Шиғырҙарым

← Йыуатмағыҙ мине

Шиғырҙарым (Шиғыр) автор Лилиә Һаҡмар

Шиғриәтем →

Ижад итеү ваҡыты: 1978. Йомаш ауылы. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (63-сө бит) ISBN 5-295-03798-3

Шиғырҙарым

Ҡулға ҡәләм алам, шиғыр яҙам,
Шиғыр яҙам – күңел бушатам,
Яҙған һәр бер һүҙҙе, һәр хәрефте
Наҙлы аҡҡоштарға оҡшатам.

Аҡҡоштарым берәм-берәм оса
Күңелемдең яҡты күленән,
Улар осҡан саҡта минең йөрәк
Таңғы еләҫлеккә төрөнә...

Эй, дуҫҡайым, һин дә минең кеүек,
Ҡулға ҡәләмеңде тот әле,
Бәлки, күңелеңдең саф күлендә
Аҡҡоштарың һине көтәлер?!

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар