Чужан сиктсянь ме челядьдыр коркӧ...
Чужан сиктсянь ме челядьдыр коркӧ,
Романтизмӧн кор тыра юр садь,
Ылі, лӧз горизонт сайӧ дзоргӧмӧн,
Уна пӧрйӧ ме мӧвпавлі тадз:
Эськӧ вӧлі кӧ мыш сайын борд,
Вына лэбачӧн верми кӧ лоны,
Лэблі эськӧ ме сэтчань кӧть кор,
Паракодъяс кысь тулысын воӧны.
Ставсӧ тӧдмалі, видзӧдлі, эськӧ,
Кутшӧм мӧд сикас, мӧд олӧм сэн.
Весиг чужан сикт эновті веськодя,
Сӧмын вӧлі мед бордъяслӧн шен.
И со мый жӧ? Ми бордъяссим кадӧн,
Воссис ми водзӧ став паськыд мир.
И зэв сы вылӧ талун ми радӧсь,
Мый оз тӧдтӧмлун сьӧлӧмъяс йир.
Но кор думыштан, окота кыдзкӧ
Челядь воясӧс бергӧдны бӧр,
Ӧд пыр ёнджыка асланьныс кыскӧны
Чужан сикт, тӧдса видз-му и вӧр.
Весиг окота овлывлӧ коркӧяс
Ичӧтдырся моз мӧвпалігсор,
Ылӧ, лӧз горизонт сайӧ дзоргӧмӧн,
Мыйкӧ виччысьны тыдавтӧмтор.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1943, so this work is also in the public domain in other countries and areas where the copyright term is the author's life plus 80 years or less (if applicable), or the copyright term is 82 years or less since publication (if applicable). |
|