць.
Захар васня те комитетэнть ланкс эзь варшнеяк. Но кода Варказо кармась клубов якамо, сестэ Захар кармась дубушки стякшномо. А Варка чиде-чис яла лиякстоми. Ловномо аламодо майшсь. Кармась кудов кинигань ды газетэнь кантлеме. Стясь Захаронь кудозо прянзо ланкс: Варка карми пурнамо авань промксов, Захар а нолды. Варка а кунсолы — Захар турьгады. Захар ламоксть чавнызе Варкань — верьс поркснилизе. Аволь весть тертнизь Захаронь велень советэв. Кода остаткадо тертнизь улко, председателесь Захарнэнь судозонзо чавсь:
— Бути, Захар, эщо весть чавсак Варкань, минек ланкс мейле иля пеняця: пекставттадызь тюрьмас, Варкань явцынек эйстэть...
[ 37 ] „Азё вана кортак мартост. Кодат анахимань закот тусть.“ Захар стакасто укстась, а удемсэнзэ истяк и аштесь, сялгозь: „Ков жо тусь Варка? Илямам кат овси — ёмат мейле!“
Захаронь думтнэ ланкс совась васолсе шабразо Игнатей. Аламнеде ирецтэ.
— Захар, тон а содат мейсь мон сынь?...
— А содан, Игнатей...
Озасть кавонест столь экшэс.
— Тон аздат ков тусь Варка-бабат?
— Шайтят, брат, содасызь! Чинь-чоп думинь теде... превеньгак майшть...
— Монь ведьмаськак ёмась... Оргоць Орина-баба...
— Оринаяк арась кудосо?... — Захар сельмензэяк тетькинзе.
— Тон думик ансяк, Захар, ков тусть минек бабатне...
— Ков, Игнатей?
— Ошов шайтят кандызь!
— Ошов?... Мень сельме эрьгест тува вешнить?
— Иля кортаяк, Захар. Маринь, мень бути авань промкс тозонь пурнавсь... лемезэ пек мудрёна — а ёвтаввияк тень...
— Тук трисподни, Варка! Эка сисемь велень сука! На вана, те ансяк арасель... Ней весе велесь пеицамам!...
— Ну, Захар, макссь тенек пазось нить... Монь, кемат а кемат, прянь повамом сась Орина марто. Сурсо а маштуви токамс сатанась: сеск милициясо карми тандавтнеме.
— Моньгак истя, Игнатей: кудонь кадумам сась... Тон думика, Игнатей, амарямонь закот тусть: эсь нить ланксо иля тейне покшокс, паро превть тензэ иля путо. Прязот пизэ теить секень вант, тон яла каштмольть. Наксадо пиксэкс сезевемаль истямо правань нолдыцятнень.
— Иля кортаяк, Захар.
Кавто шабрат стакасто укстасть.
— Игнатей, тон аздат, ки тенст макссь лишме?
— Содазь уш ки: председателесь, Ёрошка... Сон мартост месть бути мухлюви...
— У те гуйсь — Ёрошка. Калонь сардокс ашти монь седейсэ. Кода ансяк сонзэ прянть сеземс чопуда таркасо?
[ 38 ] — Да, те стака даулось тонавтумка... косто вана кундамс аздан.
Захар марто Игнатейть думазевсть, кода тонавтомс Ёрошканть.
IV
Ютасть кавто чить. Сась колмоцесь. Варка арась. Прок вець ваясь. Захаронь седейсэ кискат раздить. Кодамояк робутас кундамозо а сы, мезеяк ланкс аволь варшта. Яки кардазганть прок пряс вачкодезь сараз. Кудов аволь соваяк: тетядонзо эрямозояк майшь: чинь-чоп чикорды пецьканть ланксо, прок ношка пиласо пили Захаронть седеенть эйсэ.
Чокшнэ ёнов сась таго Игнатей. Ней аволь ирецтэ. Озасть кавто шабрат орта-ланкс. Тейсть таргамс. Кувать каштмольсть. Кортамкатне аламольть. Горяст вейкеть.
Игнатей чалгизе пильгензэ алов цигарка пенть, сялгинзе сельмензэ модантень ды кармась кортамо:
— Мон диван, Захар, мезень паронть неить минек нитне те авань комитетстэнть?..
— Причат, брат, содасызь! Мерят, прок метте андыть тосо эйсэст. Зяро яжинь Варка-бабань: прок, ай, чувц кедень чавинь!.. Мезеяк мартонзо эзинь теевть.
— Истя, Захар, стака чаркодемс миненек неень эрямотнень... Тон ванта од ломатне ланкс, аволь минек лацо касыть: церькувасто вейке од ломань а неят... весе клубов пря чавить... Аватнеяк мельгаст кармасть усковомо... народонь превтне кармасть велямо ведьгев чары лацо, чи пас!
— Мон, Игнатей-брат, истя думан: ней эрямотне пек лиякстомсть, — молить яла икелев, а минь, ташто пингень ломать, нать, кадовинек удалов... Коли уш аватне мик кармасть од эрямонть чаркодеманзо, нать сон паро... Миненек думамка тень коряс седе кеместэ!.. думамка, Ига.
— Лац кортат, Захар. Но саик сень пря потмозот: карминьдеряй цёрась нинзэ тевтнень коряс тонавтнеме лия превсэ эрямо, — ёмат виськс поц. Ёмат, чаркодить?..
— Чаркодинь, Игнатей, умок мик... но...
— Лият аместь тейнемс, мерят, Захар?
— Да, Игнатей...
Кавто шабрат раздизь човонест и думазевсть. Те шкастонть Захаронь кудонть икелев арць дрошкасо алаша. Шабратне кепедизь пряст. Дрошкатне эйстэ [ 39 ]пейдезь валксь Варка. Кецензэ цела топо-мешок мень-бути рамсевкст. Захар кодак неизе Варкань — истяк прок паметэзе майшсь; кодамо теевсь ёжозо — сонськак эзь сода: кежензэ састь эли пек радувась. Седеезэ кармась якамо часонь маятник лацо. Думась ёвтамо „ава лемь,“ лись лиякс:
— Варка, сыть нать?..
— Сынь, сынь... Небось уш тошнакадыть мельган, прок одирьва мельга.
— Аволь тошнакадынь, Варка. Содык тонсь, пек а мазыйстэ теить.
— Тонть марто лиякс акода. Парсо колияк аволимек нолда ошов.
— Варка, монь ведьмась эзь са мартот?
— Сась, сась. Азё палык... Гостинецть ламо усксь.
Игнатей эщо эзь карма кевкснеме. Од цёракс ношкстась кияванть.
Захар марто Варкат совасть кудос. Атясь пецька ланксто чикоргаць.
— Сась нать беглоесь...
Варка весёласто:
— Аштек, тетяй, иля мурне аламос... Ваныка кодамо теть туинь гостинеценть...
— Истя мезе, урьвине?
— Од пипка теть ускинь ды хунт паро табакт...
Атянь памет майшь. Кияксос валксь аволь валгозь, — празь-прась, сорны кецэ саинзе питней гостинецнень.
Ламо кой-месть рамась Варка: Захарнэнь од панар, Лизанень материя платиякс, пеншт, вакат...
— Косто саить ярмакнэнь, Варка? — кевстизе Захар.
— Косто саинь мерят? Сядо ал миинь ошов... ды суточнойть получинь конференциястонть...
— Эка гуят, Варка, — паро мельсэ мерсь Захар.
Варкань седеезэ оймась. Оргодеманть кис учось чавома, лиссь лиякс.
Чокшнэ, кода мацть таркас, Варка кувать ёвтнесь Захарнэнь, кода сон эрясь ошсо, кода робутась авань промксось, кода сонзэ, Варкань, кочкизь президиумс ды озавтызь уездной исполкомонь председателенть ваксс. Весёласто ёвтнесь Варка. Кунсолось Захар и мельс [ 40 ]пародо пешкець, мекс сонзэ нинзэ ловсызь паро ломанькс, сонсь уездэнь прявтось мери тензэ „ялгай“.
— Ну, Варка, — чевцтэ корты Захар, — эрямом саикшнык. Кавто чис знярошка седей ризнэмка ульнесь — а ёвтавияк!
— Месть плетят, Захар? — акемезь мери Варка.
— А плетян, Варка, тетянь эйстэ кудонь кадомам сакшнось. Секень мери — Варка оргоць эйстэнь. Ладна уш мейле Ига сась, горянзо ёвтнизе, кавнек седе весёла ульнесь.
— Истя самай эряват, седе превиямо кармат.
— Мон, Варуж, превиинь уш, не кавто читне пек сорновтымизь, пек...
Не валтнэде мейле Варка велявць Захар ёнов, састо дроцизе сакалдо ды мерсь:
— Эка, сырьнень покольнем...
Сизесь тече Варка. Секс эзь фатяяк, кода матедевсь. Ансяк Захарнэнь эзь педя удомась. Аштесь сон венемезь Варка вакссо ды думась:
— Алац кортась течи Игнатей. Кода нись чалги паро ки ланкс, сестэ мирдентеньгак а виськс туемс сеть слетнэва. Ки чумось сеть цёратнень кис, конатнень превтне ниньснеде нирькинеть.
Самара, рабфак 1925 ие.