Чужмӧр нылӧй, Чабанӧй, Чабанӧй!...

by Лыткин Георгий Степанович

Чужмӧр нылӧй, Чабанӧй, Чабанӧй!
Кӧн нӧ тэнад вала туйыд, вала туйыд?
— Менам вала туйӧй
Байдӧг баксан шор дорын, шор дорын.

Чужмӧр нылӧй, Чабанӧй, Чабанӧй!
Кӧн нӧ тэнад песла туйыд, песла туйыд?
— Менам песла туйӧй
Дозмӧр котсян яг дорын, яг дорын.

Чужмӧр нылӧй, Чабанӧй, Чабанӧй!
Кӧн нӧ тэнад турунла туйыд, турунла туйыд?
— Менам турунла туйӧй
Тури чуксан нюр дорын, нюр дорын.

Чужмӧр нылӧй, Чабанӧй, Чабанӧй!
Кодарӧ нӧ видзӧдӧ тэнад керкаыд, керкаыд?
— Менам керкаӧй видзӧдӧ лунлань, лунлань.

Чужмӧр нылӧй, Чабанӧй, Чабанӧй!
Кутшӧм нӧ тэнад оланіныд, оланіныд?
— Менам оланінӧй
Мича-мича ю дор, ю дор,
Гажа-гажа ва дор, ва дор,
Низьыс (вурд) ӧшйӧм лыс моз, лыс моз,
Мойыс пуксьӧм джек моз, джек моз,
Урыс ӧшйӧм коль моз, коль моз.

Чужмӧр нылӧй, Чабанӧй, Чабанӧй!
Мыйӧн нӧ вевттьӧма тэнад керка вылыд, керка вылыд?
— Менам керка вылысӧй
Вевттьӧма шабді дӧраӧн, дӧраӧн.

Чужмӧр нылӧй, Чабанӧй, Чабанӧй!
Мыйӧн нӧ вевттьӧма тэнад кум вылыд, кум вылыд?
— Менам кум вылӧй
Вевттьӧма пыш сӧдз дӧраӧн, дӧраӧн.

Чужмӧр нылӧй, Чабанӧй, Чабанӧй!
Мыйӧн нӧ вевттьӧма тэнад карта вылыд, карта вылыд?
— Менам карта вылӧй
Вевттьӧма пачӧс дӧраӧн, дӧраӧн.

Чужмӧр нылӧй, Чабанӧй, Чабанӧй!
Айыд куліс — тэныд мый колис, мый колис?
— Меным колис сёян бур дозсӧ, бур дозсӧ.

Чужмӧр нылӧй, Чабанӧй, Чабанӧй!
Эньыд куліс — тэныд мый колис, мый колис?
— Меным колис
Роч вый сывдан гырничсӧ, гырничсӧ.